( يا عيد ارجو المعذره )


يا عيد .. أنا عندي سؤال محتار ودّي اسألك
ليه البشر في طلّتك.. تلبس من الفرحه جديد ؟
يا عيد ..أرجوا المعذره لي مايعرفك يجهلك
عرّفني انته من تكون.. شبّهت بك ما ني أكيد
ليه الغرابه..والعجب..؟ يمكن سؤالي أذهلك
مثلك أنا فيني ذهـول واحساس في قربك يزيد
ودّي اشاركك الفرح .. قبل الفرح.. وأجاملك
ودّي قبل نور الفجر .. أرسل بطاقه بالبريد
ودّي مثل كل البشر .. اسـتقبلك .. وأقابلك
لكن كل خوفي الشقى .. يبقى بعد فرحي وحيد
أنا..وعمري..والأسى..والهم.. ما نحـتاج لك
حنّا اتفقنا بيننا .. ما بيننا واحـد سعيد
يا عيد .. دوّر من جديد.. رح للذي يستاهلك
لا .. لا تعكر صفوتي .. خلّك عن هـمومي بعيد
صدّقني يا عيد الفرح .. ما كان قصدي ازعلك
كلّي رجا ما تنزعج لو قلت لك : فرقاك عـيد

( محمد أحمد المزروقي )