سوالف للجميع - $$ سعودي بقلب اماراتي $$

View Full Version : $$ سعودي بقلب اماراتي $$

عشاق

06-10-2002, 09:31 PM

سعودي بقلب اماراتي

إماراتي شغل لي عقلي وبالي
فديته وأعشقه بكل حالاتي

خيال الزين أشوفه دوم عدّالي
ينور دنيتي وتخوز ليعاتي

أنا عمري هديته صاحبي الغالي
فداه الروح وكل اللي مضى وفاتي

شرات الحور يحلق في السما عالي
ملاك الروح أحبه حيل بسكاتي

جداه القلب تحدى كيد عذالي
أنا ذاته وهو احساسي وذاتي

أبد ما طيع فراقه ليته حذالي
وهو مايطيع فراقي دايم يحاتي

أنا له عاشق(ن) من أول وتالي
وعسب حبه شديت بكل رمساتي

وعسب قربه أذوق الويل مابالي
وأنا بحبه سعودي بقلب إماراتي

عشّاق

معاني المفردات :-

عدّالي = بقربي
تخوز = تنجلي أو تذهب بلا رجعه
ليعاتي = لوعاتي
شرات = مثل أو يشابه
جداه = نحوه او اليه
ماطيع = لا أوافق أو أرفض
حذالي = كلمة أخرى بمعنى بقربي (( عدّالي )) ولكنها قديمة جدا
رمساتي = كلماتي أو خواطري أو مشاعري
عسب = وهي تقسم الى كلمتين ((على )) و(( سبب )) والمعنى الضمني = من أجل أو علشان

http://qe9ayed.jeeran.com/saudi_emarati.wav

هديل الحمام

07-10-2002, 09:18 PM

قصيدة جميلة اخي عشاق :)

وحلوة فكرة معاني المفردات:D :D :D

عشاق

07-10-2002, 09:41 PM

مشكوره اختي على حضورك :)
وهناك من السعوديين من مناطق الغريبة فما فوق وام تحت (( اي الجنوب والشمال )) ممن هم لا يعرفون معاني كلماتي التي ادرجتها واحببت ان ازيا علامات التعجب التي قد تنرسم على محياهم :)

عذوبة

07-10-2002, 10:46 PM

تسلم الأخ عشاق على هذا الموضوع الطيب جدا......

اللي فرح قلوب الامارتيين كلهم و أولهم أنا........

تقبل تحياتي اخي عشاق...

عذوبه:)

عشاق

08-10-2002, 08:42 AM

أسعدني تعقيبك أختي وان شاء الله اكون دائما
وأبدا عند حسن الظن :)

كهرمانة العين

10-10-2002, 06:27 PM

السلام عليكم ورحمه الله وبركاته :

أخي عشاق ...... قصيدة رااااائعة ومشاعر طيبة ....

مع تحياتي:)

عشاق

10-10-2002, 07:47 PM

مشكوره اختي على تعقيبك وتسجيل حضورك الكريم :)

ابو الامير

10-10-2002, 08:17 PM

فعلا قصيده مميزه الى الامام

عشاق

10-10-2002, 08:46 PM

هذا من ذوقك اخوي الغالي :)

ARAE

10-10-2002, 09:56 PM

عجبتني ,, سعة ,, ثقافتك ,, وشعرك هذا الرائع ,, وانا ما أحب دائما أمدح احد في قصيده ,,,:)

لكن إنت أجبرتني على ذا الشي:)

بس ودي أسألك ,,

أنا عرفت إنك من ربع ,,

إذا جلسوا سلاطين ,, وإذا قاموا شياطين:rolleyes:

بس ,, سؤالي ,, من أي منطقه بالمملكه ,, الشرقيه ,,:)

وتحياتي

ولدأبوه

10-10-2002, 11:25 PM

قصيده عاديه
ماشفت فيها شي يستاهل كل هذا الاطراء

اجيبلك مثل هذا القصيده وعشره من امثالها في الجرايد والمجلات
وبعدين انت سعودي ولا اماراتي
قال سعودي بقلب اماراتي قال

ولدأبوه

10-10-2002, 11:27 PM

وراك وراك
وين ماسرت لاقيتك قدامي
ارسلي سر التوقيع حقك لليميل حقي
توقيع سري للغايه
كاع كاع كاع

ARAE

11-10-2002, 12:48 AM

رد مقتبس من ولدأبوه
وراك وراك
وين ماسرت لاقيتك قدامي
ارسلي سر التوقيع حقك لليميل حقي
توقيع سري للغايه
كاع كاع كاع

عسا ما شر أخوي ,, لكل واحد تفكيره ,, وإعجابه بالشي ولولا إختلاف الأذواق لا بارت السلع ,, والبضائع ,,

يعني انا أعجبتني القصيده مو شرط الله يسلمك تعجبك إنت القصيده ,, صح ولا لأه ,,

وبعدين إيش قصتك إنت والتوقيع ,,:confused: :confused:

عشاق

11-10-2002, 03:56 PM

صح ابدنك ما يهزك ريح 00
القافلة تمشي وال000000

تحياتي لك اخي الكريم ولا تلتفت لأي
مهاترات فأنت ارفع من ذلك بكثير :)

وأخوك من الجبيل يالغالي ;)