كنت صغيرة ماعرف قد شو كان عمري بالضبط " يمكن خمس سنين ويمكن أصغر "
والمنطقة لي كنا ساكنين فيها طبيعية جدا يعني الطبيعة فيها حلوة وكنت واقفة اطالع الدنيا ,,

فجأة مرت سيارة مب مذكرة لونها صراحة ,, يسوقها ريال من أهلنا بس بعيد " يعني قرابته بعيدة عنا "
كان متزوج وعنده ولدين هذيج الفترة وهو أصلا ما يعرفني أنا بنت منوه وهو ما زال يسوق .. طالعني,, ابتسم لي ,, ودلع لي بلسانه ..!!

هاي ذكرى بالنسبة لي حزينة جدا وهاي اللقطة مستحيل انساها أحينه كبرت وتزوجت وبعدني أشوفه جدامي مثل الحقيقة .... تعرفون ليش.

لأني دريت إنه مات من سنين فحادث سيارة ,, وهو ما زال في عز شبابه

الله يرحمه.

هذي أغلى ذكرى اختزنها عقلي لهذا اليوم .

والله أختي العزيزه / زهره ذكرى حزينه مره ورحمه الله رحمة واسعه. فعلاً الذكريات صدى السنين الحاكي.

السلام عليكم ..

إنت بتقول أخوي الضبع ..ذكريات جميلة .. راسخة في الأذهان .. فما هي أغلى ذكرى ؟..

قرأت هذا الكلام إبتسمت و على طول جى في بالي طفولتي أيام الخبر ( المنطقة الشرقية) .. فعلاً ذكريات لا تنسى مع الجيران والأصحاب إلي كانو زي الأهل و ما أبالغ لو قلت أكثر من أهل .. أيام كنت أروح أنا و أختي عند الجيران و إحنا محملين بعرايسنا أو هم يجون عندنا برضو محملين بعرايسهم و أكيد مع ملابس العرايس , ما نلبسهم من عندنا .. أو كنا بنلعب لعبة العروسة و العريس و نلعب بفستان أمي حق زواجها ... و ذكريات المدرسة الإبتدائية و الخوف و البكى إلي ما لو أي داعي .. بس ضيعت أحلى أيام المدرسة في الدلع و البكى و النوم على الشنطة
ذكريات لما كنا نروح كل أسبوعين ثلاثة لأرامكو عند أصحاب أبويا و أمي .. و كنا نشوف الأجانب مع كلابهم .. كنت لما أروح هناك كأني سافرت لأمريكا ..

أحلى الذكريات .. ذكريات الطفوله.. و لساتها راسخة في مخي و كأني أشوفها زي الفيلم قدامي ..

شكرا لك أخي الضبع .. رجعتنا لزمان أول ..

الله يا شهرناز فعلاً ذكرى جميله الله يجعل أيامك كلها سعاده وفعلاً (الشرقية غير) .