مرحبا.....
اذا كنت داخل السعوديه يستحسن قطع الاتصال قبل قراءة هذه القصه برويه ورواقه وعلى القابعين خارج السعوديه مراعاة فارق سعر تصفح الانترنت
ثائر طالب يدرس في جامعة الرياض سنه أولى وقد جاء مغتربا من أحد القرى السعوديه لطلب العلم عملا بقول القائل اطلبوا العلم ولو في الصين
أخونا ثائر بعد وصوله استأجر شقه صغيره ورخيصه جدا لانها بالعربي الفصيح أقرب الى الخرابه... في أحد أحياء الرياض القديمه لان ليس له أي أقارب هنا ولا حتى معارف :(:(
المهم ماشاء الله عليه استأجر شقه وأثثها .....لاتصدقون أثاث أي كلام......يطبخ بنفسه ويدبر أموره وحاله ماشي
.....بس في أحد الايام السوداء الغبراء في تاريخ ثائر أصابته القراده بسبب اسطوانة غاز اشتراها على عجل من محل ابو جبهه الواقع غرب منفوحه ....أبو جبهه لقب يلقب به الافغاني العامل في المحل ....وقد طغى هذا اللقب على اسم الافغاني وتجاوزه حتى طغى على اسم المحل نفسه........وهذا اللقب لايحتاج الى تعليق
......خلقة الله .........ما علينا.الاسطوانه للاسف كانت معطوبه وتهرب ........طبعا تهرب غاز ماتهرب شي ثاني
في ظهر ذالك اليوم أخذ ثائر يشعل الموقد مشمرا عن ذراعيه كالعاده وناوي كبسه ( رز + دجاجة الوطنيه)......بعد يوم دراسي شاق ومليان تهزيء وعنطزه من الدكاتره:(.........وفجأه تندلع النيران في أرجاء المطبخ نتيجة تسرب الغاز....يخرج ثائر من المطبخ ثم ينزل من الشقه الى الشارع لا شعوريا.......ونازل بسروال وفنيله .....الله لايفجعنا:(
للاسف أن العماره اللي هو ساكن فيها ما فيها الا شقه واحده صالحه للاستعمال الادمي والبقيه من الشقق تحت الترميم والتسليك
وبينما ثائر نازل الى الشارع .......يشوف جاره المسمى (مدفون) ويعمل في مصلحة المياه والصرف الغير صحي..... توه نازل من عمارته
يركض ثائر نحوه وعليه اثار الصدمه
مدفون مندهش:
وش فيه عسى ماشر؟؟؟؟
ثائر: الشقه مولعه نار وانا مدري وش اسوي.....
مدفون: يا ساتر !!!! وش سبب الحريقه؟؟
ثائر: الظاهر من اسطوانة الغاز ( الله ياخذ عمرك يابوجبهه:( )
مدفون: طيب وش اللي احترق بالضبط؟
ثائر: ياخي هذا وقت سوالف انا ابغاك تساعدني بأي طريقه أنت شغال في مصلحة المياه والصرف الصحي أكيد عندك مخزون كبير من المويه في بيتك وأكيد عند خراطيش مويه وخلافه
تكفى طلعها وخلنا نطفي النار قبل ما تاكل كل أثاث الشقه ( الله يرحم الاثاث طاوله دراسه خشب وفرشه ومخده وفراش )
مدفون: والله انك قروي .....أي خرطوش وبرطوش وخلافه....ياخي الموضوع سهل >>>>>>> رح اتصل على الطوارئ 911
ثائر: أنا قروي يامتخلف رقم 911 هو رقم الطوارئ في أمريكا
مدفون: أففففف .....صدق صحيح اجل اتصل على الاستعلامات 905 وهم يعطونك رقم الدفاع المدني
ثائر: ماعندي تلفون .....انت معك جوال؟؟؟
مدفون: معي..
.....بس مقطوع:(..........ياخي قهر الله يحرق شركة الاتصالات مثل ما احترق بيتك
.........
وش رايك أرسل للدفاع المدني ايميل بالنيابه عنك!!!
أكيد عندهم صفحه على الانترنت:
ترى الايميل زي التلفون
ثائر: أقول الله يخلف على اللي جابك الشرهه موب عليك الشرهه علي أنا اللي أضيع وقتي معك........ ياخي حل عني وفارقني ....قال ايش ارسل ايميل وانترزفت
ُثائر يشوف ليموزين جاي .....ويروح يركض بسرعه ويوقف في وجهه!!!
الهندي (سائق الليموزين): ايس فيه صديق انت مافيه شوف .....مخ مافيه
ثائر: اقول على شحم... وروح على طول --------> الدفاع المدني
الهندي : اوووه انافيه يسوف هريقه فوق..... هذا بيت انت!!!!!
صديق انت اتصل دفاع مدني بعدين هو يجي .....انت روح الحين مافيه فايده....دفاع مدني يجي أهسن
ثائر: يالله حتى الهنود قاموا يتفلسفون علينا
ياخوي عااااااارف ....... .....بس ماعندي تلفون
الهندي: مافيه مسكل أنا فيه موبايل انت شيل
ثائر ياخذ موبايل الهندي ويدق على 905
الهندي: مافيه هذا رقم صديق انت فين يعيش ....دفاع مدني رقم 998..............والله هاله
ثائر: يدق 998
موظف السنترال: الو
ثائر: الو ....بالله عليك بيتي مولع نار من ربع ساعه عندي اسطوانة غاز انفجرت وأنا ساكن في منفو.....
موظف السنترال مقاطعا: لحظه شوي..
ثائر:..........
موظف السنترال:ههههههه.....
أيوه ....تقول لي...وش سبب الحريق؟
ثائر: اسطوانة غاز تهرب :(.
موظف السنترال: والله حاله.....ياخي المفروض تتأكدون من اسطوانة الغاز وأنها سليمه من التهريبات قبل ما تستخدمونها حفاظا على حياتكم وحياة الاخرين ومساهمة في تطبيق مبدأ (السلامه أولا وطز في الباقي).......كل شوي التلفزيون يطلع لكم ارشادات ونصائح واللجنه الاعلاميه في الدفاع المدني ما ثكلت ترشد المواطنين لكن أنتم للاسف------> تيتي تيتي زي مارحتي جيتي
صحيح بشر معدومي الاستيعاب!!!!
ثائر: وش قاعد يقول ذا ....والله مافهمت شي.....يا ابو الشباب انتم بتجون تفزعون معي وتطفون الحريقه والا لا؟
موظف السنترال: عموما طفي العداد الداخلي والخارجي الحين وعطني العنوان وحنا خلال عشر دقايق بنكون عندك بس عطني العنوان صح أي غلطه أنت تتحملها اذا ضعنا
ثائر: طفيت العداد الداخلي من زمان والخارجي والله مدري وين موقعه بالضبط ....بس ابدور عليه:(....والعنوان هو: تعرف شارع منفوحه العام؟
موظف السنترال: يا اخي اخلص ....أيه أعرفه.
تبتل طوالي وجهك شرق مضبوط تقابلك محطة بنزين سوداء فوقها دعاية سياره أظنها كامري بدون طيس ........شفت........تاخذ يمين من عند المحطه....هذا شارع سامي بن احسان ...من الاسماء الجديده للشوارع......بس الشباب يقولون ان اسمه القديم شارع المهابيل
موظف السنترال: وبعدين مع هذا .........شكلي ابغى اخذ الحين اجازه اضطراريه:(
أقول كمل بسرعه والا صكيت السماعه في وجهك....ناقص تسولف لي عن التفحيط في حارتكم...
ثائر: معليش أنا كان قصدي لو ما تعرف الاسم الجديد وتضيعون لاقدر الله ..............تسأل أي ولد في الحاره عن شارع المهابيل وهو بيوصلك
موظف السنترال: خلالالالالالاص عرفنا مسكنا شارع المهابيل وبعدين؟؟؟
ثائر: بس امسك شارع المهابيل الى أن يجيك على اليسار محل اسطوانات غاز أبو جبهه الله ينتقم منه لف من عنده......ابتل طوااااالي الى أن يتسكر الشارع.....
بعدين ديور تلقى مدخل صغير على اليمين عمارتي قصدي العماره اللي أنا مستاجر فيها ثاني عماره على اليمين
موظف السنترال:..الحمد لله.....أخيرا......خلاص جايين......وسكر السماعه على طول
الهندي: خلاص صديق أنا فيه روح أنت قرقر كثير في موبايل
.
ثائر: خذ 5 ريال وشكرا على تعاونك .......وانقلع عني..
الهندي: لالالالا صديق ما بيغى شكرا
ثائر في نفسه: هندي سواق ليموزين ومعه موبايل لا ونوكيا الرهيب بعد........الله يخلف علي جامعي وطفران ساكن في خرابه ومعي كرسيدا 81 اييييه............زمن
الهندي : أنا يمشي الحين صديق يالله هذا كرت حق أنا....أي خدمه أنا موجود أنا فيه 4 مهل رووس مندي أنت يبغى مندي بس سوي موبايل
.......كله أنا موجود .......يبغى هرمه أنا فيه موجود؟؟
ثائر:!!!!
يالله مع السلامه
وصل الدفاع المدني بعد عشرين دقيقه الى الموقع......واقتحموا شقة ثائر وقضوا على ما تبقى من النيران ولكن للاسف احترق الاثاث حق ثائر:(....(تكفى يا الاثاث)
رجال الدفاع المدني بينهم وبين أنفسهم يقولون: لو أنا دارين أن البيت المحترق ذا الخرابه ما جينا......خسارة بنزين ومويه
المسكين ثائر كان يسمعهم ما خلص من تحطيم الهندي والا طاح في تحطيم هذولا الاشاوس .....
ثائر هرب من شقته المحترقه خوفا من بطش صاحب الخرابه (العماره)
وقرر بعد هذه القصه أن يثور على نفسه لذالك سكن في بيت شعبي وحول الكرسيدا الى ليموزين ودهن رأسه بزيت الكفرات ذو الريحه المشابهه لزيوت الهنود اللي يستخدمونها على شعورهم وقرر يجرب في الصيفيه يشتغل هندي الى أن يفتحها الله
......واذا جت الدراسه يحلها الف حلال
__________
مع الاعتذار للاخ العزيز ثائر
عرض نسخة للطّباعة |
ارسل هذه الصفحة لصديق]
