شباب مشاركه للعضة والعبرة......أتمنى التثبيت... ؟؟؟؟؟
 

شباب كل واحد الي عندة قريب او صديق او معرفه توفي في حادث يسرد لنا القصة.......................... وانشاء الله يكون فيها عبرة وعضه.


بسم الله
أبدى انا....
كنت في سيارتي (ترانز ام) ماشي على طريق الجبيل الدمام...ايام ربيع يعني الجو كان ممطر عموما
مر من جنبي قراندي ممكن موديل 92 ماشي ممكن 160 عموما انا قلت في نفسي خلينا نتسلا مع الرجال
بعدين شديت السيارة وطفته على 180 وكان في السيارة شخصين طبعا بالسائق عموما الرجال رجع تعداني مرة ثانيه
فصبرت شوي وتعديتة ممكن على 200 المهم الي صار اني قررت اني اتعبه ما عاد اخليه يتعدا.... بعد فتره مليت ورحت وخليته شوي اذا برجال يكبس بسرعه انا كنت ماشي 180 جيت ابي اخذ عنه يمين في نفس الحظه اهو اخذ يمين بعدين انا رجعت يسار عموما تعداني من اليمين وكان معصب أهو وخويه وانا والله ما قصت الحركه هاذي بس هو كان يبي يتعداني باي طريقه....... الي صار بعد كذا الرجال يبي يخوفني راح اقصى اليمين بعدين نطل علي السياره بسرعه والله ياشباب من قوت الحركه اني ابغيت انفجر من القهر لانو مالها داعي .
المهم ياشباب ان مرايت سيارتي ظربت في الباب حقه ولاحظو على سرعة 160 تقريبا الرجال في هل لحضه يطالعني ويضحك
وهو ياشباب ينطل السياره مره ثانيه يمين والله ياشباب انه منقوة انطله ان السياره حاصة وتعدتني مع المطر ياشباب بالجنب وهي تتجه لجنب الخط وفيه من جنب الهاي وي منطقه منحدرة وانها تاخذ قلبه اولا امامي ومن ثم علا الجنب.
المؤثر ياشباب اني شفت شوف العين السواق بعد القلبه الاولا طالع من القزازه حقت الراكب الين الركبتين وماسك بحافت الباب والله ياشباب يا القلبه الثانيه انها كانت عليه اي دهكته السياره تحت التنده الله....يرحمه ويغفر ذنبه....
وبعدها حرمت السرعه زي كذا او العب في الخط ..وبعت سيارتي لانه ما عاد لي نفس اركبها...


والله يغفر اذنب..
. للاسف ياشباب اني ماقدرت اوقف.

موضوع ممتاز جداً ... و ياليت الناس يتعضوا من هذه المواقف المؤلمة
 

في رحلتي الاخيرة الى احد المدن السعودية في بداية رمضان

كنت ماشي في خط سريع وسط البلد

و كنت بأزل بعض السيارات اللي ماشيه في المسار الاوسط و رحت للمسار الايسر

و شوية الا اشوف واحد من بعييد يأشر بالنور العالي بشكل مزعج جدا ... حاولت اني ازيد سرعتي و أوخر عنه لكنه كان مسرع جدا و مستمر في اذيته للخلق

جاء و عداني من بعد الخط الاصفر مع انه المسافة كانت قصيرة بين الخط الاصفر و بين الرصيف و انا صراحة خفت على الرجال و قلت الله يستر عليه

السيارة كانت كوريلا 98 و كان ماشي طبلونه كله يمكن 180 او اكثر

بعدها بشوية انشغلت بالحديث مع صاحبي و ماهي الا لحظات الا و اشوف غبار كثيف في آخر الشارع

انا قلت يمكن ناس تفحط و لا حاجة

مع العلم انه في نهاية الشارع دوار كبير مع منعطف قوي نوعاً ماء

و لما قربت لقيت راعي الكوريلا صدم في عمود الانارة بعد ما حاصت عليه السيارة بسبب السرعة العالية و عدم تمكنه من السيطرة عليها

و قفت سيارتي بسرعة و نزلت جري على سيارته و للاسف الناس كلها واقفة تتفرج محد تقدم للمساعدة

طفيت الكوريلا و فتحت الدرج ادور على هوية او اسم او رقم جوال اخذت ورقة الايجار ( السيارة مستأجرة )

و شلت الرجال و حطيناه في السيارة و رحت مسرع على مستوصف قريب

في الطريق للمستوصف الرجال قاعد ينتفض

و قفنا عند اقرب مستوصف خرج الدكتور و معاه واحد و قاعد يفحص الرجال اللي قاعد يرجف في السيارة

مو راضي يدخله المستوصف طبعا بعد ما دقينا على الاسعاف جاء وشاله و وداه لمستشفى حكومي و يقولوا انه معاه صرع

بعد ما دقينا على صاحب السيارة و قلنا له اللي حصل و جاء المستشفى و اتطمنا عليه

انسحبت بهدوء ... و الحمدلله على كل حال


===================

في اليوم التالي لهذه الحادثة كنت راجع على جدة مساءً

في نص الطريق و انا ماشي و الدنيا ظلمة و كانت ليلة الثاني من رمضان يعني مافي نور للقمر

فجأة شفت ناس معتمرين في نص الطريق يأشرون لي

طبعا الطريق معروف بقطاع الطرق و ما عمري وقفت لأحد

لكن حسيت انه المسألة فيها شيء

و قفت سيارتي بعدهم بمية متر تقريبا عشان اشوف الوضع من بعيد

خرجت من السيارة لقيت باص منقلب و راح 20 متر عن الطريق و الشبك اللي فوقه طايح في نص الطريق

ركبت سيارتي و عكست الشارع و خليت انوار السيارة ظاهرة للقادمين عشان ينتبهوا و يخففوا السرعة او اللي يبغا يساعد او امن الطريق يشوف و زي كذا

بعد ما نزلت مرة ثانية من السيارة لقيت سيارة ثانية مقلوبة بعيد عن الطريق و كانت من نوع نيسان صني 98

خرجت مسرع

حاولت افك الابواب مافي فايدة

السيارة صارت عجينة و مافي طريقة اننا نخرج المصاب

بعد محاولات عديدة فتحنا باب الراكب "محل رأس السائق بعد الحادث" طبعا كان مغمى عليه و غارق في الدماء

شميت ريحة بنزين

طفيت السيارة و شلت المفتاح

و شقيت ثوبه و فنيلته عشان اتأكد انه صدره و ظهره مافيهم اصابات

اخذت الفنيلة و مسحت فيها وجهه و خشمه و فمه عشان اخليه يقدر يتنفس

كلمت الشباب على اساس اننا نشيل الرجال من السيارة و نخليه برا عشان الاوكسجين

مسكوه شباب مع رجوله و انا من عند راسه

لما جيب امسكه عشان اسحبه على برا لقيت يدي دخلت في راسه من ورا

قلبت راسه لقيت فيه فتحة طولها تقريبا 10 سنتم و عرضها 5 سنتم

و فيه نزيف

اخذت وصلة قماش و حطيتها ورا راسه عشان يوقف النزيف

و الرجال قاعد يغرغر

حاولت اني القنه الشهادة مافي فايدة

الين جاء الاسعاف و امن الطرق و شالوه

و يقولوا انه عنده نزيف داخلي في المخ او شيء زي كذا

راح الاسعاف

و انا طلعت على السكه شلت الاغراض المرمية عشان لا تعطل السير و بعدين ركبت سيارتي و مشيت

و الله يرحم الرجال و يغفر له حياً كان او ميتا


....

و طبعا كملت الطريق و انا اشوف الناس تمشي على 180 و اكثر و فيه سيارات تتعمد اذية سيارات ثانية

و صاحب سيارة سوزوكي صغيرة قاعد يؤذي صاحب باص و يجاكره و يخش عليه


و الله تمنيت اني اكون في منصب مدير الامن العام لاسبوع واحد


و اللي اهله ما يربوه القانون يربيه


و على فكرة ...

انا اليوم بسافر مرة ثانية ... فلا تنسونا من دعائكم


و الله المستعان

تسلم اخ.... سناري
 

صراحه اخوي ماقصرت الله يعطيك العافيه ولا حول ولا قوة الا بالله.

واتمنى من المشرفين التثبيت لتعم الفائده

لا حول ولا قوة الا بالله
أنا شفت حوادث قدام عيني بس مهي بذي الخطورة
على العموم أنا أخوي الله يرحمه توفى السنه الماضيه من حادث كان راكب مع اثنين و كان راكب في الخلف المهم السايق كان يتطارح مع سيارة و مارضي يوقف (أخوي والراكب حاولو يوقفوه) لا هو ولا الي يتطارح معه وقطعو اشارتين و كان يشفط في السيارة اللي يتطارح معاها و جا يعديه و سيارة في وجهه ضغط فرامل على 240 وحاصت السيارة و شال العمود من جهة الراكب الخلفي بجانب أخي و خبط راس أخوي في عمود السقف من داخل السيارة و توفى الله يرحمه من نزيف داخلي وأنا في منطقة الحادث بعد نصف ساعة ما وصل الاسعاف ولا أحد كشف عليه ولا شي الله يرحمه كان جالس ولا في نزيف أو رضوض و السائق و الراكب ما صار لهم شي الا بعض الرضوض الخفيفة ,ما أقدر أقول الا ان الله اختاره من بينهم و انشالله انه من أهل الجنة و الله يرزفنا حسن الخاتمة.

لا حول ولا قوة الا بالله سبحانه وتعالى

ابن عمتي توفي من قرابة 7 سنين كان معاه كامري جراندي ومعاه 3 من أصحابه في السيارة الراكب الأيمن كان رابط الحزام وكان ماشي في طريق ينبع متوجه لمدينة جده لزيارة أمه في المستشفى وماشي على سرعة 160 وجاه تقاطع في منطقة اعتقد رابغ وتطلعه تريلا صدمته والسيارة اتقسمت نصفين وتوفي ابن عمتي واثنين من اصحابه واصيبوا بكسور وجراح خطيرة والراكب الأيمن لم يصب الا بقطعة زجاجة في رقبته وهو على قيد الحياة

اللهم ارحمهم واغفر لهم وادخلهم جناتك يارب العالمين

انه ابوي ( اللله يرحمه برحمته ) كان ويا عمي يتمشون على خطوط المشاة ( أمام الأشارة ) والأشارة حمره يسمح بالمرور وياك واحد يالس يسالف معا امه وهاد السكان ومجابل وره يسالف معاها ولا هامه شي والاشارة حمره ومسرع ودعم ابوي وطيره ولين قالوله شيله ووده المستشفه قال مالي شغل خلو الأسعاف ايي وبوي كان فيه نزيف وكسور في الرقبة والظهر ويده وريله ومات مكان الحادث بعد نصف ساعه ومحد راضي يوديه المستشفه طبعا عمي ما صاده شي واليوم الثاني يه الريال ويا ابوه وعمامه يترحون امي انها ما ترفع قضيه وطبعن امي قالة مات خلاص ( الله يرحمه ) وكان عذره انه مايبي يوديه المستشفه انه يخاف من الدم طبعا ابوي طار مسافة 70 إلى 100 متر ابعد من مكان الحادث .

:Sad2: :Sad2: :Sad2: :Sad2: :Sad2: :Sad2: :Sad2: :Sad2: :Sad2:
:Sad2: :Sad2: :Sad2: :Sad2: :Sad2: :Sad2: :Sad2: :Sad2: :Sad2:

مشكورين شباب على الموضوع

هذي الحادثة مؤلمة
حدثت يوم عيد الاضحى المبارك في احد القرى الشمالية في منطقة الاحساء (والمعروف ان الطرق في القرى معظمها طرق ضيقة جدا سيارتين يمرون جنب بعض بصعوبة ولانها منطقة زراعية فان معظم الطرق ايضا بجانبها حفر عميقة تشبة الاخاديد للصرف الصحي)

وفي طريق بالمواصفات المذكورة سابقا وعلى ان السرعة القصوى على هذا الشارع لاتتعدى 60 كلم/ساعة

كان احد اقاربي يسير بسيارة عمه -الذي كان في الحج- (المرسيدس موديل 90) بسرعة تتعدى 180 كلم/ساعة وكان معه 4 شباب لا تتجاوز اعمارهم 17 سنة

وهم كذلك اذا بمنعطف قوي جدا وبه شبه الحفر بحيث ان السيارة بهذه السرعة تطير في الهواء

في الحقيقة هذا ماحصل فرتطمت السيارة (بسرعتها) بجذع نخلة ثم انقلبت السيارة عدة قلبات بحيث تطاير كل من في السيارة

وما النتيجة:
- من كانت بجهته الضربة توفي فور وصوله المستشفى وكان عمره 13 عاما
- السائق اصيب في يده ولم تشفى الا بعد عدة عمليات وكان عمره 17 عاما
- الراكب الامامي لم يصب باي اذى ولله الحمد وكان عمره 15 عاما
- الراكب الاخير اصيب باضطراب عقلي حيث هام في الشوارع بعد الحادث ولكنه شفي ولله الحمد وكان عمره 15عاما

:cry: :cry: :cry:

ومن المؤلم ان والد المتوفي كان صديق والد السائق

وفي الحقيقة في العزاء لم نعرف نعزي ام نبارك للناس بالعيد

:damp: :damp: :damp:


والمعذرة من الاطالة:Sad2:

انالله وانا اليه راجعون

الله يرحمهم ويغمد روحهم الجنه

مكشور صاحب الموضوع على العبره وباقي الاعضاء

للرفع

الله يرحمهم كلهم و عظم الله أجرك يا MR_Z & 180B

و أيضاً للرفع

يعطيكم العافية ربي ياشباب
عمومن الله يرحم كل من مات ويشافي كل حي
وأشكر أخواني المشاركين والمتصفحين....

لا حول ولا قوة إلا بالله

وإنا لله وإن إليه راجعون
.
.
إخواني.. لكم جميعاً.. :cry1: عظم الله أجوركم.. ورحم موتاكم.. وغفر لهم ذنوبهم
.
.
حوادث السيارات كثيرة.. وبإزدياد.. بإزدياد مستمر
الله يكفينا شر هالحديد
والله يستر علينا
.
.
قبل فترة قريبة طلعت مع واحد من اخواني بعد صلاة العصر للعاذرية ( منطقة برية ) وكان الجو حلو وخيال.. للأسف إللي نكد هالطلعه السرعة.. كنت أمشي بالخط الفرعي وهو غير مزفلت تقريباً 130 كيلو.. ولما هديت السرعة.. تجاوزتني سيارة صغيرة من نوع سزوكي وبصراحة سرعته خيــــال يعني قليلة لما أقول 160.. الطريق بالإضافة إلى كونه غير ممهد تعبان وبعد الأمطار فيه جروف واجد.. الأخ اللي جاوزني بيتفدا جرف بالطريق فحاست فيه السيارة.. وإنقلبت على جنب وطلعت عن الخط وضربت في صخرة كبيرة.. طبعاً ولله الحمد السائق نجا.. ولا جاه شئ.. اللهم جروح خفيفة.. وقفوا شباب معنا وعدلنا السيارة وصبرنا شوي وشغل.. ومشينا وراه إلى المخيم.. طبعاً هنا الحمد لله ما فيه ضحايا ومافيه أذية وبشدة.. لكن يا شباب السرعة خطر.. والله خطر.. في ثواني يضيع كل شئ.. كل شئ..
.
.
للرفــــع.. وشُكراً لكم..

آنا رفيجي كان عنده 180B و كان ملغوم حده عليه كل ما تفكر فيه
طلع ريس ويا زد 350 جديد و طافه و لكن و هو 250 أعتقد طلعت عليه سيارة فجأة و ما كان منه إلا لف بسرعة و انقلبت عليه السيارة و الحمد لله ما صار فيه شي (حظه ) الله رحمه

قصدي الله رحمه من الموت بس اهوه ما مات

الله يكفينا شر الحوادث

الاخوين. Sayedco ياهاجسي
أشكركم على المشاركة وعلى النصيحة الله يجزاكم خير

اخواني MR_Z , 180B عظم الله اجركم و الله يرحمهم برحمته ..
اخوي MR_Z اخوك لما سوى الحادث الله يرحمه وين كان الحادث وايش السيارة اللي راكب فيها ؟؟


اذكر واحد من اصحابنا وعلاقتي فيه ليست بذاك القوة ، كانت سمعته جدا نظيفة الله يرحمه ..
الولد معاه بريميرا خضرا وكان يجي دايم التحلية .. المهم .. كان كل طلاب المدرسة دايم يذكرونه بالخير يثنون عليه واذا طلب منه اي احد مساعده ما يقصر .. حتى اني مرة سألته اذا كان يعرف اي محل ممكن يجيب لي زينون لكزس وكان هو مركب في نفس اليوم زينون لكزس .. قال لي تعال معاي لاي محل افكه لك خذه ومايغلى عليك .. انا طبعا رفضت .. وهو اصر على لكن رفضت بشده .. وهذا مثال على كرمه الله يرحمه مع انه زي ماقلت لكم علاقتي فيه ماهي ذيك القوة .. بعد كم يوم لقيت واحد من اخويانا بالمدرسة زعلان وواقف قريب من مطعم .. نزلت سلمت عليه وجلسنا ندردش .. بعدين سألت بالصدفة عن خوينا راعي البريميرا .. قال لي الولد توفى الله يرحمه ..
انا ما صدقت بالبداية .. الا يوم حلف لي .. قلت ليه كيف ؟؟
قال كان ماشي جهة البحر على رجوله وجا واحد بفياجرا وصقعه بقوة وخلاه ورفض يشيله ... وراعي الفياجرا طلع ولد ناس ( هاي هاي ) ، وقال لأهله تبون ديه اهلا وسهلا .. ماتبون بقلعتكم ...


ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــــــــــــــــــــــــــــــــــــــــــــــ

واذكر كان معانا طالب بالمدرسة معاه ماكسيما وفي يوم من الايام كان ماشي بطريق الملك 200 ويدخل عليه كراون فيكتوريا فحاول الهرب من اليسار فدق بالررصيف وتقلبت المكسيما على الخط كثير لكن كان محظوظ فالايرباج طلع بدري ومسك جسمه وجسم صاحبه وطلعوا منها بدون مشاكل وثاني يوم قابلني مع انه مايعرفني وقال لي انتبه لاتسرع .. هو قال لي هالكلام بحكم ان معاي مكسيما ..
ثاني يوم بعد الاختبارات انا كنت ماشي جهة شبك المطار 180 واصقع بذيك التريله غصب عني .. لكن الحمدلله انا كنت رابط الحزام وجتني قزازة صغيرة على خدي .. لكن انا كنت خايف على قريب لي معاي صغير وماكان رابط الحزام لكن الحمدلله ماصار له شي ..


ــــــــ

لكن صراحة كله كوم و حوادث الكابريس كوم خصوصا الال اس لانه خفيف ومافيه تراكشن .. اذكر السنة اللي فاتت كل خميس وجمعه نلاقي كابريس متعلق فوق النخل ...







اخوكم الشبابي

أنا أقول لكم هذي القصة اللي أنتشرت خاصة في جدة...
وهي عن وفاة ولد الحداد(الله يرحمه)

كان يتقاوم مع لومينا ملغومة المهم إنو قال لراعي اللومينا روح قدامي ولا جبت الطبلون أعطيني إشارة وفعلاً جاب الطبلون
وأدا الإشارة بعدين الولد معاه بورش دعس من جمبه
لمن عداه طبعاً (كن اللومينا واقفة ) من كتر مهو مسرع
ولمن لحقو اللومينا لقى السيارة زي كدا...(في الصورة المرفقة)



وطبعاً هوه طار منها ومات في ساعتها (إن لله وإن إليه راجعون)

وأقول عظم الله أجر أخواننا.........(الله يرحم موتى المسلمين)

مشكورين أخوانيSM_0_SM و الشبابي على المشاركة ولاحول ولاقوة الا بالله

انتبهوا يا شباب من السرعة فكم زهقت من ارواح بسبب التهور و اللامبالاة

عندي صديق كان ماسك خط الرياض-الدمام على سرعة 160 تقريباً وكان معاه سيات توليدو وكان ماسك الايسر والطريق فاضي قدامه تماماً وكان توه ماسك الجوال يشوف من اللي يتصل إلا وفجأه طلع له دينا من المحطة على طول على الايسر وكانت الدينا ما كملت سرعة 40 تقريباً وصاحبي على 160 ضرب فيه من الخلف
الايرباقات طلع والدينا تقلبت وكان تبع بقالة وانتثرت العصيرات والبيبسي اللي فيها ولكن ولله الحمد صاحبي كانت معه زوجته ولم يصابوا بأذى ولله الحمد :cry1: والسيات طلع عجينه :cry1:

شكراً على الفكرة الهادفة.......

زمان قبل كم سنة كنا نمشي على طريق المطار متجهين جنوب مابين مخرج 12 و13 ونلقا راعي كامري قراندي موديلها 97 او 96 ويمشي الكامري ماشاء الله قووي ومر من جنبنا ماسك الكتف الايسر وكل مايمر سيارة يلف عليها ويصقعها :blink: يمشي بحدود 140 والسيارات لاجوا يتجاوزونه يلف ويصقعهم بالموتر ويلفلف على العالم :blink: شي غريييييييييب بصراحة

المهم اقبلنا على مخرج 13 ولف على سيارة وصقعها صقعه قوية نوعاً ما ونحاش راعي الكامري

ويلاحقونه كم سيارة وحنا نمشي وراهم نبي نشوف وش يصير :damp: نمشي وراهم 190 من تحت مخرج 14 وماقدرنا نلحقه راعي الكامري ... طاااااير الرجال :blink: يوم وصل مخرج 15 تحت المخرج بالضبط وسبحان من لايعجزه شيء...الكامري لفت يمين بزاوية 90 درجة وبدوووووون مبالغة :blink: سبحان الله ماكنت متوقع اشوف سيارة بهذي السرعة تلف بهذا الشكل...شكل الذراع انفلت :headshak:

المهم انه صفق بالصبة اليمنى ودارت السيارة وصدم مرة ثانية بالصبة وانقلبت ورجعت تعدلت وصارت الكامري عجينة :headshak:

جينا وقفنا ومعنا ناس واشوف الي فيها شباب بعمر الزهور ياخسااااااارة :headshak:

والشباب يصيحون يقولون ساعدونااااااا ويبكون من جد لاتحسبوني أبالغ :headshak: بكاء وأنين اللهم لك الحمد والمنة على العافية يااااااارب


والله انا حسبتها...اسافر للشرقية امشي 170 الى 200 حسبت وقت وصولي..ماني متذكر كم بالضبط لكن سافرت مرة ثانية وكنت امشي 120 وما اتجاوزها ومثبت السرعة عليها

تدرون كم فرق الوقت؟؟؟؟؟؟؟


(((بدوووون مبالغة))) 25 دقيقة بالضبط :headshak:

والله ياجماعة الخير نقدت على نفسي وتضايقت وحسيت اني غلطان بحق نفسي من جد(انا ماقول هالكلام بغرض المثالية ولكني استحيت من نفسي لاني أخاطر بحياتي وحياة الي معي عشان ولا شي) الحياء هذا هو الي خلاني ازعل واتضايق من جد وأحس بالغبن :ranting: حسيت اني صغير وجاهل وماكنت مدرك انه مافيه فرق مع انه كان بالامكان أدرك هذا الشي لانه متوفر قدامي..مجرد اني اسوق بسرعة معقولة وتتضح الصورة قدامي....لكن (الجهل) مصيبة :mad:

آسف على الإطالة يا إخوان واحمدوا الله على العافية ولاتخاطرون بأنفسكم عشان شي مايسوى


مع التحية،،،الـفـهـد

شكر خاص لصاحب الموضوع و شكر لجميع المشاركين


و الله يعطيكم العافية على القصص المؤثرة ..



قصص الحوادث كثيرة لكن مافي بالي شي الحين ..ولكن ان شاء الله لي عودة واكتب لكم قصة


ومن جد خلااااااص


يكفي حوادث على الطريق !!!


يكفي قطع إشارة المرور !!


يكفي سرعة .. !!


يكفي تهور ياشباب !!

ياليت الاخوان المشرفين يثبتون الموضوع


الموضوع (بالنسبة لي) أول مرة اشوفه وأعتبره مميز وراح ينفرد منتدى سوالف بهذا الموضوع وهذي الفكرة

كل من يدخل يتوقع مواضيع سيارات وسرعة وإنطلاق...يوم يتفاجأ بمثل هذا الموضوع وو عنده رغبة في استكشاف هذا القسم صدقوني بيقرا بنفس وراح يستفيد ان شاء الله

الحادث الي شفته كانت سيارة البلديه تركب لمبات في وسط الطريق بدون اشارات

او براميل تحذير سوى فلشر فصدم فيها اربع سيارات والمسكين الباكستاني الي يركب

المبات فوق وطاح على وجهه ومات

................................................................................................

وكان فيه واحد شغال في الجيش طالع من الدوام ومتجه من الرياض الى الخرج

وكان يمشي 160 اقل شي سيارته كرسيدا وكان فيه عمال صيانه طرق في الجزيرة الي وسط الطريق وماخذين مسارين و الثالث مفتوح فصدم في الشيول من خلف ومات
الله يرحمه