في يوم 29/12/1980م .. قامت الوالدة تصرخ بعنف .. وتصرخ .. وابوي معطيها خامس .. الوالدة تصرخ .. وابوي خامس .. لين اغمي عليها
..:p ابوي قال لها : ياحرمة اتركي عنتس التنكيت وقومي سوي شاهي
كنت وقتها في بطن امي .. ارافس واصارخ : زهقان زهقان اخرجوني .. وسمعت كلمة ابوي .. حقدت عليه .. انا ابي اطلع والرجال يبي شاهي .. من القهر ضربت ضربة قوية .. خلت امي تصحى من اغمائتها وتصرخ صرخة قوية .. وفي هذه اللحظة شال ابوي امي ودعس بها لمستشفى التخصصي .. كنت اشاهد الممرضات وهن يهدون امي .. اغمز لهن ولكنهن معطياتي اشكل لم اسكت .. قررت ان استمر بالغمز .. وفي الناحية الاخرى قال الطبيب لابي : هذا طلق عايدي يعني قرب الوالدة باحاول اعطيها الان مسكن ..
وجاني الدكتور حاول معي بشتى الوسائل ان اوقع معه اتفاقية وقف الطلق .. ولكن معصي .. لي مطالبي .. وعندما لم استجب لمطالب الدكتور خدروني (( ومنذ ذاك اليوم وانا محشش )) بعدها بيوم قال الطبيب لابي : لازم نسوي لها عملية قيصيرية ونخليها تولد الان ولا ترى فيه خطر على حياتها .. انا سمعت هالكلمة وتخنقني العبرة .. امي حبيبتي باكون السبب في وفاتها لا والف لا .. جا الدكتور يشاورني ان كان ودي اطلع الان او لا .. قلت له شف انا ودي اطلع على بداية السنة الجديدة غير كذا مافيه .. وقررت ان اسوي في الدكتور حركة اول ما اطلع بس اصبروا لي
---------------1/1/1981م-----------------
في هذا اليوم شاورني الدكتور ان كان ودي اطلع او لا .. فما رديت عليه .. الدكتور خربت اخلاقه ودخل امي غرفة العمليات وسوا لها عملية قيصرية طلعني .. ويوم شافني اخترع ومن يومها خلوه مخترع .. ضاق صدره .. يوم طلعت كنت ساكت قال بس الولد مات .. جت الممرضة تصيح .. وتجي الثانية تخمها .. ماكنت ادري اني محبوب لهذي الدرجة .. بس يوم كبرت عرفت ان اللي اخلاقه زينة يحبونه الناس (( ما امداك )) .. المهم يوم شفت العالم قلبتها مناحة وقعدوا يصيحون وانا اللي افتح عيوني وافقعها ضحكة .. واقول للدكتور عليك واحد .. الدكتور حقد .. وقلبني على راسي وطقني (( ومن ذاك اليوم وانا اي واحد اسمه دكتور منيب اواطنه )) .. في تلك الاثناء ابوي كان يلعب بلوت بالاستراحة .. ومعاه اربعمية .. دق عليه الدكتور وقال : مبروك جاك ولد .. ابوي فرح .. مع ان كلنا عيال بس انا ولد مميز ( دافع علي اكثر ) .. ويجي ابوي يطلع مع الباب وهو فرحان ويتذكر ذيك الاثناء ان معه اربعمية .. وكوشوا عليه .. ويضيق صدر ابوي ويعصب .. وقال له الدكتور : وش ناوي تسميه ؟ .. قال : الله لايرده سمه انت .. ههههههههههه الدكتور حاقد علي وسماني زيزو لاني من طلعت على الدنيا وانا مزودها مستشفى التخصصي كل ابوه .. واستفدت من ولادتي في مستشفى التخصصي .. اني طلعت ملكع وراعي تخصصي (( احلف اني ما ادله )) .. وراحوا حطوني بالحاضنة .. كانت تشيلني ممرضة افريقية .. يالله من صنان شميته الله يقلعها من سنة ماتروشت .. وعاقبتها اني طرشت على ثيابها .. وعند بوابة غرفة الحضن .. لقيت وحدة امريكية شمحوطة ملكة جمال .. واجي اقطع من الكرتونة اللي على راس الممرضة اللي شايلتني واخذ القلم من جيبها .. واكتب الرقم اللي حاطينه على يدي واول ماقربنا من الممرضة حطيت الرقم بجيبها .. المؤسف في هذه النقطة .. انه للحين مادقت .. يمكن عشاني ما مشطت شعري .. او السكسوكة ماخطت زين
------------- أول حب -------------------
يوم انا ببطن امي كنت اسمع عن الحب والكلام هذا .. فقررت اني اكون حبيب درجة اولى .. ومن اللحظة الاولى لي على الدنيا لين وصلت لغرفة الحضانة حبيت خمس او ست ممرضات .. هذا غير اللي باسوني (( يا ان الي في بالي بينقهر لا درى )) .. واذكر من اللي خمطوني هالافريقية الله يرجها .. برطمها مدري وش قايل (( ترا عندي لها صور يوم اننا بالمستشفى ماسكها عليها لو تكلمت فضحتها )) .. المهم عطتني حبة على كل خد من خدودي .. وهذا يفسر سبب انتفاخ خدودي في الاونة الاخيرة ..
المهم يوم حطوني بالحاضنة .. وانا اللي اجيك مدرعم ماشي مليون اتلفت .. والقى بالحاضنة اللي جمبي بنت مزيونة جت بعدي بثلاث دقايق .. اسمها ريم .. وانا اللي افك معها .. وهاتك ياتغميز وحركات بس الخبلة مافهمت .. ماكانها مولودة بالتخصصي .. قلت مالي الا اعبر لها عن حبي بخاطرة مهيب صاحية يمكن تحبن .. واكتب لها خاطرة قلت فيها : دودا دبيدي عافل بيدي .. وارسلها مع الممرضة اللي ضحكت بخبث وقالت : سيطانة كبيرة مؤتافيس .. وانا اللي اختب .. وترسل لي محبوبة قلبي خاطرة ضيقت صدري قالت بها : مانددا ديدا قادا .. عرفت انها تحب واحد معنا بالحضانة له خمسة ايام .. يسمونه الزقرت .. يوم سألت عنه قالوا الحين وانتم بكرامة رايح الحمام (( مين قده )) .. وتعرفت هناك على واحد اسمه سامي علمني ان الزقرت اسمه عبدالله واقشر .. مايدخل بزر بالحضانة الا يجلده لين يقول له انت عمي .. فقلت مابدهاش .. لازم اتقعد له عشان احضى بقلب ريم
------------- تدريب ماقبل اللقاء --------------
اول ماشفت عبدالله الزقرت .. عرفت اني باقاوم واحد قوي .. فقلت لازم اتدرب زين مازين .. واقعد انا وسامي تدريب على الضغط والشقحه .. ومرني ابوي بالحضانة ويرصني بصندوق حلاو بقر .. وانا اللي اوزع لكل واحد بالشلة حبة .. واعطي ريم ثنتين .. كودها تحبن بس ماش .. وكل يوم ادز لها خاطرة .. وما عطتني وجه .. لين رجع عبدالله للحضانة في ذاك اليوم وشافني وانا ارسل خاطرة لريم.. قال شكلك ماتعرفني .. نفخت عليه وقلت له : احمد ربك ان توني راضع ولا تفاهمت معك .. قال : الميدان ياحميدان .. وقلت له : قدام .. عرفت فيما بعد ان الميدان هو حلبة مصارعة بالحضانة .. حاولت اصرف واروح ارضع بس ماش مانفعت التصريفة
----------- المصارعة -----------
في تلك اللحظة قلت مالت على امن جابتس ياريم .. انا وش دخلني انا والحب .. كان بقيت على الممرضات ارحم لي .. والله عبدالله ذا كان قوي .. وفوق كذا كانت الافريقية خويته .. كلما حقد على واحد قال لها روحي بوسيه .. عاد انا اتصفق ولا تبوسني
وبدت المصارعة .. يا انا تصفقت تصفيق .. وتعلمت من ورا هالمصارعة ان خلف كل بوقس هناك بقعه زرقاء .. وفي ذيك اللحظة سدحني عبدالله بسوبليكس رائع وقبل مايثبتني دخلت امه وابوه .. وقالوا يله عبودي بنمشي من المستشفى .. وانا اللي اتشقق .. اصلا انا ناذر اليوم اللي يطلع فيه عبودي .. باوزع فيه سيرلاك على كل المستشفى
ملتوش
عرض نسخة للطّباعة |
ارسل هذه الصفحة لصديق]
