المطبات الصنا عيه هذي الايام تحاصر منزلي من كل الجهات
الحي حقنا نبي نغير اسمه من حي (......) الى حي المطبات.
والله ماصارت..... اذا طلعت للعمل قبل ما أوصل الشارع العام ابلع لي فوق الستة مطبات وان بغيت اروح للسوق أو اي مكان المطب لازم ( يسلم) علي في الروحه والرجعه...... ياكثر ما يحبني وأنا أبغض ما أشوف هو.
وبعض هذي المطبات صراحه (سلامه) أقشر و يعور مره.... يرفعك مع سيارتك فوق بعنف ثم يمحط بكم بدون رحمه.....تهدي والا ماتهدي....مافيه فرق.
وبعضها لا والله مطب حنون وعلى قولتهم (مطب انسيابي) يرفعك وينزلك بهدوء..... والله يكثر الانسيابيين.
فكرة نشر المطبات داخل الاحياء كانت ردة فعل على بعض السائقين المراهقين
اللي يسيرون بسرعات عاليه داخل الاحياء وبعضهم يفحطون أو يستعرضون......قالوا نسوي مطبات صناعيه تمنع التفحيط والتهور.
وكل يوم طالع لنا مطب........لعيون هذولا المراهقين(المبزره).
طيب وش ذنب الناس ؟
سياراتهم تتضرر .........ووقتهم يضيع في تسلق هذي المطبات.
وهل هذا هو الحل الامثل لمنع المتهورين؟
والله وكل يوم أسمع تصريخ الكفرات وحتى وانا أكتب الان أسمع تفحيط.
يعني اللي بيفحط على سيارته مو مهتم فيها.......أكيد ما تهمه المطبات......والا انا غلطان.
تدرون أني بغيت أ سوي حادث بسبة هذي المطبات..:(
أنا دائما أروح للعمل بطريق شبه مباشر من الحي الى الشارع العام.
هذا الطريق قاموا حطوا فيه مطبين ( بس أيش مطبين كأنها حقت خيول قفز الحواجز......ياناس ترى معانا سيارات ودفع أمامي مو راكبين خيول)
المهم أبو نايف لازم يلقى له صرفه.......... صرت أطلع مع شارع موازي -ابعد شويه وداخل في حارات ويخترقه تقاطعين)
وفي وحده من هذي التقاطعات طلع علي واحد ولفيت عنه وبغيت أدخل في شجره مثل شجرة(هدية) ابو غريب ...
بس رب البيت سلم................................
وحتى هذا الشارع النكبه حطوا من قريب فيه مطب.........
وش السالفه
لا يكونون مستقصديني أنا..........بس أنا تارك التفحيط من زمان وبعدين أنا ما كنت أفحط داخل الاحياء.........وعفا الله عما سلف.
.
أعرف أن مشكلة المطبات لاتوجد في بعض الدول المجاوره.
ولكن هذا ما يمنع الاخوان أنهم يعلقون على الموضوع.
والسلام ختام..............والمعذره على كثرة البربره.
عرض نسخة للطّباعة |
ارسل هذه الصفحة لصديق]
