مذكرات مهنق

اسمحو لي اليوم احكي لكم قصة انترنتيه اغرب من الخيال, وبداية هالقصة مع صديق عزيز جدا ما يعرف في الكمبيوتر شيء مع انه خريج جامعي وتخصص انجليزي ويشتغل مترجم واذا سمعته يتكلم انجليزي تقول هذا امه مهيب (قصيمية) اكيد انها يا بريطانية يا على اقل تقدير مولودة بضواحي لندن, المهم من كثر ما أكلمه عن الكمبيوتر والإنترنت والمحادثات وكيف الناس يضحكون على بعض وخبص وخبيص, حب الإنترنت, واعجبته السالفة ولزق (1) بحلقي لازم يروح معي لمقهى انترنت..! وفي يوم من كثرة ازعاجه وافقت ورحنا (30) دقيقة..! وصار يدخل المحادثات بعد ان اعطيته التعليمات الاساسية (الخطة):

"اول شيء قل "هلا" او Hi وثمن "كيف الحال" وبعدين استخف دمك شوي وقل ترى عندي نكته "وصكهم2" بوحدة.. وبخ!". المهم, خوينا ماكمل اسبوع إلا واشترك بالإنترنت ومن هنا بدت المصايب.. خوينا سوى اللي ما حد سواه, اختار اسم لاهوب عربي ولا انجليزي ولا هوب اسم بنت ولا هوب اسم ولد واول ما يدق عليه احد ويقوله "هلا", يرد خوينا "English Please يعني انه ما يعرف عربي. الخفيف الي يكلمه ينهبل يقول وش هذا اللي داخل قناة (السعودية) وما يعرف عربي ويبدون يتكلمون معه بالانجليزي..! اختار شخصية "وحدة امريكية" (!!!) عمرها 19 سنة وهي مع ابوها الخبير الامريكي اللي يشتغل في شركة كبيرة (وفي الخليج!!) وهي انسانة متفتحة!!! ماكمل.. شهر على الإنترنت يعرفونه ويتكلمون عنه ويدورون عليه... والله الريش..! وبعضهم يتخانقون على (خوينا) وكل يوم يجي ويعلمني وش صار واللي خلا الناس يصدقونه انه يستخدم لغة انجليزية شعبية..! مثلا بدل ما يقول You يقول كلمة Ya.. واختصارات وتعابير لغوية ما تعودنا عليها وكل شوي ماسك واحد على جنب ومعطيه شوية (حنان..!) وكل ما حس انهم ملوا جابلهم حركة غريبة مثلا , جاء ذاك اليوم وكتب وسولف مع الناس بالعربي؟! فطنوا الرجاجيل وسألوا خوينا وشلون (تكتبين) عربي وانتي امريكية..! رد عليهم (خوينا) قال: "لا انا مهيب ذيك الامريكية انا وحدة جاية عندها تدرسني لغة انجليزية وصدقوا الطيبين من اول نقرة" (3)..!

- وين ساكنة عطينا التليفون.. واللي وصلوا له من شخصية صاحبنا بريد اليكتروني على هوت ميل,, وبعد ستة شهور من الاشتراك قام خويي يودع الشباب ويقولهم ان الاشتراك بينتهي ولازم يودعهم.. ويقوم ذاك الشاب الشهم ويرسل له قيمة اشتراك لستة شهور ثانية (تصدقون..!) وش ها المخفات..! وش هالريش(4).. طيب تأكدوا.. اثقلوا شوي..

المشكلة فيهم اللي عنده عيال.. واللي متزوج واللي مركز.. لكن كلهم ما عندك احد "خذني جيتك"..!

- ويا كثر الضحايا لكن كلهم يستاهلون.. لانهم طايرين.. طايرين في العجة بالإنترنت ولا بدونه..!

لانه في النهاية عمر المهنق ما يصير الا مهنق.. وعمر الخفيف.. ما يصير ثقيل..!

* سؤال مهنق..!

هل شاشة الكمبيوتر تجيب "الخفة" لبعض الناس..؟! وتخليهم ما غير "مطارد" في الإنترنت وتدوير على سعيد الحظ..؟!

بطلوا هو كل شيء بنت ومغازل..!

الدنيا اكبر من كذا.. والإنترنت اهم.. ولا يهون التهنيق..

وش الفرق بين الدوران في شارع العليا العام والمحادثة.؟!

- لا تفهموني غلط.. طبعا مو كل الناس كذا فيهم اللي احسن واطلق .. ويعرفون الإنترنت بس ما يهنق بي الا هالريش..!

وسامحونا..


(1) "لزق": غير قابل للتصريف والحذف او الاضافة

(2) صكهم: الخمهم.. او عطهم نكتة قوية..!

(3) نقرة: على وزن نظرة.. بس بلوحة المفاتيح..!

(4) الريش: من ريشة واللي تطير من ريحة الهواء
____________________________________________________________
http://www.alriyadh-np.com/rnet/cartoon.html


------------------
***أزعلوا من عقلة***
oglah@swalif.com

صراحه انت معك حق ولكني استحقر اي (رجل) يدخل النت باسم بنت و استحقر اي(بنت) تدخل النت باسم رجل.
(....) معناها مايستحق المسمى

------------------
قالو الحـب أعمى قلت أعمى بصيـر
..............................خل قلبك دليلك لو يتـوه اللسـان