افضل محل في دبي او الشارقه تركيب اجهزه انذار احترافيه ؟

[DDesigns]

السلام عليكم

شباب شريت جهاز انذار احترافي من امريكا وناوي اركبه على الهوندا اكورد 2000 حقتي ..

هذا هو الجهاز :

http://www.theinstallationshop.com/index.asp?PageAction=VIEWPROD&ProdID=1649


http://www.hotimp.com/images/car/Compustar.jpg
http://www.hotimp.com/images/car/compustar_remote.jpg
http://i10.ebayimg.com/02/i/01/30/4c/2c_1.JPG

الان ابي اعرف احسن محل احترافي يركبه عدل بدون اي مشاكل او خرابات ..

خصوصا اني ابي كل المميزات تكون شغاله مثل تشغيل عن بعد خصوصا ان سيارتي قير عادي يمكن مو اي واحد يقدر يسويها .

وبعد تركيب مؤقت حق اغلاق السياره مثل turbo timer .

وشغلات ثانيه وايد ..

فا ايش رايكم مين احسن محل ؟ وكم ياخذون على التركيب ؟


تحياتي ....... :banana:

[big block]

والله لو ادري كان علمتك بس روح محل السياره الذهبيه وإنشاله بيعلمك

بس الجهاز ايش فيه مواصفات؟؟؟ :think:

[غريب السيف]

اقدر ارشح احسن محلين في دبي وهم على درجه كبيرة من الاحتراف والاتقان والضمان على الشغل

الاول : شركة الخليج اللاسلكي في شارع الشيخ زايد على مقربة من وكالة تويوتا

الثاني : مؤسسة السلامي للتجارة وهي متخصصة في تركيب اجهزة الانذار للسيارات وموقعها في
سوق الزينة جنب فندق حياة ريجنسي

[DDesigns]

مشكووووور وما قصرت ما دام جولف وايرليس يركبون عيل انحلت المشكله انا اعرفهم زين يسون لي خصم بس ما دريت انهم يركبون .

اخوي big block

والله مدري شقول من وين ابدي من وين انتهي يعني مميزات مو طبيعيه وصعب اشرحها كلها لكن بقول لك المهمين .

1- نظام تخاطب 2 واي ابو جهتين يعني عندك جهاز مثل البيجر وفيه شاشه تقدر تشوف حاله سيارتك وتعرف شو صاير فيها يعني انت ترسل طلب والسياره ترسل لك رد على الطلب عن حاله السياره ..

2- مدى التحكم في الجهاز حوالي 2 كيلومتر يعني عادي تصف سيارتك في الجامعه وما زلت تتحكم في السياره وتعرف شو صاير فيها .

3- لما يشتغل جهاز الانذار راح يشتغل البيجر عندك ويصير يطلع اصوات واشارات و هزاز يعني لو انت بعيد عن السياره راح تعرف ان الجهاز اشتغل مو لازم تكون قريب من السياره .. يعني ما فيه خوف وقت النوم .

4- طبعا تفتح السياره بدون مفتاح .

5- تشغل محرك السياره عن بعد بدون مفتاح .

6- تحتوي على هرن قوي جدا جدا صوته عالي يصل الى 126 ديسيبل يكفي لازعاج الحرامي ويخليه يشرد .

7- فيه 2 مستوى للحساسيه الموجوده في جهاز الانذار على حسب الخطر .

8- لما يشتغل جهاز الانذار يوريك في البيجر من اي جهه تمت عمليه اللمس او محاوله السرقه سواء الباب اليمين او اليسار او الشنطه .

9- فيه نظام حق سيارات التيربو التوقيت turbo timer .. اعتقد علشان لما تطفي السياره ما تطفى بنفس الوقت راح تظل شغاله لمده دقيقتين او 3 ما عندي خبره علشان ينزل الزيت .

10- تقدر تشغل محرك السياره حتى لو كانت السياره قير عادي وهذا مو موجود في بقيه اجهزه الانذار .

11- يحتوي على نظام تشفير بنظام 64 بت مما يتيح له امان اكثر ضد الحراميه المحترفين في فتح برمجه الجهاز اللاسلكيه .. وايضا الجهاز يستعمل موجات 900 ميجا هرتز تتيح امان اكثر .

12- شاشه ملونه LCD .

طبعا فيه الكثير لكن انا كتبت المهمين ...

فيه نظام ثانيه مواصفاته حلوه بعد اللي هو Viper 791XV لكن اللي تكلمت عنه افضل منه خصوصا ان الحراميه المحترفين جدا جدا جدا جدا يقدرون يفتحون الفايبر بس هذا الي فوق مو مشهور كثير فا صعبه يفتحونه .

العيب الوحيد في هذه الاجهزه انك لازم تغير البطاريه حق البيجر كل شهر تقريبا لان فيه صرفيه شوي ..


شباب اللي يبي مثل هذا الجهاز يقول لي اجيب له واحد من امريكا ..

[NFS]

السلام عليكم



أنا أعرف أحسن شخص يركب الجهاز.......



وهو أنت !!!


تركيب جهاز الحماية ضد السرقة ما هو بصعب أبداً وأنا ركبت الجهاز لسيارتي بنفسي رغم أن الطقم إللي عندي ما كان فيه نشرة أو شرح لطريقة تركيب الجهاز.

[abumhdi]

كنت بركبه على موتري .. بس ترددت لشيئين ..

1. عدم جودة اليد بتركيبه

2. تشغيل السيارة عن بعد .. يسبب مشاكل للسيارة بعد مدة من الاستخدام ..

كانت هذه نضرتي حين فكرت بتركيبه ..


الله يوفقك .. وتاخد خيره ويكفيك شر الحرامية ..

:)

[DDesigns]

حياك الله اخوي NFS

صراحه حمستني ..

بس برضوا ما اعتقد اني اسويها السبب عدم توفر المكان لاني مو قاعد في بيتنا و ثاني شيء هذه الايام ما لي خلق اشتغل افضل ادفع فلوس واقعد اطالع ههههه ..

اخوي abumahdi

اول سبب ما فيه مشكله لكن ثاني سبب هل انت متاكد انه يخرب بعد فتره !! ؟ طيب شو السبب ؟ صراحه خوفتني .

مشكورين ........

[خالد بن عبدالله]

السلام عليكم ورحمة الله


نفس سؤال الأخ DDesigns لكن أبي في جدة أو مكة وياليت تفاصيل

ابلشونا واقلقونا ... صرت انام بالسيارة استغفر الله :D

تحيتي ومودتي للجميع

[DDesigns]

اخوي خالد ..

ما اظن تحصله في السعوديه حتى في الامارات .

انا ساكن في دبي .. لو حبيت اطلب لك واحد من برا قول لي ارسله لك على البريد ..

[الفجر mtr البعيد]

DDesigns اتذكر قبل تقريباً 8 سنوات كان اخوي مركب على سيارته جهاز انذار وفيه ميزة تشغيل السياره الله وكيلك ان خرابات السياره ماتوقفت الي يوم انه شال الجهاز طبعاً الخرابات كلها متعلقه بكهرب السياره مثل النوافذ تقطع اثناء النزول او الصعود \دقمة السلف احترقت \كهربا السياره ترمش يعني الانوار تحس انها بتطفي وبعض المشاكل الصغيرة مثل احتراق الفيوز بشكل متكرر
نوع السياره كابرس 89
نوع الجهاز ناسيه بصراحه
بس انصحك لو انك ماتركب خاصية التشغيل يكون احسن للا سباب الي ذكرتها فوق
وبالتوفيق

[SLR55]

أهم شيء تخبرنا عن النتايج و كيف وضع السيارة بعد التركيب

وأهم ميزة عجبتني فيها إنك تفتح السيارة بدون مفتاح ^_^



وقولنا شو رايك في الجهاز فإذا عجبني ^_^ يمكن أخذ لي واحد


سلااااااااااام

[DDesigns]

ما يحتاج اقول نتائج ههه الجهاز مجرب من زمان اصلا صار له 3 سنوات في السوق ..

بقولكم رائي ان شاء الله قريب .

[غريب السيف]

هلا اخوي ..

نفس كلام الشباب عن التشغيل عن بعد يسبب مشاكل للسيارة بس مواصفات الجهاز
عجيبة ...

لكن انت ركبه بس لاتستخدم ميزة التشغيل عن بعد الا في اوقات الضرورة