دردشات بحريــــــ (5) ــــــــة ((ازعاج في ازعاج))!!

[مدردش متقاعد]

أكيد مشتاقين للجزء الخامس من الدردشات البحرية……الي متشوق يرفع إيده.. ما شفت حد؟.. ها حد يريدني أكمل؟
بعدني ما شفت أي يد؟ هههههه


عموما اعذروني على التأخير.. فبداية دخل رمضان ثم امتحانات ثم خراب بيت.. قصدي انتقلت لبيت جديد و بعدها سافرت.. و أخيرا رديت رديت و أتمنى تكون رديتي خفيفة عليكم مب ثجيلة.. ترا وزني زاد:)

يالله على بركة الله نبدا.. بس أقولكم من الحين.. ترى هالجزء طويل.. إذا بتملون لا تقرون:)




لمن لم يقرأ الأجزاء الأربعة السابقة.. فهاذي وصلاتها

الجزء الأول
http://www.swalif.net/sforum/showthread.php?threadid=68194

الجزء الثاني
http://www.swalif.net/sforum/showthread.php?threadid=68727

الجزء الثالث
http://www.swalif.net/sforum/showthread.php?threadid=69080

الجزء الرابع
http://www.swalif.net/sforum/showthread.php?threadid=68194

لحظة شوي لين ما أسوي كوبي و بيست:)

[سعودية]

انا ارفع كل ايديني:)

ينفع ..

يكفي ..

:):)

[مدردش متقاعد]

سلمكم الله.. بعد ما تخزبقت (معناها ما قدرت:) ) في تحصيل اتجاه القبلة لجأت للملاحين في برج المراقبة .. و ما أتذكر بالضبط شو كان الحوار (شوفو المصداقية في السرد:):)) بس أتذكر إنه ما قصر معاي.. طبعا كعادة الغربيين .. دوم يتساءلون عن سبب الصلاة.. و أوقاتها و سبب الاتجاه للقبلة.. غيرها من الأسئلة المحرجة نوعا ما..لكني مثل ما تعرفوني مدردش (محترف) بدبلوماسية أجبت عن أسئلته..و أخذت الي أريده و نزلت..و صليت..و بعد ما صليت.. الفضول كان ياكلني.. فسرت أتحوط مرة ثانية..(بطبعي فضولي:):)) قلت خلني أجرب المصعد مرة ثانية (مش مصدق لين الحين إنه السفينة فيها مصعد:):)) …..,, فنزلت آخر طابق في السفينة (تحت مستوى سطح البحر) و يا ليتني ما نزلت…… أول ما تبطل باب المصعد.. حسيت بهوا حار لفح ويهي… وووووووووووف ما أنساها أبدا.. على طول ضغطت الزر على الطابق الي جيت منه و طلعت… من أولها حر..ليش الحر و غرفتي مكيفة.....اليوم الثاني اكتشفت إنها غرفة المحركات!!



رديت من حيث أتيت و نمت قرير العينين بس بعدني متخوف من أول يوم… ما أدري ليش.. الظاهر الهوا الحار الي لفح ويهي عقدني:)

قمت الصبح سليم معافى و الحمدلله.. صليت.. قعدت لين الساعة 8 و سرت أتريق بالرغم إني متعود و من أنا صغير إني ما أفطر (أدري بتقولون عادة غير صحية صح) بس شو أسوي.. عادة.. و شيب مدردشكم المتقاعد عليها (من شب على شيء شاب عليه!!).. بس يوم أكون في الامارات الوالدة ما تقصر.. ما تخليني أطلع من البيت إلا بعد ما أتريق..الله يجزيها الخير:))

عموما.. نزلت أفطر.. و تقريبا أعرف شو بيكون على الفطور..(من خلال خبرتي المحدودة في بريطانيا) مادام أوربيين.. فأكيد الطبق الرئيسي لحم (البيكون) شرايح رقيقة من لحم الخنزير المدخن و انتو بكرامة أو نقانق (خنازيرية) عافانا الله.. نحن نبدا صباحنا بأذكار الصباح و طلب التوفيق من الله و هم يبدون يومهم بمعصية الله و ينهونها بمعصية الله من شرب خمر و معاصي و العياذ بالله!!

لوعوا بجبدي الله ياخذهم..بس الحمدلله.. كان الفطور خمس نجوم فسرت أكلت لي كورن فليكس (أبو نمر و بس:)) و شربت لي كوب عصير و أنا قاعد أفطر حالي حال نفسي إلا ياني (ألفريدو) من هذا الفريدو يا ترى؟
.
.
.
.
.
.
.
.
.
.
.
.
.
.
.
.
.
.
.
.شوي تحت
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.شو رايكم أقولكم الحلقة الياية؟:)
.
.
.
.
.
.
.
.
.
.
.
.
.
.
.
.
.
.
.
.
لا خلاص الحين بقول:)
.
.
.
.
.
.
.
.
.
.
.
.
.
.
.
.
.
.
.
.
الله يسلمكم هذا الفلبيني الي يشتغل كجرسون و مساعد طباخ في نفس الوقت.. يا يسلم علي و يتعرف لأني جديد وياهم.. و على فكرة هذيلا الفليبينين فضوليين جدا.. أنا صحيح ما أحبهم.. بس في بعضهم طيبين.. و منهم ألفريدو المسكين.. كان يسويلي أكلات خاصة مافيها مشتقات الخنزير.. ما قصر. المهم و أنا قاعد أسولف وياه إلا وشوي يقولي تعرف (درويش)؟ .. قتله منو درويش…. قالي (موهماد) .. قتله منو هذا مهماد.. مب جنه عربي؟ قالي أيوه هذا مهندس يتدرب جاي من شركة ثانية.. شامي…. أنا عاد شو استانست.. يعني أنا مب العربي الوحيد في السفينة.. حصلتلي واحد أسولف وياه ..وووووووه:).. كلها خمس دقايق..و درويش يهل علينا و نزل و عليه آثار النعاس.. الظاهر توه قايم من النوم.. سلمت عليه و عرفته على نفسي و عرفني على نفسه طلع اسمه (محمد) و الحبيب قالي (مهماد) و الله الحرف الحاء مشكلة.. وففطرنا مع بعض و بعدين نزلنا تحت.. لأبدا أنا أول يوم عملي لي في السفينة….و ياله من يوم!!!


كالعادة نزلت و سلمت على المهندسين.. بداية من كبير المهندسين (هو الكل في الكل و أهم واحد فيهم:)) و بالمناسبة كان نرويجي.. شكله يسد النفس و الله:( زما ارتحت له من أول ما شفته... . و فعلا كنت صادق في حدسي.. درويش خبرني..إنه شري و نفسه خسيسة .. لكن لحسن الحظ.. كان بنزل في درب الروحة لليابان.. في سنغافورة..يعني بعد أسبوع (فكة) الباقين من المهندسين كانوا أسبان.. بس التحفة فيهم كان المهندس الثاني.. اسمه (فرناندو) هذا الانجليزية عنده (الله بالخير مثل ما يقولون الكويتين*)دمرانة بالمرة.. جملة على بعضها ما يعرف يقولها.. صار لي موقف معاه … يفطس من الضحك.. بس بقولكم إياه في حلقة ثانية:)


أما المهندس الثالث كان اسمه (إلياس) … أكيد لاحظتوا إنه اسمه هو نفس اسم النبي المذكور في القرآن سيدنا إلياس عليه السلام.. و كان فعلا أخلاقه راقية.. و كان يشتغل بضمير (كثير من مهندسين هذه الأيام ما عندهم ضمير بل كثير من الناس المكلفين بأعمال ما عندهم ضمير و لا يتقون الله) و تعلمت منه كثير.. بالرغم من إنه لغته الانجليزية مش قوية.. لكن على الأقل كان يحاول ..


المهم.. قبل كل شي.. طلعني المهندس الأول على المخزن.. و عطاني عدة الشغل.. عاد شو هي هذي العدة؟ الله يسلمكم.. 2 أفر رول (اسمحولي ما أعرف شو معناها بالعربي) بس المهم هي الثوب الي يلبسه الفني و البنشرجية.. بنطلون و قميص بس موصولين على بعض و فيه جرار طويل.. و عطاني جوتي الله لا يراويكم إياه.. حديد مب جوتي. يسمونه (Safety Shoes) محصن ضد كل الهجمات و الضبات النووية:).. و طبعا عطاني طاقية… قصدي (safety helmet) علشان راسي الي هو راس مالي.. ما يصير له شي و أنا أشتغل. … و جوز قفازات.. علشان أحمي (أناملي الرقيقة) أيام ما كانت رقيقة..و أهم شي عطاني إياه كانت سدادات الأذن.. تدرون ليش؟ علشان أذني ما تروح فيها.. بسب الاإزعاج و الحشرة الي في غرفة المحركات.. الله لا يسمعكم إياها.. طقطقة من هني.. و و صو ت مكاين و مضخات.. و ناس يشتغلون و بخار طالع من هني.. يعني…. ازعاج الدنيا كلها موجود….و يعطونا هذي السدادات أونه بتخفف شوي..يسمونها (earss plugs) أتاريها مخبوقة:):).. تخفف الازعاج بس ما تمنعه! آآه.. كأني أسمع الازعاج يطقط في مخي.. بس بس.. يكفي.. الظاهر مصختها و طولت عليكم… طقطقطقطقطقطق بشششششششش كطكطككككككك
يالله يالله .. أشوفكم الحلقة الياية و اعذروني على الإطالة..

[سعودية]

ما شاء الله عليك الظاهر والوالدة تفطرك الله يخليها لك كنت تكتب الدردشيات :)

ما أقدر اقول شيء في دردشاتك مثل كل مرة وأحلى :)

ما عليك ما شاء الله ولا قوة الا بالله جاي للمنتدى بسرعة 789000000000000000000000000000000000000000000000 ميجا حماس :)

الله يعطيك العافية على رقيت الأصنصير والنزلة كنهم تعبوك :)

وبعدين وشلون ما يحطون مكيف عند المحركات يبونك انت تمسك مهفه " مروحة شعبية " وتبرد على المحركات :9

ما عليك اذا بتتخرج قبل اوانك عندنا واسطة ما فيش بعد كذا :)

الملك " ملك سوالف النابغة " نخليه يكتبلك رسالة توصية بكرة يخرجونك ولا غثا الفريدو وفرناندو :)

والله اثاري اسامي المدبلجات صحيحة :)

تحياتي لك ولدردشاتك :)



















وقف شوي :

ترى انت في الكشتة رقم " 2 " وليس رقم " 3 " :)

رح دور وين الكشتة صارت ورد عليها :)

امر عسكري من عجوز سوالف اولبريت :)

[مدردش متقاعد]

أصلا لو ماحد يرد على الدردشات غيرج يا سعودية.. بتم أكتبها.. لأنج طيبة و تستاهلين كل الخير.. و هذه الدردشات مجرد اهداء بسيط لك و لأعضاء سوالف.. محاولا رسم البسمة في وجوهكم:)

شكرا لك.. و أتمنى أن تكون قد نالت على اعجابك:)

تحياتي

[ربيعة الورد]

دائما أبدا ردودي المتواضعة بكلمة أخي ... لكن بعد إطلاعي
على حلقات الدردشات البحرية الأربع والآن الخامسة بين يدي
ساستبدل كلمة أخي " بأستاذ دكتور " أو "الكاتب المميز"

رائعة جدا ومتميزة فعلا الحلقات السابقة والحمدلله قرائتها
دفعة واحدة وليس على شكل حلقات

أجمل ما اعجبني فيها ... بساطة السرد ... عنصر التشويق
مكان الأحداث ... أسلوب الكتابة ...التفاصيل الغير ممله ...
الحلقات سلسه وقريبة للنفس خاصة إنها من تجربة إنسانية
وهذا يزيدها روعة وجمال ..

أختك
ربيعة الورد

[توتة]

:)
:)
:)

عاد لا تبخل علينا بالجزء السادس.... :)
أنا انتظره على ناااااااااااااااااااااااااااار ......

تــــــــ تحياتي ــــــــوتة الحلوة :)

[مدردش متقاعد]

ياترى هالمرة طبعتي هالجزء و قريتيه زوجك.. و لا مش على المستوى:)

من الي كتبتيه يبين إنج استانستي.. و الحمدلله:)

ما شفتي شي.. هذي كلها مقدمات في نظري.. لاحظي إني لين الحين ما خبرتكم عن طلعتي الرسمية لغرفة المحركات... بعدني حتى ما لبست ال (افر رول على قولج:))

بس ما بستبق الأحداث..انتظري لين الويكند الجاي و بتعرفين:)

بس تكفين.. لا تنسين تحطين اسمي في الكشتة الجاية حقج.. و لا ترى أنا ما بكتب دردشات:)


تحياتي

[سعودية]

لا تخاف على طول على الطباعة بس لم تعرض الى الأن على وزير الخارجية :)

مدردش حطيتك في الكشتة رقم 2 اللي قبل الكشتة اللي عقبت عليها بس لو سمحت رح للكشتة وقلي وش رايك :)

ياالله جعل هذا دوم حالك شعلة نشاط :)

الله يطرح البركة فيك وينجحك :)

تعرف ليش دعيت لك كذا علشان انا عجوز:)

[مدردش متقاعد]

ههه.. ما في أدور.. شو رايج تحطين لي الوصلة مالة الكشتة:)

ترى النظر ما يساعد.. خلاص شيبنا:)

بس أقول.. ترى من الجزء الياي.. الدردشات بتصير بفلوس.. علشان أغطي مصاريف فواتير الانترنت.. ماحد يريد يسوي اعلانات عندي هههههه
شو رايج ترعين موهبتي في الدردشات

فيكون العنوان:
دردشات بحرية .. تحت رعاية حليب السعودية.. كامل الدسم:)


هههههه
فكرة حلوة صح؟:)


تحياتي

[سعودية]

ما كنت موجود في الأسابيع اللي فاتت ..

فاتك نص عمرك تعلمني شبوحة وشلون انزل صورة ما عرفت وكانت نتيجة الفشل 100%

تبيني اتوهق ثانية واتعلم وشلون احط وصلة ..

اعذرك ما زال عندك امل وموب مثل باقي الأعضاء غسلوا ايدهم مني :)

بعدين لا تقول اقري سؤال وجواب حفظتها عن ظهر قلب :)

يمكن تقول لو روضة ولا حمد 12 يساعدوني ولا حتى هذي :) انسى الكشتة اصرف :)





الفكرة رائعة ما عليها غبار :)

والنابغة هو الممول الرسمي للدردشات :)

[مدردش متقاعد]

بصراحة لا أدري ما ذا أقول أو أرد على إطرائك :)

الحمدلله الذي وفقني لكتابة مواضيع نالت على إعجابكم.. بصراحة لم أتوقع أن تشدك لدرجة أن تقرئيها دفعة واحدة:)

لكن أبشرك.. فهذه السلسلة.. طويلة جدا قد تمتد حتى العشرين و ربما الثلاثين حلقة.. و ربما أكثر من يدري:) (بتلوع جبدكم مثل ما لاعت جبدي:))
ففي رأيك.. فترة 9 شهور على ثلاثة سفن مختلفة.. كم حلقة تحتاج لتلخيصها؟::)

أشكرك يا أختي الكريمة..
و تحياتي لك

[مدردش متقاعد]

إن شاء الله بتقرينه قريب.. بس تحملي على عمرج.. عن تحترقين:)


تحياتي

[مدردش متقاعد]

هههههههههه أفا.. صورة ما تعرفين تحطينها يا عجوز سوالف المعمرة:)

الوصلة بسيطة.. سويلها كوبي و بيست (بالعربي نسخ و لصق):)
أنا وين أدور عليها بالله عليج:)

المهم أنا بحاول.. و إذا قدرت ألاقيها.. أبشري.. برد عليها هذا إذا ما كنت رديت عليها أصلا:)
بس أقثول.. متى الجزء الرابع؟