بسم الله الرحمن الرحيم

السلام عليكم ورحمة الله وبركاته


اليوم رحت ابدل قطعه خربانه بسيارتي

فسرت للعقاد في دبي لقطع غيار المرسيدس

فتفاجئت بأرتفاع اسعار قطع غيار المرسيدس بنسبة 30%

قلت له ليش هالارتفاع قالي من المصنع مب من عندنا

القطعه كنت شاريها قبل سنه ونص تقريبا كانت ب 150-145 درهم

اليوم اشتريتها بعد خصم كبير ومعرفتي مع المحل ب 175 درهم كان بيعطيني القطعه ب 191 سعرها قبل الخصم المعتاد 290

والله شي بصراحه عجيب

المرسيدس معروفه قطع غيارها ارخص من تويوتا

لكن اليورو مستمر بالارتفاع وتجاوز الدولار مادري اليوم كم سعر صرفه لاني اخر ما اتذكره كان ب 4.40 درهم

الدولار ثابت على :3.67 درهم
الاسترليني ب 6 دراهم

الظاهر بنرجع للياباني

اذانا ذا بالبيد


كل ما جينا نشتري شي...

(الدولار تصرقع باليورو)


طب انا ايش ذنبي





خلك على تاتا

الربيه ترخص ما تغلى


;)

هذي عندنا في السعودية من المستحيلات

إحنا حتى لو القطعة تجي ب150 يعطونا ب 500 على بالهم أغنى بلد

و هذا اليورو و إحنا ناااااقصيييين .. بس كأن السعر زاد 150 درهم تقريباً ؟؟ مو طبيعية بالمرة

الحمدلله قطع المرسيدس متوفره عندنا ورخيصه لاحظت ان الكل يشتكي انها اغلى في السعوديه الظاهر الوكيل في سكرات الموت عندكم ومعتمد على الي غناهم فاحش يشترون بس

سمعت انه مايقسط سياراته بس كاش تصوروا

فعلا ما عندو شي اسمه تقسيط

هذا شي اكيد طبعا عندنا ولهذا سيارات مثل ال سي كلاس نااااااااااادر ماتشوفها لان اذا شريتها كانك شاري هيونداي اكسنت من سوء المعامله بس خل واحد يشتري s-500 شوف كيف يعاملوه

احين الناس تقصط من البنوك ...


كله زي بعضه

السلام عليكم ورحمة الله وبركاته

أنا ابي أعرف اللي قاعد يقول ان قطع السياره الفلانيه غاليه .. هل الكلام هذا عن تجربه و الا مجرد توقعات ؟؟

بالنسبه لقطع المرسيدس فهي معروفه في السعوديه انها الارخص ما بين كل السيارات الفخمه فهي أرخص من

BMW و أودي و لكزس و انفينيتي بمراحل

و روحوا اسألوا في محلات قطع الغيار و تأكدوا


تحياتي

المشكلة هالايام كل ماتريد تاخذ قطع غيار المانية يحتج راعي المحل ويقول اليورو مرتفع.. لدرجة ان كلمة يورو اصبحت كلمة احتجاج حتى في شركات قطع غيار التويوتا والله حاله...

اتخيل نفسك دخلت محل قطع غيار سيارة امريكية وحصلت القطعه غاليه وتتساءل عن سبب الغلاء يرد عليك راعي المحل ويقول اليورو مرتفع...ههههههههه

بسم الله الرحمن الرحيم

هل معناته ان السيارات المستعمله قصدي المرسيدس هنا الي في السعوديه بتغلا بسبب اليورو مرتفع؟؟؟

اي والله صدقت

القطع الألمانية مرتبطة بالزفت اليورو

قبل أربعة أشهر سمت زنون الأوميغا من باب الاستطلاع فقال لي بـ550 بعد الخصم،
طبعا هذا اللمبة لحالها فقط

وربنا قدّر علي تنحرق اللمبة بعد شهرين ،
فرحت باخذها بـ550 ،
قال لي البائع : اليورو منخفض والقطع نار ،
تصوروا أخت الزينون بعد الخصم 15% بـ890

والله شي يقهر بس ايش نسوي

وكيل زفت ( الجميح )