العودة سوالف للجميع > سـوالـف الجمـيــــــــع > ســـوالف الأصــدقـاء العامـــة > شجرة فضة وشجرة ذهب
المشاركة في الموضوع
اسراء اسراء غير متصل    
عضو فائق النشاط  
المشاركات: 887
#1  

كان يا ما كان
كان في واحد تاجروهادا التاجر كان عنده مال وعيال وعبيد ومكيال وقصر شامخ الأركان مطرز باللولو والمرجان وكان عنده واحد ولد وقبل ما يموت قال له ياولدي أوصيك بوصية سرك لا تطلعه من صدرك ولا تقول به ولا حتى لمراتك مهما حصل قال الولد حاضر يا والدي قال التاجر شوف في خزنتي هادي أنا عندي شجرتين واحدة دهب وواحدة فضة كل ما تقطف منها ورقة تطلع مكانها ورقة جديدة وبكده تضمن مستقبلك وتعيش معاك ثروتك لآخر ذرية بس المهم إن سرك ما تعطيه ولا حتى لمراتك قال مفهوم يا والدي واستودعه الله وراح إلى حال سبيله
واستمر الابن كاتم السر في صدره حتى بعد ما اتجوز وكان لما يسهر مع أصدقائه كل واحد منهم يتفاخر بأملاك أهله ويقول أنا والدي يملك القصر الفلاني وأنا والدي يملك البستان العلاني والشاب ساكت ما يفتح فمه بكلمة عن الشجرتين العجيبة واحتار أصدقائه من صمته وهو ابن تاجر قد الدنيا وأكيد عنده أملاك زي ما عندهم وفضلوا يحكوا من وراه عن سر صمته وما لقوا اللي يشبع فضولهم فاتبرع واحد فيهم إنه يرسل مراته لمرات صاحبهم عشان تعرف لهم منها أسرار ثروة جوزها
وراحت الست تاني يوم في الصباح ووقفت عند الباب وفتح لها الخدم طلعت عند مرات الشاب ولقتها فوق عرش عظيم والجواري عن يمينها وعن شمالها وفي ملك أصنج ولما عرفت أنها مرات صاحب جوزها أحسنت استقبالها وقدمت لها الأطايب والمشارب وبعدين سألت الضيفة ياترى ياأختي جوزك يحبك ؟ قالت يوه هو يحبني وبس ؟ ده يعزني ما يبغاني أتحرك من مكاني أهو زي مانت شايفة ردت الضيفة طيب هو ايش عنده ؟ ايش ما عنده ؟ قالت ست البيت لا والله أنا الحاجات دي جوزي ما يكلمني عنها أبدا وما أدري عنها أي شي أنا مالي غير اللي أطلبه وأتمناه يكون عندي ردت الضيفة لأ يا غشيمة إن كان جوزك يحبك من جد لازم يقولك أسراره وما يدس عنك شي وعلى قد ما إنت غالية عنده كيف يهون عليه الناس كلها تعرف دخيلة نفسه وإنت لا والله إحنا كلنا جيزانا يأتمنونا على أسرارهم ويعزونا أسمعي النصيحة اليوم لما يرجع البيت تعملي نفسك زعلانة وتصري إنك تعرفي سر ثروته
ولقي كلام الضيفة صدى في نفس الحرمة اللي عملت نفسها زعلانة و كشرت في وجه جوزها ساعة ما دخل البيت ولما سألها عن سبب زعلها صارت تبكي وتهق وتبق وقالت انت تحبني بالكلام بس لكن فعلك ما يبين أي حب كل الحريم جيزانهم يعطوهم أسرارهم ويطلعوهم على إللي عندهم وأنا يا حسرتي دخلنا وثروتنا كلها أسرار تخبيها عليه لأنك ما انت واثق فيه قال لها ايش هذا الكلام الغريب ؟ انتعمرك ما قلتي الحاجات دي أنا عمري نقصت في حقك ؟ كل طلباتك مجابة وفضل يتكلم ويعيد ويزيد ويحاول يقنعها انها تغير رأيها وهي راسها وألف سيف الا تعرف السر ورغم ان الشاب كان مفتكر وصية أبوه وما كان يحب انه يخلف وعده إلا انه ضعف قدام إصرار مراته إللي يحبها من كل قلبه خاصة إنها هددته تترك البيت وأخذ مراته الى الجزنة وأطلعها على السر وأرتاحت لما شافت الشجرتين الفضة والدهب إللي هما سبب كل خيراتهم وحذرها جوزها وقال لها أنا قلت لك السر عشان أنا أحبك وما هان عليه زعلك لكن أرجوك السر ده لا يطلع لأي مخلوق وإلا يحل علينا الهلاك ووعدت إنها تكتم السر
لكن للأسف لما جاتها الضيفة تاني يوم ما قدرت تقاوم وكان لازم تثبت لها قد ايش جوزها يحبها ويثق فيها وأعطتها السر وورتها الشجرتين ووصتها ما تطلع السرلأحد وطارت الضيفة على جوزها وبلغته بسر الثروة إللي ما تفنى طول العمر وفي الليل والأصحاب مجتمعين وزي العادة كل واحد بيتفاخر بأملاكه وابن التاجر ساكت ما ينطق قال له جوز الضيفة فجأة يا أخي انت ليش ساكت ما تقول ايش عندك وكأنك ما انت تاجر زينا ؟ قال أقول ايش بس أنا عندي الستر والحمد لله قال له يا شيخ يعني لا عندك شجرة دهب ولا شجرة فضة ؟ وأنفجع وهو على نيته وأنكر كل الكلام فقالوا له طيب إحنا مستعدين ندخل معاك في رهان نجي معاك البيت ونفتش عن الشجرتين في كل مكان وإن لقيناهم تطلع من البيت يا ربي كما خلقتني ونأخذ إحنا كل شي تملكه
وإن كان ما لقيناهم تاخذ انت كل ما فوقنا وما تحتنا وتتركنا يا ربي مالي غيرك ووافق الشاب من غير تردد لأنه كان متأكد إن الخزنة في مكان سري ولا يمكن لأحد يعرف طريقها
وبالفعل قاموا معاه أصحابه على البيت وداروا يفتشوا في كل مكان رغم انهم كانوا عارفين طريق الخزنة من وصف الضيفة وصاروا يشيلوا ويحطوا يعني تضييع شبهة وشوية شوية قربوا من المكان السري وشافوا الخزنة وفتحوها وطلعوا الشجرتين وصاحبهم صفارة ينقط من الدهشة والقلق والحزن وقالوا له أصحابه ياللا يا عم أوفي بدينك قال لهم حاضر وهو في طريقه للباب زهم مراته ورمى عليها يمين الطلاق وصارت تبكي وتسأله عن السبب وتستعطفه ورد عليها وقال خلا كل شي انتهى بيننا انت ما صنت العهد وما حافظتي على سري وأنا أخدت عقابي على عدم طاعة والدي واللي ما يسمع كلام الوالدين ما ينال خير
وخرج من البيت صفر اليدين ومقهور ونادم على غبائه وفضل يمشي لحد ما وصل خلا خالي وسما عالي وشاف شجرة كبيرة نام تحتها يرتاح من تعب المشي وفجأة سمع الصوت اللي يقول قوم يا ولدي انت إنشاء الله عليهم منصور وفزع من نومه مرعوب واستمر الصوت يعلى روح لأصحابك وقول لهم الشجرة الفضة بكرة راح تطلع ورق والشجرة الدهب راح تطلع نحاس وإن ما صدق كلامي أسجنوني وإن اتحقق آخذ جميع ما تملكوا بالإضافة لملكي اللي استوليتوا عليه بالرهان ورغم فزعه وإحساسه إن الكلام سمعه كان غير معقول إلا إنه ما شاف قدامه طريق تاني وقام من مكانه واتوجه لأصحابه اللي لما شافوه صاروا يضحكوا عليه ويستهزؤا به لكن الشاب كان محتفظ بهدوئه وقال لهم بثقة أنا مستعد أدخل معاكم في رهان زي رهانكم والمرة دي أنا اللي راح أكسب بكرة الصباح الشجرة الفضة راح تطلع ورق و
الشجرة الدهب ما راح تطلع غير نحاس وإن ما صدق كلامي أرموني في السجن وأحرموني حريتي للأبد لكن إن كان طلعت صادق يكون لي الحق أسترد كل أملاكي وفوقها كل اللي ملككم انتوا وصاروا أصحابه يضحكوا ويقولوا أكيد الراجل اتجنن وفقد صوابه وبيخرف وهو يرد ويقول أنا مستعد أقول الكلام ده قدام القاضي إنتوا خايفين ولا ايه ؟ قالوا له يعني الشجرتين طول عمرها بتعطيكم مال ما يفني إشمعنا لما صارت ملكنا راح يتحول ورقها لأشياء مالها قيمة قال لهم انتوا ما دام متأكدين قد كده ليش ما تقبلوا الرهان ؟ قالوا له إحنا ما نبغى نزود همومك وكمان تفقد حريتك بعد كل اللي راح منك لكن أخيرا قبل أصحابه الرهان وشهد القاضي عليهم
وتاني يوم أجتمع الأصحاب كلهم أمام القاضي ومعاهم الشجرتين ومد واحد فيهم يده وقطع الورقة الفضة ومد التاني يده وقطع الورقة الدهب واندهش الحاضرين كلهم لما شافوا الورقة اللي طلعت محل الورقة الفضة والنحاس اللي طلعت محل الدهب وشاء رب العباد إنه ينصر الشاب اللي كان على نيته وخدعوه ناس ما عندهم ضمير واستلوا طيبة قلبه
واضطر أصحابه إنهم يوفوا بالعهد ويسلموا الشاب كل أملاكه كاملة تامة بالإضافة لكل ما يملكوه مجتمعين لكن هو كانت أخلاقه عالية ورفض يأخد من حقهم شي واستلم اللي يخصه واسترجع الشجرتين اللي بقيت معاه لآخر ذريته وامتنع عن الصحبة السيئة وعاهد ربه عمره ما يدخل في رهان مرة تانية
وتوتة توتة فرغت الحدوتة حلوة ولا وملتوتة

اسراء غير متصل قديم 07-08-2001 , 11:33 PM    الرد مع إقتباس
فلاش99 فلاش99 غير متصل    
مبدع  
المشاركات: 2,875
#2  


اسراء

قصة جميله وبها كذا عبرة بس اعجبتني واحده منهم
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟

سري ما اعطيه

!!! فلاش شجرة الماس !!!

فلاش99 غير متصل قديم 07-08-2001 , 11:38 PM    الرد مع إقتباس
saif_m saif_m غير متصل    
عضو نشيط جداً  
المشاركات: 382
#3  

اسراء

محلاها من قصة ... سلمت يداك على كل هذا الإنشا ... الله يسامح الزوجة السوسة ... تحياتي!

saif_m غير متصل قديم 07-08-2001 , 11:46 PM    الرد مع إقتباس
عبودي 1 عبودي 1 غير متصل    
مبدع فائق التميز  
المشاركات: 5,234
#4  

اختي قصتك حلو
وعلى نياتكم ترزقون
تحياتي
وانا سبق وسمعت بالقصه هذي
تحياتي

عبودي 1 غير متصل قديم 08-08-2001 , 12:44 AM    الرد مع إقتباس
البحاري البحاري غير متصل    
مبدع فائق التميز السعودية  
المشاركات: 6,857
#5  

صباح الخير .. إسراء

قصة حلوة .. اخرج منها

حفظ السر .. وخير مكان له الصدر .. وعدم اظهاره .

السر اذا جاوز الاثنين شاع .

على المرأة مرعاة حقوق الزوج .. وعدم اظهار اسراره .

تحياتي

البحاري غير متصل قديم 08-08-2001 , 03:13 AM    الرد مع إقتباس
اسراء اسراء غير متصل    
عضو فائق النشاط  
المشاركات: 887
#6  

شكرا لكل من :
1_ فلاش
2_ عبودي
3_ بحوري
4_ سيف
وجزيتم خيرا تقبلو تحياتي

اسراء غير متصل قديم 08-08-2001 , 08:10 PM    الرد مع إقتباس
المشاركة في الموضوع


[عرض نسخة للطّباعة عرض نسخة للطّباعة | ارسل هذه الصفحة لصديق ارسل هذه الصفحة لصديق]

الانتقال السريع
   قوانين المشاركة :
لا بإمكانك إضافة موضوع جديد لا بإمكانك إضافة مشاركات جديدة لا بإمكانك إضافة مرفقات لا بإمكانك تعديل مشاركاتك
كود في بي vB متاح الإبتسامات متاح كود [IMG] متاح كود HTML متاح



لمراسلتنا - شبكة سوالف - الأرشيف

Powered by: vBulletin
Copyright © Jelsoft Enterprises Limited 2000.