ارجو المساعدة أهل الخبرة بالسيارات

[hfakhri]

السلام عليكم ورحمة الله وبركاته

يا شباب , حبيت استفيد من خبرتكم في هذه المشكلة

عندي سيارة أودي A4 , شريتها جديدة في أواخر عام 2003 , يعني صار لها معاي سنة وشهرين تقريبا ( ماشية 21000 كم تقريبا) , وقبل كم يوم , بغيت اشغلها ,فاشتغلت لكن لاحظت أن عداد RPM ما يرتفع بالرغم من أني أدوس على الساليتر , وكانت شاشة العرض , تبين أن السيارة في EMERGENCY MODE

فنقلتها إلى الوكالة عن طريق سيارات النقل ( القلص) ,

فقال لي المدير أن السيارة تحتاج إلى GEAR BOX , علبة جير جديدة , وتكلف 3000 دينار ( 30000 ريال سعودي تقريبا ) , والحمد لله أن السيارة تحت الضمان وقال ان السيارة أيضا تحتاج قطعة في الماكينة , ما حفظتها وما اعرف وظيفتها ؟

سؤالي هو إذا تبدل الفير والقطعة الخربانة , ترجع السيارة لوضعها الطبيعي , ام تبديل القير ولو بواحد جديد يعني موت السيارة البطيء ؟؟؟

وهل تحصل هذه الحالة في السيارات الجديدة الأوروبية وتبديلها شيء طبيعي إذا كان هناك عيب مصنعي ؟؟

ولو كنت مكاني شنو تسوي ؟؟؟

[mr_z]

hfakhri أول شي اسأل عن القطعة واسأل عن فائدتها هل هي الفلاي ويل أو التورك كنفيرتر وان لم تكن من القطع المذكورة فذكر اسمها
أما عن تغيير الجربكس اذا كان أوتو هل كنت تغير زيته وكيف استخدامك للقير عادة

[saymyname]

تقريبا ( ماشية 21000 كم تقريبا) ؟؟؟

بس... :blink: :blink: :blink:

[hfakhri]

اهلا اخوي , شكرا على الرد

إلى الآن ما سألت عن القطعة اللي في الماكينة

لكن بخصوص الجير , فالجير اوتوماتيك , وهو نظام multi tronic

شبيه بال triptronic لكن هو نظام مبتكر من اودي حيث انك ما تحس بالتبديل

أما استخدامي للجير فآنه ما عندي سوالف التفحيط , وفي بعض الاحيان انقل الجير إلى نظام الشفتات (الجير العادي)

ولكن من أول ما شريت السيارة , كان وماال يظهر صوت فقط اول ما تمشي السيارة , عبارة عن طقة احسها في دواسة البنزين , وتروح , وما تظهر إلا اذا شغلت السيارة ومشيتها فتظهر مرة واحدة فقط

ورحت بها إلى الوكالة ولكنهم قالوا لي شيء طبيعي لا يؤثر على السيارة مجرد clicking

لكن بشكل عام هل تغير الجير له اضرار على السيارة ؟؟؟

[hfakhri]

اما الأخ saymyname

فما اعطيتنا رايك لكن عبارتك هذه ما ادري شنو تقصد بها هل تقصد قليل , فإذا كانت المسافة تشوفها قليلة لأني ساكن في البحرين والبحرين كلها جزيرة صغيرة , وقول تبارك الله ما شا ءالله ـ بارك الله فيك

وشكرا

[Human100]

هو يقصد إنه قوية يخترب غير السيارة بعد 21000 كيلو بس

عموماً أخوي, أول حاجة اتوكل على الله وانشاء الله مايكتب الا اللي فيه الخير ...

وطالما انهم بيبدلوا الجيربوكس بالكمبيوتر كامل (وتأكد من هالشيء) فالمفروض إنك ماتواجه مشاكل ...

أما إذا جلسوا ايلفقولك هني وهناك, ترا الأودي معقد نوعاً ما ماهو كورولا ...

فتأكد إنهم بيغيروا الجيربوكس والكمبيوتر والسنسور بعد, قوللهم السيارة لسه على الضمان ...

[RED Chevy]

ماظن بيأثر على مشي السيارة بس حاسب ترى بهباني شغلهم كله لوص تأكد من كل شي ييسوونه لك...

[hfakhri]

صح كلامكم ومشكورين

[Imaj]

AUDI :D


والله أسف ما أقدر أفيدك..

يعني 21000 فقط!! زيت الجيربوكس يتغير كل 60-80 ألف كيلو!!

ما أدري بس أقول الله يعينك :)

[Trans-Am RAMAIR]

السلام عليكم

اخوي انا ما اقدر افيدك بالموضوع....بس حبيت اسئل وكيل اودي بالبحرين اسمه --بهبهاني--؟؟!!

و الله يعينك

[الشبابي]

اخوي hfakhri ...
اؤكد ان ماحصل لك عادي جدا ...
فسيارات اودي سيارات قمة في السوء ... تصنيع سيئ وجودة سيئة ...
واعرف اشخاص كثيرين عندهم مشاكل اكثر من كذا ومنها ان احد اصحابي معاه اي 6 جلست في الوكالة اكثر من بيته ودايم تخرب وتوقف بدون اي سبب ... واعرف شخص اخر معاه اي 4 ويشكي لي ان السيارة تطفى من وحدها وهذا عادي جدا ... والله العلى العظيم لم اسمع بسيارات بهذا السوء في حياتي مثل الاودي .. صراحة السيارات الامريكية تعتبر نعمة جنب الاودي ... وياليت مشاكلها بسيطة .. جيور على مكاين على كمبيوترات ومرة احد اصحابي صلب عليه الدركسون ( المقود ) وهو ماشي ... وازرار المسجل تمسحت والسي دي خرب والستارة الخلفية ...










اخوكم الشبابي