سحابة صيف وعدت ...
..
اذكر اني مره كنت امشي علي طريق الامير عبدالله قبل مايخلص محل صحاري بلازا اللي ورا سوق صحاري مباشره........
المهم كان علي المكان لوحه مكتوب عليها بالخط العريض مشروع صالات عرض
انا قريت العباره وربطتها باقرب واحب شي يحمل هالمعني """"سينما""""
المهم نشرت الموضوع بين الشباب..........يوم خلص المبني كان شكله يبعث التخيلات بواجهته الزجاج.......
وانا كل يوم اراقبه علي اساس اني اراقب نمو السينما السعودي الجديد...
لكن بعد فتره تمت الولاده القيصريه ليخرج لنا سوق جديد لايبعد اكثر من خمس خطوات عن سوق يحمل نفس الاسم......
يالله انك لاتسخط علينا.........
مادري هل للحين عندنا طاقه شرائيه تستوعب كل هالاسواق المفتوحه...اي داوت ات!!!!
++++++++++++++++++++++++++++++++++++
صار موقف قبل كم سنه...حليل ما عليه..
كنت في الرياض لحالي ..اهلي مسافرين لديار العز.. ..مع عمي و عياله..- كنت مواعد ولد عمي اجي لمهم..باسرع وقت..اول ما اخلص شغلي..
رجعت للبيت ذاك اليوم الساعة 12 بالليل، تعبان و لي حوالي 24 ساعة او اكثر و انا ما نمت..
و مخطط اني اول ما اشبع نوم اقوم و اسافر..
نمت..و نمت ..و نمت...و صحيت و انا شبعان نوم على الاخر..و ناظرت الساعة و اثرها 6 الا شوي...
:! :!
و اقوم بسرعة..و اشيل ثيابي و اخذ زمزميه فاضيه و اصلي الفجر و الظهر و العصر..و طلع من البيت
يوم طلعت و اثر الشمس بوجهي من جهة الشرق...:! :!
و اناظر الساعة...وش القصه...الساعة الحين ست المغرب و الا ست الصبح..و نظرا لتشابه الوقت ..احتكمت للشمس و اقنعت نفسي اننا في الصبح..
ضاق صدري من هالخبصه..و قلت ..ارجع انام و الا لا..؟؟
بس النوم طار و لا هوب راجع..
قلت تدري....شغل يا ولد و توكل على الله..
مشيت و وصلت لديار العز..اللي على بعد 400 كيلو الا شوي..شمال الرياض..و وصلت بحمد الله و سلامته قبل الظهر بساعة او تزيد...
تقهويت مع الوالد عمي و اخواني و عيال عمي - على طاري القهوه..اشوفكم ما صبيتوا لي شاهي..-.. و قصيت لهم السالفه و ضحكنا و علقوا على هالموقف...
ثم اذن الظهر ..فقاموا يصلون...و قالوا مشينا للمسجد..
قلت لهم و الله انا سابقكم..":" :6 ..تقدرون تروحون بدوني..":" :6
++++++++++++++++++++++++++++++
ذاك اليوم كنت ماشي
المهم كنت عند جامعة الامام..و كان فيه مديور " يو تيرن " على شكل U ،
لكن هالمديور كان مخصص للاتجاه المعاكس..مهب البرنامج..
المديور المخصص لنا يكون شكله U بس مقلوب و كان على بعد ميتين متر ، تعيجزت اضرب المشوار و شجعتني المنطقه الغير ماهوله نسبيا على هذا التجاوز...
المهم اخذت اليو تيرن بالقوه و يوم مسكت الجهه الثانيه و اثر الحكومه مترصدين...
قال الرخصه و الاستماره...
و لان الاستماره في الدرج..عطيتها اياه،و قال اصفط الله لا يهينك..
وقفت،و يوم جيت انزل من السياره دخلت يدي في مخباتي ادور البوك...
و ما حصلته..يعني لا رخصه و لا اثبات..
نزلت و اثره كاتب كل شيء و يوم عطاني الاستماره مع القسيمة بغيت احب راسه....لانه لو سال..كان يمكن تصير علوم..
شعوري بعدها كان مزيج من الفرحه و الحزن......عارف انها ما تجي ..بس هذا اللي صار..
.........
عرض نسخة للطّباعة |
ارسل هذه الصفحة لصديق]
