>>>>>>>>>عـــيــــد الــمـــغــتــربــيـــن

[مدردش متقاعد]

وسط هذه الزحمة.. أحب أهنئ الجميع بمناسبة عيد الأضحى المبارك.. و أهدي أغنية المطرب (نعنوع الدلوع) .. شعللها و لعها.. لجميع أعضاء و عضوات سوالف الكرام:)

و أتمنى أن تتمتعوا بقضاء أمتع الأوقات مع الأهل و الأحباب في هذه المناسبة العزيزة..
قولوا الحمدلله..نعمة قضاء العيد مع الأهل نعمة كبيرة.. حسرة علي أنا.. يوم عيد و قاعد أحل البحث الي لازم أسلمه اليوم الساعة 5 العصر:(


بس الحمدلله.. الشباب ما قصروا.. يمعنا 5 جنيهات من كل واحد.. و اشتروا جمن كيلو لحم.. وواحد من الشباب طبخ طبخة رهيبة.. و قضينا عليها:)



كل عام و أنتم بخير.. و كل عام و كل مغترب بعيد عن أهله بخير.. و الله يرد كل مغترب لأهله ووطنه..

و لا تنسونا في دعائكم..

http://www.alshamsi.net/cards/eed_cards/sam_eed16.jpg

أخوكم
مدردش بن متقاعد:(

[متاهه]

بس الله يخليك..
لا تقول إنك وأصحابك أكلتوا (لحم بقر)
أنا من جد أسأل..(انت ببريطانيا صح)
أخوي عندكم:)

والله يعيد عليك السنة الجاية..
بين أهلك وأخوانك :)

أختــــك..
متاهــــه

[سعودية]

إن شاء الرحمن يكون هذا أخر عيد غربة :)

أشكرك على هذا الإهداء الرائع للمطرب دلوع النعنوع في هذه الأغنية الأروع لعلعها وشعلها وبعدين جب المطافي لها :)


مدردش وحيد :) انا بعد ما إنبسطت في هذا العيد لأنه عندي أخت مضيعتها وبعض الناس قالوا " سويعات " ويطلعونها :) وسفهوني :)


وصحة وعافية على هالأكلة اللي باين انها لذيذة :)


الله يوفقك ويردك لأهلك سالم غانم :)


تحياتي لك :)

[مدردش متقاعد]

كل عام و إنتي بخير..

لا تحافين كلينا لحم (تيوس) .. ماني مجنون علشان آكل لحم بقر تريديني (أنقلع) بسبة هالحمى القلاعية؟:)


سلمي على أخوج. و قوليله مدردش يسلم عليك من نيوكاسل:)

تحياتي لك:)

[Huda76]

أخي العزيز مدردش متقاعد :) :)

هلا بك والله أخوي ..

كل عام وأنت بألف خير وصحة وسلامة ..

ان شاء الله راح الكثير وما بقى الا القليل ( متى تتخرج ؟ :) )

وان شاء الله يا رب ان السنة الجاية تقضي العيد مع أهلك وفي ديرتك ..

بالتوفيق أخوي :)

تحياتي

[شيروود]

نحن قاعدين بالديره...ولا كو فرق مووول...


شو يعني فاتك...

أدري تقول شوفت الأهل...نعم هذي بس وصلاة العيد جان مايمكم مسجد

للجماعة...والباجي...تعال شوف إذا ما تندمت...انا أكون غلطان

على الأقل هناك..تقول غريب...ما عليه باجر نرد الديره وهات يا

معايد...لكن الصج اقول لك..والله الناس ياحجوا..ياراحوا القرى

أو البر أو سافروا للخارج..تصدق عدد المصلين اليوم أقل من عدد

مصلين يوم الجمعه...وكل واحد نصفه نوم...وعذرما بعد ذبح

الذبيحه.. محد لابس ..ولا متزين...

استغفر الله ..مابي اقول شيء زياده واللي يعارض قولي

انا قابل كلامه .. بس يحدد...احداث اليوم شلون مرت معاه...ونا

اتراجع لرأيه..اما الأخوات أظن حالهم..بعد مثل الرجال

ولا ..خلليهم هم يحكون لك بانفسهم احسن كيف قضوا يوم العيد..:)

لو رديت بتقول تغيرت الاعياد وهيه ما تغيرت..بس [[المنظر يبدوا

اكثر اخضراراً حين تتطلع اليه من بعد]]قاعده نفسيَّة.. :)

اليوم طلعت لصلاه العيد انا ورفيجي..وقررنا نعمل حركة تنشيطية

لمشاعر المصلين..ولأن العدد مثل ما قلت لك قليل...وقفنا بعد

الخطبة عند باب المصلَّى وتفاهمنا بدون كلام...بمجرد النظر..

ونوقف في وسط الساحة جدام المسجد ومن طلع لقطناه...(خومم-

هومم.عيدك مبارك.) سلام العيد...ومن كل الجنسيات..وعيد مبارك...

البعض يقول ميانين..البعض قال..اكيد يعرفونني انا مدير الصادر

والوارد...ولا انا التاجر فلان..البعض قال من انتوا...المهم فوق

مائتي ..لحية ..عايدناهم..وبربع ساعة..او اقل .

ليش قلنا كذا علشان نتذكر واياالاخوان ان الدين لا يقبل قضية

تتجاهل اللي يمك بالمسجد..وعينك متى يخلص الخطيب تقوم جري

على الدار..اجتماع الصلاة له هدف وهو التهاني سواء ضحيت ولا بعد

..تدري شصار اخوي مدردش..ولا يهونون الأخوة والأخوات..قامت صارت

مثل العدوى (الطيبه) ..كل واحد قام يسلِّم على اللي يمه...وهات

(خممم- همممم- حبببب)ومن العايدين المقبولين وسفهلوا والله كبار

السن...واستانسوا..عاد نحنه سلينا عمارنا انا ورفيجي. وعلى

اقرب فندق نفطر....وقبل لا تتحول حلوف (والله تقلطون عندنا..

الحميسة زاهبه)....؛حنا عاد نباتيين...تعرف ..:)

الزبده ..فيها كولسترول ..اقصد ترى هنيه وهناك مافيه فرق

وايد.. غير للحجاج...وروح الأجازة اما ..الباجي كله محصل بعضه.

آسف لإفساد خيالاتكم يالمغتربين...وكل عام وانتم بخير ومن

المقبولين المأجورين لسعيكم بطلب العلم .وللجميع التحية..؛

من ..اخوكم شيروود;)

[MUSLIMAH]

كل عام و أنت أقرب الى الله .. :)

و تقبل الله طاعتك :)

و عيدك مبارك :)

و الله كسرت خاطري :( الله يكون بعونكم :)

وإن شاء الله تردون ديرتكم رافعين الراس و أيام تقضي و تصير سوالف بعدين ..

الله يوفقكم دنيا و آخره :)

[مدردش متقاعد]

إن شاء الله عجبتك الأغنية؟ هههههه

أي أخت فيهن يا ترى؟:) بس مهما ضاعت فهي في الأصل يمبج و قريبة منج.. عاد أنا شقول و 6 من أخواني و أخواتي غير أمي و أبوي بعاد عني؟ بس الحمدلله على كل حال.. أنا أعتبركم أخواني و أخواتي البدلاء:)

إن شاء الله استانستي في العيد و كان فعلا يوم سعيد:)


تحياتي لك

[مدردش متقاعد]

و كل عام و أنتي أقرب إلى الله:)

نعم أختي الكريمة راح الكثير و ما بقى إلا القليل (أقل عن شهرين بإذن الله:))

بس لا تنسينا من في دعائج:)

تحياتي لك

[متعب .ع.ع]

^1
::: {{{ عيدك مبارك وسعيد أنشاء الله }}}
::: {{{ وتقبل الله من الجميع صالح الأعمال }}}
::: {{{ والله يعيده على الجميع بالخير والعافيه }}}

::: {{{ ويرد كل مغترب لأهله سالم غانم ، ويوفق الجميع فيما هو خير لوطنه وأهله ،، وتتم على خير أنشاء الله }}}...

::: {{{ ولك أجمل تحياتي }}}....

[الفجر الجديد]

ومعك حق العيد لا يكون عيد إلا بالجمعة مع الأهل والأحباب
لكن مع هذا نقول الحمد لله على نعمة الصحة والعافية ومهما كان ترى حالكم أفضل من حال كثيرين غيركم .
وإن شاء الله العيد القادم تكونون بين أهلكم وأحبابكم ونسأل الله أن يهون غربتكم ويردكم سالمين غانمين إن شاء الله .

[مدردش متقاعد]

ههههههههههههههه
و الله ضحكتني أضحك الله سنك يا شيروود:)

من وين تجيب ياخي هاي المصطلحات العجيبة؟ ما لاقيت غير الخومم-

هومم. هاهاهاها

و الله صدقك عيد اليوم غير عن أعياد البارحة.. بس ياخي أكيد أحسن عن إنك تعيد بعيد عن أهلك؟
أنا ما أقول غير الحمدلله.. على الأقل عيدت ويا مسلمين هالمرة.. بس قبل سنتين عيدت الأضحى على السفينة.. في نص البحر لا حد هناني و لا هنيت حد.. و كنت المسلم الوحيد في السفينة.. حتى نسيت سالفة العيد و ماحد ذكرني فيها إلا واحد من الملاحين!!

عيل قلت لي خومم- هومم؟ هههههه

تحياتي لك:)

هومم.عيدك مبارك.)

[مدردش متقاعد]

و أنت أيضا يا أختي الكريمة كل عام و أنت أكثر قربا من الله و التزاما بمنهاج رسول الله:)

و تقبل الله منا و منكم سائر الطاعات..

بس وين العيدية؟ جعنا.. نبا ناكل:)

عموما ما قصروا الشباب حاولوا الي يقدرون عليه علشان يحسسونا إننا في بلدنا ويا أهلنا... خلاص نحن تعودنا.. و ما بقي إلا القليل:)



تحياتي لك

[مدردش متقاعد]

و عليكم السلام و رحمة الله و بركاته

و كل عام و أنت أيضا بخير و عافية... و عيدك مبارك و عساك من عواده أخوي العزيز .. ياخي وينك من زمان ما شفناك؟

إن شاء الله قضيت عيد سعيد:)


تحياتي لك

[مدردش متقاعد]

ماشاء الله.. أنت أيضا جئتي تشاركيني أفراحي المحدودة في العيد:)

جزاك الله خيرا.. و أسأل الله أن يرد كل مسافر إلى أهله و يفرحهم به

و كل عام و أنت بخير:)



تحياتي لك

[MUSLIMAH]

جزاك الله خير أخوي مدردش :) و اياك ان شاء الله :)
تقبل الله منا و منك ان شاء الله :)
و الله ابوي مو هني علشان يضحي ، رايح الحج و ضحى هناك :)
العيد الجاي ان شاء الله :)
الله يعينكم على القليل القادم ان شاء الله :)

تحياتي لك :)

[سهيل(النجم)]

كل عام وانت بخير يامدردش وانشاءالله السنه القادمه وانت عنداهلك ولا تحزن تره السنين تمر بسرعه.
على فكره شو طابخين(برياني)ولاصالونه..........

[جرير]

السلام عليكم ورحمة الله وبركاته

هونها وتهون وانا اخوك .. ما بقي إلا القليل وترجع لامك بالسلامة .. :)
تقبل الله منا ومنكم صالح الأعمال

أسأل الله لك التوفيق في الدنيا والآخرة

[aziz2000]

كل عام وكل مغترب بخير وصحة وسلامة ..:)

وهونها وتهون .. وإن شاء الله تعيد الباقي عند أهلك وأحبابك ..:)

[الفرزدق]

من العايدين ،،،


وينك مو باين:)شكلك لقيت وجبة دسمة:)
جالس أنتظرك:)

[مدردش متقاعد]

أختي الكريمة مسلمة: أنتظر الأضحية في العيد الجاي.. بس أريد الراس بس.. علشان المخ:)


أخوي سهيل النجم: جزاك الله خير و تقبل الله منا و منكم إن شاء الله.. الحمدلله العيد عدى على خير:)


أخوي جرير:) و عليكم السلام و رحمة الله و بركاته
نعم ما بقى شي.. بس لا تنسانا في دعواتك:)



عزوز سلفكرين:)و إنت بخير و سلامة.. تراني جيت.. بجلس على قلبك:)


فرزدوق: من الفايزين إن شاء الله. كيف الرحلة؟:)