ما ابغ اطول في الموضوع ولاكن اقللكم في امان الله ونشوفكم على خير ..

انا بصراحة من القدامى والمشاركين في هالمنتدى .. وطول فترة مشاركاتي بصراحة شفت رجال وسعدت بلقياهم واتشرف بمعرفتهم
وفي نفس الوقت شفت ناس اخرى ما تقدر


عموما لاحظت في الاونة الاخيرة كل واحد سار يقللي انت عاطفي مع الامريكي .. والاخر يقللي انت عاطفي مع الشفر واللي اقللي انت متحيز او يجيك واحد ويقللك انت ما تفهم او يقللك اذا رجال اتحداني ويبتدي البعض في الغلط وفي التمادي .. وتوصل المسالة انو البعض اصبح يبعتلي ايميلات شخصية ..

والكثير اصبح يتعنى بوضع مواضيع عشان يحطني فيها على راس المقارنة وفي النهاية غرضه يبن للناس اني كذاب لا سمح الله او منافق او شايف نفسي او او او او .. يعني يبغ يطيح سمعتي في المنتدى باي شكل ممكن ..
والمشكلة اني لقيت كثير من الاناس يساعدوه على هالشي

والكثير من الناس تتعنى ترد في مواضيع اخرى وتجرح مثلا في الامريكي او اي كان وتتعنى تعلق على نقاط انا ذكرتها في السابق.. وكل غرضها ليس الاطاحة بسمعة الامريكي وانما الاطاحة بسمعتي في المنتدى على سبيل اني الوحيد اللي بيحاول اثبت حبي لهالماركة
انا اعترف شفراوي من الصميم ومش معنى كلامي هذا اني ما احب السيارات الاخرى بس انا من الناس اللي احب ابين نقاط ضعف السيارات الاخرى عشان لا يورط فيها واحد ويقول مافي احد قللي او نبهني
وفي نفس الوقت احب اذكر نقاط قوتها كما هوا الحال عشان اتيح لك الخيار ..

والمشكلة اني عندي اثبات مصورة بالصورة والفيديو .. وما اتكلم من فراغ وانا على علم تماما باللي قاعد اقوله .. وكان كل طلبي اني الاقي واحد يثبت عكس كلامي باثباتات

ولاكن لا جدوى مهما عملت .. ومهما فعلت يقللك انت وانت وانت ... الخ
على الرغم اني مدحست في الامريكي وذميت فيه في نفس الوقت الا ما زال الكثير يقللي انت متحيز او متعصب او .... الخ

تعبت ليالي عشان اوصل لمرحلة من الفهم في هالمجال والحمدلله ولاكن لاحظت انو تجيك ناس تتحداك بسيارات ماهي مصنفة من ضمن السيارات .. وقلنا ماشي

توريهم عيوب سياراتهم وفي نفس الوقت تعترف بانها قوة .. يقللك انت متحيز وعاطفي وكلام فاضي ..

يا عمي وكفى الله المؤمنين شر القتال

ولا تقللي مغرورو ولا تقللي ماني فاهم ولا تقللي عاطفي ولا تقللي متحيز او متعصب او مدري ايش ...


رسالة للكل

المنتدى فهو لك .. اشبع به ما شئت ..

والحمد لله اصراري وعزيمتي على اللي في راسي بتخليني ناجح في حياتي

اكبر موضوع في سوالف هوا موضوعي .. وللاسف ما اعتقد اني راح اكمله ومثل منتو شايفين كل الوصلات والصور راح تختفي وحتى صفحتي راح الغيها ..

انا مدري ايش العيب او المشكلة في انو شخص يحقق حلمه ... اعتقد حيكون محط للاحقاد وهذ امن واقع تجربتي هنا في منتدى عربي ...

ولاكن هذي تظل مشكلة العرب .. انهم طول عمرهم ما يتكاتفو مع بعضهم البعض ..

على خلاف المنتديات الاجنبية .. يمدحو ويقدرو شغلك تقول واحد من بقية اهلهم .. رغم اني باتحداهم في عقر دارهم ..


الحمد لله موضوعي نشر في اكثر من 20 منتدى وانا كنت اخر من يعلم ..


والحمد لله اتشفرت بمعرفة اناس قمة في الاخلاق والتقدير وانا بصدد بناء علاقة جدية معهم .. بمقابلات امام الواقع ... مش مجرد كلام في صفحة انترنت ..


اشكر كل من وقف جنبي واولهم خالد ( زورو الامارات )
كان خير رادع للاطفال اللي بيتسلون في المنتدى وخير رجل وقف جنبي في محنتي ووفاة ولد عمي ومرض والدي وخالي وغيرهم

اشكر جميع من شارك معي ووقف بجنبي في المنتدى

واتمنى من جميع الاخوة ..
اذا انت حاقد عليا او زعلان او شي .. انا اقلله انا اسف واتمنى له حياة موفقة


انا شخص عملي جدا وحشرت خشمي في المنتديات وكنت اظن ان منها فائة او على الاقل واحد تخرج منها بدعوة طيبة ... مش متعصب وتحيز ومدري ايش

ولاكن انا راح ارجع للواقع اللي بررة واللي احسه اكثر جدية من كثير من الكلام التافهة اللي بينقال هنا ..

راح ارجع للعالم الحقيقي مش لومينا وكابرس ورساوة وما ادراك مالرساوة
العالم اللي بررة والتجارب الحقيقة مش سيارات وهمية وسيارات تجارب

العالم اللي تشوف فيه خصمك وجها لوجه .. مش يحتمي بالانترنت عشان يحش فيك ويستهزئ بيك .. وعلى باله انو لا يمكن يشوفني ..
وفارق السن بيني وبينه كبير جدا ولاكن لا احترام لفارق السن ولا شي


الدنيا دوارة

الحمد لله امتلك وحدة من اقوى سيارات في العالم

وراح ارجع لجروبي العزيز الصغير اللي على قد حالي واللي احتضن فيه قللة من الناس الفاهمين واللي نفسها تطور نفسها

راح احاول اتواصل انشالله مع المقربين الي
واتمنى التوفيق للجميع ولا تؤاخذونا

ماشالله 42559 قرائة
و 916 رد .... كنت اطمح في الالفية لوول

بس يكفي الحمد لله اني سويت مرجع على مر التاريخ ما حصل في منتدى عربي

مع السلامة

والله ماهقيتها منك اخوي كينج تترك المنتدى علشان ناس ينعدون على الاصابع.....بعدين وسع سدرك يارجال اذا احد اساء لك لاترد عليه لانه ماراح ينقص منك شي واخذه على قد عقله .ارجوك تكفى لاتترك المنتدى

السلام عليكم ياخويKing_SS خلك من الهرج والكلام الي ماليه داعي والله ناس ماتتستاهل انا واحد من اشد المعجبين بانجازك الى للحين ماحد وصل ليه اتمنى انك تراجع نفسك ورتجع وانا اقولك ماعليك منهم انت مقتنع واحنا مقتنعين خلاص الباقي يولي وسلامتك:( :( :( :( :( :(

السلام عليكم

اخوي King_SS حبيت اقول لك شغله بسيطه تعوذ من الشيطان وروق


ولايهمك كلام الناس المريضه اللي موب عاجبهم شي

ناس مبدأهم سيارتي احسن سياره وياويل اللي يذم فيها اويعيب فيها حتى لوكان على حق


وباقي السيارات كلها مالها داعي وماعنده سالفه اللي يشتري غير سيارتي

وناس يحاربون الابداع والتميز يشوفونك مميز ينقهرون ترتفع حرارتهم يحاولون يطيحون منك

اعطيك مثال انا كانت عندي سياره صني وكنت مضبط فيها اشياء بسيطه
صحيح انها صني ماتسوى بس مهما يكون سيارتي وابي اضبط احب التميز
وكل شوي جايني واحد يقولي حرام فيها الخساير ماتسوى
وناس تقولي خربت سيارتك يوم هي شد بلد احسن مع الايام قررت ابيعها رجعتها شد بلد جاني نفس اللي قالولي تضبيطك ماله داعي ومدري ايش قالولي ليش شلت التضبيط اول احسن يعني ايش رايك انت... وش تسوي معهم هذولا ؟؟؟

بالاخير بقولك مثل مافيه ناس حاقده وغيرانه منك

في بالمقابل ناس تعزك وتحترمك وتقدرك وتقدر الشغل اللي انت تعبت عليه


وحرام تترك المنتدى عشان اشكال زي كذا
اي واحد تحس انه حاقد من رده اوشي كل اللي عليك تسويه انك تبتسم في وجهه خله يطرطع زياده


واسف على الاطاله

لا والله حرام عليك حبيبي KING_SS تترك المنتدى علشان ناس ماتستاهل يا أخي الدنيا كلها كده تحب تحقق حلمك ويجيك كم واحد مايتمنوه اليك وانا اقول والله ماعليك منهم وانا شفراوي معاك وظليت معاك وللحين معاك ولبكرة وفي اي وقت وبدون اي تحيز وانت كلمتني على الماسنجر ومرة كلمتني في التلفون لمدة تقارب الـ 17 دقيقة وماصار بينا غير الضحك والوناسة وعرفت اخلاقك وانت عرفت اخلاقي وما ادري انت حاطني معاهم في مواضيعهم والا حاط شيء علييي بعد فإسمح الي اذا حصل مني شيء غلط عليك لو من هالقبيل بس اعرف انه معزتك في القلب كبيرة ومن بعد ماعرفتك وكلمتك وفهمت الكثير عن السيارات وكل هذا منك اخويي العزيز أحمد علشان كده اقول خلك في المنتدى وماعيلك من اي واحد ولاتفاكر انت الوحيد اليي يكيدون اليه فيه ناسوايد يتمنوها تنطرد
واليك تحياتي أنا واحد ان طلعت انا بامشي من هالمنتدى معاك سوى ويالله وشكله حزب الشفر بقده ماشي وطالع (فكر في الموضوع حبيبي أحمد)cry:

تحيــــH+Hــــــاتي=======>Bad '95 Killer (حسينوووووه):

الحقران يقطع المصران

ياخي والله حرام عليك تسيب المنتدى عشان كلام الناس الفاضي هدا

واول الاسباب الي خلاني اشترك في المنتدى مواضيعك....


سيبك من الناس الي ما تفهم ولا تعطيهم وجه

زي مايقولو((ارضاء الناس غايه لاتدرك))



وسلامتكم جميعا

اخوي العزيز تعوذ من ابليس و لا يهمك اللي يقولوه












هذا اللي ودي اقوله وبختصار.

اخوي العزيز King_SS يمكن انك ماتعرفي لأني اعتبر عضو جديد بس صدقني كنت اتبع مواضيعك حتى اتيحت لي فرصة التسجيل والمشاركة في مواضيعك ومواضيع الشباب
واتمنى تغير رايك وتبقى لأن لسة في اعضاء كثر ومنهم انا متعطشة لقراءة مواضيعك والإستفادة من خبراتك

لاتكترث بالنضرة المتعصبه واعلم ان في ناس كثير معاك ومش ضروي تصدق كل شئ

اخوك بوعبود

لا تعليق................خسارة منتدى سوالف وقسم السيارات يخسر واحد مثلك والله يوفقك في حياتك :(

السلام عليكم ورحمه الله وبركاته
الانسان لازم يواجه اشياء زي كذا وخاصه عندنا احنا يالعرب لكن الي يثأثر من هذا الكلام هو الا خسران انت يا اخ أحمد بتخسرانا موهبتك ..
كله عشان كلام حصل
او حتى عشان جدال بموضوع من اي شخص مايفهم
بالله عليك تخصر احسن اناس بسبب اسوء الناس
دئما هذي النقاشات (المشاكل)بالمواضيع تحصل في كل شي المشاكل السياسيه بالعالم كله ياخي ..
زوهذا حال الدنيا وما اعتقد انه الحل هو انك تترك المنتدى
لكن كل واحد وعذره معه انت قلت في احد ردودك بالمواضيع انه راح يجي يوم وتترك المنتدى وذي هذا الكلام ..
وبصراحه انت انسان يندر وجوده بالسعوديهاو بالعالم العربي كله وتقارن بالعالم كله
انت سويت انجاز كبير والعاقل قدر هذا الشي وعرفه
ولو ابغى اوصف مدى الشي الي سويته ماراح اقدر عليه اي والله جد

والي ابغى اقوله انه لو حصل شي مني يزعلك او شي قاصي سامحناااا
والكلام يطوووووول
ومع الف سلامه لك ..

اخوي كينج اس اس والله من الموسف انك تترك المنتدى لانك احد اجسن الاعضاء فيه وليش تترك المنتدى بسبب بعض الاعضاء الي يحبون يلعبون ومالهم اي شغل في المنتدى ويحبون يخربون سمعت بقيت الاعضاء النشطين والمميزين وانت اكبر من كذا يا الكنج انت الي عرفنا عنك انك قوي وانت قدها وقدووود وتبي نصيحتي لاتترك المنتدى لاننا بحاجه الى عضو مثلك نستشيره وقت الحاجه ويفيدنا في كثير من الامور _________ واتمنى لك حياه سعيده تقبل تحياتي اخوك احمد

ادري انك تقصدني

بس في شئ باقولك مو انا ارسلك رسائل بالاميل اصلا انا مااعرفة

ابق في المنتدي وانا باطلع الان هاذا سيريحك

الجميع يحبونك وهناك ناس من خارج قسم السيارات يردون على مواضيعك الجميع بحاجة اليك

يلا انا طالع من المنتدي وانت ابقا فية والله يوفقك

السلام عليكم ورحمة الله وبركاته


يااخ احمد انت اخوي من اهم الاعضاء البارزين بالمنتدى لدينا بما قدمت لنا من مواضيع شيقه من دليل من الصور والفيديو والمعدات الي بنيت عليه وكل شي عندك مثبت بالتجارب الي قمت به

يااخوي خلي من كلام الصغارية هي المرة وماعليك منهم ،والعقل بينك وبينهم فرق ماشاء الله وعقليتك ماشاء الله متعلمة ومتفهمة احسن من واحد جاهل ،وانا كلمني خالد عنك وعن اخلاقك وهي المرة لاتسير عنا وروقها ان شاء الله

انت اخ وعزيز علينا وهالمرة عشان خاطري انا وخالد تبقى معانا ونساعدك لكل شي

حياك اخوي احمد
;)

اول شي السلام عليكم ورحمة الله وبركاته
صدقني اخوي احمد خروجك من المنتدى مو منطقي وماهو الحل الصحيح واذا عشان البزورة ذولا الي مايستاهلو فأي مبدع في الدنيا يواجه مشاكل زي كذا يعني انت مو اول واحد ولا اخر واحد وصدقني انه في عالم كثير يقدروك في هذا المنتدى ويقدرو شغلك والله حرام انك تحرمنا من ابداعك وصدقني انا لي سنة في المنتدى ومشاراكاتي قليلة بس دايما لمن ادخل المنتدى والله اني مادور الا على مواضيعك لانها هي الي فيها الفايده مع احترامي لمواضيع الشباب.
صدقني يااحمد انت مواضيعك هي ملح المنتدى هذا فرجاء فكر في قرارك مرة تانية وشوف.
واسفين على الاطالة:(

:(

للاسف اخوي احمد تترك المنتدى علشان شوية كلام فاضي

أنا متابع سوالف من أكثر من سنة ونص ,,,, ولاشفت منك غلطة صغيرة


حاول تراجع نفسك وتراجع حساباتك

ترى المنتدى بدونك مثل الغرفة بدون نور :( :(

ياراجل استهد بالله !! وش صار ؟؟
هاذا اولا مع اني ماادري وش سبب زعله لاكن والله لو طلعت بتصير خساااااااره كبيره للمنتدى ولنا لانا والله اتعلمنا الكثير منك ونبغى زياده ومانبغى نخسرك لانك انت اللي رجعت الحياه لمنتدى سوالف بعد ماكان خااامل ومليء بالمواضيع التافهه

ثانيا لاتعتبر ان اي واحد مايتفق معك من ناحية الماركات او الصناعات انه يكون عدوك لا والله ولاكن لكل شخص تجربته واانا بعطيك مثال :
انت تقول الشفر ماشي معاك تمام التمام ولا تشوف اي صناعه جنبه وهاذا تجربتك وكلنا نايدك انك تتمسك فيه دام انه ماشي تمام معك لاكن انا مثلا تووبه اشتري سياره ثانيه من الصناعه الامريكيه بسبب تجربتي مع هالصناعه

فالخلاصه لازم تختلف وجهات النظر ولاكن لاتعتبر كل من يختلف معك انه يكون عدوك فهناك خلافات تصير بين الاخوان وهم اخوان فكيف المنتدى ؟؟

واتمنى مااكون طولت واكون وضحت كلامي

سلام

السلام عليكم ورحمة الله
كيف الحال ان شاء الله تمام

اخوي العزيز كنق اس اس اولا انت حطيتني في موقف محرج جدا جدا
انا اللي راح اتحمل خروجك من المنتدى وراح يصير اللوم كله علي انا :(

حبيبي انا اسف اذا كان قلت لك كلام يجرحك وانا واثق اني ما قلت لك اي شي يجرح ...
على العموم هو مجرد نقاش ويعلم الله كنت اتمنى استفيد انا وانت يعني انت تعطيني معلومة وانا اعطيك معلومة بهذي الطريقة راح نطلع بنتيجة اكيد وانا لو ادري انك راح تزعل ما كان رديت على الموضوع اساسا بس انا متاكد انك لم يسبق لك ان جربت او شريت اي سيارة من سيارات الدودج وكان عندك بعض الانطباعات عنها وانا كنت ابي انقلها لك من واقع تجربة انا الحين عندي سيارتين دودح والثالثة بالطريق ان شاء الله وتقدر تقول عارف عنها كل صغيرة وكبيرة فبس بغيت اوضح الامور لا اكثر ......

على العموم انا اسف مرة ثانية واتوقع بحكم الاخوة اللي بيننا في هذا المنتدى انك راح تتراجع عن هذا القرار وابيك تعرف شي وهو مو كل واحد يخالفك في رايك هو يكرهك بالعكس الاختلاف في وجهات النضر لا يعكس للود قضية ابدا ابدا ....

وابيك تتذكر لما انقطعت فتره كيف الناس كانو يسالون عنك بالمنتدى ويحاتونك حبيبي المنتدى فيه الصغير وفيه الكبير فيه الفاهم وفيه الجاهل لازم تتفهم هذي الامور ولا تاخذ بحكمة بوش ((انت اما معي او ضدي )) ....

ومن ناحية الموضوع اللي فيه الاختلاف انا تحاشيت ارد عليك مرة اخرى اعذرني ولو تبي احذف كلامي الاول ما عندي اي مانع انت بس تامر امر ...

واخيرا القرار لك ارجو ان تفكر فيه بشكل جدي لانك يمكن راح تضر ناس احبوك ويتمنون لك الخير في حياتك واخرتك ...

تقبل تحيات اخوك فاااااااااااااااااااااااااايبر .

لالالالالالالالالالالالالالالالالالالالالالا


نحن نحبك اخوي اس اس وفخورين بك ومانبيك تروح وشيبك من الي

حاسدك وحاقد عليك
((طنش تعش تنتعش))


لالالالالالالاتروح اوكي قول تم بلييييييييييييييييييييييييز


تكفـــــــى وانا ولد عمك لا تروح واذا رحت حتروح الروح

و الله كلامك زعلني

الصراحه بتكون اكبر خساره للمنتدئ اذا تركته

King_SS

لازم تعيد تقكيرك في هذا الامر

يا اخي العزيز

اصرارك و عزيمتك لازم تجعلك تتجاهل هؤلاء (لا احدد شخص معين)

و في مشاركاتك ما عليك الا انك تتجاهلهم .... و مثل ما يقولون دع القافله تسير والكلاب تعوي

خساره بس حبيت اقول اخوي كينج اس اس
طنش تعش
يعني خليهم عنك
ولا تزعل

يرجال،، اترك عنك الحاقدين

ناس تشوفك شعبي والكل يحبك وهم مايقدرون يوصلون لمستواك ولا بيوصلون لذلك تشوف الحقد ،،،



انت إذا بتطلع بتصير ضعيف في نظرهم وكلهم بيفكرون انهم انتصروا ، مع انهم خسروا !

لذلك ارجع عن كلامك وضل مواصل لمسيرتك في المنتدى

وأقهر الأعداء وعطهم سادس

شوف كم واحد رد اخوي كينج علشان تعرف معزتك عندنا...طيب كيف نعرف اخبارك(حي ,ميت ,مريض ,صاحي) ..لو سمحت ايميلك....

السلام عليكم
أخوي أحمد هناك حكمه تقول (اختلاف الراي لا يفسد للود قضيه)
أما ناحية أنه احدتطاول عليك فهذا شي لا يسكت عليه لأنه أعتقد قريت كلام من هذا الشي في المنتدى ولاكن للأسف لمن جيت أرد الموضوع ما لقيته عشان كده لازم كل واحد يحترم نفسه في المنتدى ولا يتطاول على أي أحد مهما كان خاصة للأعضاء الذين لهم مكانة في العلم وخبرة ومكانة في هذا المنتدى
كلمت حق: المنتدى في قسم السيارات شهد حاله من الركود وسببها عدم وجود أعضاء في مكانة أخ احمد يفيدوننا بما توصولو إليه بجهدهم وتعبهم وتجاربهم بعكس بعض الأعضاء الي جالسين يتفلسفو ويستهزؤ بغيرهم وهما ولا لهم أي شيء من الخبره بس جالسين يتريقو بدون علم.
كبر دماغك يا أخ أحمد وسيبك منهم ......

يريت ترد اليوم لا أروح اهبق وأنا أبو الهبقات بكره أسوي مظاهرة في حي الصفا وأجيك من مكه مخصوص عشان ما تسيب المنتدى.

تحياتي