الى NFS

[MegaTroniC]

سلام عليكم

انا كتبت رد في موضوع تغيير زيت المحرك حق الاعرابي لكن الظاهر انك ما انتبهت له

انت نصحته يستخدم زيت Mobil1

انا لقيت الزيت وسعره 35 ريال ويتغير كل 10 الاف كيلو

انت جربت الزيت هذا؟

ماله تأثير على المحرك؟ وعمر المحرك؟

انا لقيته بنسبة لزوجه 15\50

وكتيب السياره (لومينا اس اس) مكتوب فيه:

اذا كنت ستقود السياره بسرعه 180 كلم\ساعه و\أو 4000 rpm لاكثر من 10 دقايق..فاستخدم زيت المحرك الصناعي بمواصفات 20\50 أو 15\50

يعني موبيل1 مطابق للمواصفات :) لانه 15\50

ومعنى الكلام هذا ان الزيت الصناعي هبااااااال ويحافظ على المحرك تحت الظروف الشديده جداً (أكثر من 180 كلم\ساعه أو 4000 دورة محرك)

ومعناه ايضا ان لومينا اس اس سياره قويه جداً هاللي ممكن تمشي بها اكثر من 10 دقايق تحت الظروف هذي! بس ما عليك الا تحط الزيت المناسب (ونعم بلومينا اس اس)

واذا كان الزيت هذا بيريح المحرك على الظروف هذي..معناها ان المحرك بيصير مبسوط على السرعات العاديه...


انت الحين معك لومينا اس اس صح؟

وش كنت تستخدم زيوت؟

انا الحين باقي لي 400 كيلو على التغيير الجاي وناوي احط موبيل1

لازم اسوي غسيل ماكينه بالزيت حق الغسيل؟ ما يخرب الماكينه؟

لاني مشيت 26 الف كيلو وانا استعمل شل سوبر بلس..بعدها جربت فوكس سوبر جي تي (الان) والمره الجايه بحط موبيل واحد وبستمر عليه


اذا انت مجربه علمني وش فرق معك؟

وهل لازم اسوي غسيل ماكينه ولا لا...ووش احسن نوع زين غسيل؟

وكيف استخدمه؟

وشكراً

[NFS]

وعليكم السلام ورحمة الله وبركاته
أنا ماجربت هذا النوع من الزيوت لكن صديقي "S2000" جربه ولازال يستخدم هذا النوع من الزيوت وموبيل1 بالذات وهو دائماً يمدحه وهو ما يفكر أنه يرجع للزيت العادي.

أما عن تأثيره على المحرك فأنا ما سمعت أن في أحد أشتكى منه ، لكن ينصح لما تستخدمه لفترة أنك ما ترجع للزيوت العادية "ما أدري هذي الشغلة تسويقية علشان يبيعوا زيتهم هذا!؟!؟"


أما سؤالك عن الحاجة لغسيل المحرك فأنا أعتقد أنه ما يحتاج لذلك بس يفضل أنك تغير الفلتر "علشان تضمن أنك تخلصت من أكبر قدر ممكن من الزيت القديم".


أعتقد أنك جيد في اللغة الأنجليزية وهذا الموقع مسوي مقارنة بين الزيت العادي والزيت الصناعي "أقرأ :Synthetic vs. Petroleum Oils":

http://www.edmunds.com/ownership/driving/articles/44791/article.html

ومثل ما هو مكتوب فأن الزيت بيطول أكثر ، ويكون تأثيره واضح عند سرعة دوران المحرك المرتفعة "يعني عند الدعس" ، وأكبر ميزة هو أنه يحتفض بلزوجته عند مختلف درجات الحرارة ، بشكل عام هو أفضل من الزيت العادي في كل شيء ما عدا السعر:(:(



وعلى فكرة سيارتي أكورد بس لو يحصل لي لومينا SS ما أقول لا;) :p

ملاحظة : لايفضل أستخدام هذا الزيت مع السيارات التي لم تسير أكثر من 10,000 كيلومتر.

[MegaTroniC]

سلام
شكرا على الرد

انا خابر ان واحد من المشرفين معه لومينا اس اس

هو انت ولا E55

شكلي انا مخبّط شوي!

شكراً على الرد

والظاهر اني بحط موبيل1

الواحد ودّه ياخذ راحته على سرعات الدوران العاليه

احيانا وانا اقاوم الناس أوصل ل 6000 دوره\دقيقه وأكثر في بداية القومه

:)

وانا أحس ان الزيوت العاديه لا تفي بالغرض...

ومع السلامه..