السلام عليكم ورحمة الله تعالى وبركاته
وعيدكم مبارك


رواد سوالف:p ( حلوة رواد )
ماهى المواقف التى تعرضتم لها أو وضعتم فيها وسببت لكم الاحراج أو الضحك أو الغضب ألخ الخ ألخ....

ارجو أن لا تبخلو علينا بمواقفكم....كى نفيد ونستفيد

وأنا راح ابدأ بنفسى....شخصيا كدت ان احرق ابن خالتى...أو ل يوم عيد...وذلك عندما كنت انوى أن أبخره...لكن المدخن انفلت من يدى..ووقع عليه..لولا رحمة الله..والحقيقة أننى تعرضت لزجرة عنيفة من والده ودعاء غير متوقع فى يوم كيوم العيد حيث صرخ فى وجهى وبكل قسوة ( بغيتى تحرقين الولد الله ياخذج ) :( :( الله يسامحه هذى يزاتى يعنى اريد ادخن ولده وأخلى ريحته عود

هذا الموقف أزعجنى جدا ولم أستمتع بعيدى ابدا..
( بالمناسبة ولد خالتى المعنى لا يزال طفلا )

اعتراف
أعترف أنى أخطأت عندما افلت المبخر من يدى..لكن شو اسوى قضاء وقدر....وهنا لا يسعنى سوى أن أوجه نصيحة لكم
( لا تبخرون الاوادم مول

الموقف حلو وشبه محرج جيتي (بتكحلينها عميتيها )
أنا ياكثر المواقف الي مرت علي بس وين الي اذكر
يوم دقيت على باب عمي بغيت ولد العم ردت علي الخدامه وقالت نايم كررت الطلب ثم رحاحت لتصحيه وقالت دقيت الباب وما صحي وبعدين قلت لازم يصحى صحيه قالت البيبت خالي روح لغرفته وصحيه رحت ودقيت الباب وفتحت الباب وما لقيته ول ماهو فيه يعنى صرنا انا والخادمه فقط رحت على طوال عشا اخرج الا واسمع اصوات الاهل انهم وصلو دخلو البيت وانا ادور كيف أخرج كيف أشرد ؟؟؟

بصراحه موقف مفجع وش اقول لهم !!!!!

ياله من موقف محرج
أعتقد ان شكلك كان بهذى الطريقة وانت ما تعرف من وين تروح ومن وين تي
ويوم شفتهم قلت..يالله اشفيها الدنيا حر اليوم
مبارك عليكم العيد
مب مستحرين..!
يالله تغربلت من خدامة
تحياتى لك..تعيش وتاكل غيرها

بصراحه الدنيا برده تحت الصفركمان بس الحمدلله راح الموقف من زمان ونسينى
الله يستر من الي جاي
تحياتي لك وللجميع

موقف صعب علي، خلى يوم العيد أتعيس يوم في حياتي.
في يوم العيد، كنت بسلم على الوالد وأحبه على راسه، توني بتكلم
ولا يجيني ذاك الكف، طبعاً أنا مش فاهم ليش أبوي سوى هذا الشيء
لكن بعدين، بعد سنة تقريباً، قال لي: لأنك ما صليت صلاة العيد، طبعاً
كنت مظلوم، لأني صليت، ومع أن الموقف صار له أكثر من خمس سنين
لكنه جعل كل الأعياد تعيسة، هذا أصعب موقف في حياتي.

كف في العيد قويه شوي الله يعين اعتبرها هديه عيد
موقف عيدي محرج

حاسة الدنيا برد وتشتى وتمطر...
موقف ولا اسوا يا سردال والله لو كنت مكانك انا مادري شو كان صار لى...
ممكن ترتفع حرارتى
ممكن تنخفض بعد ممكن فى لحظة احس عمرى عصفور جريح
يارب طراق يوم العيد والله ليدور راسى واطيح عليهم ما فعينى قطرة والمصيبة من اعز الناس على قلبى..ويا ليتنى استاهل اخذت ظلم لا سؤال ولا تفاهم..تعرف يا سردال شو مشكلة الشواب عندنا
شى اسمه تفاهم هذا ما يعرفونه..كله يتعاملون بالطراقات..واحد واثنين ما عندهم.زدربهم سيدة لا يطالعون يمين ولا شمال ندخل فى الجد صراحة بالفعل موقف صعب...لكن ما عليه ..فى الأول والاخير الوالد كان يحاتى مصلحتك...بس ما خبرتنا يوم عرف انك مظلوم شو كان موقف ابوك منك..يا ريت يا سردال تاخذ السؤال هذا مأخذ الجد وتجاوبنا عليه
وما تشوف شر ان شالله....وكل عام وانت بخير

في هالعيد كان خاطري إنا نروح ويا الأهل رحلة للبر.. نشوي فيها و اليهال بعد يغيرون جو.. لأني أشوف إنه عيال هالأيام مظلومين.. كله محكورن في البيوت ويا البلاي ستيشن.. و أذكر إنه آخر رحلة لي للبر كانت من أكثر من 5 سنين.. فحاولت ويا الأهل و الأقارب لين ما قدرت أقنعهم إنا نسير ثالث يوم العيد... بس عااد وين طلعوا.. ما ساروا بعيد.. سرنا عند قاعة زايد للأفراح.. تحت جسر المقطع.. (أونه بر هناك!)... و ذبحنا لنا تيس من الزين... و شلينا كم من دياية (احتياط).. بس الجماعة.. ما عرفوا يشوون اللحم عدل.. و حرقوه.. فما تهنينا للأسف:(.. بس لحسن الحظ إنه اليوم الي قبله سرت ويا نسايبي لحتا..و كان شوي محترم هناك.. و كليت لحم.. لين ما قلت بس ... عموما كانت رحلة حلوة... و لو إنها كانت محروقة


تحياتي لك

انا عيدت بسندويتش تونه...

تر حتا بلادنا....بس شكلكم ما تعرفون ابعد من حتا..لو تروحون فوق..تر والله فيه مناظر تسحر العقل والعين..
حتا ما فيها شى زين فى الداخل لكن الجمال والابهار لما بعد حتا يعنى لو تطلعون على ( جيما ) وعقب جيما ( الفى ) ومن الفى مباشرة تسندون فوق..وتطلعون على درب مب مصبوب الشارع زفت..يعنى درب عادية...تلقون بلدان ومناظر تعيشكم عصر الرسول ( عليه الصلاة والسلام ) وترجع من هناك حاس انك أخذت حمام من الراحة النفسية والانتعاش الطبيعى...اكيد دام ان هذيك الارض ما وصلها التمدن والتحضر ارض الاجداد....بس المشكلة اللى ما متعود يمكن يحس الدرب طويلة....وهى بالفعل طويلة...
عاد اتصوركم يايين من ابوظبي لحتا وبعدين تطلعون ابعد..أعتقد بتدعون على
لكن انا انشاء الله ناوية اطب عليكم ابو ظبي.بإذن واحد احد.......
شكرا لمشاركنك يا مدردش بس مرة ثانية خلوا الحريم يشون لكم اللحم اشدراكم انتوا

يااااااااااالله يا لوعة الكبد وانا اقول أشم ريحة ( مش ولابد ) وانا داشة الموضوع....اتاريك إنت ماكل تونة على العيد رحمتك يا ربي

فكرة حلوة زهورة ...

والله وناسة اول يوم العيد ..

حطيت فلوسي كلها بالألعاب النارية وجمعت عيال العائلة كلهم وقعدنا نولع فيهم ...

بس متعه فعلا لكنها خطرة مرررررة :( وحدة منهم بدل ما تنفجر في السما انفجرعلينا بالأرض حسيت يا زهرة ان الشمس قدامي :( :(
والحمد لله الحروق طفيفة للعيال وزعيمتهم .

ومن المواقف الحلوة وانا قاعدة افجر بالجراخي (الالعاب النارية يعني ) ان السيارات وقفت على رصيف الشارع العام قدام مزرعتنا يراقبون الوضع عن كثب وخليت اللي ما يشتري يتفجر ..

بس فعلا لحظااات روووعه جدااا ..

الموضوع كله كوم، والرسوم اللي تحطينها كوم

بالنسبة للوالد يوم عرف أني مظلوم، قال: زين، احرص على الصلاة عيل عشان ما تحصل واحد غيره :(

بصراحة خاطري أروح حتا مرة ثانية يمكن العيد الياي.. خصوصا إنه إجازتي طويلة 4 شهور و نص (قولوا ماشاء الله... فلا تبخلين علينا بالأماكن الزينة

على طاري العود و البخور.. ما حرفت حد و الحمدلله (مثل بعض الناس:rolleyes: )بس حرقت شوي من الزولية..هههه بس زين طرفها ما يبين.. بصراحة أموت في العود و الدخون.. و أشوف إنه احسن بمليون مرة من إنه الواحد يتعطر بالعطور الفرنسية.. لأنها ما تتم إلا كمن دقيقة.. و تطييير.. و السبب الثاني إنه الأهل مسوين علي حظر من استخدام العطور:(..بس يمكن عندنا بالإمارات الأسعار مبالغ فيها شوي..
عنبو يوصل سعر الكيلو لـ 40 ألف عند عبد الصمد القرشي!

سردال.. كل عام و إنت بدون طراقات هههههههههه



تحياتي

حياج الله اختي زهرة ..


بخبرج موقف استوانا ثاني ايام العيد ، يوم سرنا البر ..


انا و اختي و بنت عمي تمينا نمشي في البر و بعدنا من اهلنا .. مشينا واااااايد و نحن نسولف و مب حاسين ، لين ما و صلنا عند جبل صغير ..


و يوم وقفنا هناك ، شفنا سيارة ياية صوبنا ، :eek: عاد نحن تروعنا ، و نشوف السيارة كل شوي تقرب صوبنا ، المشكلة اننا بعدنا من اهلنا ، و حاولنا نرد الى مكانا و لكن لا مفر ، لان المسافة بعيدة و السيارة تقرب ، ( و اقول في خاطريه من وين بتي السيارة احينه ، و شو بييب هذي السيارة في البر ) ، يوم قربت السيارة طلع عمي .. يبي يروعنا .. هو شافنا من بعيد ، و ركب سيارته يبي يسوي لنا حركات عسب نخاف ، و قال لنا ( ليش بعدتوا وايد ) ، قلنا له نحن نستكشف ، ركبنا معه وردينا و هو يضحك علينا ..



و على سالفة الدخون ، العيد اللي طاف حرقت زولية حجرتي

والله يا هديل انتى شكلج سويتى لهم العيد عيدين أنا خوانى لثنينه يونى ثالث يوم العيد ويابوا معاهم الشلق..وخلوا لى البيت ..من الدخاخين والسواد ما يشل..واخوى يتعمد يعق على الشلق..يقول يحب يشوف شكلى وأنا اشرد متروعة ..بس كانت ليلة مثيرة وتحياتى لج عزيزتى

أما أنا قبل صلاة عيد الفطر فقد قمت بتغسيل ثلاثة ن اصل خمسة صُلي عليهم نهار يوم العيد في جامع الراجحي .
وذلك لتعلموا ان ملك الموت لا يوجد لديه اجازة .

مرحبا سردال
سبحان الله بدل ما ياخذك بالأحضان ويستسمح منك على الطراق اللى ياك بفهم غلط... يقولك لا تعيدها
مشكلت اهلنا إنهم يستحون يطلعون عواطفهم جدام عيالهم مادري ليش
حتى أنا مرة..من زمان..طلعت من البيت لبيت الجيران علشان ربيعتى طلبتنى فموضوع مهم...وما حصلت الوالدة أخبرها ةاستاذنت من أبوى وقلتله يقول حق أمى إنى سرت عند ربيعتى بشوره..قالى سيرى ولا تحاتين.. ويوم رديت من عندها أحصل الوالدة ويا خالتى..واول ما شافتنى ..الله وكيلك يا سردال ..عطتنى طراق ليومك أتذكره ..مستحيل أنساه لكن اللى أفكر فيه للحين..هو أبوى ليش ما خبرها

ليش الأهل مسوين عليك حظر عن العطور
اذا تحب تي حتا مرة ثانية ان شاء الله ...ما يهمك ..أدز لك أخوانى يتريونكم عند دوار المدام وبعدين يوصلونكم للأماكن السنعة ..

بعدين الاسعار عندنا فى الامارات مب مبالغ فيها شوى..مبالغ فيها وايد الله يعينا عليهم

والله موقف.....
بس مرة ثانية تحرمون تروحون بعيد عن الأهل

الموت يا اخى ما يعرف عيد ولا سعيد..بس انت ليش قلبتلى الموضوع نكد ...لا حول ولا قوة الا بالله الله يرحمهم ويغفر لهم ...انا لله وانا اليه راجعون..الموت علينا حق...والموت لا مفر منه...والموت نهاية كل حى...وكل عام وانت بخير يا 220...اسعدنى وجودك فى الموضوع..ولو انك غلست علينا شوى بطاري الموت...والتغسيل أعرفك شو بتقول لكن ..( لا مشكلة )
أنا فى الحقيقة ما اريد نكد فى الموضوع ان شالله فاهمنى يا 220.....

هذا موقف ثاني، وأنا صغير، أعيد بين البيوت، كنت مع صاحبي، وصلنا لبيت محترم، كبير وفخم ومرتب، طبعاً رفعت صوتي: عيدكم مبارك يا أهل البيت، سمعنا صوت عجوز: كم واحد أنتوا؟ قلنا: اثنين، قبل ما توصل صاحبي جرني وقال روح جدام، جريته أنا و ....... طلعت العجوز وشافتنا وجان تهزبنا، ونحن طبعاً شلينا عمارنا وركض طلعنا برع البيت



ومرة جانا العيد بعد مطر كثيف، كنا نمشي أنا وربعي في مكان كله رمل وطين، المهم، كلنا سلمنا من الطين، إلا واحد، تخيس بالطين من راسه إلين ريوله، رجع البيت وما عيد

هذا كمان موقف صارلي وانا اتقضى للعيد كان معي ولد عمي انا طبعا رجلي مكسوره اشي على العكزات وحنا داخلين احد المحلات كان هو قدامي وجاء العكاز اليمين في حذأه وهو يمشي العكاز انسحب معه وكنت بأطيح على وجهي قدام الناس لكن اضطريت اني احط رجلي المكسوره بالارض عشان ما اطيح رغم الالم وسويت نفسي عادي خرشتها وقاعد اضحك وهو يضحك على الله ستر


وكمان في ذاكا اليوم تقضيت 500 ريال وبقى معي 500 حاطها بالمحفظه رحت يوم ثاني تقضيت بعض الاشياء وخلاص جينا عند الحساب قلتله عندك صرف 500 قال ايه فكيت المحفظه ما فيه الا خمسه ريال ال500 ضاعت مدري وين قلت له خلاص رجعها اجيك بعدين بصراحه انحرجت كمان كان فيه ناس والى الان ما ادري وين راحت الفلوس يالله صدقه

سمعنا صوت عجوز: كم واحد أنتوا؟ قلنا: اثنين،
حليلكم اكيد كنتوا تحسبونها بتعطيكم عيدية

لله درها العيوز..الحين شو أخبارها
ومرة جانا العيد بعد مطر كثيف، كنا نمشي أنا وربعي في مكان كله رمل وطين، المهم، كلنا سلمنا من الطين، إلا واحد، تخيس بالطين من راسه إلين ريوله، رجع البيت وما عيد

اشدراك عنه ما عيد..؟
عيدت فيه الوالدة بالطراقات مثل واحد اخ هنيه عندنا فسوالف..على فكرة خبرت الوالدة عن اللى ياك..
فديتها أمى ضحكت عليك

والله الموقفين أسوا من بعض
طيب عيل فلوسك وين راحوا

يالله صدقة