لي صديق تعرض لمثل ما ذكرته
وزيادة على ذلك
جاءه في البيت مندوب شركة تنظيف
ومعه نماذج وكتلوجات لمكنسة كهربائية
تم تعيينه في هذه المهنة بسبب قوة لسانه
وكان اسلوبه الساحر يخليك تسلمه ما في الجيب على طول
كلمه هنا وكلمتين هناك
المكنسة هذي مفيدة وعملية
ممكن كذا كذا
كل ما في الامر ان اغلى مكنسة في السوق 600 درهم الى 1000 درهم من احسن المركت واجودها وبأحسن الضمانات
اما هذه المكنسة فسعرها خيالي تكفي لقضاء سفرتين الى جولد كوست
سعرها يقارب 8000 درهم ( ثمانية آلاف درهم )
يعني لالندونيسية لو تشتغل سنة كامل تمسح الجدران راح تاخذ قريب من هذا المبلغ
ويقول صاحبنا حاول يقنعني اني آخذها
قلت امشي واياه الكلام اقل له اجيكم الشركة !
الحبيب لا مصمم الا تشتريها
حاول
قال له البائع ادفع 2000 والباقي بعدين
قال ما عندي شي في البيت ( مفلس ) وهذه الصراحة انقذته والا كان بيشتريها من هالساحر !!!
المهم حاول يستخددم معه طرق ثانية خفف المبلغ الى 500 درهم
صاحبنا قال لا ( مفلس أيضا )
آخر شي شاف من منه فايده
قال له خلاص انت شفت المكنسة ( ولا شافها ولا شي كله ثرثرة فاضية وينط شمال ويمين ) ( ولما يقل له جربها وشغلها يتهرب باسلوب ثعلبي )
المهم ضحك عليه وجمع منه 20 رقم هاتف لأصدقاء صاحبنا
وانا منهم وكل يوم متصلين علي بوفلان وينك قل لنا نت وين ونعمل لك عرض ما حصل للمكنسة صاحبك الكريم ما قصر دلنا عليك وهو الحين بياخذ مكنسة
شد حيلك لا تخاف انت وين في ابوظبي خلاص المندوب جاي لك يوم الاحد واذا في الفجيرة بكرة الساعة 9 احنا عند باب البيت ...
والصراحة احنا الـ 20 صديق اتوهقنا معاه واتصلنا في صديقنا وقلنا له دير بالك اتسويها مرة ثانية اتصلو علينا ما يقارب 4 مرات برزة ويه .
وخلاصة القصة انها شركة اجنبية عرفت كيف تسوق مكنسة فاشلة في غضون 3 شهور تلف على مدن الدولة وبعدها اتقفل وتذهب الى دولة اخرى لتقوم بنفس الدور
وتنتهي الضمانات ويا دار ما دخلت شر .