اذا تعرضت لحادث لاسمح الله ، هل تقفز من السيارة

[أكورد]

السلام عليكم

هذا السؤال أرى انه صعب الجواب عليه

وقد أودى بحياة الكثيرين الذي لم يعرفوا كيف يتخذون القرار

فإذا انقلبت السيارة بشخص هل تنصحون بأن يقفز من السيارة أو يبقى فيها

لأنه دايمن تحصل هذه الحالة

مثلاً لشخص أعرفه

تعرض لحادث انقلاب وقفز من السيارة وسقطت عليه فتوفى رحمة الله عليه


وش رايكم من الموضوع

[FaNNaN]

هلا والله اخوي أكورد

ما اعتقد انك بتكون في وعيك يالغالي عشان تفكر تقفز من السياره ولا تقعد , , واللي مجربين الحوادث مثل حالتي يعرفون وش اقصد , اول ما تفقد السيطره ما تشوف الا سواد قدامك , واللي كاتبه ربك بيصير

والله يكفينا واياكم شر الحوادث , والله يغفر لفقيدكم ويجعل مثواه الجنه

تحياتي لك يالغالي

[Prelude 4 Life]

اصلا مايكون عندك فرصة علشان تفكر تقفز او لا

من اول ماتفقد السيطرة على السيارة تحس كلشي قاعد يصير بسرعة البرق

والشخص اللي تتكلم عنه (الله يرحمه) مااعتقد قفز من السيارة بارادته

بس من قوة الحادث طار من وحدة من النوافذ.

[TOP-SECRET]

والله اخوي في قسم الفيديو العضو الحر الاشهب منزل موضوع عن علي احمد يستعرض في نيسان باترول

وانقلبت عليه السياره وهو رمى نفسه من النافذه

وتصدق لو ما الله حفظه رجعت السياره عليه مره ثانيه

انا عملت حادث انقلاب في الكروزر بس ماطلعت

ماقدرت اطلع متين لوووول

لالا بس مافكرت في هالشي لان اشوف غباء الصراحه يمكن ترجع عليك السياره مره ثانيه والله بتطلع روحه..

ومشكور عالموضوع

[mr_z]

في دسكفري عملو برنامج عن السلامه
المهم اذا الانسان في حادث طار من السياره يزيد احتمال اصابته بالشلل 50%

[يا هاجسي]

بصراحة سؤال صعب.. وإجابته ومجرد التفكير فيه عملية أصعب..
لأن الأمر هذا ماله نتيجة واحده فقط. ممكن نلجأ لها.. لكن تتعدد النتائج وهنا يقع الخوف.. وما أعتقد إن أحد هذه النتائج خروج من قفز بالسلامة..! ( طبعاً الأمر أولاً وأخيراً بيد الله ( عزوجل ) )..
... لي قريب.. كان طالع للبر مع زملاء وطبعاً الموتر كروزر.. المهم بالنفود مالت السيارة ميلان مؤلـــم فظن الله يرحمه بأن الأسلم عملية القفز ونبه اللي معاه قالوا له لا لا.. قفز هو وفجـــأة إنقلبت السيارة وكان إنقلابها عليه.. الله يرحمه ويغفر له..
.
.
لذلك مو على كل حال هالعملية بتكون مفيدة..
.
.
ومرة ثانية.. الأمر بيد الله عزوجل..
.
.
ودمتم سالمين..

[عاشق سفر]

سؤال غريب

شركات السيارات حطت أحسن التقنيات الي عندها

في حزام الأمان والوسائد الهوائية الي محيطة فيك من كل جهة

وفي تقوية جسم السيارة



وفي الأخير

تبغا تقفز من السيارة

أنا مأعتقد أن بيكون عندك وقت للأختيار

والقفز من السيارة مراح يكون بأختيارك

بيكون غصب عنك أذا كنت مو رابط الحزام

وكان الحادث قوي

ولاتنسى أنك بتضرب بالدركسون وبتكسر القزاز بطريقك


وأنا أعرف شخص ما ربط الحزام وصار له حادث قوي

ما قفز من السيارة

بس ضرب راسه بالجسر الي بين القزازه الجانبية والقزازة الأمامية الكبيرة

جاه كسر بالجمجمة

وترقد بالأنعاش فترة

بس الحمد الله

ربك ستر والرجال بخير الحين ولله الحمد



وتراها مو زي الأفلام

البطل مو دايم يعيش

[HaKeM]

في عندي مقطع جوال

شباب يفحطون بكامري بسرعه عاليه وتنقلب بيهم السيارة عدة قلبات الأبواب تنفتح وتتقلب فوقهم

الله يحفظنا من شر الحوادث