السلام عليكم ،،،

مساكم الله بالخير و الإيمان

من سوء حظي ، أن موعد تسجيلي آخر يوم في التسجيل !!!

آخــــــــر يـــــــــوم ، ماذا تتوقعون ؟!

أنا أقول لكم ..

شعب مغلقة !

مقاعد على قائمة الانتظار !

تصفح بطيء جدًا جدًا جدًا !!!

و هذا حالي

و أزيدكم من الشعر بيت ..

في أسبوع السحب و الإضافة يجب أن أرابط عند الجهاز و أنتظر بالساعات حتى في أي لحظة قد يسحب أحدهم من الشعبة التي أريدها و بإمكاني أن آخذ مكانه

لا أقول سوى .. الله المستعـــــــــــان

دعواتكم يالاخوان :rolleyes:

استعيني بالرحمن ..
وان شاء الله كل التوفيق
ومن يتق الله يجعل له مخرج ويرزقه من حيث لا يحتسب

اقولك ليش تاخرتي :(
اخوك حروف سوالف

و نعم بالله

صار لي ساعتين منلطعة جبال صفحة التسجيل .. الله لا يورك التصفح بطي و شعب مقفلة و ماكو حتى اختياري

مو بكيفي .. أنا مستجدة و ثانوية عامة .. بنات رقمهم الجامعي 1000 و شي انا 4000 و شي .. ..

لا حول و لا قوة الا بالله

اتكلي على الرحمن
اقولك شغله
في موضوعي سؤال بسؤال
غيري جو فيه

الله يوفقك يا رب ....وجميع المسلمين

اختي مسلمه
فضلا لا امر تشرحين لي الطريقه بس لاستفيد

وكيف وشلون شون يسسون
ارمسي لي كل الرمس الس تقدرين ترمسينه بهالعالم عن هالموضوع
وش رايك ....

السلام عليكم ورحمة الله وبركاته أخيتي في الله مسلمة

يسر الله أمرك وفرج عنك كربك ...وأبلغك مرادك بإذنه تعالى ..

الدعاء الدعاء أخيتي في الله

بشرينا ولا تنسين البشارة ...

الله المستعان ..

لا يا معود بعد ما صار لي ساعتين قمت دخت ابي انااااام و لا ياني نوووم

الطريقة الله يسلمك .. أن كل طالب له صفحة في موقع الجامعة يسجل منها مواده ، لأنهم راح يغلقون صالات التسجيل !

أنا و لله الحمد و المنة صادف تسجيلي آخر يوم كوني مستجدة !

في يوم التسجيل لازم أدخل على صفحتي اللي فيها موادي و أدور على مواد آخذها للفصل القادم ، هذي المواد تكون مدونة في كتاب فيه مكان المحاضرة ، مدتها ، دكتورها ، موعد اختبارها النهائي ، و غيره .

ادخل رقم المقرر و أشوف هل في مكان في الشعبة ؟ إذا ما لقيت قد يكون في مكان بقائمة الانتظار ، أقدر أسجل فيها و قد يقبلوني و قد لا !

بعد ما تسجل حتى لو على قائمة الانتظار ، تضغط على عودة و تكتب رقم مقرر ثاني تبي تسجل فيه ، و هلم جرا :rolleyes:

عاد الحين بعد الساعة عشر ، أقدر أسحب و أضيف على راحتي ، لكن المشكلة مو في جذي ، المشكلة في عدم وجووووود شعب مفتوحة

الله يعين ، بس ان شاء الله يفتحون بعدين حق المستجدين ، و يسوون لي ما يسمى " استكمال جدول " ما راح يخلون الكورس يروح علي

الحمد لله على كل حال ، بس تدري التصفح لما يكون عندك بطيء و عندك بس ساعتين تسجل فيها و شعب مقفلة ، شلون بتكون حالتك ؟!

متوتر و على أعصاااابك و حالتك حالة ، عسى عينك ما تشووووف

شكرًا لك أخوي حروف الخير

شكرا لك انتي بالتوفيق

اساليب عجيبه
عندنا الكمبيوتر يسوي كل شي
يعني اجي اخذ الجدول واذا فيه نواقص
اقدم طلب واهم يسوونه

هلا اختي مسلمة ...

نصيحتي لك بان تتوجهي لمكتب التوجيه واللارشاد بكليتك وباذن الله يفتحون شعب اضافية اذا كنت مسجلة في اقل من 9 وحدات ...

الله يوفقنا اخيتي ...

اختك هديـل..

و عليكم السلام و رحمة الله وبركاته ،،،

و اياااااك يارب

ان شاااااء الله أول ما يتعدل الجدول أبشركم

بس الله يعافيك ، جرة فول على البشارة

الله يسهل عليج اختي ...

جربت تعب التسجيل والشعب المغلقة ...

الحمد لله سجلت 6 مساقات ..

وان شاء اللعه اتحصلين المساقات إلي اتريحج ..

أجمعين يا رب

متفائلة خير ان شاء الله الأيام الياية بعد ما يفتحون شعب للمستجدين ، إن شاء الله أحصل مكان

موفقة ان شاء الله أختي

اختي الله يوفقج..


بس ممكن سؤال..

اتخصصتي ولا بعدج ؟

أجمعين يا رب

لا اختي بعد .. تو الناس على التخصص

لازم آخذ 51 وحده ، و هي عبارة عن مواد مشتركة كلها نتوخذ قبل التخصص علشان يعطونا فكرة كافية و وافية عن كل تخصص و الطالب شوف شنو يميل له و يتخصص

في ناس عندنا تتخصص في بداية سنة رابعة

يعني باختصار .. جدامي طريـــــــــج على التخصص

مساكين

احنا في جامعتنا يسمونهم Freshmen .. انتو شيسمونكم ؟ .. Freshwomen ?

مساكين هالطبقة من الطلاب داائما يخللونهم في الأخير

الله يعينكم على التسجيل

نظام التسجيل عندكم يشابه إلى حد كبير نظام التسجيل عندنا في الجامعة

الله يعينكم وييسر أموركم .. أنا ماعندي تسجيل الفصل الجاي لأني طالع تطبيق

تحيااااتي

لا يسموننا ((مستجدين )) New comers

ما عليه ، في مستجدين فصل ثاني و راح يفتحون لهم شعب لأن كلللل الشعب مسكره ، و إن شاء الله يا ربي ألقى عند الدكاترة اللي أبيهم .. و كل تأخيرة و فيها خيرة ;)

راحت عليك :rolleyes: خلصت دراسة ، خلصت الوناسة ، الحين كراف و شغل و لوعة جبدي ؟ باجر تقول يا حلو أيام الجامعة

الله يعين الكل و الجميع

هلا اختي مسلمه

السلام عليكم

يعني جالسه هنا ومسويه ربشه وازعاج

طيعيني واتركي الجامعه ..وخليك مشرفه بسوالف

خذي عندي سالفه رفهي عن نفسك ..
في السنه الاخيره من الجامعه كان باقي لي ماده .. ( ماشي )
الماده لغوها باخر فصل دراااسي ..يعنى انا الوحيد طلعت ما أختها
الظاهر كنت نايم بالقاعه المجاوره
المهم رحت للدكتور قالي اسمع انت ويا ويهك ..روح واعمل بحث في وكان الموضوع عن قبيلته حقدت عليه
وتعالي بنهاية الفصل اختبرك ..قلت تم ..وكانت احلى ماده ..
ماده بدون حضور واختبرتها وطلعت الاول بالماده

أسير فايق ورايق وتصبحون على خير
وموفقه انشالله

و عليكم السلام و رحمة الله و بركاته ،،،

حيا الله أسير جدة

شسوي ياخوي ، لاعت جبدي

اترك الجامعة و اصير مشرفة هني :eek: لا يا معود .. خل الاشراف لأهله ، ما لي خلق عوار راس :rolleyes:

أحلىىىىىى شيييييييي لا حضور و لا هم يحزنون

بس تدري ، متعة الجامعة بحضور المحاضرات و لويتها و دوختها ، وايد وايد استمتعت هالفصل باللوية و الدوخة ناس وايد قالت لي ضعفتي ، مسوية رجيم ؟؟ قلت لهم لا رجيم و لا شي ، صاعدة نازلة ، رايحة رادة ، هذا رجيمي

حياك الله ، نوم العوافي

الله يوفقك دنيا و آخره

همسة :

لا تطول الغيبات

طمنينا أختي ..

خلصتي تسجيل .. وحصلتي المساقات إلي اتناسبج...


موفقة ...


تحياتي..

ههههههههههه

ضحكتيني اختي و انا ما لي خلق اضحك

وين أخلص تسجيل :rolleyes: .. وحده من صديقاتي قالت لي لا أحاتي لأن في مستجدين فصل ثاني راح يفتحون لهم شعب و إن شاء الله ألقى .. و إذا ما لقيت ، ما راح يخلون جدولي جذي و الفصل يروح علي ، لازم يسوون لي ما يسمى بـ ( استكمال جدول ) يفتحون شعب اضافية مثلا او يحطون مقاعد انتظار اضافية في الشعب المقفلة ، يعني لين يترقع الجدول

لذلك بريح راسي من همه الحين شوي لين بداية الفصل القادم ان شاء الله

لكن وين أريح راسي :( وحده ثانية مستجدة معاي سألتني شنو سجلتي ؟ قلت لها بس مادة على الانتظار !! قالت فتحوا شعب و أنا سجلت فيهم روحي لحقي عليهم !! في الحال دخلت الموقع لقيت شعب بس وقتها ما يناسبني

الله يكتب اللي فيه الخير و الصالح

يزاج الله خير على الاهتمام و السؤال

بارك الله فيج أختي

آسفــــــــــــــــة أختي هديل ما شفت ردج الا تو

3 وحدات بس حتى الآن .. بس إن شاء الله هالجدول وراه وراه و الزمن طويل

الله ييسر

صراحه من زمان كنت بكتب رد بس خفت اكتب رد ماعرف شقول
واروح اخورها واطلع من مطب لمطب ثاني فاقلت مجرد قراءه دائمه
للموضوع افضل من اني ادخل في موضوع طريقه للمطلاع :P
لكن ماقول الا الله يكتب فيه الخير وان شاء الله تحصلي مكان اضافي
و3 وحدات وش فيهم حلووين قمنا نخور ماعليه
بالتوفيق ان شاء الله وخلي عندك مصادر سريه في الجامعه
يجيبوا لك الاخبار اول باول يمكن يتم افتتاح جديد ولاعندك خبر فاتحرصي

شكرا لك

مع تحيات

الاوهـــام

الأوهام = الحل الصعب

ليش مغير اسمك ( عفوا على الفضول )

شكلك راح تخوره و تنجبه

3 وحدات حلوين :rolleyes: متى اتخرج بالله و أنا لازم انهي 120 وحده و أزيدك من الشعر بيت .. هال3 وحدات على قائمة الانتظار بس إن شاء الله انقبل لأني رقم 4 بالقائمة

إن شااااء الله أضبط لي هالمصادر ;)

الله يحفظك

هلا مسلمه

غيرت الاسم لاني مشارك باربع منتديات وجميعها بهذا الاسم

الحل الصعب وماحبيت واحد يطلع عكس السير

فارسلت لسردال مشكورا وغيره لي والحين الاربع باسم واحد

وهم الاسم حلو وهي قصيده لمهندس الكلمه الامير بدر بن عبدالمحسن

وخذي راحتك ابد مافيها فضول ابد خذي راحتك

~~~~~~~~~~~~~~~~~~

120 وحده و الثلاث على قائمه الانتظار انتي لو داخله التجنيد احسن
الله يعينك والله تكسرين الخاطر الظاهر عيال اخوك الصغير يتخرجوا من الجامعه وانتي للحين تنتظرين

بالتوفيق ان شاء الله

شكرا لك

الاوهاام

اهااااا السالفة جذي عيل :rolleyes:

عالبركة الاسم اليديد

لالا أبشررررررك ، صرت مسجلة بالشعبة ، قبلووووووني

بس الحين ، سجلت مادة إحصاء على الانتظار ، أول وحده في القائمة ، راح أنقبل فيها إن شاء الله ، بس خلال أيام

حلوة هذي عيال اخوي يتخرجون و انا بعدني

تفاءلوا بالخير تجدوووووووووه ;)

الله يوفقك دنيا و آخره