في البدايه خلونا نشوف صوره مجهريه للخلايا الدهنيه
والحين نبدا الموضوع
--
-كيف يعرف الواحد انه سمين (او بو تنمبه
).
-يمكن تعريف السمنه بأنها زياده كمية الدهون بالجسم عن المعدل الطبيعي وكلما زادت نسبة الدهون المتراكمه بالجسم زادة حدة السمنه ويبلغ متوسط نسبة الدهون بالجسم عند الرجال بحوالي 12- 15% وعند النساء 20 -25%.
وما نقدر نعتبر الوزن مقياس حقيقي للسمنه.
ليش؟؟؟؟
الوزن يتأثر بأشياء كثيره منها مثلا العظام يعني نسمع احيانا ان فلان من الناس كل وزنه عظم وهو مفهوم صحيح
وايضا الماي يزيد الوزن بشكل كبير او بعد وجبه دسمه(جرب هاذي الطريقه بنفسك قياس وزنك قبل وبعد احدى الوجبات وشوف الفرق)
وشي بعد مهم الي هو الكتله العضليه(عشان كذا نشوف الي يلعبون حديد اذا شفت الواحد فيهم تعطيه وزن اقل من وزنه بكثير واذا وزن قدامك يطلع وزنه اكثر من شكله)
الزبده اذا تبي تعرف انك متين ولا لا لازم تقيس نسبة الدهون بالجسم واستخدام المؤشرات المتعلقه بنسبة الدهون بالجسم.
---------------------
-الدهون في الجسم.
وزن الجسم الكامل عباره عن مجموع وزن عضلات واعضاء الجسم والماي والشحوم والطعام.
طبعا زي ماحنا عارفين تقريبا 60-65 من وزن الجسم عباره عن ماي وهو اكثر شي يغير وزن الجسم(عشان كذا اي واحد اذا بدى في رجيم او سوى حمام بخار يطيح من وزنه 2-3 كيلو بسرعه ومسكين ينبسط على باله انها شحوم وما درى انها ماي
)
طبعا تزيد الشحوم بالجسم بزيادة حجم وعدد الخلايا الدهنيه. ويزيد عدد الخلايا الدهنيه بالجسم خلال فترة الطفوله والمراهقه عشان كذا لازم نوصل مفهوم جدا مهم للأمهات(ان الطفل الصغير ليس ببطه حيث ان المشاهد ان الام تمسك الولد الصغير وتحطه بين رجولها عشان لا ينحاش وبعدين تمسك الاكل ودعس في حلق الولد لين ما يقول امنت بالله وبعدين تطلق صراحه وهذا شي غلط
)
عشان كذا اهم شي في فترتي الطفوله والمراهقه الاكل المتوازن والتمارين الرياضيه (طبعا الاهم منهم التربيه الدينيه الجيده
)
--------------
-اهم الطرق لقياس الشحوم بالجسم:
1-طريقه قياس سمك الشحوم:
وتتم هاذي بأستخدام جهاز خاص لقياس سمك الدهون تحت الجلد وعاده تقاس اماكن معينه من الذراع والخصر والفخذ وبأستخدام جداول معينه يمكن معرفة ان كان الشخص سمينا ولا لا.
2-طريقه قياس الوزن بالنسبه للطول:
اشهر طريقه وكلنا نعرفها الا وهي الجداول(الي فيها وزن وطول)
عموما ما تسخدم بالوقت الحاضر.
3-طريقة مؤشر كتلة الجسم ويطلق عليه بالانجليزي
((body mass index
وهو اكثر المقاييس شيوعا وذلك لسهولة اجراءه ولأرتباطه بتراكم الدهون بشكل افضل من قياس الوزن بالنسبه للطول, ويعرف هذا المؤشر بأنه حاص قسمة وزن الجسم (بالكيلو) على مربع الطول(بالمتر) ويعطيك مؤشر كتلة الجسم.
مثال:
واحد وزنه 68 كيلو وطوله حوالي 158 سم
اول شي حول ال سم الى م بالقسمه على 100 فيصبح الناتج 1.58 م
وبعدين خذ مربع الطول يعني 1.58*1.58= 2.496
بعدين اقسم الوزن على الناتج
68/2.496=27.2
يعني الشخص هذا مؤشر كتلة الجسم حقه 27.2
وفيه جدول مقارنات يوجد فيه المؤشرات مع درجة السمنه والشخص هذا زايد وزنه زياده طفيفه
(طبعا الاطفال لهم جدول خاص)
عموما الموضوع ما انتهي وله تكمله ان شاء الله في القريب العاجل
الي يبي يحسب درجة السمنه لديه يحط بالرد المؤشر حقه او اذا مستحي يرسلي اياه بالبريد وانا ارد عليه بأسرع ما يمكن(DHL)
ويرسل ايضا الطول والوزن واذا كان بالغ او طفل(لهم جداول مختلفه)
وشكرا جزيلا
(منقول بتصرف من كتاب كيف تتخلص من السمنه للدكتور عبدالرحمن المصيقر)
عرض نسخة للطّباعة |
ارسل هذه الصفحة لصديق]
