واياك جزا الله خيراً أخي عزيز ..

أولاً شكراً لاهتمامك ..

وثانياً كيف الوصول اليهم ؟ ممكن عن طريق زيارتك لهم في الجمعية نفسها .. جمعية البر او اي جمعية اخرى تضم هذه الفئة ..
وللشباب على مااعتقد اسمها دار الفتيان ..

واقتراحاتي .. ممكن ان يخصص الشخص فينا يوم في الاسبوع لزيارتهم ..

وممكن تكون مجموعة مع زملائك او مع اللي انته تختارهم وتروحو تزوروهم كل اسبوع مع عمل برنامج مسلي ليهم وفي نفس الوقت يكون هادف ويتعلمو منه مثلاً ( عن الاخلاق - عن الصلاة - عن الوضوء- عن محبتهم لبعضهم)..

صحيح انه شهر ما يكفي لتعليمهم لانهم كلهم مأثرين على بعض فأحياناً تلقا شخص منهم سيء مأثر على كثير منهم فصعبة تغيرهم بسرعة لكن نحاول لانهم يحتاجو احد يوقف معاهم ويوجههم بالمحبة واللين ..


وممكن في الاجازة الصيفية تشركو مجموعة منهم في مركز صيفي .. وهذا كان عملنا .. قمنا مع مجموعة من البنات وعملنا مركز صيفي مكون من 20 يتيم تتفاوت اعمارهم في سن معينة .. وكان من 9 صباحا ل2 ظهرا ..

كان برنامج عبارة عن حصص (( قرآن _ قصص _ تعليم كمبيوتر_ تعليم فنون _تعليم طبخ _ العاب ومسابقات _رحلات ))

في بداية المركز كان في صعوبة عشان نخليهم ينضبطو معانا .. وكانو متمردين ومايبغو احد يتفضل عليهم او انه يشفق عليهم ومن هذه النواحي النفسية ..

ولكن مع الوقت حبو المركز جدا وكانو يجو من الساعة 8 قبل الكل ..
منهم اتغيرت سلوكياته للأفضل من نحية الصلاة والتعامل وبعضهم يحتاج لفترة اطول للتعديل ..

لكن كانت فترة مرة حلوة ومتعبة وممتعة .. تحس انك انجزت .. دخلت الفرح على مجموعة محتاجة للحنان ..

وبعد انتهاء المركز عملنا لهم زيارات كتيرة لجمعية البر .. وللآن مستمرين .. بل بالعكس يتمنونا نبات عندهم .. :(

لكن لدي بعض الملاحظات ..
في بداية الامر حتحس انه محد متقبلك وانك غريب وانه محد مرتاح منك وكلم متمردين .. لكن مع الوقت حيكونو اكتر من اخوانك ..

وتاني شي لو اتعاملت معاهم لاتحسسهم ابداً انك بتشفق عليهم .. بالعكس حسسهم كأنهم زيك .. لانهم يعرفو مين هما وانه مالهم اهل الى اخره .. وكمان يحبو الشخص اللي يعاملهم بجدية وزيهم زي غيرهم من الناس اكتر من الشخص اللي يشفق عليهم ..

حاول يكون اسلوبك مو النهي والامر .. يعني لاتعملو واعملو لانه ممكن يتطاولو عليك .. لانه قليل منهم تلاقي اخلاقهم كويسة ..

واذا في سؤال انا في الخدمة .. ومرة تانية شكرا على اهتمامك اخي .. والله ييسر لنا كل عمل يرضيه عنا ..


تحياتي ..