و الــلــــــــــــــه ما أحبه ...

[ثائر]

^1

مساكم الله بالنور والسرور ....
تصدقون ...أمي خناق وياي ليش ما آكــل تمر ...وانا ما احبه يعني مو ما اكله ما اكله ,,,

بس اكل قليل وهي عاد تشب علي .... كل يوم على اي وجبه ليش ما تاكل صرت اصفر ...تغذى ,,

ولا عاد ,.,,, تعالوا حضروا لي سوت عصيدة على تمر ...اوووووووووه

انا دوروني ما تلقوني ...

وهي طردي وراي والله ما ابالغ ...تبي توكلني غصب ...وانا يا يمه يا حبيبه ..ما احبها على تمر ...

وهي ابد .... معنده ..

عاد كان المساله تهون ....:(:(

لكنها تقول ان ما اكلت ..ما تحللني ... وما ترضى عني ..:(

واني كذا اخلي الجهال ما ياكلوا تمر بعد ....لانهم يقلدوني ..في كل شي ...

وانا ما احب ازعلها ...يكفي بلاوي ثائر عليها :D

كــــــــل يوم طالع بفنتق ...:cool:


مدري هو صدق لي قالت انها مومحللتني ..لاني ما اكل تمر يعني ربي ما بيرضى عني ....:confused:

الله يستر على كذا ولا عشرين سنه اكفر عن ذنبي :eek:


اييييييييييييييه ....منو ما يحب التمر ؟؟عشان تقنع ,,

[البحاري]

ههههههه يا أخي كل حبه وحدة على الأقل ما راح تضرك :):)

أنا يعجبني التمر :):) بس في رمضااااان :):) غير ما أحبه :D

تحياتي لك :cool:
ثائريتش تعال هنا :) (http://mypage.ayna.com/chamsipasha/Iftar.htm)

[ثائر]

اقولك ..اكل مو ما اكل ...

بس هي الله يهداها حبيبتي .... تبيني الف التمر لف ..ما يصيييير :D

رمضان يا محارب الاطباق ...يا مرابط المطابخ ..هههههههههههههه

بقول ليها ...كاهو بحاري ما ياكل .:D :D :D

تحياتي لك

[Huda76]

مرحبا ثائر :)

أجل ما تحب التمر ..

اممممم .. طيب شرايك تشوف هالموقع :) :)

http://www.tomoor.org/

تحياتي لك :)

[البحاري]

تصدق أكلي يقل في رمضاااااان :):)

شوف أنا حطيت لك رابط لموضوع .. وهدي حطت رابط .. جمع المواقع اليوم .. وروح بيعها ههههههههه :):) والمكسب بالنص :):)

أقول :):)

ألف مبروك الالفية الرابعة :):) تستحق التهئنة بموضوع خاص ههههههههههه .. بس الاحتفال بأم الحنان مغطي على كل شئ هنا :):)

[ثائر]

:):):)

اوكي ...روحي رياضيه ... هههههههههههههههههه

شكرا لك ...


:::::::::::::::


بحــــــــــاري ....=============>> خلها بالقلب تجرح ...ولا تطلع و تفضح ..

ايه لنا الله ..

[SAUD33]

انا بعد ما ارضي اشوفك ما تاكل صرت اصفر ...تغذى ,,


ايه افضل وجبة عند الشياب زي حلاتي :)

بس مو معنى ان الأم ما تحلل ولدها


لالالالا ما يهمك هذي الأم وقلبها انت اخبر .,

[زهرة الكركديه]

كل تمر وبس:p

[ثائر]

ابوي ....الله يخليك لنا ويخليلك العيال انشالله و يخليك لهم ...

مو أصفر ...بس الوالده الحبيبه الله يسلمها ويطول بعمرها ...كله تشوفني ما اكل ...

مع اني عادي معتدل ..بس التمر ما احبه ..:( :):):)

وبعدين و انا اخوك ...الشباب شباب القلب ...:):) يالشاهين :D

هههههههههههههههه


وبعدين ادري ان الام قلبها ما يغضب على اولادها ... بس انا كنت استفسر ما اذا الله يؤاخذنا في مثل هذه الامور .,.,

والله يا يمه ولقيتي لج من يوقف وياج ضدي :D :D

:::::::::::

زهورررررررررر ...انشالله اختي العوده ..تحت امرج ..

كلش ولا زأراتج ...:D

[SAUD33]

هلا بالحبيب الغالي الإبن البطل الثائر الطائر



اقول لك عندنا وعندكم بعد خير , اختي الله يخليكم كلكم نفس الشيئ تقريباً ما تأكل إلأ بالدف (( بس مو الدف حق المعاريس عاد ))):)


المهم ترى الوالدة الله يحفظها ليكم أبخص بهذا الشيئ :)


بس برضوا يا ام ثائر يخليج ربي ويطول عمرج

والله لا يخلينا منج

فيه مثل صغير يقول :-كل ما يعجبك وألبس ما يعجب الناس

[بنت العين]

حتــى انا ما احبه

بس الحين الوالده تدري,,عشات جيه ما تلح علي

بس قبل كانت تقولي..لعنبوه القيض بيخطف

و انتي ما ذقتي حبه..العرب تدوره دوره..و نحن

عندنا فالبيت و ما تاكلينه..اقولها ما احبه..و تحتشر

و فرمضان عشان خاطرها..اكل شوية سح..:):)

اسمع كلام امك..اجوفك مصوفر
و بعدين صدقها اليهال بيقلدونك...لازم تاكل
غصب...اوكيه.... :D

تحياتي لكـ :)

[زهرة الكركديه]

احترام تعظيم سلام ...حقى


ندخل في الجد ياخى التمر وايد مفيد فيه فيتامين الف...

كل تمر احسن لك وتضرب عصفورين بحير
تكسب رضا الوالدة
وتكسب الفيتامينات:p


ولا الافضل نسويه لك على شكل كيكة تفتح نفسك وتستانس عليها

مادري ليش ما تحب التمر هذى اول مرة فحياتى
اسمع احد يقول انه ما يحب التمر

اقول جربت تاكله ويا الجامى
تراه طيب وصحى ومفيد



ثائر باشا:p :p :p
هاهااااههاههااههاهاوالله انك تضحك وانت تشتكى جذى مثل الياهل

[ثائر]

و عليكم السلام والرحمة ...يا هلا بك ..

شخباركم مع زام اول زفت ( اجلكم الله ) :):):)

عيل فخيت نوم عدل البارح ؟؟؟:D

والدتي الحبيبه .. ما عندها تفاهم :p ..تاكلون يعني تاكلون ..:):):):)

بالدف ..بالطبل البلدي .. ..باللي يطيح بايديها ..:):):)

تكفى اقنعها ..اييييييييييه ..

::::::::::::::::

بنت العين ...

يا همسه انتي ...

الله يرفع معنوياتج ... يعني في امل تتنازل امي عن صولاتها و جولاتها الاجباريه ضد الثوار .:p

بس اليهال انا اقدر عليهم ...

كلمة وحده مني وبسسسسسسسسسسسسسسس

يروحو في العسل ..
وانا قلت ليكم اكل شويييييه ..يعني كل يوم حبه لو ثنتين .. نعمه :mad:
..........

اوكي راح ازيدهم عشانج ... ثلاث حبات :rolleyes: امري لله <<=تراني جاي على نفسي حيل جذي ...:D

:::::::::::::::::::::


زهوووووووووووووووووور:D

الشيف زهروره .....طبق اليوم ..

نسوي كيك تمر ... بس انا ما اميل للكيك ..وايد ..احب الموالح اكثر ..

يعني اكل كيك مو ما اكل ..<<==== وليييييييييين ثائر هذا ويش ياكل

:confused: ادري بتقولون ...

بس اكله قليل برضو ..اختي اول مرة سوتها ... شوي و تدفع لي عشان اذوقها بس :D ما تشجعت اني اكلها لكنها موش بطاله حلوة ..
اهم شي ما يبين طعم التمر ..


اقول جربت تاكله ويا الجامى
تراه طيب وصحى ومفيد

<<===========ويش هو الجامي ؟؟؟

:confused: :confused:

في كل واحد منا ياهل .. مهما بلغ عمره حتى اللي في الاربعين ;)
هاهاههاهاههههههيههيههيااااايييااااااااااااااااااااي

تحياتي لكم ...........

[SAUD33]

اهلاً وسهلاً ومرحباً

خلاص ولا يهمك انا الحين بس وصلت من اول ليل


واشوي ارد عليكم هههههههه

[شعنونة سوالف]

لاني لا احبه
ابداااااااااااااااااااااااااااااااااا

ما اطيقه......

وقت الفطور اشرب ماء....بس لو البابا شافني...بصير المرحومه لينا

لازم يقول كم كلمه

بابا: ليش ماتاكلي لازم تفطرين على تمر...

لينا المسكينه : ما احبه.

بابا: انتم دائما ماتحبون الاشياء المفيده.

لينا : لا كيف عاد!!!! انا اكل سلكه وخضار وفواكهه.


بابا عايشه بالسعوديه ولنا اربع سنوات بكندا انا وماما واخوتي .

وهذه اول مره ياتي بابا الى هنا برمضان....وعند اول يوم لما شافني اني لم افطر على تمر قالي...بعدك على عادتك!!!!

يعني ثائر لاتهبط معنوياتك
:D

في مثلك كثير :)

[ثائر]

اهلين وسهلين ومرحبتين والرحمة :D

الحمدلله على سلامتك...وصلت خير ..

وحياك الله ... والعين اوسع لك من سوالف ...:):):)

ناطرنّك .....


:::::::::::::

مس لبنان ...

ايوه ..صرنا ثلاثه ...:D

وانا بعد اكل سلطه وخضار و فواكه ....

تعرفي اكلي يوميا ويش ؟؟

افطر بماي ..اول شي ..

ولما نقعد ع السفرة ...

السلطه ...لاااااااااااااازم

اكل شوربه (( شوربة هريس بس قبل لا يضربوها ))<<==طبقي المفضل ...

وبعدها اقوم ...

وبعد ساعتين ثلاثه ...فاكهه ..

وعلى الساعه11 ..ممكن اتذوق الاطباق الاخرى ...

بس ..


معنوياتي ارتفت كثير ..
:D

[زهرة الكركديه]

:eek: :eek:
:eek: :eek:
وبعد ثنتين....:eek: :eek:


ليش انت من وين مو من الامارات ....

حى الحياة يا بو الثوار

[ثائر]

لا عيني مو من الامارات ...

بس شفتيني ارمس شراتكم ...افتكرتيني اماراتي ...

مدري بعد يمكن اشبههم ...

بحط صورتي في توقيعي ...<<==توقيعي سوى ريجيم ..

وبعدين ...شو الجامي هذا الله يخليج اثرتي فضولي ...

حي الحياة هذا مكان عندكم ..:):):):) ؟؟؟؟

[زهرة الكركديه]

هاهاهاههاهاهاهاهااهاهههههههاهاههاا...يقطع بليسك والله انى نقعت من الضحك

ثائر الله يهديك
عاد شو رايك والله انى كنت مستغربة مووول من اسمك واسم المحروس اليديد اللى الله سبحانه وتعالى رزقه حق اخوك

ثائر وهاشم ..احيد اهل الامارات ما يسمون من ها الاسامى وايد
طايحين طال عمرك في عبدلله سعيد احمد محمد حميد حمدان راشد على سيف خالد خليفه مايد وماجد ومن هاذى الاسماء يعنى


يعنى انا خاطري اسمى لو الله سبحانه وتعالى رزقنى ولد ثانى ..اسميه مروان وماحد راضى مول وكلهم مب عايبنهم الاسم
لذلك انا مجبورة اسمى بالاسماء اللى يبونها اهم مع ان اسم مروان وايد حلو

لكن يلا مب مشكلة

يوسف عايبنى الحين وانشالله يصير عندى ولد اسميه يوسف

طلعنا عن الموضوع جنا..

اسمع الجامى او الكامى يستخرج من حليب البقر ...مب بقر الاسواق

البقر اللى عندنا في لبيوت طبعا الحين الشباب ما عندهم هذى السوالف عند الامهات والجدات ..
يسوونه على شكل اقراص ويجففونها في الشمس طبعا لها عملية تحضير معينة بس انا مب عارفتنها

ولما يجى شهر رمضان تلقى اكثر الناس طالبينه لانه الوجبة الاساسية عندنا على الفطور ...يعنى بعد الشوربة

حتى فى الايام العادية نحن نحب ناكله والله اوكى مع التمر وطعمه طيب ومثل ما قلتلك صحى ومفيد يعنى انا راح اعترف انا اكل تمر بس مع الحامى غير تحب تاكل اكثر...

نسيت اقولك ..الا قراص هذى لما نيبها عندنا البيت نلينها فى الماى لمدة معينة لين تصير طرية ...ويحطون عليها بعد سمن ..مب السمن اللى يبيعونها فى السوبر ماركات ..حتى هذا السمن يطلعونه من حليب البقر ....

ولك تتصور الثمن ياسى ثائر .....
والله لو اعرف عنوانك بطرش لك كمية تجرب مع انى شاكة

وبعدين شو هذا
حى الحياة مكان عندنا
الله يهديك يا ثائر

حيى الحياة كلمة نقولها حق واحد ....الناس فى شى وهو في شى ثانى

او نستغرب منه لانه ما يعرف شى بديهى ومعروف شرات حالاتك بس معذور حسبتك من عندنا

يعنى مثلا مجتمعة انا ويا ثنتين من ربيعاتى
انا ويا صديقتى نتكلم في موضوع معين ونتفلسف ونرمس والثالثة مب منتبهة او مب فاهمة علينا
تييك وتقول مثلا انتو شو تقولون
عاد نصرخ حنا الثنتين فويها ونقول حى الحياة انتى وييييين واحنا وين


اوكى ثائر اقرا ردى هذا مرتين لو ثلاث علشان تفهم عدل لانى اكتب ومب منتبهة شو قاعدة اقول وما فينى اعيد واراجع


تحياتى اخوى
واسمحلى

حسبتك من عيال الدار



:p ;) :)

[ثائر]

ههههههههههههههههاي ,,,,

و الله انا اللي مت من الضحك عليج ..

اثر الجامي ...هو الاقط عدنا ...:):):)

كنت وانا صغير احبه ... الحين احب الالبه ..اكثر <<==وهي الاقط قبل ان يجفف في الشمس ..

هههههههه سعيد عندنا منه كثيييييييييييير وعلي ...بعد اكثر ...

عاد هاشم ... هذا اسم متأصل في عيلتنا ...لازم كل بيت يسمون هاشم ... ..هذا تتوارثه الاجيال ...وخصوصي عايلتنا عاد ...

اخوي اسمه هاشم وولد اخوي اسمه هاشم ..

بس مو المولود الجديد ...لا ..الجديد اسمه محمد ..

صدقيني سمي هاشم ...حلو ....وعندج بعد ..أحمد و محمد .. لازم تسمين حداهم .....اوكي ..شلج بمروان الله يهداج ؟؟؟:mad:

اوكي ..

تحياتي

[ثائر]

وبعدين عادي ,,, جني من ديرتكم ..احنا خوان وبلادنا وحده ..

صبري ..بس ادور لي فرصه ذهبيه واجي اتوظف عندكم ..شو رايج ؟؟

عندج واسطه ..هههههههههههههههههههههههههههههههه

[زهرة الكركديه]

حتى انت مب عايبنك مروان .....:confused:


المهم هي نعم اخونا ومن اهلنا بعد حد قال شى .....
بس الاحسن تقعد فى بلادك وتشتغل فيها

تتربون وتعيشون عليها الين تصيرون شباب وبعدين تخلونها
لاااا هذى منتهى الخيانة

وبعدين اذا انت من السعودية ......فالسعودية بلد خير وعطاء ولا شووو

تحياتى