الجار الحار
سالفتي ياناس ما مثله سالفه
سالفتي سلمكم الله عن الجيران الحارين
الجار الحار اذا قابلته عند الباب ناظرك من فوق لتحت بنظره مريبه جدآ (مع اي بناتي مشبك؟)
اذا راح للمسجد وخلص صلاة شغّل الردار وبدى يتلفت يمين يسار ورى فوق تحت حتى بمخابيه يدور عياله وعيال جيرانه (تقل الله بيحاسبه عن ألأمه كلها)
واذا طلع من الصلاه ماغير مخازز بالناس كلهم حتى الأمام ما سلم من خزه وكأن الناس كلهم ناوين يسروقون بيته او يغازلون بناته
تعال عاد اذا انت واقف مع خوي لك عند الباب شف عاد ردة الفعل (مايسلّم)نظره مريبه وبعدها نظره مزريه من فوق لين اخمص اخماص رجولك
ويقول ياوليدي وراك قاعد بالبرد ادخلو ادخلوخلو عنكم وقفة الشوارع (يعني حريص عليك)
واذا رجعت من الدوام تبي توقف قدام بيتكم تحت الظلال لقيت سيارته منسدحه من الضحى حدر الشجره
وان جيت يوم ووقفت قدام بيته (لو انه بدون ظلال) سفّل بسلسفيل رابع جدانك ولو يغسلونك بماء زمزم ما طهرت(ضاقت الوسيعه يومك توقف قدام بيتي)
وبعد كذا انت تبلع لسانك وتسكت لأنه جار قديم وشايب حتى لو انه يجيد السباق وتصيد الفرص في الوقوف تحت شجرة بيتكم
طيب ياخي الشجره هذا انا اللي زارعها وانا اللي اعتني فيهاوانا اللي متأذي من ورقها اليابس (طاحت ايد الخادمه وهي تكنس الحوش)وانت اللي تتهنى بظلها
وبسرعة البرق تخطر ببالك حركة نذاله وتسمى هالنوعيه من الأفكار (تلعبوني والا اخرب)الفكره هي قطع الشجره وعلي وعلى اعدائي
وبعد تفكير قليل تخطر ببالك فكره اكثر حسد ونحاسه ونكايه في الجار الحار
الا وهي اوقف العراوي القديمه
فبكذا الجار بيموت قهر لأن الموقف صار محجوز 24ساعه للست هانم عراوي
وانت طبعا ميت قهر اكثر منه لكن نكايه فيه ويباسة راس وعناد لنفسك (العروه بالظلال والشبح بالشمس)
ويتم الوضع على ماهو عليه لين يتأدب الجار او يلقاله جار اخر يوقف تحت شجرته لو كانت المسافه كيلو بس المهم (الصالون)يقيّل بالظلال
المهم اذا جارنا العزيز جى يوقف وانت عندك عزيمه وما لقى موقف قدام بيته (لو انه مايبيه)قوّم ضيفك من عشاه عشان يوخر سيارته(لو سمحت عندي اغراض ثقيله بنزلها من السياره) وتلقاها علبة مناديل وفاضيه بعد
جينا لأوقات نوم هالجار الغثيث
ان قعدت تحبرش بحوش بيتكم بالظهريه او بزران الحاره لعبو كوره بالشارع او مر من الشارع ونيت 454او دينا مشقوقه كنداستها او حتى البنغالي اللي يكنس الشارع كنس بخشونه بذاك الشارع نط الجار وطلع بوزاره وفنيلته المخرومه وبدى يلجلج على الرايح والجاي,وخذ من الدعاوي(لو الله يقبلها كان افنت اسرائيل وروسيا)
وبالليل ان طلعت عقب 11 ماتدري الا هاللي يطل عليك من الدريشه (هيّن الوعد صلاة الفجر) وياويلك ان ماصليت بالمسجد
وان قابلك بعدالصلاه خزّك خزه وعيونه تقول(وشعندك بهالليول يالهيس الأربد يالسربوت يالسفله)
لين الواحد بدى يدف سيارته بلكين بعدين يشغله وان رجع طفى الموتر قبل ياصل بيته بكيلو(الله يرجع ايام المكيفات) كنا مرتاحين لوان موترك دبابه محد درى عنك متى طلعت ومتى دخلت
اللي يسمع عن هالجار يقول راعي دين ويخاف على حريم جيرانه كثر حريمه وان جيت تطلع من الأهل وهو بالشارع وقف عند باب بيته تقل انه يبي يطلع المفتاح وهو يبي يشوف من هالحريم(اذا قلنا نيته زينه) اما ان كانت نيته غير كذا والله ماتفتك لو تطلع اهلك وهم لابسين خياش(بيطلع مقاس……بيطلعه)هذا اذا ماكان عنده المقاس من اصله, واذا طالعت فيه اوهمك انه مب حولك او ان نظره ضعيف لدرجة انه مب قادر يشوف فتحة باب بيته
وهو مناك عارف الكـ……..

حنــــــــــــــــــــــ لحد يسكن بالديره اسكنو بالبر ـــــــــــــــــــــون

حنون
سلملي على جارك
نفسي اتعرف عليه...واشد على يديه

بس نصيحة اخوك..............اياك وقطع الشجره


(الجار ولو جار)

والله خليتني اشك فيك يالشايب
على العموم اشتقنالك يراعي الشبح

حنون بس ابي اعرف كم قعدت لين تكتبها000000

أجل العراوي ها0000000

ياخي انت تعقد الأمور وهي بسيطه000

انت شكلك من النوع اللي تسوي قلق بالحاره000

ومن النوع اللي يلعب كيرم عند باب بيتهم مع عيال الحاره0000

وان ماخاب ظني شكل جاركم ملسبك امس وجاينا انت صخيتنا بموضوع طويل عريض

تبي تفش غلك فيه0000

ياخوي بطل الحركات هذي يالشطرطون واكبر شوي0000

وانترنت وزحمه واشتراك بسوالف ومسوي قلق وأخرتها كيرم وفريره عند الباب مع

عيال الحاره0000

نعنبو المبزره ياناس000

والله شكل جاركم هذا معاه حق0000

أخ لو يقرا الموضوع هذا00000شرط ليفرشك فلكه على حوض عراويكم000

ماجـــــــــــــــــــــــــــــــــ يمدحون التيب الأيام هذي ـــــــــــــــــــــــــــــــــــد

ماجـــــــــــــــــــــــــــــــــ شال عليها ـــــــــــــــــــــــــــــــــــد



------------------


tariq@swalif.com

ICQ # 50777797

ولكن خلك على مثل هذا ولا تجيب أشكل00000

والحمد لله ترى ماعندنا مشكل0000000

وأن كان ضاق ماجد ثم عطاك أشكل000000

فألحس كراعينك ولاعاد تشكل000000

الله اتمنى هذا جار لي
اعذبه والله

------------------
لا توأجل عمل اليوم إلا باجر
IcQ 58150197