السلام عليكم ورحمة الله وبركاته

كيفكم شباب، ادري ان مشاركاتي هنا قليلة جدا على الرغم من قدم عضويتي ، بس انا والله من المتابعين شبه اليوميين لهذا المنتدى الروعة بكل صراحة...

على العموم ما أطول بالديباجة..... :-)

أنا جاي على بالي من زمان مشروع Restoration للطراز القديم (FJ 40) من اللاندكروزر ذو البابين أو الربع او العشة كمت يحلو للبعض تسميته.....

طبعا البداية راح تكون البحث عن السيارة والتي أكتشفت من خلال استطالعاتي الأولى انها عملية مش سهلة أبدا، لأن مثل هذي السيارات صارت نادرة وصعب الحصول عليها.
الخطوات المقترحة:
- تغيير المحرك الى 4500 efi اللي يجي طبعا على المويدلات الأحدث، أو تغييره الى محرك ال GM 350 ، ولكن الامريكي كما تعرفون أعتماديته أقل من الياباني وخاصة TOYOTA لازم الواحد يفكر كثير قبل ما يقرر على اي محرك
- طبعا تغيير الجير حسب المحرك الجديد
- تغيير التعليق لجعل السبارة متوحشة أكثر بالاضافة لرنجات وتواير أكبر
- من الداخل ، أنا عن نفسي أفضل الشكل القديم لبساطته وعملانيته، ولكن شفت وحده مركبلها صاحبها طبلون الكروزر الجديد والصراحة مو غلط ابدا
...............................
المطلوب من الأخوان اللي معاهم تجارب سابقة أو ممكن يفيدونا بأي شي لا يبخلون علينا علشان الكل يستفيد
واللي يعرف جراج أو ورشة شغلهم طيب لا يبخل علينا بعد،
والان مع الصور:
قبل

بعد


هذي موديل 1965 ما غيرولها لا مكينة ولا الجير ، فقط توضيب مع قطع لزيادة البيرفورمانس

---------------------------------------------


هذي موديل 1968 مع مكينة V8 350 وجير لانكروزر 5 غيارات بدل القديم اللي يجي 4 غيارات فقط

-------------------------------------

وهذي يقال انها من الامارات ويقال ان تكلفة تعديلها وصلت 95 الف درهم




شوفوا من داخل كيف !!!!!!!!!!!!!!!

------------------
الشكر مسبقا، وأكيد راح أبلغكم عن اي تطورات أول بأول..

الصور منقولة من المواقع التالية
TLC 4x4
EFI4500 مع الشكر للاخ عاشق 97

شغل ممتاز ومن داخل روعه

يابختهم :cry1:

ايه والله من الداخل روعه

حلوووووووو

كان عندنا واحد زمااااااااااااااااااان حق اخوي قبل حوالي 13 سنه كنا مرهمين له مكينة جمس 350 والله ان الجيب صار نشيط من قللللللللللب :knight: بس غلطتنا مابدلنا القير وتركنا له القير حقه شد بلد وكانت النهاية المؤسفة للجيب حقنا بطعوس الثمامة كان الجو مطر والارض طين وغرزنا وتعلقنا ونشبنا وانكسر القير :cry1:

جلس فترة كذا بالطعوس وبعناه وهو ناشب وجاء الي اشتراه وجاب ناس من زملاء موظفين بالحرس وجابوا جيوب الحرس وشلعوه من مكانه


بس والله الموتر قووووووووووووووووووووووووووي كنت ارقى الطعس بالريوس

اخي العزيز ،،،

السلام عليكم،،،

اخي انت من وين لو من دبي بدلك عند ميكانيكي رقم واحد يشتغل بالراليات ومع الشيوخ وكل شغله بكلتا يداه .... ما حد يشتغل معاه من الهنود بالشغلات الميكانيكية ... لو حبيت بدلك على المكان وين بدبي ....بس رد خبر علي لانو هو يجدد رنجات قديمة ويهيء هذه السيارات حق الريس والصحراء....

ودمت سالم...

مع محرك امريكي لديك خيارات لا نهائية في التزويد و بسعر رخيص و تورك عالي

:lol:



وبالتوفيق بالمشروع

والله الشغلات هذي عادةً تكون مكلفة بس حلاوتها إنها شغلك أنت :banana:

وبالتوفيق إن شاء الله بس لا تخلينا بعد التعديل لازم تحط الصور لنا ;)

هيل شغل جامد مسووله ..

وعلى ما أعتقد مغير الدفريشن جدام وورى .. وحاط الموديل الجديد 5 بلط .. على قوللتكم .. يعني رنجات الأستيشن الجديد ..

والعنجلييز يسيرون السعوديه وياخذون هالكبسولات ويسولهم رستريشن كامل ببلادهم ..

يقولولنا عندكم كنووز وما تعرفون .. هم يشترونه مني سكرا ببلاش .. ويبيعونه ببلادهم دبل السعر .. وهو بعده سكراب ..

..

هذا الأستيشن وبلاويه .. :banana:

السلام عليكم ورحمة الله وبركاته

شباب،، مشكوريييييييييييييييين جدا على التفاعل الطيب.....
************
نديم الطيف....
والله حمستني أكثر الحين، لازم ابدي مشروعي بسرعة ، بس لو خبرتني عن سيارتك كان شريتها منك ، بس ما عليه لما تغرز لك سيارة مرة ثانية انا راح اكون أول زبون
***********
BMW M8 .......
أنا من مسقط، بس الاصل من صلالة ، والسيارة حاب اني اجهزها عشان الاجازات لمل ارجع صلالة
استخدمها للحملات الاستكشافية... :smart: :smart: ، (طالع فيها مستكشف)
يا ريت اتدلني عليه، بس الخوف يكون غالي دامه يشتغل للراليات وزباينه مثل ما تقول شيوخ. وتسلم على الرد
***********

قلق ورجة......
الله يرج ابليسك.... ،
والله انا أصلا من محبين الامريكي وأكره أصلا شي اسمه تويوتا، بس ما يوديك على المر الا اللي أمر منه، وتسلم لي
*******************
El_3grab..........
والله في أمريكا اسعار هذي السيارات والعدلة خصوصا أغلى بعض الاحيان من السيارات الجديدة، تصدق انه في شركات هناك متخصصة في انتاج جميع انواع المتعلقة بال FJ40 من الدفرنشلات الى لصقة تعليمات الدبل،، يعني شي بروفشنال....
وفعلا مثل ما قلت هذا الاستيشن وبلاويه........





ومرة ثانية مشكورين على الردود، وانتظرونا قريبا

اذا تبي النصيحة في المحرك

خذ لك LS1 وتعديلات بسيطه عليها

ترتاح من الخربات و مكينة بتخلي سيارتك تطير وتزويدها بحر

وسعرها مناسب جدا

وصرفيتها رهيبه بالنسبة لغيرها


وانصحك تخطط للمشروع من كل الجهات عشان ما توصل في نص المشروع وتنصدم في شي

يعني احسبها صح قبل ما تبدى في اي خطوى

وبالتوفيق انشالله

تعبنا وحنا نحسب .. نبى نشتغل ..

يا صيف ما أبعدك ..

خخخخخخخخ

كل تاخيره فيها خيره

وما بعد الصبر الا الفرج

اخي الفاضل،،،

حين وصولك إلى دبي اذهب الى منطقة الراشدية وبتحديد إلى وكالة الفطيم للسيارات " وكيل تويوتا الحصري " في الامارات وعلى بعد 400 متر تقريبا بتحصل على شمالك سياران لند روفر قديم " فوق 25 " سيارة .... الكراج اسمه الحرفة الفنية .... الميكانيكي اسمه سامي ابو عمرة....

الريال مخ وبيفيدك ان شاء الله....

رقم التلفيون مال الورشة بيبلك اياه وانت اساله اذا ممكن يستقبل السيارة بالوقت الحالي ومقدرته على تنفيذ المشروع .... لانه وبكل صراحة الشغل ما يوقف عنده....

موتري ويدته امس يباله اكثر من اسبوع لين يخلص ..... ونحنا ربع من 20 سنة .... بس شغله الصراحة ما عليه اي كلام.... هذا راي

نبى نشوف النتايج خيو BMW M8 :-)

اخوي من تجربه شخصيه

لا تركب LS-1 اذا كنت راعي طعوس

اما اذا كنت راعي قومات وريس شارع ركب الـLS-1

لان التورك كبير في هذي المكينه والطعس مايحتاج التورك الكبير

لان السياره بتحفر

عندي فيديو قومة طعس بين نيسان هارتوب "ربع"

واحد عليه 4500 كامات كربريتر وواحد عليه LS-1 سوبر جارجر

وكان الكربريتر قدام والـLS-1 يحفر

لكن في الشارع بيكون وحش ومحد يقدر يمسكه

ومن تجربه على نيسان LS-1 +هيدرز +فلتر+كامات+كمبيوتر

ونيسان مكينة تويوتا تيربو نتك وكان الـLS-1 قدام