تجربه

[corvette 40th]

اليوم مريت على كم وكاله في منطقتي انا و واحد من الزملاء
و القيت نظره على كم سياره و جربت ايضا كم سياره.

احنا كنا بصراحه ناوين نقوم بمقارنه بين الهوندا و الهيونداي لان زميلي عنده بحث يتطلب منه ذلك
و لكن احنا عيبتنا السالفه و خطفنا على المعارض الي حولنا لين ما عيزنا.
انا بحاول ارفق صور لكل سياره اتكلم عنها للتوضيح

و السياره الاولى كانت Hyundai XG300
http://us.autos1.yimg.com/autos.yahoo.com/i/b/xg3002.jpg
المحرك:3.0L V6
القوه:192@6000
العزم:178@4000
السعر: 24500$

الصراحه هذي السياره فاقت توقعاتي
انا ما كنت اضن اني في يوم من الايام بروح و بتعنى عشان اجربها يعنى ضنيتها ما تستاهل
بصراحه سياره محترمه بمعنى الكلمه رحبه من الداخل و فخمه
و بالكاد تسمع صوت محركها جيرها ناعم في التبديل و فيها نظام التبترونك مع خمس غيار فيها شاشه كمبيوتر تقوم بوظائف عديده متفوقه بهذي الميز على كثير من منافساتها
ما انكر عليكم لاحظت فيها بعض العيوب
استخدام نوع رديء من البلاستك في الديكورات الداخليه
و الديكور الي هو مفروض يكون خشب كان بلاستك
ايضا لاحظت ان بريكها تعبان جدا يعنى ما تضمنه في اي وقت ممكن يخونك
و على كلام البائع السياره تفقد 68% من قيمتها بعد استخدام ثلاث سنوات يعني السياره الي جربناها كانت ب24500$
بعد ثلاث سنوات توقع انك تبيعها ب7800$ تقريبا
و هذا طبعا في السوق الامريكي

السياره الثانيه Honda Accord Sedan EX V6
http://us.autos1.yimg.com/autos.yahoo.com/i/b/accord3.jpg

المحرك:3.0L V6
القوه:200@5500
العزم:195@4700
السعر: 25500$

السياره مثل ما توقعتها و مثل ما هو معهود من هوندا
الجوده العاليه في مكونات السياره
السياره كانت بسيطه جدا في تفاصيلها بالرغم من انها كانت كامله المواصفات تجاوبها كان جيد و سريع و الجير كان ناعم
بس لاحظت فيها قساوه نظام التعليق على الاقل اذا قارنتها بالهيونداي و الشيء الثاني الى لاحظته هو صوت الشارع يوم تسرع ابها يعني عازليتها للصوت الخارجي ضعيفه.
السياره تفقد 49% من قيمتها بعد استخدام ثلاث سنوات يعني السياره الي جربناها كانت ب25500$
بعد ثلاث سنوات توقع انك تبيعها ب13000$ تقريبا

و اذا قارنا السياره بالكامري من ناحيه قطع الغيار
كان رد البائع بان اسعارها متقاربه بالنسبه للسيارتين لان معظم القطع تصنع في امريكا.
و بالنسبه للكامري, السياره تفقد 54% من قيمتها بعد استخدام يعني اذا كان سعر السياره ب26000$
بعد ثلاث سنوات توقع انك تبيعها ب12000$ تقريبا

للعلم عندنا شركه هوندا و هيونداي و تويوتا وكيلهن واحد
يعني اتوقع البائع كان محايد في معلوماته


هذا الكلام الي فوق حصل و كان بغرض البحث المطلوب
و لكن نحن طبعا عيبتنا السالفه و قلنا بنجرب سيارات ثانيه


السياره الثالثه كانت HONDA S2000
http://us.autos1.yimg.com/autos.yahoo.com/i/b/s20002.jpg

المحرك:2.0L I4
القوه:240@8300
العزم:153@7500
السعر: 32500$

السياره طبعا غنيه عن التعريف سياره رائعه و ذات جوده عاليه
انا بصراحه خفت اسوقها عشان ما اتلصق ابها
لان الظاهر ان البائع ما بيخلي يومي يعدي على خير اذا طلعت من المعرض من غير سياره بعد كل هذي الاسئله و التجارب
فاكتفيت بتجربه الجلوس فيها

السياره كانت بسيطه جدا من الداخل
ازرار قليله و عمليه و حتى المسجل داسينه
الكراسي تضمك عدل و مريحه تذكرني بالBMW Z3 و لكن اضيق بقليل

احلى و اهم شئ بالنسبه لي كان المقود و الجير
المقود صغير و يعطيق شعور بالثقه و الجير و ما احلى الجير
ما ادري كيف اوصفه (الى منكم يقدر يمر على وكاله هوندا و يجرب الجير بيعرف شو اقصد) رائع بمعنى الكلمه.

و بعد كل هذي التجارب ما شبعنا.
طمعنا اكثر و اكثر.

السياره الرابعه Mercedes-Benz C-Class C320
http://us.autos1.yimg.com/autos.yahoo.com/i/b/c-class2.jpg

المحرك: 3.2L V6
القوه:215@5700
العزم:221@3000
السعر: 43000$

سياره حلوه من الخارج و الداخل
كانت مزوده بمواصفات اضافيه (SPORT PACKAGE)
نظام تعليق قاسي و بعض المواصفات الى ما لحقت القطها
بصراحه السياره سريعه و قويه و تحس انها متماسكه في الطريق
بس لاحظت علو صوت محركها (اضن انها حركه مقصوده من الصانع)
الصوت كان حلو باختصار (صوت الماني)
السياره معقده من الداخل الكثير من الازرار يعني لازم تاخذلك وقت لين ما تتعود عليهن
نحن ما طولنا كثير في سواقه السياره للعلم ان البائع قال لنا خذوا راحتكم و لا تستعجلون و يوم بتملون ردوا.

طبعا نحن بغينا شئ اقوى و اقوى و نحن كنا اصلا لامحين سياره يوم دخلنا المعرض ما كنا نشل عيونا عنها.

السياره الخامسه Audi S4 Sport Sedan

http://us.autos1.yimg.com/autos.yahoo.com/i/b/auds44.jpg

المحرك: 2.7L V6 مع شاحن توربو ثنائي
القوه:250@5800
العزم:258@1850
السعر: 42000$

سياره متوحشه و قويه ,و الله ما تريد تنزل منها لانك ما بتشبع من سواقتها. قوتها متوفره في اي وقت في اي جير.
ما تخاف انها تخونك و تفتر; فيها نظام دفع رباعي دائم
مب بس يساعدها على الثبات في اللفات ,
يعطيها بعد قومه قويه و تبديل قوي (يكسر الظهر)
نحن بصراحه ما قصرنا ابها سقناها لين ما قرب المعرض يغلق
قلنا بنرحمها و بنردها.
لكن لا صاحبنا ما رام يتركها قال بشتريها او على الاقل بابدل معاهم على فكره هو شاري BMW X5 و ما كملت عنده 3 اسابيع و ما مشت 800 ميل
بس بعد ما شاف انه بيخسر فيها غير رايه.


هذا سرد تفصيلي على الى حصل معاي اليوم
و قلت ما بيمر اليوم الا اني اكتبه في المنتدى لعلي احرك المنتدئ بعد فتره الركود هذي.

فاسمحولي على الاطاله لاني طولت
و اعذروني على طريقه وصفي للسيارات
فهذا مبني على رايي الشخصي

و احب اعرف ارائكم الشخصيه بالنسبه للسيارات المذكوره
لاني اعرف انه بمجرد لفه صغيره ما تكشف لي مميزات و عيوب السياره.
و شكرا

[NFS]

مشكور يا كورفيت على هذي التجارب الجميلة "وبالجملة بعد:):)"


بالنسبة للـHyundai أنا أتفق معك مع حكاية الديكور الداخلي في أنه لو كان من الخشب الأصلي لأضاف رونقاً أجمل من الديكور الحالي "البلاستيكي" ولا أعتقد أن Hyundai ستخسر الشيء الكثير لو فعلت ذلك.
وأيضاً أعتبر سعر السيارة ممتاز مقارنة بالتجهيزات المتوفرة كالمقاعد الجلدية والناقل الـH-matic "كما تسميه Hyundai" ومرايات خانبية ذات تحكم كهربائي بالكامل ، لكن كما ذكرت سعر إعادة البيع هو أبرز عيوبها.

أما الهوندا أكورد والـS2000 أنا ما بتكلم عنهم لأني لو تكلم ما راح أسكت ، لكن أنا زعلان لأنك ما جربت الـS:(

المرسيدس حلوة ويكفي أسمها Mercedes-Benz

الأودي S4 وما أدراك ما الأودي S4!

لاحظ أقصى عزم للسيارة هو 35.7 كلغ*متر على سرعة 1850 RPM والعزم يبقى ثابت حتى عند سرعات عالية للمحرك وهو ما يوازي (250*5252÷5800)/7.22=31.35 كلغ*متر "عزم جبار" الله يعز التيربو

هذا السيارة هي الأقرب من ناحية الأداء للهوندا S2000 في التسارع من 0~100كلم/ساعة وقطع الربع ميل لكن الأودي تتفوق في السرعة القصوى!

على فكرة في أي ولاية كانت هذي التجارب؟؟؟

[corvette 40th]

مشكور على ردك على الموضوع يا NFS
لا تزعل انا بحاول اجرب ال S2000
بس حاليا افكر بعذر مقنع علشان ما اشتري السياره
بعد ما اجربها انت تدري سياره مثل هذي عيوبها قليله
يعني ما تقدر تنزل منها و بكل بساطه تقول و الله السياره ما عجبتني
و في احتمال اني اروح و اجرب ال سوبارو WRX لانها بعد موجوده عند نفس الوكيل

و ردا على سؤالك الاخير قمت بهذي التجارب في ولايه انديانا

[مجنون سيارات]

اتمنالك التوفيق في مواضيعك الجميله والشيقه وأتمنى منك المزيد بأذن الله وبغيت منك مقارنه بين هونداي سوناتا وكيا كلارس من ناحية سرعت المحرك وقومتها وراحه في الخط والشكل الخارجي.
ومره ثانيه أتمنى لك التوفيق. وشكراً

[Ferrari^_^love]

لو انا منك جان جربت ال S2000 ... هالسياره ما أتجربها :):) .. الحين انت جربت كل هالسيارات الرائعه بقت ال S2000 ماجربتها .. يلى ماعليه ... بس الموضوع رائع ... يعطيك العافيه على الموضوع

نسيت اكمل ... انا اشجعك انه اتروح أتجرب السوبارو ايمبريزا WRX وقولنا شنو رايك فيها :)

تحياتي اخوي :):)

[كابريس]

:):):):):):):):):):):):):):):):):):):):):):):):):):):):):):)

[S55AMG]

أنا أتفق معاك و مع أخونا المشرف العزيز في تجربتك للهونداي
أما الهوندا أكورد سيارة جميلة من الداخل و الخارج و تزينها بسهولة و تصير رهيب و جبارة و معروفة سيارات الهوندا بهذا الشيء
و الهوندا ٍS2000 بإذن الله أشتريها لما أدخل الجامعة صراحة سيارة جبارة جبارة جبارة
أما المرسيدس و الأودي يكفي إنها ألماني

[Eclipse]

موضوع جميل

[E55]

ياااااااا حظكم :)

تجارب حلوة بصراحة

أما عندنا: السيارة قيمتها ***** ، بتشتري ولا لأ ؟

لو قلت له ممكن أجربها بيرد عليك

لأ ... إطلع برع :)

طبعاً مب كلهم :):)