سؤال للجميع ما هو المطلوب من لكزس؟؟

هل المطلوب منها سيارة صالون عادية لا تحتوي على أي تكنولوجيا أو هل المطلوب منها انها تخترع سيارة بمواصفات لا يوجد منها على وجه الأرض أو شو المطلوب منها يعني ؟؟ الشركة قدمت لكم سيارة صالون فخمة تتوفر فيها جميع المواصفات الموجودة عند المنافسين علشان ما تكون أقل منهم وبعد مش عاجبنكم سبحان الله.......


على فكرة الموضوع صاير ممل وشكله راح يغلق قريبا :anger:

والله رايي من رايك اخوي AMG :mad1:

مادري ليش هالتعصب ضد لكزس

بس معروف كل ناجح يزيد انتقاده :laugh1:

ابي القي كلمتي.... ممكن؟؟



انا مو متعصب ضد اللكزس



اللكزس سياره رووووووعه اذا عطوها "حقها" في السعر... مو تصك اسعار فوق وهي ما تسوى سعرها...



انا متعصب ضد اللي يرفعون اسم اللكزس ويقولون انه احسن من البي ام والمرسيدس وهم ما يدرون وش ينطبخ تحت هيكل السياره



اذا رئيس شركة لكزس بذاته قال ان سياراته يعترف انها ما تنافس الألمان من ناحية الأداء والمتعه والجوده... بس يضمن ان مشاكلها اقل منهم بواااااااااااجد




وانا اعترف لهم... اذا بنتكلم على لكزس من ناحية هدوء وقلة مشاكل وجوده داخليه انا معكم....



لكن اذا بنتكلم على اداء ومتعة قياده وسلاسة وثبات عااالي... لا نطلع عن دائرة الألماني والكادي لو سمحتوووووا




وبس هذي القصه... يعني لا يجي احد يقول ان مشاكل المرسيدس والبي ام والكادي اقل من اللكزس ... لأنه نصااااااب... مشاكلهم أكثر



ولا يجي احد يقول لي ان اللكزس تنافس الألمان وكاديلاك من ناحية المتعه في القياده والثبات ... لأنهم يهبون يوصلون لهم...



لو لكزس من جد تحط حيلها في الالمساعدات والثبات والدقه في الميكانيكا.. كان صارت الجي اس تستاهل 200 الف... اما اشتري سياره بهالسعر وتزحف علي... قويه



وفي الأخير لكل واحد وجهة نظر



اللي بيشتري سياره يشوف هل هو يفضل ناحية الاعتماديه في السياره ولا ناحية متعه وأداء... ويختار اللي يناسبه



وتبقى شركة لكزس من كبرى الشركات... لكن لها حدود....







الأخ "الأنصاري"


الكادي غيروا مصنعها لمصنع يعتبر من أجود المصانع في العالم.... وعلشان تعرف وش اهمية الكادي اللي مو معطيها حقها...



اختباراتها نقلوها الى حلبه "نوربنبيرغ" في ألمانيا.... مع الأودي والمرسي والبي ام



عن تجربه شخصيه... انا كنت اكره الكادي... تعرف شلون اكرها... احسها غباء وفشل امريكي متجمع... وما حببني فيها الا ال STS


والحين هذي هي معي ومن معارفي اللي عنده بي ام واللي عنده أودي



قعدنا نقارن سياراتنا ذاك اليوم نبي نشوف كاديلاك وش ناقصها....



شي واحد انا اعترف فيه.. جودة المواد الداخليه مو ذاك المستوى... بسسسسس



الباقي كله تصف مع الألماني بجداره وتدوس على اللكزس... موصفات اكثر من رائعه... مكينه من أحلى ما يكون ... تعشيقات ناعمه جدااااا.... ثبات يعجز اللسان عن وصفه.. والله يعجز من روعته.. متعة قياده... شكل... تصميم... أمان....



وشوف الزمن وش مخبي... اصبر على الكادي كم سنه... تشوف وش بتسوي





أخوي مؤيد إف1


حبيبي السياره معي صار لها كم شهر... ومن أحلى ما يكون والحمد والفضل والمنه لله... لا مشاكل ولا شي مع اني كرفتها جدا...

وجذاااااااابه... من جد سياره "تلوي الأعناق"... ياما التفتوا ناس لين ما طقت رقابهم


واذا ركبت الجي اس مع خويي ... ولاااا كأننا راكبين جي اس... يشوفونها من ورا يحسبونها سوناتا الجديده كليا 2005





اخوي الشبابي...


بالله تعتبر ال DTS الجديده تغيير؟؟؟.... انا من وجهة نظري احسها Facelift... غيروا فيها من داخل كثييييير ومن برا لا بأس... لكن المكينه نفسها... وهذا يعتبر فقط شي في بداية التقدم لأن كاديلاك تستخدم استراتيجيه جديده لسياراتها بالتحول الى الدفع الخلفي.... وما يبون يخربونها بالDTS لين ما يضبطون الشغله اللي هم فيها (هذا كلام رئيس شركة GM بزاااتو )



والوعد ... ال DTS الجايه... شف وش بتسوي...









وياااااااااا شباااااااااب.... انا مليت وانا اتكلم عن الكادي



مليت وانا اشرح وفي ناس مو معبرين...



كل اللي يقول ان الGS احلى من الSTS ابي اقوله شي واحد...



خذ لك تجربه للسيارتين في نفس اليوم....



احجزهم... خذ الجي اس سوقها شوي وبعدين رح فيها لوكالة كاديلاك...



وجرب ال STS.... وشف الفرق بعينه وعلمه.... ولا تتعصب... لأنك لو تعصبت للكزس مهما كانت سواقة الكادي بتقول خايسه





ولكم خاااااااااااااااااااااالص التحيه والتقدير....

فاصل اعلاني:


من زمان على مواضيع زي كذا

موضوع ممتع وما اتوقع تلاقي زية خارج سوالف :banana:

اشوف ان الموضوع حرام يتقفل نقاش هادئ ةلا احلى :banana:

لاشك ان سيارات كاديلاك رائعة وتستحق نسبة اكبر من سوقنا لكن لربما الوكيل دلينا سئ .... وهي كسيارات ناجحة لكن مع الازدياد الكبير في اسعار الموديلات الجديدة لانرى توافق كبير في المواصفات المدرجة .... الا ان انظمة تعليق الكاديلاك يبدو لي انها من افضل الانظمة من حيث الموازنه بين الراحة العالية والثبات العالي ....
ولكن ايضا لكزس غير ... سيارات جودتها عالية و لايختلف اثنين على ان سيارات لكزس هي الاكثر اعتمادية على مر الزمن وان كان سعر سياراتها مرتفع فالمشتري كسبان ما هو خسران لأنه بالنهاية بيبيعها بمكسب ...
وافضل شئ لاحظته فيها التكنولوجيا السهله الغير معقدة المتطورة وهذا مما يسهل عمل صيانة لسياراتها ......
لكزس ابدعت خصوصا في الموديلات الاخيرة و كان ينقصها بعض التجهيزات مثل البرسيف والان توفر لها نظام مماثل ...
سنرى مفاجأت في السيارة القادمة كما عودتنا لكزس ....
والصراحة ان كاديلاك بقيت دون ان تطور نفسها لسنين ولن تعود تنافس الابعد سنين من الجهد .....










اخوكم الشبابي

ممكن اعقب على كلامك اخوي

كل شركه لها حدود مش بس لكزس لها حدود

واكيد جميع الشركات تعرف هذا الشي احنا نقاشنا هنا

مش نقاش علماء وفنيين يشتغلون في الشركات

نقاشنا نقاش شباب واعضاء في المنتدى

لكن تعطي مثال على الجي اس وتقول تزحف

ياخوي انا عندي مقطع استعراض E مو بس زحف :laugh1:

ياخوي انت قلت كل شي له حدود بنفسك,

والسيارات لها حدود ومادري كيف ضربة المثال بزحف سياره؟

الكزس جي اس سعرها فوق الـ200 لأنها تستاهل ولو انها ماتستاهل

مانتشرت في جميع الشوارع عندنا (اتكلم عن بلادي)

وعلى فكره 3 دفعات جايه محجوزه من الحين بالنسبه للجي اس

ماعتقد ان الناس بايعين فلوسهم عشان يحذفونها في سياره ماتسوى؟؟

ياخي المرسيدس والالماني يبقى غير شي طبيعي هذا مافيه خلاف عليه

لكن شوف الردود من الصفحه الاولى؟؟ياخي ردود غريبه واعذار اغرب

الي يقول قير تريلا والي يقول تروح فوق تنزل تحت تويوتا

اوكي يعني انتو العرب حتى الكيا ماتقدرون تنافسونها

وتحكمون على اكبر الشركات العالميه

بنص جمله ;) وياريت الكلمات مقنعه وبأسلوب سليم

لكن اخوي انت مثلا تقول مافيه شي يفوق الالماني في الراحه والاداء والكاديلك

الكاديلك انا جربته وجربت النورث ستار وجربت الـSTS الجديد وماعجبتني سواقته

في النهايه انت كلها وجهات نظر يعني انت وجهة نظرك ان الالماني والكاديلك هم الافضل

في الراحه والاداء بس الناس تختلف وجهات نظرهم اخوي ;)

ولو بنتكلم في وجهات النظر ممكن انت تشوف ناس ماعندها سالفه تحط 270 الف على

لكزس LX470 ويقدر يشتري بقيمته بورشه كايين أس صح ولا لا

لكن هو ما اشترى الكزس الا باقتناع انه الافضل بالنسبه له ويلبي حاجاته وحتى لو وصل 300

واغلا من سعر الالماني بيكون عنده اقتناع ذاتي ان هالسياره هو يرتاح لها اكثر

على فكره اخوي فيه رد سابق لك قلت شنو الموجود في الكزس جي اس ومش موجود

في الكادلك؟؟اوكي شنو الموجود في الكادلك ومش موجود في الجي اس ;)

جل كلامك عن الكادلك في ردك السابق على المحرك للـ8 سلندر

مايختلف عليه اثنين انه محرك قوي الكزس جي اس نزلت او بتنزل قريب برع بأسم GS350

وهو نفس المحرك الي على الـIS والي يتكون من 6 اسطوانات و306 احصنه

بمعنى ان الكزس الموجود حاليا من المحركات الجيل القديم من الـ 4.3 والـ 3.0

وطبعا تعرف اخوي من كم سنه موجود هذا المحرك؟؟ صار له 4 او 5 سنوات

لكن لاحظ الكزس الجيل الجديد الـ460 والـ 350 وشوف مواصفات المحرك والقير واحكم بنفسك :laugh1:
---------

فيه رد والله قريته ان السي تي اس 3.6 يخبق الالتيما الاوتو

ياكثر مقاطع الافلام حق قومات الالتيما الـ6 سلندر مع اللومينات اس اس والكوابرس

والحين تقارنون الالتيما مع السي تي اس في القوه :laugh1:

هدوا اللعب شوي اذا الالتيما بالافلام طبعا المقاطع تعتبر دليل قاطع على قوة المحرك

تروح على اللومينا اس اس والكوابرس عيل الافالون الجديد شيسوي؟؟ ;) وقيرين بعد :laugh1:

لاتعليق الصراحه :m:

كلامك زين و كل شئ و لكنك بالغت شوي في ردت فعلك بالذات على اللي ذكر موضوع التريلات ... الرجال جاب حقائق و أدله و براهين و مصادر ووضح كل شئ و الجميع اقتنبع بكلامه و تجي في النهايه تقول انه يألف و تقول أعذار


و الله حاله ....

ماقلت يألف لكن لو كل عدد تبديلات نفس عدد تبديلات قير شاحنه

السيارات كلها بتكون تريلات وشاحنات

وبالعكس مابالغت في ردت فعلي وهي طبيعيه جدا بالنسبه للردود الموجوده :laugh1:

بعدين ما اعتقد اني تعديت على احد او غلطت على احد

كتبت ردي بأسلوب محترم ;)

اخوي توب سيكرت ....... جيبلي قير فيه 6 تعاشيق ..... او حتى 7 تعاشيق على تريله !!!!!

اكيد مافي.......... لكن ابو 8 موجود على التريلات

وخشب اللكزس يالشبابي مب خشب طبيعي للاسف ( مثل خشب الاكسسوارات حق اللاندكروزر ) مدري ليش لكزس مستخسرين خشب طبيعي على سيارة تتجاوز ال250 ألف :anger: هذي الجودة اللي شايفينها ؟؟؟؟؟؟





ياجماعة الخير القصد ليس حقران للكزس او استهزاء .....

ياجماعة كل قصدنا من الردود هذي شي واحد ....
اننا نرد على الجماعة اللي يقولون >>> لكزس أول من قدم نظام في العالم وأول من اخترع مدري ايش


وهي كلها اختراعات موجودة من زمان



فقط لا اكثر .......... مجرد ايضاح حقائق


يعني لاتطيرون بالعجه ........... اذا تم توفير تجهيزت بالسيارة وانظمة فذلك جميل جدا لكن لا يجي واحد ويبدا يطمس الحقائق .....ويطلعها فوق السحاب لان الحقائق ثابته وكل شي موجود




على العموم ماصار الا كل خير والسيارة اللي اعطاها حقها هو مدير لكزس على لسانه هو ابخس من الشباب اللي مطلعين لكزس للسحاب وهي ماجابت شي جديد اصلن


ولو جابت شي سنكون نحن اول من يرحب فيها وراح نصير اول من يطلعها فوق السحاب

ماشميت ريحة الSTS تقول جربته


وصاحبنا Ascari عنده السياره مو بس جربه



ليش مستكثر على الكاديلات بالالتيما..255 حصان مقابل 260 حصان ماشوف في فرق كبير


روح فيديوهات نادي السيارات وشوف القومه :banana:

المشكله في ناس تفكر ان احنا نجيب كلام من عندنا زي مايسوو هم..

استمتعت بقراءة الردود وانا كل فرُاخ وكنى قاعد في السينما بس ناقص الصوت والصورة ....

ياخي ليش ماتقول رايك باسلوب محترم :laugh1: شنو ما شميت؟؟ :laugh1:

مو انا الي اقولك غير اسلوبك المفروض انت كبير وتعرف تكتب وترد بأسلوب مناسب ;)

بالنسبه لي مش ملزوم اني اقنعك اني جربته وردي مش موجه لك :laugh1:

كلامي حق الرجال وكتبته له باحترام انت شيدخلك في النص :laugh1:

بعدين يخي 255 حصان قدرت على الـ 325 حصان ماتبيها تقدر على الـ 260 ops:

في النهايه اتمنى الي بيكتب وبيعلق على رد يكون رده بالشكل المناسب

عشان مايعرض نفسه للإحراج ;)

والله الي اعرفه في 4 غيارات حق الدناكر الي يسقون النخل ماي :laugh1:

الجمس الي يجي حجم مكينته 6000 القديم ;)

هل هذا دليل ان قير اللومينا مثلا قير دنكر

عاد مادري اخوي شنو تسمون الدنكر في السعوديه يمكن مافهمت شنو اقصد

بمصطلح دنكر بس هو الي يسقون فيه الماي وجذي اكيد بتعرفه ;)

وفي النهايه اخوي سواء ابتكار او اقتباس

فيه ناس ثقتهم في الكزس اكبر من ثقتهم في المرسدس والبي ام

وهذي حقيقه ملموسه

احنا مانقدر نغير افكارهم كل شخص مقتنع برأيه

لكن المقصد في القير 8 سرعات من وجهة نظري

ان الكزس هي اول سياره (سيدان) تضع هذا العدد من النسب في سيارتها

هذا الي فهمته بانها السباقه من ناحية القير الجديد وانه ابتكار ;)

لكن مثل ماقلت لك هي وجهات نظر اخوي وتختلف من شخص لي شخص

واحترم رايك :-)

260 حصان مستحيل تقدر على 325 حصان :laugh1:


الا اذا كان ال325 حصان اثقل بواجد وهذا هو الي صاير :laugh1:



ولنا الفخر اذا ال255 يقدر على ال325 بس مااتوقع :laugh1:


عموماً اللكزس ابو 300 حصان و 6 سرعات ماقدر على ال325 يعني مستحيل ال260 يقدر الا اذا في شي غلط في بقية الاشياء مثل الوزن




والله حلو نتكلم بالارقام شي جيد



جير الدنكر كان موجود على بعض السيارات وموجود على بعضها


منها ال260 :laugh1:



واسمح لي حمود على اسلوبي وان شاء الله ماتشوفه منا ;)

لا مو مشكله اخوي ماصار الا كل خير :mad1:

وانا يوم قلت قير الـ 4 سرعات كان المغزى من كلامي

والله الـقير بو 8 سرعات الي نزل على الكزس يتم تشبيهه بالتريلا

كنت اقصد ان اذا كل عدد سرعات تقارنونها بسياره كبيره

السيارات كلها بتصير قيورها قيور شاحنات وتريلات هذا المغزى

مش اني اقارن بين قيور السيارات بالعكس ;)

وبالنسبه للوزن وهذي الشغلات اكيد مؤثره وشي طبيعي القير مؤثر ;)

وعالعموم الموضوع تشعب وايد وطلع عن الصلب

ننتظر الكزس LS460 وانشوف اقبال الناس عليها ووجهة نظرهم فيها

ونشوفها وندخلها ونجرب قيادتها وبعدين نحكم اذا هي فعلا سياره تستحق

الاطراء او النقد ;)

تحياتي

اوكي جير اللكزس شي جديد 8 سرعات..بس تتوقع فيه فرق واضح بينه وبين ابو 7 سرعات؟


انا مااتوقع صراحه..يمكن التعقيد اكثر فقط

ماندري بعد5 سنوات يمكن توصل عدد التعاشيق 10 :m:

بس الافضل مايتم الحكم على سياره حتى الحين ما صدرت في الاسواق حتى

يعني ننتظر ونشوف بنفسنا ونحكم ماعتقد ان شركة تويوتا غبيه لهذي الدرجه

انها تصنع قير لمجرد الاسم ان عملنا قير 8 سرعات اكيد فيه اسباب تقنيه

واتوقع بيكون القير سبب رئيسي في تقليل الصرفيه

ننتظر ونشوف ماراح نخسر شي ;)

اكثر من 8 تعاشيق خارج عن المعقول بالمره..


تويوتا تبغى تباهى عشان كدا سوت جير 8 سرعات..وانا اتوقع الفرق بينه وبين ال7 في الصرفيه نص لتر لكل 100 كلم


45 هلله يعني تعوز واحد عنده سياره سعرها فوق ال250 الف ريال

لا اخوي كلمة تتبهى مش موجوده في قاموس السيارات والشركات الكبيره ابدا ً

الاسباب اكيد بتكون رئيسيه في القير الجديد والصرفيه طرف من الاسباب اكيد...

وليش ماقلنا يوم نزل القير 7 سرعات من المرسيدس انها تبي تتباهى وان الـ6 يكفي

او الـ6 سرعات ماتكفي ;)

لان مرسيديس تبغا تحط تقنيات الفورمولا1 الي جيورها 7 سرعات في سياراتها..هذا هو المبدء بكل بساطه..اما تويوتا وقتها راحت الاضواء عنها عشان كدا سوت 8

في موقع لكزس في موضوع عن السياره وتكلم عن الجير انا معاك يمكن الفرق مو كبير ولكن في فرق

وعشان في فرق حتى لو كان بسيط يعني الجير افضل حتى لو اجزاء بسيطه في التعاشيق وحتى لو مقدار بسيط في الصرفيه

عموما يوم كان في 6 ماكان في فرق وايد عن 7 ولكن الحين في 8 التطور يزيد

وهي مسئلة وقت ان البي ام الومرسدس يستعملون جيرو من 8 سرعات


بعدين شنو التعقيد اكثر كلام مو منطقي ابدا يعني الشركه الي جالسه تطور تقنيات وتستحدث تقنيات وتطلع لك احصنه كبيره من اصغر محرك وباقل صرفيه قاعده تعقد نفسها

يعني متخيل في مصنع لكزس يوكي جالس جنب ناكمورا وقاعدين يضحكون وقالوا يالله نسويه 8 تبديلات بس جذي بدون دراسه


جوهر الموضوع خلي نعترف ان شي زين ان لكزس سوت جير حلو مثل مانبارك حق بي ام ومرسدس خلي نبارك حق لكزس

مرسيديس وبي ام ماراح يزيدو عن 7 وبتشوف ;)


لاتستغربها على اليابانيين بقولك الي قلته ترا عليهم طلعات

لحظه لحظه لححححححححححظه



أخوي الشبابي .... والأخ TOP SECRET


حرام عليكم عاد..الكادي مبالغ في سعره ؟؟؟؟



شرايكم اعدد لكم الأشياء اللي في الكادي ومو موجوده في الجي اس


لاحظوا قبل لا اكتب بس... ترا سيارتي القديمه كانت لكزس ... وقبل سنتين تقريبا كنت متيم في حب لكزس.... كنت اشوفها الأفضل...


يعني مو متحيز ضد لكزس من قديم الزمان... لكن بعد ما دخلت في اشياء عميقه عرفت الصح من الأصح


المهم خلونا في ليش ما تستاهل سعرها....


المكينه والمساعدات والسواقه والثبات تكلمت عنهم بما فيه الكفايه ... وبالنسبه للقوه ويكفي ان سعودي اوتو صرحت بأن الكادي أقوى


تبون تكنولوجيا في الكادي ؟


شوفوا الكادي وش فيها والجي اس ما فيها :


- 6 مبدل CD/DVD (مو بس CD ) ... هذا غير الفتحه الخاصه لنظام الملاحه

- شاشتها High Color Display... شاشة الجي اس كلها مربعات شغيره والوان تعبانه

- تشغل افلام DVD ... الجي اس ما تشغل

- فيها تلفزيون ... تقدر تتفرج على القنوات القريبه (كل يوم الصبح اذا وصلت الدوام قبل لا انزل اتفرج على افلام كرتون ... يطلع عندي البحرين بقنواتها كلها.. MBC .. MBC4 .. العربيه ... السعوديه ... )

- نظام حساس في المكيف اذا شم رائحة ديزل او اي غاز ضار يخلي المكيف يسحب هوا من داخل السياره بس

- تقدر تشغل السياره من بعد 60 متر... وتشغل معها المكيف ، تدفئة/تهوية المقاعد ، وال Rear Defrost

- فيها تدفئه للدركسون

- تشغل ملفات MP3 ... يعني عب الCD وخذ لك اغاني

- فيها فتحات Video/Audio.. اصفر/احمر/ابيض.. تقدر تشبك فيها Ipod وتسمع الصوت على السبيكر .. او حتى تشبك كاميرا فيديو وتشوفها على الشاشه

- فيها نظام يقلل صوت الازعاج من الخارج ويرفع لك صوت المسجل... وكذلك يساوي طول موجات اللي يتكلم داخل السياره وموجات المسجل بحيث انك تسمع المسجل وهو عالي نسبيا وتسمع خويك في نفس الوقت (بس طبعا موب تخرش لي المسجل على الأخير وتقول ما اسمع)

- فيها حساس اذا شاف الشارع مظلم شغل النور العالي... واذا شاف سياره جايه او لمبه في الشارع نزل العالي.. واذا راحت شغلها مره ثانيه

- فيها نظام تعرف صوتي واسع جدا لدرجة انك تقدر تفتح الدرايش وتسكرها وترفع المكيف وتنزله بالصوت بس.. هذا غير استخدامه في نظام الملاحه والراديو والبلوتوث والسي دي والأفلام وغيرها وغيرها


- فيها رادار.... يقيس سرعتك مع السياره اللي قدامك ويبطئ معها ويسرع معها


- الزينون يفرش لك مساحه واسعه جدا الى الأمام... يحيث ان الجي اس ينور لك مساحه بسيطه... حطيناهم جنب بعض وشفنا ... الكادي تنور تقريبا دبل المسافه قدام

- لمبات ضباب خلفيه (صحيح ان موقعها سخيف... بس على الأقل فيها )

- Tire pressure monitor... مدري موجود في اللكزس ولا لأ... اتوقع فيه

- الأنوار الأماميه عدسه... والعالي عدسه ... والضباب اللي تحت عدسه (مدري وش دخلها ... بس يمكن تكون ميزه )

- شاشه صغير تطلع لك فوق الطبلون على القزاز الأمامي تبين الأشياء المهمه مثل السرعه والقير واتجاه نظام الملاحه

- المقاعد جدا مرييييييحه... ولا انكر بعد راحة مقاعد اللكزس... بس مقعد الكادي تحسه يمسكك زين من الجوانب


هذا اللي اتذكره... ما اظن فيه شي ثاني....



كل هذا ... ومو احسن من الجي اس... كل هذا وما تسوى 220 الف ؟؟؟؟؟




وبالنسبه للأخ Top Secret ... انا ما قصدي زحفت السياره بالتفحيط... قصدي انها في المواقف تخونك....

خانتني اللكزس 3 مرات... يسقط علي واحد بقوه... ابي افلت منه تزحف السياره وتنطل والله يستر بغينا نضرب في الجدار.... ومره مسرع وما انتبهت جتني لفه قويه.... مدري كنت مسرح وما انتبهت لها... ونفس الشي.. بعد عناء من التنطيلات عدلتها والله تقول بيني وبين الصبه ربع متر


واخذت الكادي في نفس اللفه بحركه اختباريه مني (بعد ما امنت تأمين شامل على السياره ).. وفوجئت بسلاسه ونعومه على اللفه ولا اروع


واللكزس كنت محافط عليه وكفرات جديده وصيانه اول بأول...




تقول سواقة الكادي ما اعجبتك.... وجهة نظرك ومن حقك ولا أحد يقدر يكلمك عليها ....


وكلكم من حقكم تفضلون اللكزس على غيرها... كل واحد له وجهة نظر



بس وش الحكم الأغلب...




لي رد ثاني على ناحية السواقه هذي قريب....



وانشالله ما اكون زعلت احد لو بينت معصب بردودي ... اهم شي الكل يستفيد :-)