View Full Version : دردشات بحريــــــ (7) ــــــــة ((القراصنة))!!
مدردش متقاعد
03-03-2001, 01:28 AM
لقراءة الجزء السابق من هذه السلسلة:
دردشات بحريــــــ (6) ــــــــة ((تيارات المنسون))!! (http://www.swalif.net/sforum/showthread.php?threadid=78934)
__________________________________________________________
للي يحب يعرف شو هو المنسون(سؤال الحلقة الماضية) فهذا هو الجواب:)
المنسون هي رياح موسمية تهب على خليج عمان و بحر العرب في الصيف و تسبب تيارات بحرية
أبدى لي كثير من الأخوان و الأخوات ملاحظاتهم حول طول الدردشات البحرية السابقةو يمكن سبب ملل للبعض .. فتميت طوال الفترة الماضية أفكر في طريقة جديدة طرح..
فخطرت لي فكرة إني أنزل هذا الجزء على شكل نقاط خفيفة.. أو مثل ما نقول سوالف بحرية على الطاير كنهاية للجزء الأول من هذه السلسلة و أتمنى تسمتعون بقراءتها:)
من الطرائف الي ما أقدر أنساها في أول سفينة سالفة القراصنة في مضيق ملقا (مضيق يفصل بين سنفافورة و ماليزيا) ، فالسفينة في طريقها إلى اليابان و نفس الشي في الردة لازم تمر بهذا المضيق .. فمرة كنت أسولف معا صاحبنا (درويش) فحذرني من القراصنة اللي يهاجمون السفن في المضيق في الليل و خاصة الليالي الي مافي قمر!! أول شي حسبته يمزح معاي و قعدت أضحك عليه شو قراصنة و خرابيط وين عايشن:p .. وين عايشين نحنا؟!.. لكنه صمم.. و قالي قفل باب حجرتك.. ترى قبل سنتين هاجموا السفينة الفلانية و قتلوا الكابتن و سرقوا الخزينة. وسوا كذا و كذا و و و حكالي سوالف خلت شعر راسي يوقف من الرعب:(.. عاد أنا كنت أكبر خواف في هذيك الفترة.. فرحت ركض على غرفتي.. و قفلت الباب (ما كان في الغرفة شي ثقيل و إلا كنت حطيته ورا الباب احتياط!!) و غطيت نفسي باللحاف.. و إيدي على قلبي و ياليتي نمت مرتاح.. الكوابيس ما خلتني في حالي.. كل دقيقة أقوم أتأكد إنه ماحد هاجم السفينة.. و الحمدلله.. جت سليمة فلا قراصنة هجموا و لا يحزنون!!؛)
للأسف كان ماحد معطينا وجه من المهندسين.. لا أنا و لا درويش.. فكنا نقضي معظم الوقت نسولف و نثرثر.. حش في هذيلا الأسبان و النرويجان.. ماعندنا شغلة و لكن بالمقابل ما كانو يقدرون يحشون فينا لأنه درويش يتكلم أسباني!!.. كانوا مخلينا على راحتنا.. و بالذات أنا..ماأدري من نشر إشاعة إني ولد مدير الشركة!! و أنا استانست على الإشاعة :)أداوم وقت ما أريد.. و أطلع وقت ما أريد!!:p
كان في السفينة مثل ما خبرتكم غرفة تمارين رياضية و كان فيها أجهزة جديدة شجعتني أنا و درويش إننا نتمرن حديد.. فكنا دايما قبل ما ينتهي الدوام بساعة نشرد علشان نتمرن… فسويت تحدي أنا وياه في تمرين البطن.. من يقدر يسوي أكثر من الثاني.. أنا كنت واثق من نفسي ذيك الأيام.. بعدني صغير و رشيق.. و بالمقابل درويش كان شيبة و كرشته ماشاء الله.. فكل يوم كنا نزيد من مرات التمرين.. إلى أن جا يوم سويت فيه حوالي 60 مرة تمرين بطن على بالي حطمت الرقم القياسي… و النتيجة……. اليوم الثاني ما قدرت أقوم من فراشي!!:(:(
وصلنا اليابان في النهاية بعد حوالي 14 يوم إبحار.. و أقنعت درويش ينزل معاي بصعوبة.. لأنها معروفة إنها غالية جدا.. مشوار التاكسي بس يكلف حوالي 40 دولار من المينا للمدينة و نفس المبلغ للرجعة!!
عموما الجولة ما اختلفت عن الجولة الي حكيت لكم تفاصيلها في موضوع ((لحية ديجيتال)) و ((يابانيون مطاطيون)) الفرق البسيط.. إني كنت مستغرب (حبتين زيادة):p
سمعتوا عن إعصار (التيفون) .. أكيد سمعتوا عنه في الأخبار هذا الإعصار الي عادة يضرب اليابان و دول شرق آسيا في الصيف عادة.. .. المصيبة يا جماعة إنه كان في طريق السفينة و نحنا راجعين للإمارات.. تخيلوا إعصار يقابل سفينة.. صح إنها كبيرة بس قوة الإعصار بتخلي هالسفينة الكبيرة.. مثل علبة الكبريت!
بالرغم من الملاحين حاولوا يتفادون الإعصار و غيروا خط سير السفينة أكثر من مرة.. بس مافي فايدة… و حدث الالتقاء…………… و كان لقاء حميم فعلا!
فبالرغم من إن السفينة كانت بعيدة عن مركز الإعصار بحوالي 200 ميل.. إلا إنه تأثيرها كان مش بسيط!! أتذكر إنه الليلة الي كنا فيها قريبن منها. ما قدرت أنام و الله بسبب الاهتزازات العنيفة للسفينة.. و صوت الريح برع (وصلت سرهة الرياح لحوالي 70 ميل في الساعة!!).. و الأمواج الضخمة العاتية مثل الجبال.. باختصار.. ذكرتني بالأفلام الأجنبية.. بس كان بالنسبة لي.. فيلم رعب يخوف وايد!!
أخيرا… وصلنا مدينة الفجيرة بسلام.. و أنا ما صدقت.. على طول شليت قشي و تعلقت بالطراد الي جا يشلني.. و من المينا لاقيت تاكسي ينتظرني ووصلني لمدينة أبوظبي الحبيبة الي أسكن فيها…. 5 أسابيع في السفينة محبوس.. زين إنه درويش كان موجود و لا كنت بنتحر..
أخيرا و ليس آخرا طلعت بنتيجة إنها الحياة البحرية كلها ملل في ملل خاصة بالنسبة لنا نحن العرب الي ما نحب المراقص الليلة و لا الشرب و المكرات الي يسونها الغربيين بداعي التسلية و و زادت هذه القناعة يوم طلعت السفن الي بعدها….. علشان كذا صار شعاري الي دايم أقوله للشباب الجدد قبل ما يطلعون السفينة … (الداخل فيها مفقود و الخارج موجود)!!
لكن السؤال هنا.. ليش ما انسحبت من البعثة بعد هذه الرحلة.. خصوصا و إن الشركة كانت معتبرة هذي الرحلة هي المحك .. و بعدها يكون لي حرية الإختيار.. إما إني أكمل أو أنسحب... بصراحة ما أدري ليش.. و ما أقدر أقول غير..(( قدر الله و ماشاء فعل))
و الحين ما بقى لي غير شهرين اثنين و إن شاء الله أتخرج.. و أصير مهندس:)
و إلى اللقاء مع دردشات بحرية جديدة.. لكن في سفينة جديدة و مثيرة أكثر:)
و أتمنى تكونون اسمتعتم بخلاصة تجاربي البحرية في السفينة الأولى..
تحياتي:)
سردال
03-03-2001, 01:39 AM
يا عيني، هذا كله على السفينة الأولى بس!! :) الله يستر في الباقيات.
بس قصة القراصنة والموج والإعصار خلتني أخاف وأنا في البطين!!! :) الله يعينك يا مدردش، البحر مو السفن بس، الداخل له مفقود والخارج من مولود :)، الله ستر يوم رجعت بالسلامة.
أتذكر مرة في بحر أبوظبي، والجو عاصف كيف لعب بنا الموج لعبة والموج تقول جبال من كبرها، كيف لو طلعنا برع؟! :)
مدردش متقاعد
03-03-2001, 01:53 AM
و إنت سردال:)
أكيد إنت خبرتك في البحر أكثر.. أمواج المحيطات بالتأكيد أضخم بكثير من أمواج الخليج العربي الي كنا نشوفها يوم نروح بعيد شوي:)
تخيل إنها تلعب بها لعب بالرغم من إن وزن السفينة حوالي 110 آلاف طن.. بدون حمولة!!
تتذطر يوم كنا نروح السباقات البحرية؟ أحيدك موجود؟:)
تحياتي
شيروود
03-03-2001, 06:01 AM
تحكيها لأحفادك...وسنونك طايحه..واسمك وقتها ..مدردث :)
http://www.harrythecat.com/Graphics/k/island1.gif
اخي القرصان المتقاعد..اوبس ....اقصد الطوفان..اقصد القبطان...
لا تواخذوني ..من زمان عن السوالف وبالذات الأصدقاء..:) لذلك متردد بالكلام ...بس لين شفت ان اعصار التايفون اللي حسَّربكم كان الأسبان خذوا اسمه من العرب (الطوفان) ترحمت على زمن سيادة العرب للبحار ...والله كنت اهنيك اللي ترقد والطوفان التايفون...يزأر بالخارج..الف قرصان ولا طوفان واحد .القراصنه على الأقل بشر تقدر تتفاهم معاهم...ومجرمين...لكن التايفون تخاف ليكون عقوبه ربانيَّه الله يستر تشمل الواحد مع غيره....
عموما انت مريت بتجربة القراصنه..او الحلم بهم..على الاقل...بس انا ظنيتهم انتهوا من ايام..زمان..ابوعصابه على العين بس بالكرتون حسبالي..مو بالواقع
سؤال مدردش اذا ممكن...اكيد السفنه هاي وزنها (110,000) طن
ولا ومائه وعشره طن...الرقم مهول بالنسبة لي...
بالنسبه لخوفك من القراصنه انا اعتقد انك ماخفت ولا يحزنون..ولا انته ما جربت الخوف قبل.. ماتعرف شلون تخاف يعني..هاهاها
اللي يخاف ماينام يامدردش...انت نمت بس شوَّية كوابيس..هذا مو خوف.. يمكن ..مزود العشاء شويه الله يسلمك...:)
عموما...حركات البحر حلوة لو مخيفة..شوي ..بس تشغل وتشعلل التحدي بنفس الانسان..والله يمكن من حظك ماطلعت من عمل البحر..
الغريب ما معاكم اي مهندسات او ملاحات (نساء )..ولا يمكن نوع سفينتكم نوع ..مايعملن عليها النساء...؟حب استطلاع فقط..؟
نتريا اخبار رحلاتك بالسفن الثانية ورايي نفس نمط النقاط...لا تتركنا ننتظر وايد.....يالله نبي رحله جديده..بس من عالم البحار...كمهندس لا كمسافر ...مع فنون.الحياة بالبحر ومسابقة بنهاية الحلقات عن التايفونات والمنسون ومكان القراصنه .. وغيرها من مصطلحات البحر...وهمومه....عشر حلقات بعشرين سؤال... ...نبي نقرا ونرد...مانبي نقف بس متفرجين....:)
http://www.harrythecat.com/Graphics/k/sunset1.gif
عذرا عذرا للإطالة مادريت بروحي الا بالنهاية....قضيت فيها وقت و مانيب حاذفها ببساطه....:)
تحياتي ...
شيروود
مدردش متقاعد
03-03-2001, 05:43 PM
أول شي.. مرحبا بك مرة ثانية في سوالف الأصدقاء.. و كم يفرحني إنه عودتك تكون من خلال التعقيب على دردشاتي المتواضعة.. في تعقيب أكثر من رائع.. المفروض تفرد له موضوع خاص:)
خليتني قرصان الله يهديك.. و طلعت فضايحي:)
ياخي و الله القراصنة خوفوني.. بس ترى كان شوية أمان و هذا خلاني أنام شوب.. بس ما تهنيت للأسف:(
إن شاء الله مرة ثانية.. إذا نمت بخلي واحد يصورني و يطرش الصورة لك علشان تصدق:)
السفينة يا طويل العمر وزنها مائة و عشرة آلاف طن.. غير الحمولة.. فيوم ينكون محملين في طرقنا لليابن السفينة تكون متزنة شوي.. ة تمايلها يكون أقل.. بس المصيبة يوم تكون (Ballast) بالنسبة لي كابوس.. و خاصة السفينة مرتفعة.. فإذا كان في تيارات و خلتها تتمايل يمين و يسار.. على طول أصدع و أتعب.. غير التعب النفسي:(
حلوة هذي تريد ملاحات حريم؟ هذا الي ناقص.. الحمدلله في كل السفن الي طلعتها ماكان في لا مهندسات و لا ملاحات.. دايما ينزلون قبل ما أجي.. يخافون مني:) بس هي في كم وحدة.. بس هم أقرب في تكوينهم للرجال من النساء؟ بالله عليك من المجنونة الي بتشتغل هذي الشغلة؟
عموما أشكرك على تعقيبك الأكثر من رائع.. و أتمنى تسمتع بقراءة الجزء الثاني من السلسلة:)
و لك من خالص تقديري و احترامي:)
مدردش بحار
سعودية
04-03-2001, 08:42 AM
يا سيدي الفاضل ..
اعلم أن دردشاتك طبعت قبل القراءة وكنت أنا أول من زار الدردشات وقت نزولها ..
فكيف تسأل هل أعجبتني أم لا ..
وصدقني أن دردشاتك صارت ملف كامل بكامل موضوعاته مع ردوده في مكتبة زوجي العزيز وصار عنوانها >>> تجربة بحار أعرفه <<<
*
*
*
*
*
*
*
*
*
*
*
*
لم أرى أن دردشاتك طويلة ولكن كان البعد في الزمن بين كل حلقة وأخرى هو الطويل ..
*
*
*
*
*
سوف أتبع أسلوبك هذه المرة في طريقة الرد ..
*أما سالفة القراصنة هذي تحفة :)
وحلوة " ما كان في الغرفة شيء ثقيل وإلا كنت حاطيته ورا الباب احتياط " تخيلت شكلك ههههههههه:)
بس وش رايك تنزل موضوع جديد تسمية كوابيس مدردش وتقص فيه كوابيسك هذيك الليلة :):):)
والحمدلله على السلامة ..
" قت سليمة المرادي بس خدها نصيحة من أختك الكبيرة مش كل مرة تسلم القرة " :):)
*وخر عنك يا ولد مدير الشركة :):):)
ما شاء الله واسطة وش عليك ..
تعرف لما قريت النقطة هذي قلت ياليت تتدرب عند مديرتي أيام " السكرتارية " قضيت فترة التدريب بشق الأنفس وطلعت عيوني لبره او زي ما تقولون لبرع :)
*60 مرة يا الظالم بس لا تخاف شفت اسمك في موسوعة جنيس للأرقام القياسية :)
*عندي الوالد والوالدة هم اللي راحوا اليابان ويقولون نار الله الموقدة " فنجان الشاي " ب 50 ريال :(
بس أتمنى أروح لها .. بس الله أعلم متى راح يكون .. يا حظك يا شيخ ما شاء الله لا قوة الا بالله :)
*حمدلله على السلامة بعد الإعصار تخيلت حالة الأهل وكيف كانوا قلقانين عليك :(
بس الله يعين الوالدة على فراقك :(
عندي اخ في منشستر قريب منك إذا صار زلزال في اليابان راحت الوالدة تركض تدق عليه ها عسى ما صار لك شيء يا وليدي :)
*أخيراً وصلت أبو ظبي .. كفارة يا عم يقولون السجن للرجال :)
*صدقت " قدرالله وما شاء فعل " لولا هذا لما وجدت إنسان بقي على حاله ..
* سؤال يا مدردش وش تطلع اذا خلصت " طبعاً عارفة مهندس سفن " بس قصدي وين تشتغل وطبيعة الوظيفة أو حر مع الوالد ؟؟
اسف على التطفل :)
أشكرك يا أخي لقد استمتعت مع قصتك أنا وزوجي ونتمنى منك ان توافينا بالجزء الثاني بسرعة :)
تحياتي لك ولقلمك الصادق :)
aziz2000
04-03-2001, 10:16 AM
يريد مننا أن نلتهي بالحلاوة التي نجدها في مواضيعه ونحن نقرأها فيطول الموضوع لكي يكون له فرصة للهجوم على أجهزتنا في غفلة مننا ..:)
================================================
ليت إن القراصنة جاءت حتى تسوي لك إختبار بسيط في مدى سرعة الخوف عندك ..:) .. بس وصيتي لك .. لاتجلس مع درويش ..:)
http://www.des4arab.com/images/backcell.gif
ياعيني عليك ياولد المدير .. :p .. هذي تــحــفــة الـرحـلـة .. :p .. بس من وين سرت هذه الشائعة ؟؟ .. ( أشك في سعودية :)) .. :p
http://www.des4arab.com/images/backcell.gif
وش صار لك بعد التمارين الرياضية .. وليه ماقدرت تقوم من الفراش ؟؟ ..:) .. بطنك صاده تصلب ؟؟ .. :p
http://www.des4arab.com/images/backcell.gif
ليه ماشريت لي جوال من اليابان ؟؟ .. :mad:
http://www.des4arab.com/images/backcell.gif
في وقت الإعصار .. تموج الإبحار .. وأصبح مدردش في خبر كان ..
http://www.des4arab.com/images/backcell.gif
5 أسابيع في السفينة ؟؟!! .. مسكين .. :cool:
http://www.des4arab.com/images/backcell.gif
الحمدلله إنك كملت يامهندس ( مقدما ) ..:)
http://www.des4arab.com/images/backcell.gif
هل تستثمر هذه الرحلات الطويلة ووقت الفراغ الطويل في القراءة ؟؟ .. أظنها فرصة ثمينة جدا للقراءة .. :)
http://www.des4arab.com/images/backcell.gif
والحمدلله على السلامة ..:)
سعودية
04-03-2001, 10:30 AM
مين قالك :)
الله يهديك يعني لازم تطلع الفضايح :)
يعني وش يصير أخونا ونبي نسوي له شوي برستيج فيها شيء :)
ما عليك بعد مطلعة اشاعة ثانية انه عزيز ترليون صاير مراقب في سوالف :)
بس ما أحد معطيها وجه ها الإشاعة :)
على قولة يونيك هع هع هع :)
على قولة سعودية كع كع كع :)
تحياتي لك :)
aziz2000
04-03-2001, 10:44 AM
مــراقــب ؟!!! .. :cool:
عز الله إللي صار كل المنتدى ضدي ..:)
مراقب 10 10 10 ..:)
سعودية
04-03-2001, 10:59 AM
علشان كذا أنا نشرت الإشاعة :)
علشان الناس ................. ههههههههه :):):)
تحياتي لك :)
aziz2000
04-03-2001, 11:02 AM
الظاهر مدردش بيطلع علينا واحنا نحوس في موضوعه ..:)
مراقب 10 10 10 ..:)
تحياتي ..:)
سعودية
04-03-2001, 11:26 AM
يا مراقب 101010 لا تطلع اشاعات ما لها داعي :)
مين يقول حنا أصلاً كتبنا في صفحة مدردش من او عقبنا حتى على موضوعة بطل اشاعات يا مراقب 3 عشرات :)
يا رب اشوفك مراقب ابو ريالين :)
جديدة طالعة من البنك طازة :)
تحياتي لك :)
aziz2000
04-03-2001, 11:48 AM
ابسط يامدردش .. أنا صرت مراقب بوريالين ..:(
طيب ياسعودية ..:) .. مع العيد سأطلق اللقب الجديد لكِ ..:)
تحياتي لحليب السعودية ( قديييمة صاارت ) ..:)
سعودية
04-03-2001, 12:07 PM
هيه هيه هيه هيه هيه هيه
هيه هيه هيه هيه هيه هيه
هيه هيه هيه هيه هيه هيه
هيه هيه هيه هيه هيه هيه
بأخذ عيديه من زمان عن العيديات :)
في انتظار اللقب:)
تحياتي لك:)
aziz2000
04-03-2001, 12:17 PM
انتظري وسنُعطيكِ العيدية في موعدها إن شاء الله ..:)
مدردش .. تايم آوت .. ;)
مدردش متقاعد
04-03-2001, 12:27 PM
من 5 ردود لـ 14 رد؟
ماشاء الله؟:)
صارة غرفة دردشة.. ماهي دردشات بحرية.. يالله اطلبوا.. إيش تريدون تاكلون؟
ربيان؟ سمك مشوي.. سمك مقلي.. أفستوس (مادري ويش يسمون ذاك الكأءن الغريب الي سعره غالي؟)..
خبروني و أنا أجيب لكم الطلب:)
سعودية
04-03-2001, 12:35 PM
أنا مسلم جيب أكل ما في كنزير :)
جيب شرب ما في كهول :)
جيب دبه اسلامي هلال :)
أنا فيه سوري صديق علشان انا فيه سوي قرقر واجد :)
يالله جيبي اكل جلدي :)
تيقا :)
أكاهي مطلب :)
ميري مهبه مافي سلام
****************** شاهر ماهر مك كربان
اشرب ببسي اكل رمان
****************** يالله بسوراه انا فيه تأبان
أعشق الشعر لأخر رمق في عمري:)
مدردش متقاعد
04-03-2001, 01:10 PM
و الله ضحكتيني.. أصحك الله سنج..
من وين جبتي هالأبيات؟ ههههه و الله تفطس من الضحك:)
أنا يروح يجيب عسير.. و شعشبونه.. مافي مشكل:)
أخي مدردش متقاعد
دردشات في غاية الروعة تجربة جدا حلوة
لنا كقراء ... شئ طيب جدا أن يدون الإنسان
ما مر به في حياته ويطلع الآخرين عليه ... :)
كل اللي بغيت أعلق عليه سبقوني أخواني فيه
وأحلى جملة كتبتها
"أخيرا… وصلنا مدينة الفجيرة بسلام.. و أنا ما صدقت..
على طول شليت قشي و تعلقت بالطراد الي جا يشلني..
و من المينا لاقيت تاكسي ينتظرني ووصلني لمدينة أبوظبي الحبيبة "
ما أحلى الردة للبلاد
وشكرا لك أمتعتنا :)
[تم تعديل الموضوع بواسطة بشرى يوم 05-03-2001 في 01:16 AM]
زهر الليالي
04-03-2001, 04:38 PM
الحمد لله أن طيب الذكر أخونا (بروكسي) ما دخل هالموضوع.... كان قال عبارته المشهوره (وع موضوع طويل)
:):)
على العموم أستمتعت بالدردشات البحاريه قصدي البحريه و(ملحقاتها)
وتسلم يا مدردش
مدردش متقاعد
04-03-2001, 07:49 PM
أختي الكريمة سعودية..
ما تدري كيف مقدار فرحتي يوم رديتي على الموضوع:)
شكرا لك.. رفعتي معنوؤياتي و الله.. و شجعتيني إنت و الأخ العزيز شيروود على اللإستمرار.. فبارك الله فيك و كثر الله من أمثالك أختي الفاضلة..
قبل كل شي.. ما خبرتني عن أحوال الطابعة؟:) خلص الحبر و للا بعد؟:)
ماشاء الله مسوية فايل باسمي؟ يا حظي و الله ياحظي.. في ناس يعطوني وجه!! وووووووووووووووووووههههههه:)
ميين قدك يا مدردش:)
و الله ما أدري شو أقلك يا سعودية.. أدري أن التباعد في طرحي للأجزاء يفقدها شعبيتها و ينسي القراء تسلسل الحلقات..المشكلة و الله هي الوقت و الله و مشاغل الدراسة.. لكن إن شاء الله سأجهز الحلقات قبل عرضها.. حتى لا (أزنق) في الوقت:)
صدق الوالد و الوالدة راحوا اليابان و لا تمزحين؟ شو بيوديهم هناك؟ أعوذ بالله شو بياكلون.. و الله جوع هناك؟:)
ههههههه,و سالفة الإعصار سالفة.. الحمدلله كانت أول مرة و آخر مرة نشوف الإعصار.. عاد أنا استغليت الوضع استغلال محترم:).. أول ما وصلنا سنغافورة و لاقيت إرسال في الجوال مالي.. اتصلت على البيت و كلمت الوالدة.. قلت لها.. ترى الموضوع كذا و كذا.. و يمكن يمر علينا إعصار.. و ما أشوفكم.. فادعيلي بالخير.. و و .. هههههه
الوالدة مسكينة خافت علي هاهاها بعد ما سويت لها فيلم هندي:)
و الله أيام صراحة:)
أما القراصنة فسالفتهم سالفة مرة ثانية بحط شنطة السفر ورا الباب مع الكركيب الي فيها:)
.. توني البارحة شايف في قناة الجزيرة إنه السلطات الماليزية مكثفة الدوريات في المضيق بسبب زيادة حوادث القرصنة في المضيق؟ خلاص حرمت أنا ما بطلع.. بكرة يختطفوني.. بتلاقون مدردشكم في خبر كان!!
هممم فكرة الكوابيس واردة.. بس خلني أجمع لي كمن كابوس و أحط لها بهارات:)
و الله كنت (كينج) أداوم وقت ما أريد.. و أطلع وقت ما أريد..يا سلام عليك يا مدردش.. شيخ:) ترى الفاكس يوم وصلهم إني بلتحق في السفنة الظاهر اسم القبيلة وصل غلط.. على طول قالوا هو هذا.. ولد المدير العام هههه وو أنا قاعد أقول لنفسي " يا أغبياء لو كنت ولد المدير.. أو حتى أقرب له.. كت جييت هالشغلة المنيلة في سيتين نيلة"؟:)
بس ما ينلامون.. اسبان .. خوافين:)
و الله يا سعودية وش أقولج.. ظهري لين الحين أحس يعورني.. هذا جزاي.. أتفلسف.. أنا وش لي في الرياضة خلونا في المكابيس و المندي و المظبي (ترى أنا ماني متين نفس سردال:))
بس خلاص.. حرمت بعدها.. صرت أسوي 15 مرة و آخذ راحة:)
و الله ما أقدر أوصف شعوري يوم وصلت الإمارات.. كأني طلعت من سجن.. 5 اسابيع سوت في كذا..كيف قدرت أستحمل 4 شهور سحبة وحدة... هذي سالفتها سالفة.. بخبركم عنها في الجزء الثاني من السلسة.. بس صدق الواحد ما يحس بالحرية إلا يوم يفقدها.. صحيح كنا منعمين و معززين و مكرمين.. بس ما زلنا محكورين في مكان و احد.. و الإنسان بطبعه يعشق الحرية (ولا شو رايك يا سعودية؟:)
نعم هذا قضاء الله و أنا راضي به.. "و عسى أن تكرهوا شيئا و هو خير لكم" و الحمدلله على كل حال :)
إن شاء اله بعد ما أتخرج.. مافي فكة يا أختي الكريمة.. بداوم علي السفن.. بين الإمارات و اليابان.. و كل طلعة بـ 4 شهور.. و بالتالي كلها كم شهر و بودعكم:(
لأنه مافي لا إنتر نت و لا هم يحزنون:(
خلوها على الله بس.. و ادعولي إنه الله يفكني من هالشغلة و يعوضني بشغلة أحسن منها.. على الأقل شوية استقرار؟:(
ذكرتنيني في موضوع بطرحه و الله:)
آخيرا و ليس آخرا.. أشكرك أختي الفاضلة يعودية على تعقيبك الرائع حقيقة و على الردود الفرعية الأخرى.. بصراحة أضفتي على الموضوع نكهة مميزة إنتي و الأخ عزوز سلفكرين بن بلكريم:)
فلك مني خالص الإحترام و التقدير.. و كل عام و أنتي و زوجك الفاضل و شيطونك الصغير بالف خير. و أسأل الله أن يديم بينك المودة و أن يجمعك دائما على خير:)
المدردش البحري
مدردش بن متقاعد:)
جرح السنين
05-03-2001, 03:29 AM
اهلا اخي مدردش
فعلا الاندماج في مجتمع آخر يختلف عنك في العادات و الدين و كل شئ امر صعب
بس الحمدلله عدت الرحلة بسلام
و ما باقي شئ و تتخرج يعني هانت و انشاء الله تاخذ الشهادة
و ما تلقى الا اللي يطيب خاطرك .. و انشاء اله الله يعز ابو ظبي و الامارات و تكون في تقدم مستمر
مدردش متقاعد
05-03-2001, 05:27 AM
أنا هاكر يا شامبو:)
الله يسامحك. ياخي.. إن بعض الظن إثم.. صاير تطلع إشاعات مثل حليب السعودية؟
مش مكلة.. حسابي معاك بعدين:)
ياخي خل القراصنة في حالهم.. الحمدلله ما جاو.. أصلا يوم يشوفون شكلي بيعافونه.. ترى أنا ما أسوى.. كلها عظم و شوية لحم:)
و الله يا أخي.. درويش ما قصر ريال و النعم.. تعلمت منه و استفدت. و لولاه كنت حالي مثل حال الكرس و الا الطاولة.. ما حد يريد يعلمني شي:(
بهالإشاعة هي الي خربت الرحلة أصلا.. ياليتها ما طلعت.. كنت بفهم شي على الأقل؟ ما كانت هاخمسة أسابيع ضاعت هدر.. و الله كل شي جايز.. بس ما أعتقد سعودية كانت تعرفني ذاك الوقت:)
خلاص ياخي.. قلنا توبة.. مابسوي تمارين بطن مرة ثانية.. المشكلة الكرش بدا يظهر.. على ما أتزوج بينتفخ و بيصير بالونة هههههه
يا حبيبي جوالات اليابان ما تمشي لا في السعودية و لا في الإمارات.. نظام جي إس إم ثاني:)
و بعدين إنت ما عطيتني فلوس:)
و الله رحلة.. بس هذي كانت هينة..مقابل ال8 شهور الي قعدت فيها...
و للأسف ما كنت أستفيد من وقتي فيها و كنت لاهي.. بس أنا ناوي إني أستغل الوقت الجاي في حفظ القرآن و قراءة كتب الفقه و التفسير.. و لا تنسوني من دعائكم:)
تحياتي لك يا عزوز:)
مدردش متقاعد
05-03-2001, 06:09 AM
أشكرك على تعقيبك الطيب.. و أحمد الله أني عند حسن الظن:)
أتمنى أن تكوني فعلا قد استمعت بقراءة هذا الجزء و ما سبقه من أجزاء.. لأني أعتقد أنها ليست مذكراتي الخاصة بي وحدي بل هي خاصة بمجموعة من شباب الوطن قهروا الصعاب و اختاروا تخصصين من أصعب التخصصات المهنية.. و هما الهندسة البحرية و الملاحة البحرية.. و التي يفر منه كثير من شباب هذه الأيام فرار القط من الأسد:)
أعتقد أنك من الإمارات إذا لم أخطئ بعد أن رأيت ذكرك لجريدة الإتحاد في تعقيب من تعقيباتك على موضوع أحد الأعضاء.. لذلك أنا متأكد أنك متفهمة لوضعنا نحن الشباب المغتربون..
و فعلا...
ما أحلى العودة إلى الوطن:)
تحياتي لك أختي الكريمة:)
أخي مدردش متقاعد
بالنسبة للدردشات والحق يقال فعلا ممتعة لأن
مكان الأحداث فعلا جديد بالنسبة لنا " البحر "
وطريقة السرد مشوقة .. شكرا لك
بخصوص معاناة الشباب ...
أثبت شباب الإمارات والخليج بشكل عام ...فعلا تميزهم وقدرتهم على العطاء والتفوق في كثير من المجالات ولله الحمد ...
وأنا ضد من يقول أن شباب الإمارات شباب مستهتر ولا يحرص إلا على توافه الأمور ... طبعا لأ وألف لأ ...
فما شاء الله هناك الأطباء
والمهندسين :) ... والطيارات .. وكثير من الـتخصصات الصعبة
فعلا ... التي اثبتوا فيها تفوقهم بكل جدارة ...
وشكرا لك :)
مدردش متقاعد
06-03-2001, 01:13 AM
شكرا لك يا أخي الكريم على تعقيبك الطيب.. و أرجو أن تكون فعلا قد استمعت بقراءة هذه الحلقة القصيرة نسبيا:) و (ملحقاتها):)
أخونا بروكسي للأسف صار له مدة غايب و ما يبين؟؟
عموما.. كل عام و إنت بخير.. و أتمنى أن تستمتع بباقي الحلقات:
تحياتي
مدردش متقاعد
06-03-2001, 01:16 AM
و عليكم السلام و رحمة الله و بركاته
شكرا لك على مشاعرك الطيبة تجاهي و تجاه جميع المغتربين.. و أسأل الله أن يتقبل دعائكم.. فقد مضى الكثير و لم يبق إلا القليل:)
و كل عام و أنتي بخير:)
مدردش متقاعد
06-03-2001, 05:52 AM
شكرا لك يا أختي الكريمة على هذه الشحنات المعنوية الهائلة التي أمديتيني بها في آخر شهرين لي هنا:)
فعلا.. هناك شباب واعون و يعشقون خوض الصعاب و المغامرات.. قد تجذبهم مظاهر الدنيا في البداية.. لكن مادام أساسهم متين .. فلابد لهم أن يعودوا مرة أخرى لاستكمال طريقهم في الحياة:)
أتمنى أن يعجبك الجزء الثاني من السلسلة البحرية التي ستطرح قريبا:)
تحاتي لك أختي الفاضلة بشرى
سعودية
06-03-2001, 06:21 AM
الله يرفع شانك وقدرك اخوي :)
وصراحة الدردشات تستاهل ولو كنت اجاملك كنت جاملت مرة ولا ثنتين وبس ولا غثيتك وين باقي الأجزاء في كل موضوع :)
بعدين اعتقد انه صرنا أكبر من أنه نجامل بعض :)
ترى أنا أختك الكبيرة وإذا سويت شيء ترللي :) راح أعطيك على راسك ولك تجربة معي وتعرف اسلوبي :)
((((((( نسيت اكتب النقطة هذي في هذا اسلوبي ماهو اسلوبك ))))
تعرف عندي مشكلة أواجهها الميزانية حقت الطابعة طغت علينا ومحنا ملحقين عليها :) بس الله يعين :)
مدردش والله العظيم الوالد والوالدة راحوا لليابان " مرتين "
المرة الأولى كنت معاهم بس كان عمري 11 سنة ما أتذكر الا طشاش :)
ذكريات بسيطة مثل السوق اللي يبيعون فيه المحار وتدفع حق المحارة وانت وحظك اذا فيها لولوة تاخذها واذا لا هذا حظك ونصيبك :)واتذكر الوالدة طلع لها لولوة بس أكلوها عليها وبدلوه بإكسسوار يعني بصحيح العبارة ارطسونا :)
بعد اتذكر يوم رحنا علشان نتغدى بالمطعم وكان فيه وفد او حاجة زي كذا وكانوا كثيرين " الطاولة اللي جنبنا على طول " وبعد ما طلبنا غدانا جابوا شيء لهم غريب كائن في صحن تقديم وصاروا ياكلون بالملعقة من عند راسه ومستانسين وانا في قمة الإستغراب يومها سألت وشو هذا قالوا ((( قرد ))) وياكلون دماغة :(
واتذكر اننا واجهنا مشكلة مع اليابانين علشان طريقة عيوننا وكل محل نروح يسألونا وشلون وليش وعلشان ايش ؟؟؟
وبعدين يقولون حنا عالم ثالث وهم متقدمين علينا بمراحل !!!!
بس السفرة الثانية كنت متزوجة ولا يمكن ان اذهب معهم أي ((( نفر افر )))) :)
اما رايي في الحرية ما يبي اجاوب !!! صح :):):)
أن شاء الله ترتاح في شغلتك وتلاقي الشغلة اللي على مزاجك وكيفك وتستقر ويزوجك ربي ويرزقك بالذرية الصالحة :)
تحياتي لك :)
مدردش متقاعد
07-03-2001, 12:19 AM
ماشاء الله .. مرتين ؟
شو راحوا يسوون طيب؟ ممكن أعرف؟ الظاهر إنتوا سافرتوا أماكن كثيرة؟
ليكون إنتي بنت سفير ة نحن ما ندري؟ هههههه
شخبار الطابعة:) قولي الحدلله إني ما أحط صور في الدردشات كنت خسرتج حبر محترم و أوراق:)
عموما.. أتمنى الجزء الثاني من السلسة يكون في نفس المستوى.. بس بقلل من المكتوب علشان ما حد يمل:)
الله يوفق الجميع لما فيه الخير
تحياتي لك أختي الكريمة:)