رمضان افرنجي

حسبي الله عليج يا غربة رمضانج اقشر
يجي الشهر ويروح ومايبان للفرحة مظهر
وين المؤذن لي علي بصوته وكبر
واليهال عقب العصر هذا بالقاري يفتر
ذيله يلعبون كره وهناك طايحين له عمبر
يا زين القعدة عالدكة يا حلو ذا المنظر
تشوف الصواني تدور وبين البيوت تفتر
هذا حلو ام فيصل وذاك تمر بوناصر ما قصر
يا زين حجي غلوم لين انه بالاذان تأخر
والفطور اشكال والوان طب وتخير
السفره تكفي الشعوب من عمان لي مدقشقر
وين التشريب والهرريس وذاك المقلي المبهر
وين المحلبية واللقيمات وينك يا كستر
وروحة المسجد عقب الفطور وانت اتمخطر
تقول حامل بتوم او يمكن اكثر
غير القعدات والجيام والغبقات الله اكبر
حسبي الله عليج يا غربة رمضانج اقشر
شهر بطوله يمر مثل غيمة صيف ما تمطر
ويامغترب يا لي قمت تنادي الوالد مستر
والله علي حالتك قلبي تكسر
حايس بين الكلاسات وبين اللابات مفتر
لي مشيت تقض البصر من الغزال الاشقر
الي طول السنة منخش بس برمضان يظهر
حزة الفطور تبي تمرة وترسي علي كاكاو ومحزر
وفطورك وسحورك واحد يا بيتزا يا برغر
حسبي الله عليج يا ايام كرشي بدا يصغر
حسببي الله عليك يا زمن صج انك اغبر
حسبي الله عليج يا غربه رمضانج اقشر

عن الاخ : "عبد الله الشمالي "


طلبتنا في الخارج

يا سلام يا سلام!! شو هذا! فعلاً!

السفره تكفي الشعوب من عمان لي مدقشقر

الحمد لله! سفرتنا صغيرة وعلى قد الحال

الله يرجعهم ديرهم سالمين وماخذين اعلي الشهادات انشاء الله

نجمة! سفرة = مائدة الطعام! ولا أنا غلطان؟!

جميل جدا
وخصوصا للذين فقدوا هذه الامور في الغربه
هم يحسون بها اكثر منا


تحياتي

فعلا الغربة كربة وبالذات اللى جربها:(:(

ربى يرجع كل مغترب لديرتة واهلة ويحس لو لايام قليلة ماأجمل

رمضان فى الدول العربية

تحياتى لنجمة فى سماء سوالف

والله رمضان الحين
صاير افرنجي ..
مو مثل رمضان اول
ولا انا غلطان ..

اميين انشاء الله