السلام عليكم ورحمته وبركاته
كيف الحال شباب
ادري طولت ما نزلت الموضوع بس الظروف وتاخر السيارة وسافرت
و كل تاخيرة فيها خيرة
واتركم مع الموضوع
انا لي تجربه في ترهيم سياره وحبيت احط واكتب عن كل مرحله صارت واطلعكم على المعوقات وعلى الحلول اللى ابتكرناها ...
وهو عباره عن تعديل سياره وتغيير نظامها من نظام معين الى نظام اخر وطبعا الهدف هو التزويد (( التلغيم )) وبشرح وشلون صار هالشي خطوه خطوه .. وقبل كل شي ابتكلم من البدايه عن هالسياره :
السياره طبعا هي كمارو موديل 99 ولكن مسجلينها المرور عندنا 98 ولاادري وش الهدف منه !!
كانت مكينتها سته سلندر سعه 3800CC على شكل V وبقوه 200 حصان الى 220 وبنظام OHV وبـ 12 بلف (( صمام )) وبثلاث كويلات .. وطبعا هالمواصفات كلها هي نفسها اللى على اللومينا لكن تختلف طريقه شكل الانتيك (( الثلاجه )) .. وحتى القير برضوه اللى هو نوع اوتو 4L60E واللى يسمونه (( 700 )) الكتروني نفس الشي تقريبا ...
طبعا كانت المكينه مخبطه ومنتهيه وكنت ابي مكينه ثمانيه سلندر لعدم اقتناعي بهالمكينه ابد ابد .. وكنت ادور مكينه LT_1 وطبعا مع الظفير والكمبيوتر والقير برضوه وهذولا الاشياء هن اللى عقدتني وعقدتني من جد .. لان ياكثر ماالقى المكاين لكن بدون ظفيره وكمبيوتر وكنت ابي مكينه مع ظفيرتها وكمبيوترها مع بعض وماكنت ابي ظفيره وكمبيوتر لحالها ومكينه لحالها واجمعهن لان هالحركه دايم تصير من وراها مشاكل في الكهرب ومنيب رايق لها ...
المهم جلست فتره طويله حوالي تقريبا الشهرين من يوم شريت السياره ومالقيت اللى انا ابي وحتى اني تنازلت عن القير لكن نفس الشي .. عموما رضيت بالواقع ولغلاء مكينه الـ LS_1 قلت خلاص السته سلندر وامرنا لله ...
وظبت المكينه وجبت كل شي جديد في كل القطع ...
وكنت فرحان بها بعد ماطلعت رغم الوجيهه الغريبه اللى تناظرني على هالسياره حتى ان ابوي قالي اذا مريت في الحاره تلطم واسرع لحد يشوفك وتفضحنا
لكن كل هذا مابعد سويت اللى انا ابيه وهو القوه ...
السياره وخذتها لكن تنقصها القوه :rolleyes:
سته سلندر ماتفي ابدا ابدا بالغرض .. وخصوصا كل مامر واحد قالي يالله قاوم ؟
بعد كذا قررت على اشياء بسيطه كبدايه .. خذت لها اسلاك وكويلات وبواجي وفلتر وتقسيم الشكمان ...
وهنا توضح الكويلات اللى من نوع MSD والاسلاك برضوه من نوع MSD
وفلتر ريس (( فلتر رياضي )) نوع K&N وفتحت للمنيفولد (( للشكامين )) ومافكرت ابدا في الهيدرز لاني منيب اواطن صوت الهيدرز على السته سلندر ابدا ابدا وعلى امل اني ارجع للفكره الاولى اللى ماتحققت وبخسر عليها كثير كون الهيدرز بيكلفني كثير لذلك فكرت اني اخلي كل منيفول (( اقزوز )) لحاله من الوصله وبكذا عطتني نتيجه بسيطه لكن فعاله ...
الين هنا كان الموتر يروح على بعض المواتر البسيطه اللى هي سته سلندر مثل الكمارو السته سلندر والمكسيما والكامري وهذولا ماينقاسن ابدا وكنت اصلا منيب مقتنع وكنت اذا بغيت اتقاوم احرص اكون بعيد عن عيون الناس (( اجل كمارو ومكسيما صافيه |5| ))
بعد تفكير وتمحيص واستشارات .. وبرضوه غلاء قطع السته سلندر في التزويد من استروكر وسوبر وانتيك.
قررت ..اني اخذ ثمانيه سلندر واعدل فيها ابرك من السته ...
لذلك قلت اخسر عليها خساير واحط عليها اشياء كويده واطلعها وقت اللزمه ...
وكنت ابي اوفر لها كل شي جديد وبسيط .. وقوي .. مع المحافظه عليها.
وكان السائد والرائج على مكاين الـ LT_1 واللى يسمونها 350 هي كربريتر وانتيك واسلاك وكام وهيدات (( رووس)) لكن في الاساس الكربريتر في هالمكينه مايجي على الكمارو لان الديلكو بيرجع ورا وصعب انك تدخل المكينه جوا والديلكو ورا .. لذلك العمليه صعبه في هالسياره وثاني شي ماكنت مقتنع بقوتها رغم رخص القطع ...
واذا كنت ابعتمد على الانجكتر (( االبخاخ )) واحط ستروكر ضغط منفخض وتيربو او سوبر او ستروكر ضغط عالي وهيدات وكام وركورات بيكلفني كثير ومع هالتكاليف اقدر اخذ LS_1 وازودها لذلك شلت عن بالي هالمكينه بعد ماكنت ادور عليها دوران !
وفي الاخير مافيه الا الـ LS_1 طبعا هالمكينه هي اللى تجي على الكمارو من موديل 98 وبرضوه الكورفت من موديل 97 وعلى اللومينا والكابرس SS ...
وطبعا هالمكينه محترمه جدا بوجود الكويلات الثمان وخفتها وبرودتها وقله الصيانه عليها واهم شي قوتها ;)
لكن خلونا ندخل في عالم الفلوس والنصب والغباء بعد
بعد ماقررت على الـ LS_1 رحت ادور هالنوع اللى على الكمارو ظنا مني انها رخيصه او على الاقل ارخص من اللى على اللومينا لاني اباخذها مع الظفيره والكمبيوتر .. لكن لقيت المفاجأه !!
مكينه وظفيره وكمبيوتر في السكاريب (( التشليح )) للكمارو على 20 الف 22 الف ؟؟؟
انا استغربت .. ليش بهالسعر ؟
وبصراحه ايست وقلت اظاهر بسكر الموضوع من اوله .. لكن بالصدفه سألت عن مكينه اللومينا كامله بالظفيره والكمبيوتر قالي بـ 14 الف ؟؟؟؟
والمكينه لحالها بـ 6 الاف اما الكمارو المكينه لحالها بـ 14 الف ؟
انا قلت وش هالغباء .. سألت كم واحد من اهل السكاريب (( التشاليح )) قالولي هذي كمارو وهذي لومينا يفرقن في الاسم حتى لو انهن نفس المكينه !!!
بصراحه انا شفت غباء لكن مثل هالشي .. نادر ونادر جدا .. عموما قررت بعد مكاسر اني اخذ حقت اللومينا دامها بهالسعر .. لكن قبل كل شي وش تخطيطي على المكينه ...
العالم تقولي كمبيوتر وركورات وكام وانتيك وثروتل وهيدرز مع الظفيره اللى بجيبها من برا وكمبيوتر وكل هذا بيزيد تقريبا فوق الـ 200 حصان وممكن حول الـ 250 حصان للمكينه (( مدري كم بيوصل للكفر ))
لكن هذا بعد مراجعه مني ومن خويي الميكانيكي اللى انا قلتله هالشي لقينا ان الوضع بيكلفنا وبيكلفنا الكثير وتقريبا اخر حساباتنا عليها توصل حدود 10 الاف دولار بدون مااشتري مكينه
ووقفت لكن كان عندنا خيار ثاني رغم صعوبته وانا اصلا كنت خايف كثير منه الا ان الميكانيكي خويي اكدلي وعلى ضمانته ان الموتر بيكون نفس اشتغاله وحالته مع الحركه الجديده .. يعني الايرباق يشتغل وكل وصلات الكهرب في السياره تشتغل مثل الـ ABS والفيوز كامله .. عموما الحركه هي :
كاربريتر مع ثلاجه (( انتيك )) مع كمبيوتر من شركه MSD خاص بـ الــ LS_1
من شركه Edelbrock
وبصراحه هذي الحركه جديده واكرر جديده على هالمكينه وهي تتميز بالكويلات مهب بالديلكو ...
قارنت هالحركه مع بخاخات وانتيك وكمبيوتر موتيك لقيتها افضل بكثير وارخص بعد بكثير ...
لكن كانت فيه عده تساؤلات من تفكير عميق على هالحركه وهي :
1 _ هل الكربريتر بيدخل جوا او المساحه بين المكينه واعلى حد لمكان المكينه بيكفي ؟
2_ هل عمل الكهرب في السياره بيختلف ولا بيكون نفس شي بعد فك الكمبيوتر ؟
3_ هل القير بيركب على هالنظام ولالا اذا عرفنا ان القير موصل بكمبيوتر السياره ؟
4_ هل الانتيك (( الثلاجه)) بيكون عالي مره .. لانه يختلف عن انتيك (( ثلاجه )) الـ LT_1 في الكربريتر !
وخصوصا ان حنا ماشفنا القطع الا على شكل صور اما قدام عيونا ماشفناها ولا احنا شايفينها الا اذا شريناها وجتنا ...
5_ هل الكويلات اللى في المكينه مهيب مسببه مشاكل مع الكمبيوتر الجديد ؟
6_ هل الكمبيوتر الجديد بيتعرف على كل قسائم الكهرب في السياره ؟
وبرضوه كانت فيه تسأولات على اني اخذ مكينه اللومينا بدلا من الكمارو وهي :
1_ هل الكراسي بتتغير كلهن مع المنيفولد(( الاقزوز ))؟
2_ هل الكرنكيس (( الكرتير )) بيركب اذا عرفنا ان حق اللومينا جاي قدام اتجاهه مع الفلتر والكمارو من ورا ؟
3_ هل الكمبروسر (( المكيف )) بيظبط حق اللومينا ؟
وعموما جتنا عده تساؤلات لكن عرفنا واستنتجنا ان نغير اشياء معينه وهي :
1_ القير يتغير .. لان الموجود يشتغل على كويل من الكمبيوتر يشبك في القير وهذي صورته :
ومن القير يشبك مع الكمبيوتر لذلك لازم ينفك وينزل ونشتري واحد ثاني اللى هو ابو كيبل (( القديم اللى يركب على الكوابرس والتايفونات والفانات القديمه )) وطبعا هو اللى يسمى قير 700 نفس الشي بس يختلف في الاداء ووقت التغيير ...
2_ كراسي المكينه مع المنيفولد (( الاقزوز )) لازم يتغيرن ويبدلن بـ كراسي ومنيفولات (( اقزوزات )) حقت كمارو ...
3_ الكرنكيس (( الكرتير )) لازم يتغير وناخذ حق كمارو ونشبك من جوا بين الوصلات اللى طالعه من المكينه على الكرنكيس (( الكرتير)) لـ فلتر الزيت .. لان منول جايه قدام .. وهذي صوره الكرنكيس (( الكرتير )) حق اللومينا ويبين ان فتحات المواصير من اول الكرنكيس (( الكرتير )) اللى موصله لـلفلتر وفي كرنكيس (( كارتير )) الكمارو على طول مشبك مع الفلتر ...
طبعا وهي مفكوكه من المكينه .. وهذي صوره لكرنكيس (( كرتير )) حق الكمارو ويبين ان الفلتر (( السيفون )) جاي ورا وبرضوه العلبه جايه ورى وهذا الفرق اللى بينهم وطبعا كرنكيس حق الكمارو كبيييييييييييييييييييييييييييييييييير ويشيل زيت احتياطي اكثر من كرنكيس حق اللومينا بـ ليترات واجده ..
عموما ولمعرفتنا ان بيجينا اكثر من مشكله وانه بيكلفنا اكثر من المتوقع .. حبينا نغامر وطلبنا القطع وهن :
الكربريتر .. وهذي صورته وهو توه جاي في كرتونه:
طبعا هو مقاس 650 cfm ...
والكمبيوتر من شركه MSD مثل ماقلت .. وهو خاص لـ هالمكينه ومكتوب عليه ومعه الظفيره :
ومعليش لعدم وضوح الصوره
وبرضوه الانتيك (( االثلاجه )) اللى كانت اعلى من المتوقع
عموما بعد ماجبنا الكربريتر جا واحد وطلبه وعطانا كربريتر ثاني مقاس 900 cfm (( الموضوع له قصه ثانيه ))
ومعه الانتيك (( الثلاجه )) والكمبيوتر وكان فيه اختلاف شي بسيط في اسلاك الكمبيوتر ...
انا خذته وفرحت لكن ادري ان من وراه شفط بنزين بس قلت ولو هذا افضل واقوى .. واقدر مستقبلا لو اركب كام ولا سوبر او اي شي في راسي يتحمله هالكربريتر وهذا اصلا مخصص للدراق ...
عموما ممكن البعض يسأل كم بتوصل هالحركه من قوه ...
بتوصل وعلى كلام الشركه فوق بـ 100 حصان للمكينه .. يعني تزيد فرق قوه بـ 100 حصان عن البخاخ العادي حق الوكاله ...
طبعا هذا اعلن في مجله CHEVY واكدوا لنا الشركه في النت ان هالقطع بتعطي حتى 100 حصان في المكينه وراح تعطي افضل على الداينو من الكمبيوتر والظفيره اذا كان القير مركب عليه كت وبرضوه مداخل ومخارج الهواء في المكينه سهل !
وخلونا ندخل في معالم هالاشياء
اول شي راح يكون للمكينه الكت اوف لها عند 7500 RPM وماتقدر تنزل ابد واذا ركبت اشياء زود راح يرتفع .. واعرف واحد مركب نفس الحركه (( ملفقه على نيسان باترول )) ومركب سوبر من دون زوايد في المكينه ووصل عنده الى 8400 RPM وطبعا اللى يتحكم هو هذا
وهالتشبات تجي مع القطع ومكتوب عليهن (( CURVE 2 & CURVE 4 & CURVE 6 )) وهن ثلاث وكل وحده تعبر عن مرحله من التزويد والـ curve2 للمكينه الصافيه زي اللى عندي .. واصلا عمله هو يتحكم في الكام انه مايطلع اكثر من 7500 دوره في الدقيقه وحتى لو شلته عادي لكن مكينتك بتستقبل خرابات في الـ بش رود والركورات والحركات هذي ...
وهذا مكانه
وبالنسبه لو ركبت كام او سوبر او اي اضافه داخليه للمكينه او خارجيه بتركب الـ curve 4 يعطي زياده في الدورات او بما معناه ينظم الكام الى انه يصل الى دورات اعلى وطبعا منتب مركب كام الا ومركب ركورات وبشات رود وسبرنقات .. الخ تتحمل هالدوران العالى لان العاديات مايتحملن حتى حق الوكاله ...
اما الـ curve 6 للستروكرات وللحاجات الكبيره ولااعرف كم يوصل لان الورقه ضاعت واصلا ماقريتها لان مابعد خلصت من شغلي
عموماوصلن القطع وبدينا في الشغل .. جبنا المكينه وهي حقت لومينا موديل 2001 كامله مكمله من كمبرسر ودينمو وبرضوه كراسيها وغطاها وسيورها اللى شلينا بها
وهذي صوره اول ماجبنا المكينه وطبعا كنا مفككينها للوزنيه (( الميكانيكي خويي هو اللى اشتغل عليها مهب انا .. لان حدي فك وتركيب مكينه وودها للمخرطه ))
وهذي بعد صوره وبتشوفون الانتيك (( الثلاجه )) محطوط على جنب
وهذي صوره الانتيك (( الثلاجه ))
وهذي صوره غطاء المكينه
طبعا الوقت كان طويل الين جبنا القطع والين لقينا المكينه المظبوطه وهذا كله خذ علينا ثلاث شهور !
شهرين الين وصلن القطع (( لان كانت فيه مشكله في جمارك دبي )) وخذنا شهر او اقل بشوي الين لقينا المكينه المظبوطه والصاحيه ...
بعد هذا كله دخلنا العروسه في الورشه .. وبدا الشغل ...
طبعا صايعه مع سيارات تقاس بألالاف الاحصنه !!
وهذي صوره لمرحله فك المكينه والظفير والكمبيوتر :
عرض نسخة للطّباعة |
ارسل هذه الصفحة لصديق]
