العودة سوالف للجميع > سوالف شخصيه وثقافيه ادبيه > سوالف الأدب والثقافة > تو .. طين
المشاركة في الموضوع
زمردة زمردة غير متصل    
مبدع فائق التميز  
المشاركات: 19,033
#1  
تو .. طين

وش عاد يا دار ٍ بها صار ( توطين )

و في مكتب التوظيف لبنى و ميسون !



مديرهم مدحت و نائبْته نسرين

و على الرسبشن حمّص و فول و زيتون !



كل ما اتصلت اسمع ( الو مرحبا مين ؟

بدّك وظيفه ؟ .. مين دلّك على هون ؟ )



اقول انا لي اتصل صار شهرين

و انتوا وعدتوني متى بس توفون



اسمي ( مواطن ) ( جامعي ) طيب و زين

كني ابخطب عندكم و اتّغلون !



عندي شهاده طايحه بجبدي سنين

عشش عليها شي له ستة عيون !!



لو للشهاده لسان قالت ( على وين

ناوي توديني .. تلف فيني الكون ؟ )



من كثر ما صورتها غارق بدين

للهندي راعي المطبعه صرت مديون



لا ليلي ليل ولا نهاري نوى يبين

دقيت راسي لين ما صرت مينون !



مطلوب خبره عالأقل في مجالين

ولا تجينا بواسطه و سير مدهون !



ولا انثبر في بيتك .. افرك بكفين

يومك يشابه امسك و عيش مغبون



تعدادنا ويّاهم اربع ملايين

و اهل البلد للحين ما صاروا مليون !!



ويلاه من باكر اذا وضعنا الحين

و احنا اقل من الربع حالنا شجون !



و اللي ابتسم له حظه والله مسكين !

حصّل وظيفه .. بس في وين .. تدرون ؟



ساكن في راس الخيمه .. حطوه في العين !!

و اللي سكن في الذيد .. في السلع مدفون !!



يشوف اهله بس في الأسبوع يومين

و اذا حسبتوا الدرب كم ساعه .. تبكون



يعني في كل احواله ذاق الأمرين

شغّال محزون و بلا شغل محزون



و الأجبني اللي راتبه فوق عشرين

فله و سياره و تذاكر .. و طاعون



عنده بدل كل شي عالراتب الفين

حتى بدل معجون اسنان و صابون !



و من بعد ما يجمع من بلادي فلسين

و يربّي م القعده على الكرسي بطون



و يصير في بلاده غني و عنده برجين

يرحل و هو جاحد .. و كم مثله ملعون !



و حتى الجماعه قوم مدحت و نسرين

مردّهم لبلادهم لو يطولون



يرضون بشوية دراهم .. و شفتين

صبح و عصر .. لو حتى في الليل يرضون



بس لو سمعتوا همسهم بينهم بين

وسط القهاوي يلعنون و يسبون !



لا تحسبوني عنصري .. كلنا طين

و الخل لو عاتب محبينه يمون



داري و انا اولى بها من الغريبين

ما يوصلون لحبها لو يموتون




و ( الأقربون اولى ) .. كلام ٍ من الدين

ما جبته من شعري مع الهام و ظنون



ولد البلد ما يبغي لبلاده الشين

بالروح بالدم يفتديها ولا يخون



لكن سؤاله يوم قلتوا له ( توطين )

يا كيف بيد الغرب توظيفه يكون ؟؟!!



شعارهم معروف ( راجعنا بعدين )

و باين من التأجيل .. انهم يخافون



اذا معك خبره .. يا اهلين و سهلين

و اذا شهاده بس .. عنك يصدون



ما عندنا شاغر .. و بطلنا تعيين

ولو تحرق الهاتف ترى ما يردون !



من وين اجيب الخبره ؟ من وين من وين ؟

دام الوظيفه عند لبنى و ميسون !



عندي بمطبخ بيتنا خبره سنتين !

تنفع اذا صاروا المطاعم يوطنون ؟؟!



ولا اهاجر و آخذ الخبره في الصين ؟

صح العيون صغار .. لكن يقدْرون



سؤال يا دار ٍ ..صراحه بترضين ؟

اني اسافر و اطلب الغرب لي عون ؟



و سؤال يا ناس ٍ على الراس و العين

صدق الوظايف واسطه و سير مدهون ؟



اما الجواب الشافي يجيني الحين

او هاتوا تأشيره .. اذا كنتوا ترضون !



- من الإيميل -

زمردة غير متصل قديم 08-05-2006 , 01:26 AM    الرد مع إقتباس
صدى الحق صدى الحق غير متصل    
عضو شرف  
المشاركات: 7,164
#2  

السلام عليكم ورحمة الله وبركاته

الله يرحمك ويسكن عظامك الجنة يا زايد ...

لا تعليق ...

صدى الحق غير متصل قديم 14-05-2006 , 07:07 PM    الرد مع إقتباس
زمردة زمردة غير متصل    
مبدع فائق التميز  
المشاركات: 19,033
#3  
وعليكم السلام ورحمة الله وبركاته
اللهم آميـــــــــــــــن ..

جزاك الله خيراً .. أخي صدى الحق ..

وبإذن الله أبنائه على نهجه سائرين ..

نسأل الله تعالى أن يخلصنا من تسلط الكافرين ..

زمردة غير متصل قديم 17-05-2006 , 04:07 AM    الرد مع إقتباس
المشاركة في الموضوع


[عرض نسخة للطّباعة عرض نسخة للطّباعة | ارسل هذه الصفحة لصديق ارسل هذه الصفحة لصديق]

الانتقال السريع
   قوانين المشاركة :
لا بإمكانك إضافة موضوع جديد لا بإمكانك إضافة مشاركات جديدة لا بإمكانك إضافة مرفقات لا بإمكانك تعديل مشاركاتك
كود في بي vB متاح الإبتسامات متاح كود [IMG] متاح كود HTML متاح



لمراسلتنا - شبكة سوالف - الأرشيف

Powered by: vBulletin
Copyright © Jelsoft Enterprises Limited 2000.