عندي اقتراح بــــــــــس..

[بنت الأحزان]

ماأدري إذا راح ترحبوا فيه وتفهموا قصدي ولا لاء؟؟

أتساءل أحيانا في موقفنا من عضو أو عضوة لما نكتب
لهم على أساس انه هي .. أو انها هو!!!
وكيف راح تكون ردة فعلهم خاصة إذا كانوا
معروفين في الموقع من زمان.. !!
عن نفسي أحس بان ويهي قافط!! :(

بصراحة .. حبيت أعرف رايكم في لو..
يكون فيه رمز أو أي شيء يميز بين الجنسين
لا لشيء .. فقط عشان ما تصير مواقف محرجة..
يعني ممكن الواحد يتقبل هالشيء لو كان من ناس ما يعرفونه..
ناس جدد..!! لكن لما يكون من شخص المفروض منه
أو انك تتوقع انه يعرف عنك بحكم تواجدك في الموقع ..!!
ويجيك ويكلمك على خلاف جنسك!! ماأدري أحس بها صعبة شوي!!
يعني غير ان البعض مختار له اسم
ممكن نفهمه على انه هي أو العكس أو حتى ما يوحي لك بشيء
وتضيع بينه فمرة تكلمه على أساس انه هو ومرة على أساس انه هي..
وهو ما يبين لك لحد ما يضيق به الحال
ويصرخ فيك إما .. أنا اخت.. أو أنا أخ..
وبعدين عادي ترد المياه لمجاريها الطبيعية النقية :):)
وهذا الأهم في الموضوع..

ولا شو رايكم؟؟؟!!! :):)


أوه نسيت أقول.. الله يسعد أوقاتكم..!!

وتقبلوا تحياتي لكم..

[الروح]

أنا عني بكتب (الــروح http://www.harrythecat.com/graphics/k/girl5.gif ) :)

والله .. مع إنه الروح إسم واضح إنه لأنثــــــــــــــى ، وايدين يردون عليّه على إنه إسم واحد مب وحدة :(

[مدردش متقاعد]

السلام يا بنت الأحزان:)

ما أظن إن إذا الواحد التبس عليه الأمر بين أخ أو أخت إنه فيه أي إحراج.. أعتقد إنه دوم يصير.. مب بس في المنتديات.. يصير حتى في حياتنا العامة... مثلا مرات الواحد يتصل بيت ربيعه يسأل عنه.. ومكن ترد عليه والدته أو أخته.. و صوتهم يكون غليظ.. او التلفون خربان يظهر الصوت مب طبيعي (علشان ما تزعلون يا معشر الفتيات :)) ففي رايش شو لازم الواحد يسوي في هذي الحالة؟ يسكر التلفون في ويها .. و لا كلمة اعتذار بسيطة و كل شي بينتهي؟

أنت من أسميش ايبين انش بنت.. وأنا ايبين من اللقب اني شيبة :)

لأني متقاعد :)

بس لا تاخذين هم.. الأخوان و الأخوات هي صدورهم واسعة.. و ما حد يقفط بسرعة

و فقني الله و ايكم لما فيه الخير

[بياع القلوب]

الاخت بنت الاحزان
تحية طيبة
اقتراح جميل
لكن تبقى المشكلة كما هي
لاعتبارات كثيرة قد يمتنع البعض من تحديد هويته ...
لك تحياتي
اخوك بياع

[بنت الأحزان]

الروح..
طيب انتي حليتي مشكلتك.. والبقية؟؟!!
وماأدري شو الأحلى
الصورة ولا ... الحل ;)


مدردش متقاعد..
أهلين أخوي.. صحيح اللبس متواجد في كل مكان..
تحياتي

بياع القلوب..
مرحبا بك.. الاقتراح اللي طرحته
كان مجرد حل بسيط خطر على بالي!
وكل واحد مسؤول عن الهوية اللي يمثلها..
لكن الأهم انه ما يعصب بعدين وايقول انا.. مش..!!
((هذا إذا تمت الموافقه على الاقتراح!!))

تحياتي لك..

[تفاحة]

ليه ما يحطون اختيار الجنس //
ويكون اجباري ان يختاره مثل اليوزر نيم
ولا يقدر يغيره في الملف //

تحياتي //

[بنت الأحزان]

أهلين تفاحة :)
ليه لاء.. :)

تحياتي لك

[حروف سوالف]

اهلين بكل الموجودين
اخوكم حروف له رايه اش رايكم ..
انا اقول ما فيه فرق بين البنت والولد لان احنا في منتدى يعني عادي واذا غلط وقلت اختي وصار ولد او قلت اخوي وصار بنت عادي جدا انتوا الحين تقدرون تعرفون من بعض الاسماء انها لاولاد وبعضها لبنات اما المشتركه فهو اذا وده ما يحرج نفسه يقول اخوك فلان او اختكم فلانه
اخوكم حروف الحب....

[8]

عني انا موافقه وايدج الراي
بس انتي خمني انا شو
الرقم
8

[Huda76]

هلا وغلا أختي الغالية حزونة ..

اقتراح حلو .. :)

بصراحة لما قريت الموضوع تذكرت سالفة .. :)

أذكر مرة كنت أبي أرد على موضوع بسوالف لأحد الأعضاء .. وبصراحة من الاسم ما كنت أعرف هل بنت أو ولد .. احترت وما عرفت شنو أقول لأن الرد كان يستوجب اني أوجه الحديث للشخص .. اخاف أقول اختي يطلع أخوي أو أقول أخوي يطلع أختي http://www.swalif.net/sforum/images/icons/icon11.gif

عموما .. لجأت لأحد أعضاء سوالف اللي معاي بالأي سي كيو( الله يذكره بالخير ) .. أقول له بنت وهو يقول ولد .. تخيلي أنا وهو ردينا على الموضوع .. أنا أوجه الكلام كأني أخاطب بنت وهو رد يوجه الكلام كأنه يخاطب ولد .. :)

فعلا احراج شوي ..

الله يذكر الغالية أوركيد بالخير لما تقول (أختك/ أوركيد) ;)

تحياتي

[بنت الأحزان]

حروف الحب.. 8 .. هدى76..
آسفة على التأخير بالرد عليكم..:(:)
لكن .. ماأدري ..
مع ان فيه ناس راضيين على مبدأ الفكرة!!!
بس اللي أشوفه .. غير !!
ع العموم.. تحياتي لكم:)