View Full Version : و أي قلب لك ..
شوق الامارات
20-08-2000, 04:02 PM
يمكن يكون واقع خلاص صرنا نعيشه .. بس والله يا عالم حرام .. حرام يكون مصيره هذه المعاملة القاسية .. و أي قلب تملك .. عشان يكون هذا جزاه .. هو تعب و شقا كل أيام عمره .. لأجل يوفر لكم أحسن عيشه .. كبركم و ستركم .. وحرم نفسه من أشياء وايد لأجلكم .. آه و ما أقول غير آه .. آه من الأيام كيف صارت أيامه . .
طبعا تبون تعرفون السالفة .. يا حبكم حق السوالف .. بس هذه السالفة للي عند قلب و بس .. لأن اللي ما عنده قلب عمره ما راح يحس ..
السالفة وما فيها اني أمس زرت أحد المستشفيات الكبيرة في الدولة .. كانت الحركة في هذا المستشفى عجيبة .. ناس رايحه وناس جايه .. و انت اقعد و طالع .. أهم الأشياء اللي لاحظتها و أنا قاعدة .. الرجال الكبار في السن .. مساكين والله .. كل واحد فيهم واره هندي يساعده .. ومن دكتور لدكتور هو معاه .. طيب وين ولده أو بنته .. أخته والا أخوه .. خلاص الناس ما عاد فيها خير .. والله يا عالم حرام .. تلاقي الرجال هذا صرف على عياله و رباهم وكل عمره عطاهم .. يكون هذا جزاه ..
والله اني ما اعرف اشلون اقول السالفة .. بس والله يا عالم حرام ..
تحياتي لكم
أختكم شوق
HaMaD12
20-08-2000, 04:05 PM
ممكن تغيرين آخر جملة
سوار العسل
20-08-2000, 04:08 PM
شو مافي بقلبهم رحمة...
....................
هلا شوق الإمارات...
:):):)
تحياتي لكم
أختكم شوك !!!!
---------------
مع إن حرف الكاف بعيد عن حرف القاف في الكيبورد!!
شوق الامارات
20-08-2000, 04:15 PM
HaMaD12
اهلين باصغر الاعضاء في سوالف
--------
هلا اختي سوار
خلاص ما عاد في قلوبهم رحمة
و الله يستر من الايام الجايه
تقبل تحياتي
شوق
شوق الامارات
20-08-2000, 04:19 PM
هذا اللي صار
ما ادري اشلون .. يا الله هي غلطه مطبعيه ..
لا تفكر غلط
عاندني
20-08-2000, 04:25 PM
صدقتي و الله ...
هذا حال الدنيا هذي الأيام ..
و تلاقين عيالهم مب فاضيين حقهم عشان جذي..شوفينهم على هالحال..
هفوف الخواطر
20-08-2000, 04:32 PM
سلام أختي شوق الإمارات
اهمال الوالدين أو عدم رعايتهم عند الكبر يعبر جريمه ،لا بل من أبشع الجرائم ..
يحزنني كثيراً عندما ارى عجوز ومعه السائق أو الهندي الذي يعتني به ، وكأنه مقطوع من شجره ... بالرغم من ان له من الأبناء الكثير
ولكن المشاغل كثيره .....
فأي جحة هذه التي يتحججون فيها ..وأي أعذار واهيه ..
يفعلون هذا الشيء وهم متناسين قول الرحمن جل شأنه :
""وقضى ربكما ألا تعبدوا إلا إياه وبالوالدين إحسانا""
شوق الامارات
20-08-2000, 04:42 PM
هلا عاندني
أي والله هذه حال الدنيا
---------
هلا بهفوف الخواطر
صدقتي والله .. و بس وين اللي يسمع هذا الكلام
و الناس هالايام ما همهم غير المادة ...
و اللي نسى اللي رعاه
باجر عياله ينسونه
ساعتها بس وبيذكر ابوه
وما راح يفيده شيء
للأسف ...
-------
تقبلوا تحياتي
اختكم شوق
الحفار
20-08-2000, 06:11 PM
موضوع حلو تشكرين عليه
..
اقول لك شيء
بالتاكيد ان العيال
غلطانين وانه حرام عليهم
لكن فيه نقطه ضروريه
ان هذا الاب هو اللي عود عياله على الهنود هو اللي جاب الهنود يخدمونه هو وعياله
هو اللي ربي عياله على هذا
انا احمل الاب ثلاث ارباع الشيء هذا
لو ربي عياله زين وزرع فيهم احترامه وتقديره كان ماصار اللي صار
ولو زرع فيهم نبته حلوه كان حصد اللي زرعه
ايده وما جاه ..
شوق الامارات
20-08-2000, 08:21 PM
هلا بالاخ عبدالله
احترم رأيك .. بس تعال قول لي ..
طيب هو غلط .. لكن اذا كان هو جاب الهندي يخدمه و علم عياله على هذا الشيء .. هذا ما يمنع وجود عياله جنبه .. معقوله عاد طيب يذكروه شيء زين في حياته سواه .. ما مقوله يا اخ عبد الله يكون هذا جزاه .. فكر فيها الله يخليك .. دور له شيء حلوه سواها في حياة .. لا تذكر الشين و تنسى الزين .. يا اخي يكفي انه ابوهم .. و هذا فضل من الله .. والله وصانا فيهم .. والله لو كان بدل الهندي احد أقرابه كان حاله احسن .. فكيف لو كان ولده و بنته ..
الحفار
في مثل الناس دوم يرددونه وهو " الجار للجار و لو جار " فكيف لو كان احد الوالدين . .
تقبل تحياتي
اختك
شوق
الأخ أو الأخت شوق
لا ما فهمت غلط
وآسف لني ما شاركت في الموضوع لأنه سبق وعرض هذا الموضوع في الموقع وناقشه الأخوة باستفاضة وما أحب أزيد على كلامهم
بالنسبة للغلطة ، لفت انتباهي الأسم لأنه بالفعل في عضو مشارك في سوالف وبإسم شوك وهذا اللي لفت إنتباهي(سبق وذكرت لك الشي هذا إذا تذكرين)
وهذا توضيح لوجهة نظري عشان محد يفسر ويأول على مزاجه وشكراً
شوق الامارات
21-08-2000, 01:43 AM
هلا بالاخ e55
على العموم اشكرك على المشاركة
وهي كانت مجرد غلطته مطبيعيه لا اكثر ولا اقل
و احترامي للعضو أو العضوه شوك
تقبل تحياتي
اختك شوق
هيه والله شيء يقطع القلب اختي ..:(
الحفار
21-08-2000, 09:40 PM
بالتاكيد انهم جاحدين فضل الاب
ومهما كان اخطأ في تربيتهم فعلى الاقل يكون فيهم واحد يخاف الله في والده
...
ولكن صدقيني ماتزرعه هو ما تحصده
من يزرع الشوك سيجني شوك
وم يزرع الورد سيقطف ورد
هي هذه الحياه
وقه يكون الاب ذات يوم غير وفي لوالديه وهذه قوبة الدنيا له
,,
اسال الله التوفيق
مظاهر اجتماعية مؤسفة
نراها كل يوم في مجتمعنا
ومن ضمنها هذه الصورة ولمن ؟؟؟
لمن هم أغلى من الروح صورة الأب مع سائق هندي!!!!!!!!!
وهو في أشد الحاجة الماسة لرعاية أبناءه ....
وقد يعود ذلك أن هؤلاء الآباء قد حاولوا تعويض الأبناء عن الحرمان الذي عاشوه قبل الطفرة ....
بتوفير جميع سبل الراحة لأبناءهم
أو بسبب غيابهم عن بيوتهم لفترة طويلة
وتركوا ابناءهم يتصرفون كيفما يشاءون .....
ونتيجة لهذا الأهمال
وعدم زرع القيم في نفوس أطفالنا منذ الصغر
وتعريفهم بواجباتهم وحقوقهم ومالهم وماعليهم
أدى إلى أهمال أعز الناس ( الوالدين ) ....
وللأسف هذه الصور متكررة
حيث نرا الأطفال في يد الخادمات ...
والأسرة متروك لها الحبل على الغارب :( ....
وتملص الآباء من تحمل مسؤولية الأبناء
وركوبهم مع السائق من غير ضوابط ....
وقد اخطأ هؤلاء الآباء
في تفريطهم بأبناءهم
واعتقدوا أن الرعاية فقط
هو المأكل والملبس والقصور والسيارات الفخمة
وتناسوا أن الرعاية في حسن التربية
من تعليم أمر الدين والآداب والأخلاق الفاضلة
والوقوف عند حدود الله سبحانه وتعالى ....
ونتيجة لهذا الأهمال الذي أدى بالتالي
إلى انعدام الوازع الديني لدى الأبناء
أشكرك على هذا الطرح
ونسأل الله العلي القدير
أن يجعل عملنا خالصا لوجهه الكريم
وأن يرزقنا العمل والعلم النافع
وخلوص النية ....
طيبة:(