بسم الله الرحمن الرحيم
اولا وليس اخرا انا باشخبطلكم كم نصيحه لكم مهيب من ذا النصايح اللي تارسه الدنيا وغثونا فيها مثل غير الزيت ولاتسرع وسو فحص لموترك
ذالنصايح اللي ازعجونا فيها ومحد طرى على باله يفكر فيها

انا بقولكم عن اشياء للأسف ماعرفتها انا الا والناس يقولونلي لامهوب كذا ياغشيم ولالاتسوي كذا يامخفه

فعشان تتجنبون الفشيله والحش من اللي يسوى واللي ما يسوى ..... ((ياكثر قرقتي كثراه))

خل نخش فالموضوعب بس

نمبر ون
نص البشريه تلقاه اذا ركب موتره يدق سلف ويمشي والا قلتله خل السياره تحمي تشوفه يضحك لك ويقول حنا في عز الصيف اي تحمي سياره واي كلام فاضي ... يامخفه تحمي السياره مهوب معناها تخليها تحتر لا معناهاتخلي الزيت يمشي فالسياره
واذا تبي تعرف متى تمشي يا اما انك تخلي عداد الحراره يوصل لحرف السي ويتعداه بشوي ولا انك تلاحظ عداد الضغط حق المكينه اول ماتشغل الموتر يكون فوق الواحد .... خلها تنزل شوي

نمبر تو:
لاتشغل المكيف اول ماتدق سلف او اذا كنت ماشي لازم تهدي مره لين تصير شوي وتوقف وشغله ولا ترى بيعدم موترك وتبدى تطلع اصوات

نمبر ثري:
اذا جاك مطب فجائي اياني واياك تكع فرمل وترقاه وانت ضاغط عالفرامل هذا مهوب يعدم الموتر وبس..... لو تحط فالسياره قنبله ارحملها
اجل وش الدبره؟
ياطويل العمر انت اضغط فرمل بس اهم شي ماترقى المطب وانت ضاغط عليه. اذا حسيت انك راقيه راقيه خلص اترك الفرمل ((صدقوني تراي مجرب وقد عدمت موترنا كل مطب كنت ارقاه مهوب ونا ضاغط فرمل بس كنت ارقاه وانت تسمع صوت الكفرات وهي تقاحص)) لاكن الوالد طال عمره ماقصر علمني بعد مالسمني بعقاله

نمبر ثري:
اذا وقفت موترك لاتخلي الكفر لاف لا اعدله الله لايهينك وهمن طف السياره ولا ترى بتصير تحذف معك

نمبر فور:
اذا جيت بتطلع رقيه لاترقاها بالريوس احسللك ولا سلملي عالموتر يومين ونلقاك تحرج عليه وخاصه اذا كانت دفع امامي

نمبر فايف:
انتم يالمطعسه ياراعين الجموس يقالكم اذا شقيتو الكنداسه عشان ذالصوت موتركم مهوب جايه شي ياحليلكم حليلاه بس

نمبر سكس:
اذا كان فيه مخش فالكفر مهما كان صغير وصغنطوط ترى مع الحر بينفقع عليك وبتروح في خرايطها وخاصه اذا كنت من راعي تصفيط الطبلون ((بالعربي يعني كلكم))

الحين عاد النصايح للغشمان والناس يرفعون الضغط ويجيبون السكر

اولا:
انت ياراعي الهايلكس ولا الميتين ال ((ايه تراها ما انقرضت)) اذا سيارتك عورى لاتقعد تشغلي العالي يقالك انه بيعوض عن الشمعه المحتركه تراك اذيت خلق الله ياخي الله لا يهينك ركب شمعه جديده لا وركب شمعه بيضا زي حقت الزينون ترى راس مالها 25 ريال

ثانيا:
انت ياللي تطفي الكبوس وتشغلي السكن ولا الشمعات بس ترى فيه ناس مايشوفون وبيطل فالمرايه مهوب قازك ومنتب داري الا ذاللي حذف عليك بكل ماعطاه ربي من قوه وهمن عقبها تبدى تدهر انت بالعالي.... لا ومن زين الطبايع تلقى موترك اسود ومضلله مكتم والديه ((خفاش على غفله))

ثالثا
اللي يعانون من التفحيط عند بيوتهم.....
ياخي حرام عليكم ترى مطب واحد يكفي ولامطبين بالكثير ماله داعي ترصلي سلسلة جبال السروات قدام بيتك ولا وتلقاك تحط المطب اللي يجيك نحييييييف وطويييييييييييييييل ويرصلك الحاره كلها والحاره اللي جنبهم ((حنا ماكفانا مطبات البلديه تجينا انت بعد)) الله يهدك يامفتري


رابعا:
راعين البي ام طالت اعماركم ممكن لو سمحتو ماتولعون انوار الضباب اذا ماعليكم كلافه ترانا فالرياض مهوب لندن طالت اعماركم وعسى ما ازعجنا معاليكم

وخير الختام مسك هذا وش اسمه اللي يجيبونه مناك
اللي هو الزبده عسى نكون افدناكم وترى اذا لقيت واحد فالشارع ما اتبع ذالنصيحه تراي مجهز المشعاب تحت الكرسي بنزل السمه اكفر فيه وقد عذر من انذر ((الا النصيحه الاخيره الموجه لطوال العمر هذيك لهم الحريه في تنفيذها واللي يشوفونه))
واذا احد عنده نصيحه منا ولا مناك لا يبخل علينا بلله ونشوفكم

حقيقة الموضوع جميل ( مع اني خفت يكون مكرر)

وأجمل شي نصايح الغشمان

عندي بعض النصايح للمزعجين اللي اتمنى تعجبكم

1- نصايح للسميعة(الهبلان بس )

- لما تبغى تغير الشريط مافيه داعي تدخل راسك تحت الطبلون عشان تدور للشريط ( حصلت مع بعض الحلوين الي يعرفون أنفسهم ) وبلاش فضايح

- صجيتونا بأصوات المسجل العالية ( حتى اني لحقت واحد أحسب عنده شي في السيارة خربان وماهو منتبه واكتشفت ان الصوت هو من المسجل مع ان الصوت كان رررردج رررردجدبرربدبدبدج يعني أبعد مايكون للمسيقى )

2- استخدام البوري يكون بضغطة واحدة (طاط) وليس هكذا (طاااااااااط) هذا جنان مو بوري

3- الي مستعجل ويبغى يوصل عمله (أو مدرسته ) بدري نصيحة لاتمشي ورا سواق فيه عايلة لأنه بيغثك طول الطريق وبيوقف والإشارة باقي تشاور عقلها تحمر والا لا

اما بالنسبة للمحافظة على السيارة للأوتماتيك

1- اياك تعشق الريوس الا بعد وقوف السيارة تماما لأن الدحدرة البسيطة مع الوقت توديك الورشة

2- لأصحاب الفورد (نصيحة يقولونها من زمان ) لما تعشق عشق حبة حبة ( لاتسوي زي أصحاب الكابريس تراهم غير )

3- الفرملة لما تطلع صوت روح غير قماشات ترى الإهمال وراه هوبات واسأل مجرب (لأنها وسيلة الوقوف الوحيدة بعكس العايدي)

4- استخدام زر الباور بدون داعي هدر لقوة السيارة وعمرها والبنزيييين

5- لاتعشق الP الا بعدأن تشد الهاند بريك وترفع رجلك من على الفرملة وتخلي السيارة ( تريح ) ثم عشق P

أرجو ان تكون النصايح مفيدة