View Full Version : حالة الشباب مع قروض السيارات الفخمة..
lumina
13-08-2004, 03:16 PM
السلام عليكم ورحمة الله وبركاته
كيف حالكم شباب ..
حبيت اعرض لكم موضوع خارج عن صور ومعلومات السيارات الجديدة ..
حبيت اعرض حالة الشباب في دول الخليج اللي غارقين في قروض السيارات وخاصه السيارات اللي تجلب البنات (آسف لكن هذا الللي حاصل) وانا اتكلم بصراحه ولا أحد يزعل ...
الشاب تحصلة في بداية عمله ويسير وكالة البي إم وخذ الفئة السابعه مثلا يعني من دون دفعه اولى ومعاشه 8000 درهم والبنك اللي بيمول بيمص دمه في الفوائد وينغر في كلام البنوك وهذا المعروف ..
والأقصاد لمدة 5 ولا 6 سنوات ولله المعين .. وفي الأخير يفنش من شغله والبنك يسحب السيارة أو يدخل السجن لديون ثانيه .. ماهي الديون الثانيه ( مب قادر يصرف على عمره لأنه الديون كاسره ظهره مايبقى من معاشه غير 3000 درهم ولا 2500 فمجبور يدين مرة ثانيه ) ماهو السبب اللي يدخلك في هذي الحفرة اللي مالها قاع .. فحبيت اناقش هذا الموضوع معاكم لأنه صراحة موضوع يخوف والكثيرين واقعين فيه ...:(
عين الفهد
13-08-2004, 03:44 PM
اولاً اشكر lumina على طرحه لهذه القضيه
وبدون زعل وانا انصحكم ونصيحه لكل الشباب لاتشتروا سياره على اقساط واذا ماعندكم ثمنها وفروه وجمعوه حتى لو كمل 10 سنوات عشان تجمعوه
وبعدين انتم الرابحين لانها تطلع بدون فوائد
:p
TOP-SECRET
13-08-2004, 03:47 PM
فعلا كلامك صحيح جاسم بس تحصل شباب يعني زين منهم يقدرون يشترون كورولا ويروح ياخذ سلفيه ويطلع له حوت ولا سياره بـ300 الف :damp: احس ان ماعندهم سالفه هالنوعيه من الشباب والله يهديهم
تحصل الرجال وصل 27 ولا 28 ومايقدر يتزوج بسبب قيمة السياره:p
loolicpolic
13-08-2004, 05:03 PM
قعلا، الأقساط مشكله كبيرة، والأدهى المظاهر الكذابة..
تحصل شبح، ولا حوت واقف على باب البيت، الي يمكن السيارة أغلى منه بمليون مره..
ليش؟
مد لحافك على قد رجليك :) ..
تحياتي..
لون الليل
13-08-2004, 06:04 PM
كلامك 100%
وخاصة عندنا فالإمارت ...
تلاقي الواحد أمس مداوم واليوم ساير البنك ( تلاقيه حتى ما يسأل عن نسبة الفايدة ) وباجر تلاقيه في وكالة البي إم ولا المرسدس ولا أي وكالة ثانية ( طبعا وكالات السيارات الغالية )
ومطلع له أحلى سيارة وطبعا فل اوبشن لأنه الحبيب ما يرضي يركب سيارة بدون جلد وفتحة ومكيف
اتوماتيك و.... و.......
وتلاقيه بعد سنة ولا سنتين سار وغير السيارة لأنها صارت قديمة وهو بعده ما خلص الديون اللي عليه
وهذي حالة الشباب هالايام
هجيرالصمت
13-08-2004, 07:15 PM
بسم الله الرحمن الرحيم
والله ياشباب كلامكم عدل
بس من جهه ثانيه اللي كان كماليات في يوم صار شي اساسي
يعني مو شرط مرسيدس
بس على سبيل المثال الجوال
شفيه الجوال اللي نزل قبل سنتين مثلا
بس اراهن انه ولا شخص من المتواجدين يحمل تلفون قديم
احسن حل الموازنه
تحياتي
هجير الصمت
عباس المفك
13-08-2004, 08:24 PM
الجوال مقدور عليه يا هجير الصمت سعر مايتجاوز 2000 ريال شنقول على الي ماخذ سياره بربع مليون :confused: :confused: وتصير وااااااايد صراحه خصوصا البنوك الي تعطي تسهيلات في القروض ويقصونهم قص عقب في الدفع
شي يحزن
السلام عليكم
اكثر شي اتعجب منه واحد ساكن في شقة في حي عادي وسيارته 2004 بي ام او مرسيدس
وناس ساكنين في فلل احياء راقية وسيارتهم عادية جداً ماكسما كامري لا ويدخلونها في الكراج :glasses2:
Third Eye
14-08-2004, 02:45 AM
رد مقتبس من هجيرالصمت
بسم الله الرحمن الرحيم
والله ياشباب كلامكم عدل
بس من جهه ثانيه اللي كان كماليات في يوم صار شي اساسي
يعني مو شرط مرسيدس
بس على سبيل المثال الجوال
شفيه الجوال اللي نزل قبل سنتين مثلا
بس اراهن انه ولا شخص من المتواجدين يحمل تلفون قديم
احسن حل الموازنه
تحياتي
هجير الصمت
أقول ياعزيزي
إيش المشكلة لو أقتنيت جوال حديث...طالما عندي القدرة المادية:headshak:
وأقولك لا تراهن ولا شي لأنك بتروح فيها
lumina
14-08-2004, 06:04 AM
السلام عليكم ورحمة الله وبركاته
مشكووورين شباب على التفاعل الرائع مع الموضوع و أشكركم على المناقشة الجيدة في الموضوع.
عين الفهد : أشكرك على الكلام و انا أؤيدك
TOYOTA - OBAS : كلامك صحيح مرة وانا عندي واحد من الشباب عنده نيسان بترول 2004 فل مواصفات وماعنده لبتروله بسبب الديون .
لون الليل : في الإمارات خلها على الله
هجيرالصمت : الجوال مقدور عليه ياخوي والله مايأثر في ميزانية الراتب إلا في شهر لكن مو 5 ولا 6 سنوات.
عباس المفك , 902 , Third Eye أشكركم على الردود وماقصرتوا و أنتظر المشاركات الأخرى من الشباب .
هذا موضوع اجتماعي ما له علاقة بالسيارات..
بس الحل واحد يستأجر سيارة فخمة.. مو لازم يشتري..
واحد من أقاربي استأجر ديفيل وجنن خويته :D
طبعاً هو عنده سوبارو ليجاسي :rolleyes:
سلام :banana:
lumina
14-08-2004, 03:45 PM
رد مقتبس من Imaj
هذا موضوع اجتماعي ما له علاقة بالسيارات..
بس الحل واحد يستأجر سيارة فخمة.. مو لازم يشتري..
واحد من أقاربي استأجر ديفيل وجنن خويته :D
طبعاً هو عنده سوبارو ليجاسي :rolleyes:
سلام :banana:
شكرا اخوي على الرد وماقصرت بس الموضوع هذا اللي تقول عنه إجتماعي ومايخص السيارات ..
بلعكس يخص السيارات من وجهة نظر الشباب الآخرين .. وهذي وجهة نظرك وانا اتقبلها وشكرا مرة ثانيه .
black scorpion
14-08-2004, 06:26 PM
احب اضيف حالة من الحالات التي تحصل انه يشتري السيارة بالمبلغ الفلاني عن طريق بنك من البنوك او بنظام التقسيط من الشركة ولظرف ما يبيع السيارة ومعروف ان السعر يقل باختلاف نوع السيارة فتلاقي المسكين يسدد باقي الديون اللي عليه والسيارة مش موجوده معاه ولا قدر يتهنا بها. :)
وتلاقي البعض يشتري السيارة الفلانية ويجي عند الصيانات الكبيره مثلاً 60.000 كم تلاقي ما عنده مبلغ يغطي تكاليف الصيانه الباهظة الثمن نتيجة انه اشترى سيارة هو مو قد مصاريفها .
و الاسوأ لمن تنصدم السيارة لا قدر الله الانسان اللي اخدها كااش ويكون ربنا ميسر عليه تلاقيه يصلحها وكاله او اي ورشة محترمة وقطع جديدة واصلية لكن اللي اخدها بالديون في ورش مشي حالك وقطع مستعملة من التشاليح وسمكرة لمن تتطلع السيارة تحس ان اللي سمكرها عامل بناء مو سمكري.
المثل اللي المفروض نمشي عليه على قد لحافك مد رجولك.:)
بس دا اللي حبيت اقوله و اشكر صاحب الموضوع على الموضوع لانه يغطي عده جوانب (اجتماعي ونفسي و اقتصادي)
اجتماعي: لان بعض الناس يقيم الاخرين مقابل ممتلكاتهم او سياراتهم.
نفسي : في بعض الشباب نفسياً ما يرتاح الا اذا ركب سيارة فخمة وغاااااالية و سمع الناس تقول فلان ما شفتوا سيارته ومن الكلام دا.
اقتصادي: سبب ان الناس تقول ان الرواتب ما تكفي ومن الكلام دا سببه انه اخد سيارة قسطها بياخد مبلغ كبيير من راتبه الشهري.
password
15-08-2004, 12:12 AM
السلام عليكم
قصدك حال الشباب والشابات ...
لأن بعض الشابات تعتبر الكورولا والسفك والصني خارج القاموس ......
الله ويهدي المسلمين أجمعين ....
RED Chevy
15-08-2004, 01:12 AM
هو صحيح مد ريولك على قد لحافك لكن الناس تمشي على فلان قال وفلانة قالت:D
ياخي تبي مرسيدس خذ محد قال لاتاخذ لكن عندك فلوسه؟
لا
وش الحل؟؟؟
الله يخلي البنوك>>>>يطلع من البنك وهو:D :rolleyes: :banana: :p :cool: :)
بعد سنتني لي إنكسر ظهره وهو يدفع في الاقساط يركب سيارته وهو:mad: :cry1: :Sad2: :cry:
الناس عندنا وخصوصاً بالخليج لازم تمشي بالمظهر عشان يقولوا فلان عنده وفلان شرا وفلان راهي ولو يدرون إن مايبقى له ربع معاشه من الأقساط:D
الله يهديهم بس الله يهديهم...
CL-Class
15-08-2004, 01:01 PM
اسمحولي ياجماعة بقول شي....... وسامحوني اذا فهمتوني غلط......لكن على قولتهم سالفة وانفكت
كونك مطلع سيارة فخمة عشان بنات......... صدقني انت غلطان...... بعدين من البنت اللي تبي سيارة
البنت تبيك انت ماتبي سيارتك.........سيارتك ماراح تعطيها حب ولا حنان وسيارتك ماراح تكلمها
البنت اللي تناظر سيارتك هذي ماتبيك انت بذاتك هذي تبي دراهمك تبي تنبسط عليك وانت دلخ
هذي مو بنت سوية ولا بنت شريفة ولاراح تستمر معك لان هدفها مادي وبس
البنت اللي راح تستمر معاك صدقني ماراح تطالع الشغلات ذي:glasses2: تبيك انت ماتبي سيارتك
واعذروني
Dreams_Maker
15-08-2004, 01:11 PM
والله الموضوع تشعب على الأخير... :D
وأنا ... http://www.d5oonqatar.com/vb/images/smilies/2.alkber.mlwan/La.ta3leq.gif
Lumina LS
15-08-2004, 03:09 PM
أخوي لومينا ، موضوعك ممتاز وكان من المفروض ان احنا نطرحه من زمان ، ما شاء الله عليك دائما متميز في اسلوبك وفي طرحك للمواضيع ، وانا شخصيا عجبتني عبارة "......... حفرة بدون قاع" لأنها فعلا تعبر عن خطورة هالموضوع من كل النواحي ..
انا بغيت بس اطرح كم سؤال ، على هالشباب هداهم الله اللي يشربكون روحهم ويضيعون مستقبلهم ويقصرون على نفسهم وعلى اهاليهم علشان يشترون " حديدة " مهما اختلفت المسميات .. وسمحوا لي اطرح هذي الاسئلة على ضوء الواقع الملموس واللي نعايشه ونشوفه يوميا ..
1- اخوي يا من تكشخت ورزيت الشماغ والعقال وتعطرت وتسمت على كرسي السيارة .. بصراحة شكلك هيبه ويخوف .. بس لو ما فيها احراج ، انا اشوف ان مؤشر البانزين في سيارتك يدل على ان السيارة ما فيها قطرة بامزين وحدة .. ليش ما تروح وتصب فيها .. نعم .. شنو ... اسكت .. ليه .. وش تقول !! ما عندك فلوس تصب بها بانزين :confused:
-2 آقول يالاخو ياللي رهنت بيتك او شقتك علشان تطلع بي ام او لكزس .. بالله عليك .. جاوبني .. هل انت مرتاح النفس .. وانت تداور في هالسكيك ورا بنات الناس .. يعني انت حاس انو مو ناقصك شي .. انت مو حاس انك ضحيت بالكثير علشان تطلع كتلة حديد على 4 عجلات .. اذا كان جوابك انك سويت الشي الصحيح ، اذن انا انصحك انك تاخذ معاك السيارة بالليل وتسبحها مع عيالك في نفس البانيو ، وبعدين تشربها الحليب وترقدها جنبك على السرير ..
3- بصراحة عاد الفئة هذي هي اللي باطه جبدي ومفوره دمي .. هذا واحد صاحبنا باع اللي وراه واللي قدامه وتدين وتسلف + انه باع سيارته الجديده علشان يغطي قيمة " رقم مميز " .. طبعا هاذا الشخص متروس اغلاط وعيوب شرعية من ساسه الى راسه .. بس حبيت اسأله عن شي بسيط .. انت الحين يا حلو يا مميز جبت الرقم .. بس تعال قول لي .. ما كأنه في شي ناقص ؟؟ :think: اخوي وين سيارتك :blink:
انا ما اقول الا الله يهي كل من يلعب بشبابه وبمستقبله ومستقبل اهله .. والله يساعد من طب في حفرة الديون والفلس ..
Lumina LS
هجيرالصمت
15-08-2004, 07:14 PM
ياجماعه الخير الجوال مقدور عليه وانا عطيت مثال ليس الا
في اخوة يقولون لاتاخذ اقساط
طيب انا موظف ومعاشي سبعة او ثمانيه اخذ اي سيارة
مو شرط اشتري سيارة بربع مليون بس بعد مايصير اشتري سياره باربعه الاف ريال مثلا
ولو حصلت سياره كويسة بخمسين او ستين من عنده هالمبلغ
يعني العمليه محتاجه موازنه وكل واحد عارف مدكن كام تحت مخدته
تحياتي
هجير الصمت
عين الفهد
15-08-2004, 08:50 PM
اعطيكم بالارقام نموذج
سعر السياره 250.000
الفائده 0
كل شهر 2500
يعني تحتاج 8 سنين و4 اشهر !!!!!!!!!
سؤال بتطلع السياره وانت بحدود 25 سنه وراح تدفع اقساط السياره وتخلص وانت 34 سته والسياره اكيد خلاص صارت موضه قديمه والزواج اذا ماكان على الباب بيكون حصل كيف راح تقدر توفي بكل مستلزمات الحياه مع اقساط من هذا النوع؟؟
وانتبهوا ترى الاقساط لعبه والرابح فيها (نسبة الفائده) البنوك
وسلامتكم
أخوكم