كلام فاضي
أقصد العنوان اللي كتبته ..
كلام فاضي من الدرجة الأولى
واللي ما يصدق يطوف في الشوارع ويشوف
أي فن وأي ذوق .. بلا ذوق بلا بطيخ الله يهديكم
شارع إش طوله إش عرضه فيه ثلاث صفوف ومن المفترض إن الصف اليسار
للسيارات المسرعة ، وأقصد المسرعة يعني ما تتجاوز سرعة الشارع
اللي هي عادة 80 أو 100 في أقصى حد .
عاد تعال شوف الناس !!!
اللي يمشي لك يسار على 40 أو على 50 تقول شارع أبوه !!!!
يا أخي الناس مستعجلة تبي تروح الشغل تبي تروح موعد تبي تروح جهنم وإنت على كيفك !!
زين ..
الصف اليمين شنو الغرض منه ؟
طبعا الغرض منه شئ واحد .. إن آنه وأمثالي نروح نطوف منه
يعني هاذي حاله بالله عليكم ؟!!!
اللي يضحك إنك لما تشب الليتات من وراه عشان ينتبه ويتحرك
يقوم يضرب لك إشارة على إنه يبغي يلف في اللفة اللي بتجي
عاد تعال شوف اللفة وين ..
تبعد ما لا يقل عن سنة ضوئية عن المكان اللي انت فيه !!
أففففففف
والله منرفزني هالموضوع لكن عاد شتسوي
لو كنت آنه مسؤول في إدارة المرور كنت أحط قانون لمخالفة اللي
يسوق في الصف اليسار على سرعة ماصخة مثل هالجماعة
فيه دول كثيرة تطبق نظام السرعة القصوى والسرعة الدنيا حلوة الدنيا هاذي
خصوصا على الشوارع السريعة ، عشان ما تتسبب في عمل ازدحام مروري
لكن الجماعة عندنا همهم على الفلوس أهم شئ إذا تسرع يخالفونك
أم الكلام الفاضي اللي تسمعه من كل مكان عن حماية الناس
والسهر على راحتهم تراه كله خرييييييييييط .
وإلا واحد يسوق سيارته في السوق على سرعة 15 عشان يدور له موقف
يقوم ينط عليه شرطي المرور ويا دفتره طاااااااااااخ مثل المصارعين
والا هو منسدح فوق السيارة : هااااااااا طحت عليك ليش مو لابس الحزام ؟؟
يا أخي أي حزام الله يهديك الريال يدور له موقف في هالحر وانت حزام
شنو فايدة الحزام في هاللحظة ؟؟
والله ولا شئ ، لكن عاد النحاسة عشان يطلعون من عندك خمسة دنانير بدون تعب .
يالله ماهي سايبه على قولة المصاروة.
نرجع حق موضوعنا
الحل الوحيد اللي أطبقه حاليا هو إني كل ما شفت حد ماسك الصف اليسار
وما تحرك مع أول تنبيه مني ، على طول أرجع الصف الأوسط
وبحركة سريعة ومفاجئة أدوس بنزين وأتوجه بزاوية حادة مقدارها
36 درجة وشخطتين وفووووووووووووووووووووووووووووووووو
طبعا مع مراعاة إني ما أصفقه بالسيارة ولا أصفق الرصيف في نفس الوقت
بس .. طلعت حرتي فاش فاش فاش
!! الفلفل فن وذوق وبطيخ !!
عرض نسخة للطّباعة |
ارسل هذه الصفحة لصديق]
