|
عضو نشيط
|
|
المشاركات: 79
|
#1
|
سيرة
سِيْره
شعر: سلطان مجلّي
يا أميرة قَلْب راعي ما مَلَك إلاّ عصاه
هَشّ فيها احلام عمره لين حَقَّقْ حِلْم غَيره
تِشْرِقْ الشمس إن رفَعْها وْتَغْرِب إن داسَتْ ثراه
يسدِل الليل بْطَرَفْها ويِشْعِل الشَمْس بْهجيره
يِزْعِجْ الدنيا شَغَبْها لا تمَنّت صُوف شاه
ويستريح الكون منْها لا قتَل نومه ضميره
يَزْرَع الدنيا أماني تاركٍ ياسه وَراه
والبصَر لو خان عينه شاف بِعْيون البصيره
لو تمنّى يجْمَع الليل بْعصاته ما عصاه
والنجوم اللي بليْله بالعصا تَدْخل حظيره
لو بغى يرعى قطيعه يَزْرع العِشْب بْسماه
ويسقي أوّل راس مِنّه في سناه وْلا يضيره
آه يا حِلْم الطفوله .. آه يا شيبٍ غزاه
آه يا طول الأماني آه ما اطوَلْها قصيره
لا تغرّك كلْمَة الأحلام لا جَتْ من شفاه
كل الاحلام الكبيره في نظَر عينه صغيره
ما حَلَم يسكِن قصور وْلا يبى مالٍ وجاه
مكتفي بْظِلّ النخيل وفارشٍ تحته حصيره
كسرةٍ من خبْز زاده والسواقي عَذْب ماه
يطعَنْ الجوع بْرغيفه كافيٍ شَرّه وخَيْره
كل أحلامه في كلمه قالها به من قراه
كلمةٍ تاخِذْ بثاره من قدَرْه وْمِن مصيره
كلمةٍ نامَت بشِفّه لو صَحَت تمحي عناه
كلمةٍ ما كنّها إلاّ فَرْح عِشٍ رَدّ طيره
كلمةٍ تشرَب جروحه كلمةٍ تروي ظماه
كلمةٍ ما مثلها الاّ جذْع واغصانه وفيره
كلمةٍ تمْدَح عصاته بين آلاف الرعاه
كلمةٍ لو مات تبقى بين خلق ا لله سِيْره
|
|
30-06-2004 , 03:17 PM
|
الرد مع إقتباس
|