العودة سوالف للجميع > سـوالـف الجمـيــــــــع > سوالف الطرائف والكاركاتير > يوميات واحد غزاوي اثناء الحرب ^_^
المشاركة في الموضوع
spy-kid spy-kid غير متصل    
عضو نشيط جدا إذا كان كل العالم ضدي... فانا فلسطيني أعشق التحدي  
المشاركات: 3,776
#1  
يوميات واحد غزاوي اثناء الحرب ^_^
بكل عفوية.. وبروح مرحة ... يروي الشاب الغزاوي كيف يقضي يومه خلال الحرب...
اترككم معه..!!
يقول:


كنا نشوف أغلب القصف على التلفزيون .. هلأ صار قدامنا مباشر
طول الليل الدنيا تضوي وتطفي.. زي الألعاب النارية..
بس العالم الألعاب النارية عندها من الأرض للسما.. إلا في غزة.. من السما للأرض..
هيهم وصلوا تل الهوى.. يعني بشيكل بكونوا عنا.. مش بشيكل ونص حتى..
أنا قاعد عالكمبيوتر.. وأهلي كلهم مجتمعين قالبين محللين عسكريين وسياسيين.. وعاملين غرفة عمليات مشتركة.. ومستغربين اني قاعد ع النت.. على أساس إنو الدنيا حرب لازم أضل قاعد ألطم..


تلت أسابيع قاعدين في الدار لا طلعة ولا نزلة.. ولا شغلة ولا مشغلة.. فش كهربا ولا مي.. من كتر الزهق من القعدة الواحد بتحير ايش يعمل في الدار..
مرات بقعد أعد البلاط.. ومرات أكم كسرة في الستارة.. وأحياناً بقعد ألعب في الجوال (في حال كان فيه بطارية).. أو بقعد أتشغل في واحد من اخواتي..
ما علينا.. الحلو في الموضوع انه شلومو (يعني رئيس الوزراء الاسرائيلي هاد مصطلح عنا بنحكيه عنه ) بتبين حنيته في وقت الحرب .. بقولك حفاظاً على رفاهية الشعب.. اعطونا تلت ساعات تهدئة في اليوم.. الواحد يعمل فيهم اللي بده اياه..
وأحلى ما فيهم انهم مشكّلين.. يوم من الوحدة للأربعة.. ويوم من التمنية للحدعش.. ويوم من العشرة للوحدة..
وبقولك احزر الفترة تاعت بكرة واتصل على رقم تلت تمنيات اتنين صفر وواحد احمر.. بتكسب جائزة..
والله الواحد بتحير شو يعمل في التلت ساعات .. مسافة ما يفكر وين يطلع (على أساس ضل مكان في غزة الواحد يروح عليه) بكونوا خلصوا..
اليوم قعدت أفكر أفكر شو أعمل.. لقيت احسن اشي أعمله اني أنام.. عشان الجو بكون هدوء وفش صوت قصف (نسبياً) ..
لأنه طول الليل صوت القصف وصوت الزنانات بخليش الواحد يعرف ينام.. الواحد بحس انه في واحد بخرق في نافوخه بمقدح ( جهاز للثقب)..


طول ما الواحد قاعد وهو بسمع يا صوت صاروخ قريب.. يا بعيد.. يا بحس بزلزال.. وبدينا نسمع مناطق غريبة صاروا يقصفوها..
مرة مقبرة.. ومرة صالة أفراح.. ومرة عمارة سكنية.. ومرة دار مهجورة.. أو بقصفوا مكان قصفوه قبل هيك (للتأكيد)..
طبعاً في هادي المناسبة بحب أتقدم بالشكر للطيار اللي بقصف بإنه بحدف صاروخ زغير ع الدار قبل ما يجيبها نصين بالصاروخ اللي بعده..
شايفين الإنسانية لوين.. وبتقولوا عنهم عاطلين.. يعني اللي ما بصيده الصاروخ الأول.. معاه خمس دقايق ينفد بجلده قبل ما يجيب أجله الصاروخ التاني..
الأعمار بيد الله.. الواحد عنده يقين انه كل شي بأمر الله.. ع الرغم بإنه الواحد بطل يخاف زي أول لما يسمع صوت صاروخ..
بس إلا إنه الخوف من انه الطيار أخو الشلن تحلوّ دارنا في عينه ويمزعنا صاروخ بحجة الغسيل اللي عالسطح بأثر عالزنانات..
دايما بحاول أواسي حالي بالمقولة اللي بتقول "متخفش من صوت الرصاص.. لأنه الرصاصة اللي حتقتلك مش حتسمع صوتها"..
بس هالمقولة بتنطبقش عالصواريخ.. ولا شو رأيكم..؟



أكتر اشي بكيّف عليه لما يرن تلفون الدار.. بنصير نتقاتل مين يرد عالتلفون أنا واخواتي.. عشان نحكي مع الناس اللي بتصلوا من الدول العربية..
كل واحد وحظه.. يطلع الإتصال من المغرب.. الجزائر.. مصر.. ليبيا.. السعودية.. السودان.. أو ياكل مقلب كبير ويطلعله واحد بقولك جيش الدفاع الاسرائيلي..
ويطلع الشب بحزرك انه يكون عندك سلاح.. أو تتعامل مع واحد من المقاومة..
بس اليوم حسيت انه فش إلا تلفونا بكل غزة.. مسكتش وهو يرن..
- ألو السلام عليكم...
- وعليكم السلام..
- معك فلانة من ليبيا.. الله معكم.. الله ينصركم.. الله يقويكم..
- تسلمي يا حجة.. إدعولنا..
- الله ينصركم ويحفظكم..
- يلا سلام عليكم..
- وعليكم السلام..
هادي عينة من المكالمات اللي بتوصلنا.. مع انها صغيرة وفهاش رغي وطق حنك .. إلا إنها بتحسس الواحد انه مش لحاله وفي حد معاه..
ويا حبيبي لو خلال المكالمة نزل صاروخ ولا الخمسمية تاعت الأباتشي اشتغلت.. شوف العياط على التلفون .. وبدل ما هما يصيروا يواسوك ويهدوا فيك.. احنا بنصير نهدي فيهم ونسكتهم..



لأ والشغلة الجديدة اللي مجنناني قصة الفسفور.. أنا طول عمري بسمع انه الفسفور في السمك.. وإنه مفيد وكل ما الواحد كان ياكل سمك.. كان يحس حاله صار يضوي من الفسفور..
بس هونا الوضع مختلف.. فسفور صح بخليك تضوي.. يعني أول ما تيجي عليك قذيفة فسفور.. وتهب فيك النار.. حيصير اللي يشوفك يقولك منور ياحج.. الله يلطف فينا..



طبعاً وقت الفراغ الواحد بحاول يستغله بإشي مفيد.. أنا استغليت وقتي برياضة جديدة.. وهية رياضة براميل المي..
أول ما أفتح عنيا على طول بمارس الرياضة اليومية.. بطلع على سطح الدار بتفقد البراميل.. وقديش ضايل مي.. طبعاً عن طريق الدقدقة على البرميل..
الواحد صارت أذنه موسيقية برميلية.. وصار من صوت الدقة على البرميل يعرف إذا كان فاضي ولا مليان (طبعاً هادي الكل بعرفها).. بس الجديد واللي اكتسبته مع الخبرة انه لو كان البرميل مليان أعرف أكم لتر مي فيه..



أنا لقيت حالي لهلأ عايش قلت أكتبلكم أحكيلكم عن وضعنا.. بكرة يمكن أكون عايش بس مش قادر أكتب.. أو مش عايش من أصلو..
إدعولنا.. إدعوا تنحل هالقصة على خير.. إدعوا للمقاومين.. إدعوا للشهدا.. إدعوا للجرحى.. إدعوا للناس الله يصبرها.. إدعوا للكل..
ولو ضل معكم وقت.. إدعولي ..




ونشوفكم على خير..

اخوكم سباي الغزاوي

spy-kid غير متصل قديم 21-01-2009 , 08:33 PM    الرد مع إقتباس
روزي روزي غير متصل    
مبدع # كريمـــة الأصـــل نشميـــه #  
المشاركات: 2,654
#2  

عيشتني الجو بقوهـ ..

وأنا أقرأ حسيت قد إيش إنتم قاعدين على أعصابكم ..

وقد إيش عايشين برعب ..

مابيدنا غير ندعي لكم ..

اللهم انصر اخواننا في فلسطين

اللهم عجل بنصرهم يا سميع الدعاء

اللهم عليك باليهود فانهم لا يعجزونك

اللهم زلزل الارض من تحت اقدامهم


اللهــــــــــم آميـــــــن


وعندنــا وقت ندعي لك وندعي للكل ..

الدعاء موصعب أهم شي النيـــه الصافيه ..

أسأل الله العلي القدير أن يرفع عنكم ..

مع تحيات ..

روزي الغزاوي <<أخوان

روزي غير متصل قديم 22-01-2009 , 10:05 AM    الرد مع إقتباس
مملوحه مملوحه غير متصل    
عضو نشيط جداً k.s.a  
المشاركات: 229
#3  

الحمدلله على كل الحال ..
القصف وتوقف..!
بس ماأقول غير الله يزلزل هالإسرائيليين.! ويورينا فيهم يوم،،،

مملوحه غير متصل قديم 27-01-2009 , 03:18 PM    الرد مع إقتباس
ندووووي ندووووي غير متصل    
مبدعة الطرائف  
المشاركات: 2,463
#4  

بالرغم من الوجع والقهر...


ضحكني اسلوبك في الكتابه


الله ينصركم ياسباي وترجع فلسطين حره



ندوووي الغزاوي << أختهم

ندووووي غير متصل قديم 07-02-2009 , 11:38 AM    الرد مع إقتباس
FOUZIA FOUZIA غير متصل    
مبدع فائق التميز الجزائر يا حكاية حبى  
المشاركات: 7,692
#5  

كريم والله انااقرا والا والدموع تنهمر اقسم لك بالله كائني عايشة معكم انت عرفت كيف توصل لنا وضعكم وريت كنت اعرف كيف اوصل لكم مدى محبتي لكم واني حزينة جدا لما عشتوه بس ربي يعلم بمعزة فلسطين واهلها في قلوبنا
ربي ينصركم ويعينكم ويقويكم ويجمع شملكم
ربي مع الاطفال تراه اطفالكم غير كل الاطفال من مستمدين هالفصاحة والقوة ربي معهم
كريم شكرالك عالموضوع وربي معاك ودائما ما انساك من الدعاء
اختك فوزية

FOUZIA غير متصل قديم 08-02-2009 , 03:08 PM    الرد مع إقتباس
spy-kid spy-kid غير متصل    
عضو نشيط جدا إذا كان كل العالم ضدي... فانا فلسطيني أعشق التحدي  
المشاركات: 3,776
#6  

روزي , مملوحة , ندوووي و فوزية

شاكر لكم تنوريكم للموضوع نسيت اقول انه مش انا اللي كاتب هالموضوع وصلني كرساله من شاب صاحبي بس تقريبا حالنا كان نفس حال هالشاب

على فكرة حلوة حركة روزي الغزاوية ^_* و بيشرفنا تكونوا النا اخوة انتي وندوووي وفوزية

دمتم بألف خير

spy-kid غير متصل قديم 10-02-2009 , 02:58 PM    الرد مع إقتباس
spy-kid spy-kid غير متصل    
عضو نشيط جدا إذا كان كل العالم ضدي... فانا فلسطيني أعشق التحدي  
المشاركات: 3,776
#8  

اللهم آآآآآآآآآآآآآآآآآمين..

spy-kid غير متصل قديم 02-03-2009 , 06:13 PM    الرد مع إقتباس
المشاركة في الموضوع


[عرض نسخة للطّباعة عرض نسخة للطّباعة | ارسل هذه الصفحة لصديق ارسل هذه الصفحة لصديق]

الانتقال السريع
   قوانين المشاركة :
لا بإمكانك إضافة موضوع جديد لا بإمكانك إضافة مشاركات جديدة لا بإمكانك إضافة مرفقات لا بإمكانك تعديل مشاركاتك
كود في بي vB متاح الإبتسامات متاح كود [IMG] متاح كود HTML متاح



لمراسلتنا - شبكة سوالف - الأرشيف

Powered by: vBulletin
Copyright © Jelsoft Enterprises Limited 2000.