شرايكم في تويوتا برادو 2005 ؟

[uae speed]

السلام عليكم ..

شباب بغيت اعرف رأيكم حول تويوتا برادو موديل 2005
مواصفاتها كالتالي :
2.7 لتر - 4 سلندر - بقوة 157 حصان
فئة البابين مب اربع ابواب .

امس سألت عنها في وكالة الفطيم في دبي ..
وقالوا لي سعرها 93 الف درهم بدون جلد وسيدي و زوايد ورنقاتها عادية ..

وفي النوع الثاني مع الاضافات اللي ذكرتها بـ 99500 درهم ..!

مثل هذي :

http://www.japanvehicles.com/newcars/toyota/Prado2003/picprado/body5.jpg


http://www.japanvehicles.com/newcars/toyota/Prado2003/picprado/body6.jpg

بس بدون المرايات الامامية والخلفية والحواجز اللي فوق ..

وهذي من الداخل :

http://www.japanvehicles.com/newcars/toyota/Prado2003/picprado/int5-1.jpg


يمكن أشتريها .. بس باللون الأسود أو العنابي .. :)

حد منكم جربها أو يعرف عيوبها مثلا ؟

[زورو الامارات]

بسم الله الرحمن الرحيم


السلام عليكم ورحمة الله وبركاته


بو حميد تبغي نصيحتي ؟


لا تشتري البرادو الا 6 سلندر ال 4 سلندر ماتنفع لو تضحي شوي في المواصفات وتاخذ لك 6 سلندر احسن


لان السته سلندر تعطيك عمر واداء ياتشتري 6 سلندر ولا لا تشتري هذي نصيحتي لك

[uae speed]

هلا خالد ..
انا وياك .. بس الستة سلندر قيمتها 118 الف درهم فل اوبشن ..
والعاديه تقريبا 112 الف درهم .. طبعا انا اتكلم عن فئة البابين مب الاربعه !

الستة سلندر للمعلومية مواصفاتها كالتالي :
4.0 لتر بقوة 262 حصان !

بيني وبينك يا خالد الميزانية ما تسمح تقريبا .. وصرفية البترول عالية ..
وانت عارف البترول عندنا كيف ! :(
و انا ودي الصراحه اخذ 6 سلندر .. بس بشوف كيف الوضع وبفكر ..

تسلم مشرفنا :)

[AMG]

إختيار حلو لكن السعر مبالغ فيه الله ياخذ الين واليورو واللون الأسود والذهبي من أحلى الألوان عليها

[الأنصاري]

ممممممممم ما انصحك ب4 سلندر محرك ضعيف جدا :confused: :confused: وهو نفس محرك الهايلوكس

نصيحه شوف الباجيرو ومواصفاتها وقارنها مع البرادو:D :D

في محركين 3.0 قوته 190 حصان
ومحرك 3.8 قوته 230 حصان
وفي 3.5 بس مادري لو لسه متوفر

[زورو الامارات]

السلام عليكم ورحمة الله وبركاته


بو حميد حاول تتخلى عن بعض المواصفات لصالح السته سلندر وفكر

[Third Eye]

أوووف...شي عجيب والله اعار السيارات غالية وكمان البنزين!!!!!!!!!!


أنا أقترح بهذا السعر شوف جيب ثاني ستة سلندر بهذا السعر

في أحد الأعضاء عنده بابين ستة سلندر أعتقد إسمه SL 65


تحيااتي

[grandv8]

وعليكم السلام ورحمة الله وبركاته

uae speed

اخوي عبدالله والله السيارة سعرها غالي جدا على سيارة 4 سلندر وباب واحد بعد،باخذ سيارة فيه مواصفات حلوة ورخيصة وخاصة سيارات اربع سلندر وايد.
باجيرو
سوزكي فتيارا
راف فور
هوندا سي آر في

وانت استخير ان شاء الله.

تحياتي
:)

[dbooor]

رد مقتبس من زورو الامارات
السلام عليكم ورحمة الله وبركاته


بو حميد حاول تتخلى عن بعض المواصفات لصالح السته سلندر وفكر

[durango]

ما تحس انها غاليه شوي...؟؟؟:sleep:







EMO

[Porsche GT2]

اخوي أنصحك إبعد عن البرادو 4 سلندر ..

أنا مجرب سواقته عزمه ضعيييف جداً .. وهذا بالخط ضعيف أجل بالبر كيف :confused:

مادري عن ال 6 سلندر لكن ال 4 المحرك ضعيف بالنسبة للسيارة ..

[TOP-SECRET]

خذ لك نيسان كوبي وركب عليه مكينة ستيشن:D

بشكل عام البرادو من وجهة نظري الفور دور 100% روعه

لكن الكوبي ماله داعي او مب متعودين عليه بشكل اصح:)

وسعره غالي

بالتوفيق

[SL 65]

أنا عندي برادو 2004 6 سلندر و بصراحة سيارة عملية. لاكن تصرف بترول. عيبها أنها مب ثابته و تسمع الهوا وايد. لاكن مريحه. وتصدق ما أتّذكر أي نيسان ولا ستيشن راوح عني. و المكسيما و LS400 أروح عنهن حتى 120.
عند ربيعي 2005 6 سلندر و الفرق أنها خمس غيار. فيها نفس العيوب لاكن قومة أسرع عني حتى ال60 و بعدين يتم جدام عني ب10 أمتار لين ما نبند على ال 190.

[Crower]

يش ما تشتري نيسان 4500 انجكتر باب واحد, ارخص, و اقوى, و مكينة ال4500 ما تصرف بترول وايد, و بعد شكله احلى... فكر فيها, و ان ما اقتنعت اقولك الراف احسن لك من البرادو

[SL 65]

ال 4500 efi باب واحد مب أقوى من البرادو و بعدين الصيانة و قطع الغيار أغلا. ومن متى النيسان بترول (أسم على مسما) يصرف أقل من التيوتا؟ :anger:

[uae speed]

هلا شباب أشكركم على تفاعلكم .. :)

AMG
بالنسبة للألوان انا اشوف الاسود احلى لون .. :)

الانصاري
المشكلة ان الوالد مب مقتنع الا بتويوتا ..! :D
والباجيرو ما عليها كلام بعد .. حلوة :)

Third Eye
الاسعار غالية لأنها 2005 توها نازله ..!
بس لا تخاف عندي خصم محترم :cool:

grandv8
اهلين بوجاسم ..
المشكلة اني مجبور على التويوتا ..
والوالد راسه يابس .. :D
وكل موديلات تويوتا عندنا ..
كورولا - راف 4 - كروزر - كامري - بيك اب ..!
ما بقى غير البرادو .. علشان اكمل العائلة :D

durango
مب وايد .. هذا قبل الخصم ..!
والواسطه بتشتغل ولا يهمك :D

Porsche GT2
تدري ان كل ربعي قالوا لي نفس كلامك ..
يقولون خذ الستة سلندر .. الاربعه تعبانه ..!
وانا اخاف اتوهق بصرفية البترول .. بس بحلها ان شاء الله :)

TOP-SECRET
هههههههههههههه اي مكينة ستيشن الله يهديك .. :D
والله ياخوي انا اشوف البرادو الكوبي احلى ..
يعني شوي اخف واسرع بعد .. :) تنفع للقومات ! :D

SL 65
اهلين اخوي .. الحمدلله لقيت واحد عنده برادو .. :D
أول شي بسألك .. انت من دبي ؟ وعندك برادو كوبي ابيض ؟ و دوم تتمشى عالممزر ؟ :D
بالنسبة للقومات فهذا هو المطلوب .. يعني مستواها حلو ويا المكسيمات .. :)
بغيت اسألك بكم تفول سيارتك ؟ وكم كيلو تمشيك تقريباً ؟
والسموحه غثيتك بأسألتي .. :D

Crower
متأكد ان النيسان يصرف اقل عن البرادو ؟ :think:
لا يا ريال ما اتوقع .. النيسان معروف عنه يشرب شرب ..
وبالنسبة للراف 4 ترى عندنا واحد .. :)

:help: :help: :help:

[kaser annassr]

بسم الله الرحمن الرحيم

السلام عليكم ورحمة الله وبركاته

اللاند كروزر أحلى بألف مرة

وأفضل بعد



مشكور

[SL 65]

:laugh:

صادق, أنا من دبي و عندي برادو لؤلؤية و مب دايماً على الممزر. لاكن الي يميز سيارتي أنه الغطاه مال السبير لونها نفس لون السيارة و مش أسود نفس العادي .

بنسبة للبترول أفول سبيشل ب77 درهم و يمشيني 430 على الراحات. بس أنا ديماً أضرب خطوط وكله أمشي 180 و يمشيني 350.

[SL500]

اذا انت تملك خصم ويساهل خذ لك 6 سلندر مثل مانصحك المشرف...اعتقد شخص يقدر على ال100 الف ما يعجز عن صرفية البنزين...ولا تسنى انها تويوتا و6 سلندر مو 8 سلندر...


وانا نصيحتي لك اللاند كروزر كوبيه احلى شكل والطـــف
وبالتوفيق :)

[Crower]

النيسان 4500 صرفيته حلوة و كان عندي... عيبه كان وزنه ثقيل فلازم تضغط السياره علشان العزم.. بس على الباب واحد البدي اخف بوايد... و بعدين انجكتر... و القوة صدقني بيكون اقوى من البرادو, عند واحد من الربع 2005 و يروح عن 4800 و يمدحه وايد.

[SL 65]

يا عمي أنت يا crower أول واحد يمدح الصرفيه مال نيسان. :think:

[cruiser2000]

السلام عليكم ورحمة الله وبركاته



عبدالله نصيحة مجرب

لاندكروزر 6 سلندر غيار عادي/اوتوماتيك اي شي

صرفيتها ممتازة وهذا شي معروف تمشيك عادي 700 كلم
فولها يمكن 85 اعتقد
وقوية في العزم


هذي نصيحتي لك عبدالله


وانت شوف السيارات الثانية

عندك الكوري ممتاز في صرفية البترول: <<<<< عنده سيارة كورية :D
ومعروف الكوري ببرودة المكيف ماله

بس القوة تعبان شوي الا اذا حافظت عليه

الياباني معروف في قوته وصرفيتة الزينة للبترول

4 سلندر برادو ما انصحكفيها لانها تصصرف بترول وايد وسعرها الغالي

انا صراحة عجبني شكله اول ما نزل والله وحش ما يباله شي مرة

بس كان سعره في العين حسب كلام الوكيل مال الفطيم قالي
بابين مب اربع ابواب انا اتكلم عنه ......... فل اوبشن مع فتححة وحساسات
كله مرة مرة ب 105 الاف درهم
ويوم رحت عند النيسان حصلت كبسولة
فل اوبشن قير عادي مع فتحة وكل شي اوتوماتيك ب 106




انتهى

اي شي تبا تعرفه خبرنا ونحن بنفيدك


تحياتي لكم
والسموحة على الاطالة
ثرثار شوي :D

[Crower]

sl65 : هاهاهاه........ عزيزي انا راعي نياسين من استويت..... خلنا نحسبها و نضحك شوي
عدد 2 نيسان : ستندر باب واحد موديل 93,97 .
عدد1 نيسان: 4 ابواب قناص 97 (فل تانكي 145 درهم على ايام البترول الاولي).
عدد 1 نيسان : ستندر 4 ابواب موديل 96.
عدد 1 نيسان : 4500 فول اوبشن جير عادي موديل 2000.
عدد 1 نيسان: 1991 4 ابواب مكينة 4800 ( ثاني واحد في الامارات).
عدد 1 نيسان: 4 ابواب 4800 2003.
حلوه طريقه الحسبه مثل مال الوكالة :D
علشان اكون صريح وياك لاقصى الحدود......... كلهم يشربون بترول بطريقه غير طبيعية و خصوصا ال4800....... الا الانجكتر 97 كان معقول...... بس 4500 ما كان يصرف بترول ... تقدر تقول نفس اللاندكروزر ان ما كان اقل (على اعتبار ان البلكات و السياره 100% ) الخزانين فل بترول كانوا يوصلون من أبوظبي لين اول محطه بعد الغويفات على سرعه 140 كم ثابت.... يبقى كل سياره غير بس انا سمعت الربع يمدحونه بعد:rolleyes:

[Third Eye]

أقول مادام عندك خصم فلا تفوت الــv6(الأربعة مايسوي أبدااا)

وحتى لو أشتريته ستاندر

حوش عليه قرشين وحط فيه حق الفل أوبشن

بس خذه من البداية بتندة

وحسب ماقريت في الإعلان حق البرادو أنو القير العادي 6 نمر

أنا انصحك قبل ماتشتري الأربعة خذه تيست درايف

وربك يكتب فيه الخير

وبالبركة

[SL 65]

يا crower كل أهل الأمارات عندهم خبرة في النيسان و أسئل أي حد بيقولك على الأقل مرن نيسانين في حياته أو عند حد من أهله. و نحن عندنا كبسولة 1991 و ثنينة طوال 97 , وكان عندنا سلق 4.5 أنجكتر و بعناه عقب سنة, و أخويه عندة 4800 موديل 2002 رقم ثنين. وطبعن كلهن قير عادي لأن النيسان تماتيك مايسمونه نيسان.


وبعدين شعنه كاتب (1991 4 ابواب مكينة 4800 ( ثاني واحد في الامارات).) . ولو أنت صادق قولي شو أكبر مشكلة كلحد حاول يبدل ويركب ال4800 يواجه؟ يا خبير التزاويد.



........................:laugh: :laugh: :laugh:



:laugh:

[Crower]

عزيزي ليش معصب..... انا قلت وجهة نظري.. و انا ما اختلف معاك على اي نقطة, انا اللي قلته ان النياسين كلهم يشربون بترول من واقع تجربتي... باسثناء ال4500 اللي مقارنة مع الباقين صرفيته معقولة جدا.
اما عن النيسان 4800... انا اتكلم عن اول سنة 2002 ...
الكمبيوتر بهدل الناس اول ما بدو الناس يركبون مكاين.... مشكلة فتحة الكامات او الفتك مثل ما نسميه.. كان في بعض الاوقات ما يشتغل ( السبب كان من الكمبيوتر و الضفيرة..) الجير للنيسان القديم كان مريح وايد... المشي كله في جير 4 جير 5 كان مريح وايد (اتكلم عن اي موديل قبل 92 و اي نيسان جي ال 95-97 الاويل بمب كان مصيبة على ايامه اول دفعة نياسين ( اشتريت المكينة منهم) فيهم عيب مصنعي في الاويل بمب و كان في وايد حالات ان السياره تدق مكينتها او تصرف ايل.......... بالنسبه للتركيب ترها مب صعبه و اسهل عن مكينةالاستيشن.. الضفيرة اهم شي و واحد فنان يعرف شو يالس يسوي... اكبر مشكله كانت الضفيره محد عرف لها عدل اول ما نزلت هالمكينة ... و هالمشاكل تواجهك يوم بتبدل مكاين للنيسان في اغلب الاوقات.
و قلت لك عزيزي لا تعصب... و بعد المسمى (خبير التزويد ) الشباب اللي اختارولي اياه مش انا, انا انسان عارف على قد حالي, و ما زلت اتعلم في هالسوالف, خذها بروح رياضية عزيزي كلنا اخوان, مافي داعي تقولها بصيغة اني صادق او كذاب... الحمدالله الشباب يشهدولي في عمري ما غلطت على حد......

[SL 65]

يا uae speed ما عليك من النيسان. يوم تشتريه رخيص لاكن يوم بتشوف سعر قطع الغيار بتيود راسك.
بعطيك مثال: نحن كنا مركبين هدرز كامل على نيسنان ئنجكتر طويل 97. و بغينا نبدل دبت هدرز الأخيرة (ألي يسامونها دبت توربو) ونبا نركب دبت ئنجكتر مال الوكالة مال 97. وكان سعرها 400 درهم! :shock2:

سرنا وركبنا دبه مال برادو 2003 ب 190 درهم. يعني شوف الفرق الكبير في السعر و شوف فرق السنه. دبت النيسان أجدم بخمس سنين. و اذا تشوف المقارنة مب عدلة شوف دبت الستيشان 2003 ب310 درهم. وبعد شوف الفرق الكبير في السعر و شوف فرق السنه. الله يعلم كم سعر دبت ال4800 أو ال4500 اليديد الوسط؟
و السرويس لاتخبر, عندنا ستيشان 2003 8 سلندر و فحص ال5000 ب250 درهم . و موتر أخويه 4800 2002 فحص ال5000 ب550 درهم.

و شو تقل عن هذا يا crower .

:laugh:

[Crower]

معروف قطع غيار النيسان غالية..... و السيرفس اغلى.... التويوتا معروف و ما يحتاج على قوله الشياب...... الاستيشن شيك في المخبى..

[SL 65]

بصراحه أنا مب عصب و أشهد أنه عندك خلفيه عن الميكانيكه. لاكن أنت أول واحد أسمعه يشتكي من الأويل بمب. وبعدين شو يخص القير في نظام الفتك:confused:

أنا ما عندي أي خلفيه عن عالم السيارت الى قطره من بحر. ممكن تشرحلي الي قلته عن مشكلت تبديل المكينه الى 4800 مره ثانيه و رتب المشاكل لو تسمح.

[Crower]

ان شاء الله. بحاول ابسطها لك....
1- الاويل بمب في محرك النيسان 4800 كان فيه عيب مصنعي في اول دفعة... و كان في بعض اولاقات الايل ما يوصل المكينه بسببها و بالتالي تدق المكينه او تصرف ايل...... عدلوا هالعيب بعدين في الدفعات اللي عقبها بس طبعا اول ناس اشتروا السياره او المكينه تبهدلوا لحد ما حددوا المشكلة, لان البمب مب خربان, و شغال..... بس عيب من المصنع في طريقه عمله, طبعا الحل كان انك تاخذ اويل بمب من الدفعات الثانية (طبعا سحبوا الخربان من السوق و صلحوا كل السيارات في الوكالة). بالنسبه لي المكينه كانت 15 كم بس و دقت عندي و بالتالي خسرت لين عدلتها من اول و يديد.
2 مسألة الجير بسيطة...... النيسان من موديل 88-91 جيرهم 5 مريح وايد... و مافيه تناسب مع الدفريشن... و الجي ال جيره مريح بعد. المشكلة انك توصل سرعه كبيرة في جير 4. بس يوم تبدل 5 السياره ما تمشي خلاص لان الجير وايد مريح... و ان خليته جير 4 حاكر وايد...... فهمت عزيزي.

[Third Eye]

سوال


هل البرادو باب واحد فيه تانكي إحتياط؟

[SL 65]

أنا فاهم سالفت الجير. النيسان الكبسولة 91 الي موجد عندنا انكسر جير الوكالة. فخذنالة جير مجدد مال 95. الجير الجديم كان ينزل 140 في الجير الثالث بس يوم بدلنا الجير استوى الموتر حاكر قام ينزل 130 في جير ثلالثه. أما النسب الثانيه فيها فرق بسيط صعب يتلاحظ!

بس لو تلاحظ اذا أنت كنت مركب تواير وكاله و دست الموتر خط (مش مهم مديل الجير), ما ينفع تخلي الموتر جير أربعه حاكر وايد من يطوف RPM 4100 دزه خمسه. بينزل الموتر أكثر بوايد. لاكن اذا مركب تسعميه (15 أو 16) ما في فايده لازم تخلي يحكر جير أربعه. أنا جربت أكثر من نيسان كبسوله, طويل , كربيتر, ئنجكتر. كلهن فيهن هذا الشيء!

لاكن أنت فوق يبت سالفت الجير مع نظام الفتك؟
ما أعتقد له علاقه :think:

[SL 65]

ر

[SL 65]

لا بس تانكي واحد. لاكن الطويلة الرقم واحد و ثنين فيهن, و نظام التانكي السبير تماتيك, ما يتفول الا اذا كان الكبير فل, و ما يستخدم الا اذا كان الكبير فاضي. و الشيء الغريب أن الفل دبل تانك ب160 درهم يعني اكثر من النيسان و الستيشن, و المسافه على الشاشه توصل 1100 بس يمشيك 1000. طبعاً هذا على سواقت الدريول.:D


وتصدقون يا جماعه أنه البرادو 2005 6 سلندر الجير العادي ست غيار (الجير العادي بس على رقم2 وسعرها 114000 درهم). :shock2:

[uae speed]

هلا شباب ... ما شاء الله معلوماتكم ممتازة يا crower و sl 65 :)
وأنا تقريباً خلاص باخذ السيارة خلال هالاسبوع اواللي بعده ..
اللون أسود فل اوبشن باب واحد ..
وباجر بمر الوكاله علشان اشوف اجراءاتهم .. ويمكن اسوي تست درايف اذا قدرت !

مشكووووورين شباب على مشاركاتكم وما قصرتوا .. :)
عبدالله :)

[SL 65]

الله وياك والله يوفقك لاكن بصراحه أنا أشوف بلادنا ما ينفع فيها اللون الأسود مع أنه لون رهيب. الذهبيه غاوية لاكن انا ما كان لي نصيب فيها. قالولي لازم تصبر شهرين! لذلك أنجبرت بل اللون اللؤلؤي.:cry:

[®Lumina ss 2002]

رد مقتبس من uae speed
هلا شباب ... ما شاء الله معلوماتكم ممتازة يا crower و sl 65 :)
وأنا تقريباً خلاص باخذ السيارة خلال هالاسبوع اواللي بعده ..
اللون أسود فل اوبشن باب واحد ..
وباجر بمر الوكاله علشان اشوف اجراءاتهم .. ويمكن اسوي تست درايف اذا قدرت !

مشكووووورين شباب على مشاركاتكم وما قصرتوا .. :)
عبدالله :)
الله بيارك فيك يا بوحميد ومبروك مقدما و الله يعطيك خيرها ويكفيك شرها وان شاء الله اختيار موفق:p

[uae speed]

up

سوري شباب رفعت الموضوع ..
المهم .. الظاهر ما في نصيب في السيارة ..

خلوني أقول لكم السالفه ..
رحت الوكاله وقعدت مع المندوب بخصوص السيارة ..
قال للأسف مش متوفر حالياً اللون الأسود ..
ما عندنا الا ابيض وذهبي ..

قلت له والحل ؟
قال اصبر لين اواخر شهر 2 .. قلت خييييييييييبة اتخيبكم ..
بشتري رولز رايز انااااا :mad:
انا مب مقتنع الا بالأسود ..

المهم .. كلمة مني وكلمه منه ..
واخر شي عرفت ان اللون الأسود على البرادو (كوبيه) نادر ويطلبون كميات بسيطه ..
انا استغربت .. قلت له ليش يعني مع انه مطلوب ..
قال لا بالعكس .. 85 % من مبيعات البرادو باللون الابيض ..
الصراحه اقتنعت بكلامه .. كل برادو اشوفه بالشارع القاه باللون الابيض ..!

قلت بكلم الوالد بستشيره .. قالي خلاص شوف سيارة ثانية .. :(
أجلت السالفه .. وحطيت على البرادو علامة X

[TOP-SECRET]

احسن لك البرادو يصلح حق اجانب وانقليز لكن حق اهل الامارات والخليج ماينفع:D

شرايك في الفتك اليديد صج غالي بس سعره فيه:p