السلام عليكم ورحمة الله وبركاته
عزوز شاب سعودي الجنسيه ولد و نشأ وترعرع في المنطقه الوسطى....والده تعيش أنت :(.......وماعنده الا أم عزوز.....
يمتاز عزوز بحب القراءه وهو مبدع في الدراسه ولكنه ضعيف في تكوين العلاقات الاجتماعيه
أنهى دراسته الجامعيه .......فعمل بوظيفة مساعد باحث في هيئة المواصفات والمقاييس ..........وبعد أن أكمل ثلاث سنوات عمل بدأ عزوز بالتفكير بالزواج ليكمل نصف دينه مثل باقي خلق الله اللي حوله.
من قراءات عزوز الكثيره قرأ في كتاب ما..... أن زواج الاقارب غير مستحسن لاسباب صحيه وهناك أسباب أخرى يضيفها عزوز لنفسه وهي أن الزواج من الاقارب قد يسبب المتاعب بين الزوجين أو اذا حصل مشكله بينه وبين زوجته قد تسبب أنشقاق في العائله
لذالك أتجه عزوز الى والدته وطلب منها البحث له عن زوجه مناسبه
عزوز: بس تعرفين يمه أنا مابي من أقاربنا لواخذ بنت عمتي .........وفي يوم من الايام سبحان الله تهاوشت أنا وأياها جتني عمتي وعضت خشمي
....وقبصتني:(... وش أقول لها هذي عمتي أخت أبوي.
أم عزوز: مايخالف ياوليدي نبي نلقا البنات واجد...... مهوب لازم من جماعتنا
أنت بس خلني أكلم الخطابه أم حنظل وهي يقولون أن عندها بنات وااااااجد....بنات أشكال وألوان......... وتعرف القاصي والداني ومافيه بيت ماتدخله.
عزوز انتفخ راسه وأستانس
....قال يمه هاااااه أنا عندي شروط أبغى البنت تكون بيضاء وطويله:p
أم عزوز: أكيد ياولدي مانبي الا بيضاء وطويله وشعرها ناعم وراعية بيت تطبخ وعاااقله ودينه وهاديه.........أنت كل بنت تتمناك وجامعي وموظف وتصلي وتخاف ربك.....وفوق هذا مملوح وش ملحك:p
---------------------------------
بعد يومين ترفع أم عزوز الهاتف وتتصل على جارتها وتاخذ منها رقم الخطابه أم حنظل
أم عزوز: مسيك بالخير يام حنظل معكي أم عزوز
أم حنظل: هلا أم عزوز امري
أم عزوز: مايامر عليك ظالم ياوخيتي أنا أدور لوليدي مره وقلت يمكن أم حنظل الخطابه تساعدني.
أم حنظل: يالله حيها ......ايه وصلتي..
.. أعرف بنات واااااااااااجد وعوايل وااااااجد أنتي بس قولي لنا وش تبون من أشباه ( مواصفات ) وقولي لنا مواصفات ولدك وأبشري بالخير.
أم عزوز: أي والله ترى ولدي مايبي الا وحدة بيضاء وطويله وشعرها ناعم
وولدي تراه أبيض وسنافي ومملوح ------- وعزوز في عين أمه غزال
------وموظف وظيفته زينه ومعاشه زين ومتخرجن من جامعة سعود.
أم حنظل: طيب أم عزوز أنا أبدور وأزهم عليك بعد أسبوع.....بس هاه يام عزوز أن تم شئ ترى الرقم بخمسة الاف........
والرقم + الخطبه بسبعة الاف....
يعني أروح معكم لبيت الناس وأكلمهم بسبعة الاف...
.أعطيكم الرقم بس بخمسة الاف....واضح؟
أم عزوز: واجد يام حنظل:(
أم حنظل: لاياعمري والله عشانك باين عليك حبيبه....... وعشاني مسويه ريجيم
..... والا أنا مااخذ على الخطبه أقل من عشرة الاف......والزباين عندي واجد يام عزوز....أن جازلكم عرضي والا بكيفكم
أم عزوز: خلاص مايخالف حنا نبيكي تعطيني الرقم وماتخطبين...... حنا نبي نروح ونخطب وأذا تم شئ نعطيكي خمسة الاف.
أم حنظل : زين توكلنا على الله
وبعد أسبوع.
أم حنظل جهزت الطلب..
... وأتصلت على أم عزوز وأعطتهم رقم أهل البنت.
أم حنظل : ياأم عزوز هذي البنت اللي تصلح لكم;).... بنت سنعه وشقرديه
هاااااااه يام عزوز أن تم زواج ووفقكم الله...... لاتنسون الخمسة الاف حقتي.
أم عزوز: أيه لاتخافين حنا ماناكل حق أحد.....حطي في بطنك جحه صيفيه
أتصلت أم عزوز على الناس:
أنا أكلمكم من طرف الخطابه أم حنظل وهي اللي ذكرت عندكم بنت في سن الزواج.
أم البنت: أيه مايخالف سيروا علينا الله يحييكم نشوفكم ونتعرف عليكم ويصير خير.
وبعد الزياره باين أن أم عزوز ماارتاحت للناس
عزوز: هاه يمه وشلون >>>>> شفتي البنت.
أم عزوز: أيه والله البنت ماعليها........ بس أهلها كنهم شايفين أنفسهم شوي..
.... أمها تقول ترى لازم يحط لبنتي خدامه ودش.
عزوز: لاوالله خدامه ماعندي نيه..
.. أجيب خدامه ....أجل أنا ليه ابتزوج.........أما الدش مافيه مشكله أكثر الناس عندهم دش.
أم عزوز: هاااااااااه تحط دش
نسيت أني حالفتن عليك على الدش مايدخل بيتي........الدش مافيه غير ذا الحريم الفاسدات اللي مايستحن....... شف عاد كل شئ الا الدش....
عزوز: اووووه نسيت أنك حالفه على الدش
...خلاص مانيب حاط دش والله ماهمني بس لوابحط دش عشان أشوف الاخبار في الجزيره.
أم عزوز: هه........ وش تبي بالاخبار مغير ذبح وذبيح ودمان وماتستفيد شئ ومابيدك شئ.
أم حنظل أتصلت على أم عزوز : هااااه يام عزوز بشري أن شاء الله جازولكم الجماعه؟
أم عزوز : لاوالله مايصلحون لنا......يقولون نبي خدامه وليدي يالله يكد على بنت الناس عشان يجيب له خدامه
.
أم حنظل : معليش ندور غيرهم.
أم حنظل جابت خمسة أرقام أخرى رقم ورى رقم وكلهم ماصلحوا .....
منهم اللي عايلتهم فيها مرض سكر والسكر معدي حسب رأي أم عزوز
وعائله ثانيه أخوهم الكبير يشرب
...
وعائله ثالثه يقولون أصلهم صلب
والعائله الرابعه ..قطوعين حاطين جدهم في غرفة في الملحق بلحاله.... ياويلهم من الله
والعائله الاخيره فيهم عيب واحد : أخوهم الكبير أقشر ودايم سلاحه في باطه ...أم عزوز:لاوالله ------> باكر يذبح وليدي...
قررت أم عزوز أن تبحث بنفسها عن زوجه لولدها عملا بقول القائل .." ماحك جلدك مثل ظفرك"...وتترك أم حنظل وأرقامها.
طبعا أم حنظل لسانها طويل ......أبلشت ذا العجوز تبي دراهم أنا تعبت وجبتلكم أرقام وووو وبالاخير عطتها أم عزوز خمسمية ريال تسد حنكها فيه جعل حنتسها للكسر.
عزوز وبعد شهر سأل أمه عن نتائج بحثها عن زوجه:
هاه يمه لقيتي لي بنيه والا للحين:(
أم عزوز: ماعليك اصبر شوي هذولا ناس مذكورين لي يقال لهم المحماس......عندهم بنت ....ذكرتهم لي بنت خالتك رقيه والبنت زميلتها..... بنت حموله ودينين وابوها متقاعد والبنت بيضاء وطويله وشعرها ناعم.
عزوز: يمه موب لازم يصير شعرها ناعم مايهمني الشعر بكيفه أن شاء الله شوشه
.....أحذفي هذا الشرط عشان نوسع دائرة البحث.
أم عزوز: وشي دويرته
........خل عنك بس ..
لازم يصير شعرها ناعم عشان عيالك بكره يصيرون مزايين وشعورهم ناعمه
..البنات في البيوت قاعدات أنت أصبر ولا تصير مطيور.
أم عزوز أتصلت على عائلة محماس
ألو أم فنجال موجوده
أم فنجال: ايه معاك امري أختي.
أم عزوز: أنا أبكلمك على بنتك هيله اللي تدرس بالسنه الاخيره بالجامعه أنا أبيها لولدي عزوز....وترى عزوز يصلي وحبيب وجامعي وموظف وماعليه قصور.
أم فنجال: ولدك عنده بيت
أم عزوز: أيه عنده بيت أبوه الله يرحمه........مافيه ألا أنا وهو.
أم فنجال : طيب ولدك يسافر برا السعوديه.
أم عزوز: لاوالله ماعمره سافر لها الديار الا مره وحده تبع العمل راح أبو ظبي ثلاثة أيام.....ولغيرها ماقد سافر.
أم فنجال: وش يشتغل طيب.
أم عزوز: والله ولدي وظيفته مممممم وش اسمها ياربي أسمها عسر كايد:(...........أيه باحث في المقاييس.
أم فنجال: وشو باحثه...... والله يااختي أبو فنجال يقول محنا مزوجين هيله الا أمام مسجد.
أم عزوز: أمام مسجد!!!.....ياوخيتي ترى المطاوعه يحبون التعدد باكر يتزوج عليها ويحط على راسها مرة ثانيه .........
ترىولدي يصلي وهادي ويخاف الله......... ومهوب يشرب التتن
.
أم فنجال: والله عجزنا عن أبو فنجال يقول ما أعطي بنتي الا لمطوع يصلي بالناس في المسجد.
أم عزوز: الله يرزقكم...........أقول الظاهر أبوكم يبي يزوج بنته أمام مسجد عشان يتوسط له يصير موذن............أيه هذي سوالف المتقاعدين ......
.أم عزوز خربتها.....قدها خربانه أصلا.
رقم اخر حصلت عليه أم عزوز ......من جارتها
أم عزوز:السلام عليكم ابغى اكلم أم رايق
أم رايق: ايه معك أم رايق
أم عزوز: أنا أبكلمك على بنتك ( رولا ) اللي تدرس بالسنه الاخيره
أنا أبيها لولدي عزوز.......وترى عزوز يصلي وحبيب وجامعي وموظف وماعليه قصور.
أم رايق: طيب.......ولدك عزوز يسافر برا المملكه.
أم عزوز: لاوالله مايسافر ولدي مطوع واذا بغى يسافر راح مكه والا الطايف بس هي مرة وحده سافر برى المملكه روحة عمل لبوظبي....
أم رايق: هذا شئ مؤسف بنتي تحب السفر برا واحنا بصراحه نبغى نزوجها واحد منفتح وشايف عالم ويسفرها ويمشيها....مانبي متشدد
أم عزوز تدبست
: أقول مالت عليكم بس هالحين تعافون الطيب وتدورون راعي الدوجه والسفريات.....
أم عزوز خربتها وقدها خربانه....
.
هلكت أم عزوز بالبحث ستة أشهر وهي على قدم وساق .......وسماعة الهاتف تدهر ليل نهار في البحث والتحري...
عزوز قرر من جهته أن يبحث بنفسه عن زوجه مناسبه .....
.وفي الحلقه القادمه نشوف مغامرات و ركض عزوز بالشورت
________________
يتبع لاحقا
ملاحظه مهمه: عزوز شخصيه ليس لها علاقه بأي عضو في هذا المنتدى.
عرض نسخة للطّباعة |
ارسل هذه الصفحة لصديق]
