السلام عليكم ورحمة الله وبركاته ..
تتذكروا سالفة مقهى الجنوب ؟. والمعلم صداع ؟
هذه سالفة صار عليها اكثر من سنة .. واللي ما قرأها ..
بـأمكانة يراجع الجزء الأول من القصة
هنا ( صار مسلسل )
عموما اللي ماله خلق يقراء الجزء الأول .. او الجزء الثاني .. يضغط ( ctrl + w ) .. ويفارقنــا
المهم ..
بعد قرابة السنة .. اصروا الشباب انهم يروحوا مقهى الجنوب مرة أخرى ! .. لأن المعسل هناك غير !
دخلنــا المقهى ... وكان مكان مظلم .. شبه معدوم الأضاءة .. وفيه لمبة واحد زرقا .. لزوم البكش !
وما شالله تبارك الله .. اشكال المرتادين .. كلهم سوابق !.. وانا لليوم استغرب ليش اسمه مقهى الجنوب !.. المفروض يسموه مقهى الوحوش !.. مقهى الغيلان ...يعني اسم المقهى لازم يكون معبر
المقهى عبارة عن جلسات كثير .. وتلفزيون واحد في نص المقهى ! .. وطبعا الريموت مع الأقوى
الطريف ان الشيش ( جمع شيشة) معظمها مقفلة بأقفال .. وكل شيشة عليها اسم زبون
جلسنا انا والشباب في جلسة .. وقبل ما اجلس .. جاني اتصال .. الشباب جلسوا وانا رحت في مكان بعيد عشان اتكلم ...
خلصت مكالمتي .. ورجعت الجلسة ... الا والاقي واحد غريب جالس مع الشباب .. اول مرة اشوفه ..
قلت في نفسي .. يمكن انه يعرف واحد من الشباب !
المهم ..
الأخ كان يحكيلهم عن مغامرة صارت له في المدينة ... بصراحة كانت اغرب وأغبي قصة سمعتها في حياتي ... اترككهم معها ..
=========
يقول الأخ :
في مرة كنت ماشي في المدينة ... وكان الطريق كله جبال و الدنيا ظلام ..
شفت مكان مرة ضيق .. بين جبلين ... تقريبا المكان عرضه متر ... مشيت في الطريق هذا ..
الا وفجأة الاقي قدامي أسد !!
كلنـا نطالع فيه زي كده :
الأخ : ايه والله اسد طلعلي !! ..
اتذكرت عادل امام لمن يقول: انا يطلعلي أسد !!!
واحد من الشباب: وايش سويت معاه ؟
الأخ: ابدا ... زغرت فيه ( الزغر : النظرة الحادة) ... راح الأسد وقف على رجوله .. وعدينا من ورا بعض ظهر لظهر ! ... وكملت طريقي !
كلنـا :
طالعت في واحد من الشباب ..
وسألته بلغة العيون أو ال( telepathy) : الحيوان دا جاي مع مين ؟؟..
رد صاحبي بلغة العيون: والله مدري ! احسبه جاي معاك !
قلت في نفسي .. يلا ما يخالف .. نتونس عليه .. ايش ورانا !
قلتله: في مرة .. كنت في المدينة انا والشباب ... وطالعين في رحلة صيد ... نصيد غزلان و ..
قاطعني الأخ: غزلان في المدينة !
انا : ياخي انا مشيتلك سالفة الأسد !!!.. مشيلي هذه
الأخ: طيب طيب
انا : المهم .. الا واشوفلك ذاك الغزال .. واطارده !!!. وأجلس اطارد فيه ...
وهو يجري ... وانا اجري .. وهو يجري .. وانا اجري <<< صارت أغنية
لين وصلنا لمنحدر .. ومافي مكان يقدر يروح له !! ...
ومن مسافة ( كيلو ونص ) ..اصوب البندقية حقتي بين عيونه !!
الأخ : وصابت في عيونه ؟؟!!!!؟؟!!
انا : لاء.. بين عيونه .. لكن لمن مشيت مسافة كيلو ونص ..ووصلت لي عنده .. اكتشفت ان الطلقة ما صابت الغزال !!..
الأخ : أجل ؟
انا : الطلقة جات في الأسد اللي طلعلك
ما يستفاد من الموضوع :
1- لغة العيون او ال Telepathy مهمة جدا لشتم انسان دون ان تجرح مشاعرة !
2- اذا ذهبت لمقهى الجنوب لا تنسى تاخذ معاك (قفل) .. واذا منت مدخن يكون احسن !
3- اذا في يوم من الايام طلعلك أسد .. أزغر فيه ... لعل وعسى الأسد يوقف على رجوله
تحياتي